LI JKUXLEJALTIKE

Jaʼ xa jtunestik ta cholmantal li Kʼupino akuxlejale

¡Xijmuyubaj tajek ti oy xa jlik achʼ livro xchiʼuk achʼ foyeto ti xuʼ xkakʼtik-o estudioe! Ta jkʼanbetik Jeova ti akʼo skoltautik yoʼ spas kuʼuntik ta yajchankʼop Kristo li krixchanoetike (Mt 28:18-20; 1Ko 3:6-9). ¿Kʼuxi xuʼ jtunestik li achʼ vunetik taje?

Ti kʼu yelan pasbil li achʼ vunetike chjel ti kʼu yelan chijchanubtasvane. Jaʼ yuʼun, kʼalal chachapan aba o kʼalal yakal xa ox chavakʼ estudioe, tsako ta venta liʼe:a

Chano lek baʼyel xchiʼuk nopbo skʼoplal li sjakʼobiltake.
Saʼo li tekstoetik skʼan kʼelele xchiʼuk koltao li avaj-estudio sventa xaʼibe smelolal kʼusi chchanubtasat li tekstoetike.
Akʼo ta ilel li videoetike xchiʼuk jakʼbo avaj-estudio li sjakʼobiltak te taleme.
Kʼalal chavakʼ estudioe, akʼo persa ti xachanik sjunul xchanobile.

Kʼalal chachol mantale, jaʼ baʼyel xavakʼ li foyeto sventa xakʼel mi oy ta yoʼonton mantal li krixchanoe (kʼelo li rekuadro «Kʼuxi xuʼ xkakʼtik li foyeto Kʼupino akuxlejal kʼalal ta jchiʼintik ta loʼil ta sba velta li krixchanoe» ti te chvinaj li ta pajina 16). Mi tskʼan chchan-o batel li avaj-estudio kʼalal mi tsuts xa ox xchanel avuʼunik li foyetoe, akʼbo li livroe. Vaʼun, te xalikesik xchanel ta xchanobil 4. Mi oy xa buchʼu yakal chavakʼbe estudioe, xuʼ xa jaʼ xatunes li livro Kʼupino akuxlejal. Voʼot chanop bu chlik achanik.

Li nupultsʼakal taje chakʼbeik estudio ta sna li kerem ti jaʼ tstunesik li foyeto Kʼupino akuxlejal.

MI LA AKʼELIK LI VIDEO LEK TI CHLIK ACHAN LI VIVLIAE, TAKʼIK LI SJAKʼOBILTAK LIʼE:

¿Kʼusi chchanik ta achʼ livro li estudianteetike?
Li buchʼutik jaʼ to chlik yichʼik estudioe, ¿kʼu yuʼun skʼan xichʼik akʼbel ta ilel li video liʼe?
¿Kʼusitik xuʼ jtijbetik yoʼonton ti akʼo spas batel li estudiantee? (Kʼelo li rekuadro «Li kʼusi chichʼ albel skʼoplal xchiʼuk li kʼusi chichʼ pasel ta jujuvokʼe» ti te chvinaj li ta pajina 16).

a TSʼIB TA YOK VUN: Ti bu chal: «Xuʼ to xakʼel liʼe» te chanop mi chakʼelik o mi muʼyuk kʼalal jaʼo chavakʼ estudioe, pe skʼan me xachan skotol kʼalal chachapan abae. Vaʼun, jaʼ jech chavakʼ venta li kʼusi xuʼ skʼupine xchiʼuk li kʼusi xuʼ stabe sbalile. Mi ta selular o ta tavleta ta jkʼeltike, xuʼ sjambutik li videoetik xchiʼuk li yan mantaletik mi jaʼ noʼox la jnetʼtike.

LI KʼUSI CHICHʼ ALBEL SKʼOPLAL XCHIʼUK LI KʼUSI CHICHʼ PASEL TA JUJUVOKʼE
	XCHANOBILTAK	LI KʼUSI TA JCHANTIKE	LI KʼUSITIK XUʼ SPAS LI ESTUDIANTEE
1	01-12	Kʼelo avil kʼuxi xuʼ skoltaot li Vivliae xchiʼuk kʼuxi xuʼ xavojtikin li buchʼu laj yakʼ ta tsʼibaele.	Tijbo yoʼonton avaj-estudio sventa xchan Svivlia, ti xchapan sba kʼalal skʼan toʼox xichʼ s-estudioe xchiʼuk ti xbat ta tsobajeletike.
2	13-33	Kʼelo avil kʼusi spasoj ta jtojolaltik li Diose xchiʼuk ti kʼu yelan tskʼan chkichʼtik ta mukʼe.	Tijbo yoʼonton avaj-estudio sventa xcholbe mantal li yantike xchiʼuk ti x-och ta jcholmantale.
3	34-47	Kʼelo avil kʼusi tskʼan Dios ti akʼo spas li yajtuneltake.	Tijbo yoʼonton avaj-estudio sventa xakʼbe xkuxlejal Jeova xchiʼuk ti xichʼ voʼe.
4	48-60	Kʼelo avil kʼuxi xuʼ jechuk-o xakʼan li Diose.	Chanubtaso avaj-estudio yoʼ xtojob stʼujel li kʼusi lek xchiʼuk li kʼusi chopole xchiʼuk ti jechuk-o xchʼi batel ta mantale.