Li Jeovae skʼanoj li buchʼutik sakike

Epal totil meʼiletike ta xchanubtas li yalab xnichʼnabik ta spokel li skʼobike, ti xchʼuba li skuartoike, ti smesik li nae xchiʼuk ti slokʼesik li kʼaepe, taje jaʼ ta skoj ti tskʼanik ti akʼo lekuk sakikuke. Pe akʼo mi jech, li buchʼu tskʼan ti sakukotike jaʼ li Jdiostike, yuʼun li stuke toj chʼul (Éx 30:18-20; Dt 23:14; 2Ko 7:1). Kʼalal lek noʼox sakutike xchiʼuk ti lek sak li kʼusitik x-ayan kuʼuntike, jaʼ me jech chkichʼtik ta mukʼ li Jeovae (1Pe 1:14-16). ¿Kʼu yelan li jnatike xchiʼuk li spat xokone? Oy jlom krixchanoetike ta sten skʼaepik ta karetera, ta parke, pe jaʼuk li yajtsʼaklomutik Kristoe ta xkakʼtik persa ti mu xkikʼubtastik li jbalumiltike (Sl 115:16; Ap 11:18). Kʼalal ta jkʼeltik ti bu ta xkakʼtik li xpix jdulsetik, li yav kʼusi ta xkuchʼtike, li jchikletik o yan kʼusitike jaʼ te chkakʼtik ta ilel mi ta jkʼantik ti lekuk sak li kʼusitik x-ayan kuʼuntike. Ta jkʼan ti jechuk jtalelaltik kʼuchaʼal yajtuneltak Dios ta skotol li kʼusi ta jpastike (2Ko 6:3, 4).

MI LA AKʼELIK LI VIDEO TSKʼANUTIK DIOS MI SAKUTIKE, TAKʼIK LI SJAKʼOBILTAK LIʼE:

• ¿Kʼusi tspak-o skʼoplalik junantik krixchanoetik sventa xalik ti mu persauk sakuk li kʼusitik oy yuʼunike?

• ¿Kʼuxi xuʼ skoltautik li mantaletik akʼbat Moises yoʼ jnaʼtik kʼu yelan chil Jeova ti sakuk li kʼusitik oy kuʼuntike?

• ¿Kʼuxi xuʼ xkichʼtik ta mukʼ Jeova ti mu persauk kʼusi xkaltike?