Kʼalal ta jtsaktik ta venta li tukʼibtasel chakʼ Jeovae, chkakʼtik ta ilel kʼanelal

Kʼalal oy buchʼu chichʼ lokʼesel ta mantale, jaʼ sventa chichʼ chabiel li tsobobbaile xchiʼuk jaʼ sventa xichʼ tukʼibtasel li buchʼutik mu sutes yoʼontonike (1Ko 5:6, 11). Kʼalal ta jtsaktik ta venta li tukʼibtasel chakʼ Jeovae, chkakʼtik ta ilel kʼanelal. Pe ¿kʼuxi xa noʼox ti jaʼ yakʼel ta ilel kʼanelal ti chakʼbe tajek svul yoʼonton li yutsʼ yalale xchiʼuk li komite sventa jchapanvaneje?

Ta baʼyuke, chkakʼtik ta ilel kʼanelal xchiʼuk ta jtsaktik ta venta ti lekuk xkom skʼoplal li Jeovae xchiʼuk li mantaletik yakʼoj ta sventa li talelalile (1Pe 1:14-16). Jech xtok, chkakʼbetik iluk kʼanelal li buchʼu laj yichʼ lokʼesel ta mantale. Akʼo mi kʼux tajek kʼalaluk chkichʼtik tukʼibtasele, ta me xakʼbutik «jun oʼontonal xchiʼuk tukʼilal» (Ebr 12:5, 6, 11). Mi ta jchiʼintik-o li buchʼu laj yichʼ lokʼesel ta mantal o ti yiktaoj li mantale, muʼyuk me chkakʼtik ti akʼo xakʼbe mantal Jeova li krixchano taje. Teuk me ta joltik, li Jeovae chtukʼibtasvan ti bu kʼalal jtatik-oe (Jer 30:11). Yoʼ to ta jmalatik ti sut talel ta stojolal li jkʼuxubinvanej Totil kuʼuntike, kakʼ jbatik ta stojolal li Jeovae xchiʼuk jechuk-o jpastik batel li kabteltik ta mantale (Is 1:16-18; 55:7).

MI LA AKʼELIK LI VIDEO TUKʼUK KOʼONTONTIK TA STOJOLAL LI JEOVAE, TAKʼIK LI SJAKʼOBILTAK LIʼE:

• 

  ¿Kʼu yelan chaʼi sbaik li totil meʼiletik kʼalal chiktaik mantal junuk skerem o tsebike?

• 

  ¿Kʼuxi xuʼ skoltaik utsʼ alalil li tsobobbaile?

• 

  ¿Kʼusi loʼilal ta Vivlia chakʼ ta ilel ti jaʼ mas tsots skʼoplal ti tukʼ koʼontontik ta stojolal li Jeovae ti jaʼ muʼyuk ta stojolal li kutsʼ kalaltike?

• 

  ¿Kʼuxi chkakʼtik ta ilel ti jaʼ mas tukʼ chkakʼ jbatik ta stojolal li Jeovae ti jaʼ muʼyuk ta stojolal li kutsʼ kalaltike?