LI JKUXLEJALTIKE
Totil meʼiletik, chanubtasik ta sventa Jeova li avalab anichʼnabike
Jtos ti kʼuxi xuʼ xakolta avalab anichʼnabik sventa xpʼijubike jaʼ ti stabeik sbalil li tsobajeletike. K’alal chilik, chaʼiik mantaletik xchiʼuk li skomentario ermanoetike, chkoltaatik sventa xojtikin mas li Jeovae xchiʼuk ti xkʼot ta yamigoike (Dt 31:12, 13). Pe ¿kʼuxi xuʼ xakolta avalab anichʼnabik sventa stabeik sbalil li tsobajeletike?
Akʼo persa ti ta salonuk xabat li ta tsobajeletike (Sl 22:22).
Akʼo xchiʼin ta loʼil ermanoetik avalab anichʼnabik kʼalal skʼan toʼox xlik o kʼalal tsuts li tsobajeletike (Ebr 10:25).
Oyuk yuʼun avutsʼ avalal li vunetik chichʼ tunesel ta tsobajeletike, xuʼ syalesik ta selularik o ta stavletaik.
Koltao avalab anichʼnabik sventa ta skʼop stukik xakʼ li skomentarioike (Mt 21:15, 16).
Lekuk kʼusi xaval ta sventa li tsobajeletike xchiʼuk li kʼusi chichʼ chanel tee.
Akʼo skolta sbaik ta xchʼubael salon li avalab anichʼnabike xchiʼuk akʼo xchiʼinik ta loʼil li buchʼutik oy xa sjabilalike.
Yikʼaluk van chanopik ti vokol chavaʼiik skoltael avalab anichʼnabik sventa xnopajik ta stojolal Jeovae. Pe teuk ta ajolik ti mu atukikuke, yuʼun tskoltaoxuk li Jeovae (Is 40:29).
MI LA AKʼELIK LI VIDEO TOTIL MEʼILETIK, TA ME XAKʼ AVIPALIK LI JEOVAE, TAKʼIK LI SJAKʼOBILTAK LIʼE:
¿Kʼusi xa ox chkʼot ta stojolalik Miguel xchiʼuk Lidia ta skoj ti lubemik tajeke?
¿Kʼu yuʼun lek ti skʼanbe yipalik Jeova li totil meʼiletike?
¿Kʼusi la spasik Miguel xchiʼuk Lidia sventa xnopajik ta stojolal li Jeovae?