Kʼupino sbatel osil li bendision chakʼ li Jpasvaneje

Li Diose laj yalbe ta jamal li j-alkʼop Abraan ti tstaik bendision skotol li «lumetik ta balumile», taje jaʼ koliyal li snitilulal Abraane (Jenesis 22:18). ¿Buchʼu jaʼ li snitilulal taje?

Li Jesuse akʼbat sjuʼel yuʼun Dios sventa spas skʼelobiltak juʼelal, taje jutuk xa mu chaʼmiluk jabil ti jech kʼot ta pasele. Yuʼun jaʼ chakʼ ta ilel ti chkʼot onoʼox ta pasel li kʼusi albat yuʼun Dios li Abraan ti chakʼbe bendision skotol li lumetik ta balumile, taje jaʼ laj yakʼ kʼotuk ta pasel li Jesus ti jaʼ snitilulal Abraane (Galatas 3:14).

Ta skoj ti la spas skʼelobiltak juʼelal li Jesuse, jaʼ koltaatik-o li krixchanoetik ta snaʼel ti jaʼ yaj-alkʼop Dios sventa xakʼbe bendision skotol li krixchanoetike. Li kʼusi la spase jaʼ te laj yakʼ ta ilel ti chtunesat yuʼun Dios ta mas jelavel sventa xakʼ tal bendision ta sbatel osil. Taje jaʼ te vinaj junantik li slekil talelaltak Jesuse, kalbetik batel skʼoplal.

Laj yakʼ ta ilel slekil yoʼonton xchiʼuk la xpoxta jchameletik.

Jun veltae, kʼanbat vokol yuʼun jun vinik ti ip ta leprae, albat ti mi tskʼane xuʼ xpoxtaat. Li Jesuse la spik li vinike xchiʼuk xi laj yalbee: «¡Ta jkʼan!». Vaʼun, ta ora noʼox sakchʼay li leprae (Markos 1:40-42).

Laj yakʼ li kʼusitik oy yuʼune xchiʼuk laj yakʼbe sveʼel li buchʼu chviʼnajike.

Li Jesuse mu skʼan ti xilik viʼnal li krixchanoetike. Ta skʼelobil juʼelal laj yepajes junchibuk pan xchiʼuk jaykotuk choy sventa smakʼlintas epal mil krixchanoetik, taje mu junuk noʼox velta jech la spas (Mateo 14:17-21; 15:32-38). Lek noj kom skotolik xchiʼuk komelaj to epal veʼlil.

Laj yakʼ ta ilel xkʼuxul yoʼonton xchiʼuk la xchaʼkuxes animaetik.

Kʼalal laj yil ti cham li jun noʼox yol jun ants ti chamem smalale xchiʼuk ti muʼyuk buchʼu xkʼelate, li Jesuse «kʼuxubaj ta yoʼonton», la xchaʼkuxesbe li skereme (Lukas 7:12-15).