LI JKUXLEJALTIKE
Sventa jpastik ta yajtsʼaklom Kristo li krixchanoetike, toj tsots skʼoplal ti jcholbetik mantale xchiʼuk ti jchanubtastike
Li Jesuse laj yalbe yajtsʼaklomtak ti akʼo spasik ta yajtsʼaklom Kristo li krixchanoetike (Mt 28:19). Pe sventa jchʼuntik taje, skʼan jcholtik mantal xchiʼuk xijchanubtasvan. Jaʼ yuʼun xi jakʼbe jbatike: «¿Kʼuxi xuʼ jlekubtas batel ti kʼu yelan ta jpas ta yajtsʼaklomtak Kristo li krixchanoetike?».
LI CHOLMANTALE
Sventa mu teuk noʼox jmalatik ti jaʼ baʼyel xtal skʼoponutik li krixchanoetike, jaʼ lek ti voʼotikuk baʼyel jkʼopontike xchiʼuk jsaʼtik li buchʼutik staik-oe (Mt 10:11). Kʼalal ta jcholtik mantale, ¿mi ta jcholbetik mantal li krixchanoetik kʼalal ta jnuptik ta be «skotol kʼakʼale»? (Ech 17:17). Li Lidiae kʼot ta yajtsʼaklom Kristo ta skoj ti ta sjunul yoʼonton cholbat mantal yuʼun li jtakbol Pabloe (Ech 16:13-15).
«Ovolajan noʼox ta sob xchiʼuc ta mal cʼacʼal» (Ec 11:6).
MI LAJ AKʼELIK LI VIDEO «MU ME XKIKTA JBATIK» TA YALBEL SKʼOPLAL LI LEKIL AʼYEJETIKE: CHOLMANTAL TA BUYUK NOʼOX XCHIʼUK CHOLMANTAL TA NAETIK, TAKʼIK LI SJAKʼOBILTAK LIʼE:
¿Kʼuxi laj yakʼ ta ilel Samuel ti laj yakʼ persa ta stsʼunel li sbekʼ tsʼunobil ta mantale?
¿Kʼu yuʼun skʼan xkakʼtik persa sventa xijkoltavan li ta jeltos kʼu yelan ta jcholtik mantale?
¿Buchʼutik xuʼ jcholbe mantal kʼalal oy kʼusitik ta jpas jujun kʼakʼale?
LI CHANUBTASELE
Sventa xkʼotik ta yajtsʼaklomtak Kristo li krixchanoetike, mu baluk noʼox ti jpuktik li vunetike, yuʼun skʼan sut jkʼeltik xchiʼuk jchanubtastik ta Vivlia (1Ko 3:6-9). Pe ¿kʼusi skʼan jpastik mi mu noʼox xchʼiik ta mantal chkiltik li buchʼutik chkakʼbetik estudioe? (Mt 13:19-22). Skʼan jsaʼtik-o batel li buchʼu oy ta yoʼonton ta melel li mantale (Mt 13:23; Ech 13:48).
«Voʼon la jtsʼun, Apolos laj yatʼes, pe jaʼ laj yakʼ chʼiuk batel li Diose» (1Ko 3:6).
MI LAJ AKʼELIK LI VIDEO «MU ME XKIKTA JBATIK» TA YALBEL SKʼOPLAL LI LEKIL AʼYEJETIKE: CHOLMANTAL TA BUYUK NOʼOX XCHIʼUK GRUPO XCHIʼUK JPASTIK TA YAJTSʼAKLOM KRISTO LI KRIXCHANOETIKE, TAKʼIK LI SJAKʼOBILTAK LIʼE:
¿Kʼuxi laj yatʼesik sbekʼ mantal li Solomon xchiʼuk Mary ti la stsʼunbeik ta yoʼonton li Ezequiel xchiʼuk Abigaile?
¿Kʼusi ta jkʼantik xkʼot ta pasel kʼalal chijkoltavan ta jeltos cholmantale xchiʼuk kʼalal ta jcholtik mantal ta karitoe?
¿Kʼusi skʼan jpastik bakʼintik yoʼ jaʼuk mas tsots skʼoplal xkiltik ti xkakʼtik ta chanel li kʼusi melele?