Chichʼik koltael li buchʼutik chil svokolik ta nojelal ta voʼ, ta nikel, ta chamel xchiʼuk yan kʼusitik

Li ta 2020 ep kʼusitik kʼot ta pasel. Echʼ nikel, nojelal ta voʼ, lik li coronavirus xchiʼuk yan kʼusitik. ¿Kʼusi la spas li stestigotak Jeova sventa skoltaik li buchʼutik laj yil svokolike?

Li ta septiembre ta 2019 kʼalal ta agosto ta 2020, li Komite yuʼun Kordinadoretik ta Jtsop Jbeiltasvaneje laj yakʼ permiso sventa xichʼ tunesel 28 miyon dólar sventa xichʼ koltael li ermanoetik ti laj yil svokolike. Li takʼin liʼe laj yichʼ tunesel ta mas ta 200 jeltos vokolil. Taje te tsakal skʼoplal li coronavirus, urakanetik, nojelal ta voʼ ta África, laj yichʼ tunesel kʼalal laj veʼlil ta Venezuela xchiʼuk li ta Zimbabue ti laj yil svokolik ta skoj ti muʼyuk chakʼ voʼe. Li matanal takʼine laj yichʼ tunesel sventa xichʼ manbel sveʼelik, yaʼalik, sventa xichʼ sabel svayebik, sventa xichʼ manbel skʼuʼ spokʼik xchiʼuk xpoxtaobilik. Jech xtok, jaʼ laj yichʼ manel-o li kʼusitik mas jtunelik sventa xichʼ chʼubael li naetike xchiʼuk ti xichʼ chaʼmeltsanel li naetik ti lajemik kome. Jkʼeltik echʼel jaytosuk ti kʼu yelan laj yichʼik koltael li buchʼutik laj yil svokolike.

Coronavirus. Ta skoj li coronaviruse, ta spʼejel li balumile yiloj svokol li ermanoetike. Junantike ipajemik, chat yoʼontonik xchiʼuk yiloj svokolik ta takʼin. Ta skoj taje, laj yichʼ vaʼanel mas ta 800 komite ti tskolta ermanoetik ti chil svokolike. Li komiteetike tey sat ta stojolal li ermanoetike. Mi laj yakʼik venta ti oy kʼusi chtun yuʼunike, jaʼ chalbeik batel li Komite yuʼun Kordinadoretik sventa xkoltavanik tale.

Ta sjunul jabil li komiteetike koltavanik ta yakʼel veʼlil, li kʼusitik chtun sventa sakukutike xchiʼuk li poxiletik ti mas jtunelike. Ta junantik lumetik xtoke la sbeiltasik moletik ta tsobobbail yoʼ staik koltael li ermanoetik ti jaʼ chakʼ li ajvalile.

Li buchʼutik maʼuk stestigotak Jeovae yakʼojik venta kʼusitik ta jpastik sventa xijkoltavan kʼalal oy vokolile. Taje jaʼ jech kʼot ta stojolal li Field Simwinga ti jaʼ bankilal yuʼun polisia ta Nakonde, Zambia. Xi laj yalbe li ermanoetike: «Mu xa noʼox xlaj jtojbotkutik ta vokol ti ta yorail noʼox la akoltaik li buchʼutik laj yil svokolike».

Laj veʼlil ta Angola. Ta skoj li coronavurise, jutukaj veʼlil li ta Angolae. Jaʼ yuʼun, toyanuk tajek stojol li kʼusitike. Vaʼun li ermanoetike mas xa vokol tsta sveʼelik jujun kʼakʼal.

Jaʼ yuʼun, li Betel ta Brasile laj yichʼ albel ti akʼo stak batel epal pakete veʼlil sventa li ermanoetik ta Angolae. Sventa lekuk xichʼ tunesel li matanal takʼine, li ermanoetik la skʼelik kʼuxi xuʼ smanik xchiʼuk kʼuxi xuʼ stakik batel li veʼlil sventa masuk yalel xlokʼe. Jaʼ yuʼun, kʼot ta nopel yuʼunik ti mas yalel chlokʼ mi ta mayoreo la smanike. Sventa yichʼ manel xchiʼuk takel batel jujun pakete veʼlile, lokʼ ta 22 dólar. Li jujun paketee 20 kilo yalal xchiʼuk yichʼoj tal aros, chenekʼ xchiʼuk aseite. Laj xa yichʼ takel batel 33,544 pakete veʼliletik. Ti kʼu yepal yalal ta skotole jaʼ 654 tonelada. Ti kʼu yepal laj yichʼ takel batel li veʼlile xchiʼuk li veʼlil laj yichʼ lokʼesel ta Angolae laj yichʼ-o makʼlinel mas ta 50 mil krixchanoetik.

¿Kʼu yelan laj yaʼi sbaik li ermanoetik ti laj yichʼik koltaele? Li Alexandre ti te nakal ta namal paraje ta Angolae xi chale: «Jamal xkil ti skʼanojun li Jeovae, ti mu jtukuke xchiʼuk ep jbalil chilikun li steklumal Jeovae». Xi chal li Mariza ti stuk tstsʼites yalabe: «Laj yaʼi j-orasion li Jeovae. Ta jtojbe tajek ta vokol li Jeova xchiʼuk s-organisasione».

Vokolil ta skoj ti muʼyuk chakʼ voʼ ta Zimbabuee. Li ta septiembre ta 2019 kʼalal ta agosto ta 2020, tsots tajek laj yil svokolik ta Zimbabue ta skoj ti muʼyuk laj yakʼ voʼe. Ta skoj taje, ta smiyonal noʼox krixchanoetike jutuk mu chamik ta viʼnal. Jech xtok, ta smilal li ermanoetik eke jutukaj li kʼusi stakʼ slajesike.

Laj yichʼ vaʼanel voʼob komite sventa xichʼbeik batel sveʼel li ermanoetike. Ta sienal noʼox jcholmantaletik koltavanik ta stikʼel li veʼliletike, ta smuyesel ta karo o jlome laj yakʼ ta chʼom skaroik.a Li ta septiembre ta 2019 kʼalal ta agosto ta 2020, laj 691,561 dólar sventa xichʼ makʼlinel mas ta 22,700 krixchanoetik.

Junantik ermanoetike laj xa ox sveʼelik kʼalal kʼot li koltaele. Li ermanoetike la stojbeik ta vokol Jeova, oy jlom xtoke lik skʼejintaik kansionetik sventa mantale.

Oy chaʼvoʼ ermanaetik ti chamem smalalike batik ta jun tsobajel li ta sparajeike, te ch-albatik ti ch-akʼbatik koltael yuʼun jun organisasion ti muʼyuk nitil ta politika ta alele. Pe lik yalbeik skʼoplal politika li ta tsobajele. Ta skoj taje, li ermanaetike kʼot ta nopel yuʼunik ti muʼyuk tskʼanik li koltaele. Kʼalal lokʼik batele, lik labanatikuk yuʼun skotolik xchiʼuk xi albatike: «¡Mu me jaʼuk to xtal akʼan aveʼelik ta tsʼakal un!». Pe kʼalal chib toʼox xemana yechʼele, kʼotik li ermanoetik ti chakʼik koltaele xchiʼuk laj yakʼbeik sveʼel li vaʼ ermanaetike. Mas baʼyel kʼot li ermanoetik kʼuchaʼal li organisasion ti chakʼ koltael ta alele.

Ti kʼu yelan koltavan li ermanoetik ta Zimbabuee lek kʼusi kʼot-o ta pasel. Kalbetik skʼoplal kʼusi kʼot ta stojolal Prisca ti te nakal ta jun bikʼit lume. Akʼo mi oy xa onoʼox svokol ta skoj ti muʼyuk chakʼ voʼe, chlokʼ ta cholmantal skotol mierkoles xchiʼuk viernes. Jech-o la spas akʼo mi jaʼo yorail chabtelan yosilik. Chlabanat yuʼun li jnaklejetike xchiʼuk xi ch-albate: «Ta skoj ti jaʼ batem ta avoʼonton cholmantale, chamil ta viʼnal li avutsʼ avalal maʼ leʼe». Kʼalal jech albat li Priscae, xi chalbe li krixchanoetike: «Li Jeovae muʼyuk bu chikta yajtuneltak kʼalal chil svokolike». Ta tsʼakal jutuke, kʼot akʼbatuk sveʼel yuʼun j-organisasiontik li Priscae. Junantik slakʼnatake labal sba laj yilik tajek xchiʼuk xi albate: «Muʼyuk bu yiktaojot-o li Diose, ta jkʼan ti xavalbunkutik skʼoplale». Li avie oy xa vukvoʼ slakʼnatak ti chaʼiik ch-echʼ tsobajeletik li ta radioe.

Ta skoj ti poʼot xa tajek xtal li lajebale, mas to ta xkil jvokoltik ta nojelal ta voʼ, ta nikel, ta chamel xchiʼuk yan kʼusitik (Mateo 24:3, 7). Ta jtojkutik tajek ta vokol li slekil avoʼontonike xchiʼuk ti jeltos chavakʼik tal matanal takʼin jech kʼuchaʼal chal li ta donate.jw.org. Li matanal takʼin chavakʼik tale jaʼ te ta xichʼ tunesel sventa xichʼ koltael li ermanoetik ti ta xil svokolike.