Jkʼeltik kʼuxi xuʼ jkolta jbatik kʼalal ch˗echʼ nikel, nojelal ta voʼ o yan kʼusitike

Buyuk xa noʼox chkaʼitik ti oy nikel, nojelal ta voʼ o yan kʼusitike. Kʼalal jech chkʼot ta pasele, li ermanoetik ti jaʼ oy ta sbaik chkoltavanike skʼan noʼox me lek chapalik. Jaʼ yuʼun, li Jtsop Jbeiltasvaneje yaloj mantal ti ta jujun Betele skʼan oyuk li Departamento ti Tskolta ermanoetik ti Chil svokolike.

Li ermanoetik ti chkoltavanike ta anil tskʼoponik batel li moletik kʼalal chaʼiik mi oy bu echʼ nikel, nojelal ta voʼ o yan kʼusitike. Taje jaʼ sventa snaʼik kʼusi chtun yuʼun li jcholmantaletik ti bu chil svokolike. Mi toj tsots laj yil svokolike, li Betele jaʼ tstʼuj jayvoʼuk ermanoetik ti jaʼ tsbeiltasik li buchʼutik chkoltavanike. Li ermanoetik ti laj yichʼik tʼujele jaʼ chalik li kʼusitik chtun yuʼun li ermanoetike xchiʼuk jaʼ chalik mi tskʼanik ti oyuk buchʼu xkoltaatike o moʼoje jaʼ chbat tsmanik li kʼusitik chtune xchiʼuk chbat spukbeik li ermanoetik ti laj yil svokolike.

Mas lek ti jechuk xichʼ pasele. Taje jaʼ sventa mu epuk xichʼ abtel, mu jecheʼuk xlaj takʼin o yan kʼusitik, yuʼun bakʼintike jaʼ jech chkʼot ta pasel kʼalal te noʼox tskʼel stukik kʼusi tspasik li ermanoetike.

Li ermanoetik ti laj yichʼik tʼujel yuʼun Betele jaʼ chalik kʼu yepal takʼin chtun xchiʼuk jayvoʼ ermanoetik chkoltavanik. Jech xtok, mi persa chilike jaʼ chchiʼinik ta loʼil li j˗abteletike, yuʼun bateltike chkoltavanik sventa mas kʼun xaʼiik spasel yabtelik li ermanoetike. Jaʼ yuʼun, avokolikuk, mu me kʼusi xapas ta amantal atukik mi muʼyuk kʼusi laj avichʼik albele, mu xatsobik takʼin, mu xatakik bal veʼliletik mi jaʼuk xabatik ti bu chil svokolike.

Melel onoʼox ti jkʼanojtik tajek li kermanotaktike, jaʼ yuʼun muʼyuk te jmeyoj jkʼobtik chijkom kʼalal tsnuptan svokolike (Ebr 13:16). Vaʼun chaʼa, ¿kʼusi xuʼ jpastik? Li kʼusi mas tsots skʼoplale jaʼ ti jpastik orasion ta stojolal li buchʼutik laj yil svokolike xchiʼuk ta stojolal li buchʼutik chkoltavanike. Xuʼ xkakʼtik matanal takʼin xtok ta sventa li abtelal ta spʼejel balumile. Li Beteletike beiltasbilik yuʼun li Jtsop Jbeiltasvaneje, jaʼ snaʼojik lek kʼuxi tstunesik li takʼine xchiʼuk butik chtun. Pe mi ta jkʼan chbat koltavankutike, xuʼ jnojestik li Solicitud de voluntario local de diseño y construcción (DC-50).

MI LA AKʼELIK LI VIDEO NOJIK TA VOʼ TA BRASIL, TAKʼIK LI SJAKʼOBIL LIʼE:

¿Kʼusi kʼupil sba avil ti kʼu yelan koltavanik li stestigotak Jeova kʼalal echʼ nojelal ta voʼ ta Brasile?