¿Mi oy kʼusi laj yichʼ jelel o tupʼel li ta Vivliae?

Abal. Kʼalal ta jkoʼoltastik xchiʼuk li voʼneal Tsʼibetik xchiʼuk li Jvivliatik avie, muʼyuk-o bu jelem akʼo mi ta smilal xa noʼox jabil pasbil tal kopiar.

¿Mi jaʼ skʼan xal ti muʼyuk xchʼayik jsetʼuk li ta stsʼibaele?

Yichʼoj tael ta smilal xa noʼox voʼneal tsʼibetik li ta Vivliae, oy junantike chʼayik onoʼox ta stsʼibael, pe mu toj tsotsuk skʼoplal, yuʼun muʼyuk tsjel li kʼusi chakʼ ta chanele. Akʼo mi jech, oy onoʼox yichʼoj tael ti jelel kʼusi chakʼ ta aʼiele, yuʼun li ta voʼnee, yolbaj yileluk la sjelik yoʼ jeleluk kʼusi xakʼ ta aʼiel jech kʼuchaʼal ta orijinale. Jkʼeltik batel chaʼtosuk.

1. Junantik Vivliaetik ta voʼnee xi jelubtasbil li ta 1 Juan 5:7: «Yuʼun oy oxib rextico maʼ ti ta xalbeic scʼoplal ti oy ta vinajele: ti Dios Totile, ti Chʼul Nichʼonile, ti Chʼul Espiritue. Ti oxibic taje, jmoj ti scʼopique». Jaʼ yuʼun, li ta yantik Vivliaetike, muʼyuk te tikʼil jech kʼuchaʼal naka to laj kaltik li ta tekstoe. Ta tsʼakal to la stikʼik,a pe li Jvivliatik ti achʼ to laj yichʼ jelubtasele, muʼyuk te tikʼel ta skoj ti mu jechuk chal li ta orijinale.

2. Li ta voʼneal Tsʼibetike ta smilal xa onoʼox te chvinaj li sbi Diose, pe oy ep Vivliaetik ti jelbil ta «Kajvaltik» o «Diose».

¿Kʼuxi xuʼ jnaʼtik mi chʼabal yan kʼusi la sjelik kʼalal la spasik kopiare?

Avi ti oy xa epal Vivliaetik jelubtasbile, anil chkiltik ti bu mu jechuk jelubtasbile.b ¿Kʼusi laj yakʼik venta kʼalal la skoʼoltasik li Vivliaetike? ¿Mi xuʼ jpat koʼontontik ta stojolal li Jvivliatik oy kuʼuntik avi eke?

• Xi laj yal li pʼijil vinik William Henry Green ta sventa li Tsʼibetik ta Ebreo Kʼope (ojtikinbil kʼuchaʼal Mol Testamento): «Xuʼ xkaltik ti jaʼ noʼox stuk Vivlia ti tukʼ jelubtasbile».

• Xi laj yal li Frederick Bruce ti xchanojbe lek skʼoplal Vivlia ta sventa li Tsʼibetik ta Griego Kʼope o li Achʼ Testamentoe: «Li buchʼutik la stsʼibaik li achʼ Testamento ti lek ojtikinbilike mu xuʼ xkaltik ti muʼyuk lek tukʼ la sjelubtasike».

• Xi laj yal li Sir Frederic Kenyon ti xchanojbe lek skʼoplal li Tsʼibetik ta Vivliae: «Li jun krixchanoe xuʼ spat yoʼonton ta stojolal li Vivlia ti chʼabal kʼusi jelel jutebuke, yuʼun jaʼ Skʼop Dios. Akʼo mi voʼne xa tajek slikel talel li Jvivliatike, pe muʼyuk-o kʼusi jelem».

¿Kʼuxi xuʼ jnaʼtik ta melel ti mi tukʼ jelubtasbil li Vivliae?

• Li jtsʼibajom judaetik xchiʼuk li jtsʼibajometik kʼalal talem xa ox li Kristoe, jamal laj yalik li kʼusitik muʼyuk lek la spasik li yajtuneltak Dios ta voʼneec (Numeros 20:12; 2 Samuel 11:​2-4; Galatas 2:​11-​14). Jech xtok, la stsʼibaik komel ti muʼyuk la xchʼunik mantal li jteklum Judae xchiʼuk jamal laj yakʼik komel ta aʼyel junantik jecheʼ chanubtaseletik laj yal li krixchanoetike (Oseas 4:2; Malakias 2:​8, 9; Mateo 23:​8, 9; 1 Juan 5:​21). Li jtsʼibajometik ta voʼnee, tukʼ la stsʼibaik li Vivliae, yuʼun melel snaʼ xkʼopojik xchiʼuk jaʼ mas tsots skʼoplal laj yilik li Xchʼul Kʼop Diose.

• ¿Mi mu jechuk ti lek skʼeloj talel li Dios sventa lekuk xichʼ jelubtasel li Skʼope?d (Isaias 40:8; 1 Pedro 1:​24, 25). Maʼuk noʼox tun yuʼunik li krixchanoetik ta voʼne li Skʼop Diose, yuʼun ta jtabetik sbalil li avi eke (1 Korintios 10:11). Xi chal li Vivliae: «Skotol li kʼusitik laj yichʼ tsʼibael ta voʼnee laj yichʼ tsʼibael sventa jchanubtaseltik, sventa oyuk spatobil koʼontontik ta skoj ti chkuch kuʼuntik xchiʼuk ti tspat koʼontontik li Tsʼibetike» (Romanos 15:4).

• Li Jesus xchiʼuk yajtsʼaklomtake laj yalbeik skʼoplal li Tsʼibetik ta Ebreo Kʼope. Mu junuk velta la svul yoʼontonik ti mu jechuk tukʼ jelubtasbile (Lukas 4:​16-​21; Echos 17:​1-3).