Tojobkutik batel mas li ta cholmantale: Lek xatunes li sjakʼobiltake

¿KʼU YUʼUN TSOTS SKʼOPLAL? Yuʼun li snopben jun krixchanoe xkoʼolaj ta jun natil voʼ, sventa jnaʼtik li kʼusi te oy ta yut snopbene jaʼ chtun kuʼuntik li sjakʼobiltake (Pr 20:5). Mi lek ta jnoptik li kʼusi ta jakʼtike chloʼilaj me kuʼuntik li buchʼu ta jchiʼintik ta loʼile. Maʼuk noʼox taje, yuʼun oy kʼusitik tsotsik skʼoplal ta xkaʼibetik smelolal. Li Jesuse toj lek ti kʼu yelan la stunes li sjakʼobiltake. ¿Kʼusi xuʼ jpastik sventa jchantik ti kʼuxi la spase?

¿KʼUXI TA PASEL?

• Oyuk kʼusi xajakʼbe sventa xal li kʼusi tsnope. Li Jesuse oy kʼusitik la sjakʼ sventa snaʼ li kʼusi tsnop li yajchankʼoptake (Mt 16:13-16; be paj. 238 par. 3-5). ¿Kʼusi xuʼ xajakʼ sventa xanaʼ li kʼusi tsnop jun krixchanoe?

• Oyuk kʼusi xajakʼ sventa chkoltavan ta stakʼel. Sventa xtukʼibtasbat li kʼusi tsnop Pedroe, li Jesuse oy kʼusitik la sjakʼbe ti jaʼ koltaat-o sventa lekuk li kʼusi tstakʼe (Mt 17:24-26). ¿Kʼusitik xuʼ xajakʼ sventa lek xbat ta takʼel yuʼun li jun krixchanoe?

• Kʼupil kʼoptao mi la stakʼe. Li Jesuse la skʼupil kʼopta li jun jtsʼibajom kʼalal laj yakʼ venta «ti lek xtojob» ta stakʼele (Mr 12:34). ¿Kʼusi xuʼ xavalbe li jun krixchano mi la stakʼ li kʼusi la ajakʼbee?

MI LAJ XA OX AKʼELIK LI SBAVOKʼAL VIDEO JTSʼAKLITIK-O BATEL KRISTO LI TA ABTELAL LA SLIKESE: CHANUBTASVANAN, VAʼUN TAKʼIK LI SJAKʼOBILTAK LIʼE:

• Akʼo mi jaʼ jech li kʼusi la xchapbe smelolal li jchanubtasvaneje, ¿kʼu yuʼun muʼyuk lek ti kʼu yelan chchanubtasvane?

• ¿Kʼu yuʼun muʼyuk lek ti jaʼ noʼox ta jchapbetik smelolale?

KʼELIK LI XCHAʼVOKʼAL VIDEOE, VAʼUN TAKʼIK LI SJAKʼOBILTAK LIʼE:

• ¿Kʼu yuʼun xuʼ xkaltik ti lek la stunes sjakʼobiltak li ermanoe?

• ¿Kʼusitik to yan xuʼ jchantik ti kʼu yelan chanubtasvan li ermanoe?