Kakʼtik ta ilel ti jkʼanoj jbatik li ta kutsʼ kalaltike

Kʼalal skʼanoj sbaik li jun utsʼ alalile, jmoj noʼox tsobol oyik xchiʼuk mu vokoluk chaʼiik sventa skolta sbaik. ¿Kʼuxi xuʼ xakʼ ta ilel ti skʼanoj yutsʼ yalal li malalil, li ajnilal xchiʼuk li totil meʼiletike?

Li jun malalil ti snaʼ xkʼanvane tstsak ta venta li kʼusi chtun yuʼun yajnile, li kʼusi tsnope xchiʼuk ti kʼu yelan chaʼi sbae (Ef 5:28, 29). Tskʼel ti oyuk skʼuʼ spokʼ li yutsʼ yalale, ti oyuk sveʼele xchiʼuk ti lekuk oyik ta mantale, jaʼ yuʼun chchapan li yichʼel ta mukʼ Jeova ta yutsʼ yalale (1Ti 5:8). Li jun lekil ajnilale chchʼunbe smantal li smalale xchiʼuk chakʼ ta ilel ti yichʼoj lek ta mukʼe (Ef 5:22, 33; 1Pe 3:1-6). Jech xtok, skʼan xakʼbe sbaik perton (Ef 4:32). Li lekil totil meʼiletike chchabiik skotol li yalab xnichʼnabike xchiʼuk chchanubtasik sventa skʼanik li Jeovae (Dt 6:6, 7; Ef 6:4). ¿Kʼusitik vokolil xuʼ snuptanik ta eskuela? ¿Kʼuxi xuʼ stsal yuʼunik li sujel ch-akʼbat xchiʼilik ta chanune? Mi skʼanoj sbaik li jun utsʼ alalile, jun noʼox me yoʼonton skotolik.

MI LA AK’ELIK LI VIDEO KAKʼTIK TA ILEL TA KUTSʼ KALALTIK LI KʼANELAL TI MU XLAJ-O SKʼOPLALE, TAK’IK LI SJAK’OBILTAK LI’E:

• 

  ¿Kʼu yelan chchabi yajnil li jun malalil ti snaʼ xkʼanvane?

• 

  ¿Kʼuxi chakʼ ta ilel ti yichʼoj lek ta mukʼ smalal li jun lekil ajnilale?

• 

  ¿Kʼuxi xuʼ xchanubtasik lek ta mantal yalab xnichʼnabik li totil meʼiletike?