Jkoltatik noʼox me li buchʼu oy ta yoʼonton mantale

1. ¿Kʼusi tspasik junantik krixchanoetik kʼalal chaʼiik li lekil aʼyeje? (Echos 13:​47, 48; 16:​14, 15).

LI TA baʼyel sigloe, oy ep krixchanoetik la xchʼamik ta anil mantal kʼalal laj yichʼik albele (kʼelo Echos 13:​47, 48; 16:​14, 15). Jaʼ jech li avi eke, oy buchʼutik ta sjunul yoʼonton chchʼamik li lekil aʼyej kʼalal chaʼiik ta sba veltae. Oy junantik xtoke muʼyuk chkʼot ta anil ta yoʼontonik, pe chjel snopbenik ta tsʼakal xchiʼuk tskʼan xa chojtikinik li Diose. ¿Kʼusi skʼan jpastik mi la jtatik krixchanoetik ta cholmantal ti oy ta yoʼontonik mantale?

2. ¿Kʼu yuʼun chkaltik ti xkoʼolaj ta tsʼunolajel li cholmantale?

² Kalbetik junuk skʼelobil. Li cholmantale xkoʼolaj ta jun jtsʼunolajel ta osiltik. Kʼalal yakal tstsʼunolaj, tsmalta xchiʼuk chakʼinta li yan stsʼunobe, xuʼ van chakʼ venta ti lek xa o ti tokʼon xa sat li yan stsʼunobe, vaʼun chbat stul tal ta anil. Jaʼ noʼox jech ek, kʼalal ta jcholtik mantale, xkoʼolaj ti yakal chijtsʼunolaje. Yuʼun ta jtatik krixchanoetik ti oy ta yoʼontonik mantale, vaʼun ta jkoltatik ta anil sventa xkʼotik ta yajtsʼaklom Kristo. Pe oy ta jtatik xtok ti mu to skʼanike, vaʼun jech-o ta jcholbetik mantal sventa xojtikinik li Diose (Juan 4:​35, 36). Mi te noʼox jsatike, chkakʼtik venta li buchʼu oy ta yoʼonton mantale xchiʼuk li buchʼu muʼyuk toe, vaʼun ta jnaʼtik kʼuxi xuʼ jkoltatik. Li ta xchanobil liʼe, ta jkʼeltik batel kʼusi xuʼ jpastik kʼalal ta jchiʼintik ta loʼil ta sba velta li jun krixchano ti oy ta yoʼonton mantale. Jech xtok, ta jkʼeltik kʼuxi xuʼ jkoltatik sventa jechuk-o xchʼi ta mantale.

JKOLTATIK LI BUCHʼU OY TA YOʼONTON MANTALE

3. ¿Kʼusi xuʼ jpastik mi la jtatik jun krixchano ti oy ta yoʼonton mantale? (1 Korintios 9:26).

³ Mi yakal ta jcholtik mantal xchiʼuk ta jtatik junuk krixchano ti oy ta yoʼonton mantale, jkoltatik ta anil sventa stambe batel sbelel li kuxlejale. Jaʼ yuʼun, kʼalal ta jchiʼintik ta loʼil ta sba veltae, kalbetik noʼox me ti ta jkʼan chkakʼbetik chanubtasel ta Vivliae xchiʼuk ti akʼo xbat xchiʼinutik li ta tsobajeletike (kʼelo 1 Korintios 9:26).

4. ¿Mi oy krixchanoetik ti chchʼamik ta anil chanubtasel kʼalal ta jchiʼintik ta loʼil ta sba veltae? Alo junuk loʼil.

⁴ Albo ti chavakʼbe estudioe. Oy krixchanoetik ti chchʼamik ta anil chanubtasel ta Vivlia kʼalal ta jchiʼintik ta loʼil ta sba veltae. Jkʼeltik kʼusi kʼot ta pasel li ta Canadae. Kʼalal jaʼo chcholik mantal ta karrito ta jun juevese, te nopaj talel jun tseb xchiʼuk la stsak li foyeto Kʼupino akuxlejal. Li ermanae laj yalbe ti xuʼ xakʼbe-o chanubtasel li ta foyetoe. Li tsebe lek laj yaʼi, vaʼun laj yakʼbe komel snumero. Li vaʼ kʼakʼale, li tsebe la stakbe mensaje li ermana sventa sjakʼbe kʼusi ora ch-akʼbat li s-estudioe. Li ermanae laj yal ti xuʼ xakʼbe ta savado o domingoe. Pe li tsebe xi laj yale: «¿A ti xavakʼbun okʼom ne? Voʼone xokolun». Vaʼun, akʼbat s-estudio li ta yokʼomale xchiʼuk bat ta tsobajel li vaʼ xemanae. Pe maʼuk noʼox, yuʼun chʼi noʼox ta mantal.

5. ¿Kʼusi skʼan jpastik mi ta jkʼan ta jlikestik junuk estudioe? (Kʼelo xtok li lokʼoletike).

⁵ Mu skotolikuk onoʼox jech stalelalik kʼuchaʼal li tseb laj kalbetik skʼoplale. Sventa x-ayan ta yoʼonton mantal li jun krixchanoe, skʼan teuk ta joltik ti skʼan van baʼyuk jloʼiltabetik li kʼusi lek chaʼie. Mi lek kʼusi ta jnoptik ta stojolal li krixchanoetike xchiʼuk mi chkakʼtik ta ilel ti oyik ta koʼontontike, yikʼaluk van xlik noʼox xchʼamik chanubtasel ta Vivlia. ¿Kʼusi xuʼ xkalbetik jun krixchano mi ta jkʼan chkakʼbetik estudioe? Taje jaʼ jech laj yichʼ jakʼbel jayvoʼuk ermanoetik xchiʼuk ermanaetik ti xtojobik lek ta slikesel estudioe. Jkʼeltik kʼusi laj yalik.

6. ¿Kʼusi xuʼ xkalbetik jun krixchano sventa xbat jkʼeltik yan veltae?

⁶ ¿Kʼusi laj yalik li ermanoetik xchiʼuk prekursoretik ti laj yichʼ jakʼbel sloʼilike? Laj yalik ti ta junantik lumetike mu toj lekuk ti xi xkalbetik li krixchanoetike: «Ta jchanubtasot ta Vivlia» o «Chkakʼbot estudio». Yilojik ti mas lek ti xiuk xkalbetike: «Jchantik to batel mas li Vivliae», «Jloʼiltatik to batel li kʼusi chal Skʼop Diose» o «Sventa xavojtikin mas li Diose. . .». Sventa xkalbetik ti ta jkʼan chbat jkʼeltik yan veltae, jtunel yilojik ti xi xkalbetike: «Toj ep me kʼusi tsjambutik smelolal li Vivliae» o «Maʼuk noʼox chalbe skʼoplal relijion li Vivliae, yuʼun ep kʼusi chalbe skʼoplal ti jtunel kuʼun ta jkuxlejaltike». Xuʼ to xi xkalbetike: «Mi xanaʼe, akʼo mi 10 o 15 minuto noʼox xachan li Vivliae, xuʼ ep kʼusi xachan ti xuʼ skoltaote». Sventa mu sujbiluk xaʼi sba li jun krixchano o ti vokol xa chaʼie, mu persauk xkalbetik ti chbat jkʼeltik jujun xemanae.

7. ¿Bakʼin chakʼik venta junantik krixchanoetik ti melel li kʼusi ta jchantike? (1 Korintios 14:​23-25).

⁷ Ikʼo batel ta tsobajel. Xaval yaʼeluke, li ta skʼakʼalil jtakbol Pabloe, oy junantik krixchanoetik laj yakʼik venta ti jaʼ melel li kʼusi chchanik li yajtsʼaklomtak Kristoe. ¿Kʼuxi laj yakʼik venta un? Jaʼo kʼalal ayik ta sba velta ta tsobajele (kʼelo 1 Korintios 14:​23-25). Jaʼ jech li avi eke, oy ep krixchanoetik ti chchʼiik noʼox ta mantal kʼalal chlik batikuk ta tsobajele. Pe ¿bakʼin skʼan xkalbetik ti akʼo xbat xchiʼinutik ta tsobajele? Li ta livro Kʼupino akuxlejal li ta xchanobil 10, te chalbe skʼoplal taje. Pe mu persauk ti jaʼ to xkalbetik mi lijkʼot li ta xchanobil taje. Kʼalal ta jchiʼintik ta loʼil ta sba veltae, xuʼ jtijbetik yoʼonton ti akʼo xbat xchiʼinutik li ta tsobajel ta savado o ta domingoe, xuʼ xkalbetik kʼusi sbi li mantal chjelave xchiʼuk li kʼusi chalbe skʼoplal Li Jkʼel-osil ta toyol li vaʼ xemanae.

8. ¿Kʼusi skʼan xkalbetik mi oy buchʼu chkikʼtik batel ta tsobajele? (Isaias 54:13).

⁸ Kʼalal oy buchʼu chkalbetik ti akʼo xbat xchiʼinutik ta tsobajele, kalbetik kʼu yelan chjelav li jtsobajeltike xchiʼuk kʼusi sjelbenal li ta yan relijion ti oy xa van yiloje. Oy jun estudiante ti ay ta sba velta ta tsobajele labal sba tajek laj yil ti kʼu yelan chichʼ chanel Li Jkʼel-osil ta toyole, xi la sjakʼbe li buchʼu chchanubtasate: «Li buchʼu tsjakʼ tale, ¿mi yuʼun snabe sbi skotol li buchʼutik liʼ oyike?». Li ermanae laj yalbe ti xkoʼolaj ta kutsʼ kalaltik li ermanoetik ta tsobobbaile, jaʼ yuʼun chkakʼtik persa sventa xkom ta joltik li sbiike. Li estudiantee laj yal ti mu xkoʼolaj jsetʼuk li ta s-iglesiae, yuʼun junchib noʼox li buchʼu snabe sba sbiike. Oy ep buchʼutik mu snaʼik kʼusi sventa ti ta jtsob jbatike, jaʼ yuʼun lek ti jchapbetik smelolale (kʼelo Isaias 54:13). Ta jtsob jbatik sventa xkichʼtik ta mukʼ Jeova, ti oyuk kʼusi jchantik ta stojolale xchiʼuk ti jpatbe jba koʼontontik ta jujuntale (Ebr. 2:12; 10:​24, 25). Jaʼ yuʼun, li tsobajeletike lek chapal chjelav xchiʼuk xuʼ xkakʼ jloʼiltik, muʼyuk chichʼ pasel te li kʼusitik sventa kostumbree o li kʼusitik chʼabal xa smelolale (1 Kor. 14:40). Ta skoj ti jaʼ te chkichʼtik ta mukʼ Jeova li ta Salon sventa Tsobobbaile, lek sakjaman xvinaj xchiʼuk lek noʼox sba meltsanbil. Jech xtok, ta skoj ti muʼyuk ta jtikʼ jbatik ta politikae, muʼyuk ta jloʼiltatik jsetʼuk xchiʼuk muʼyuk ta jkoltatik junuk partido. Li ta tsobajel xtoke, muʼyuk ta jtsak jbatik ta kʼop xchiʼuk muʼyuk ta jvochʼ jbatik ta utel. Sventa snaʼ kʼu yelan ch-echʼ jtsobajeltik li jun estudiantee, xuʼ xkakʼbetik yil li video ¿Kʼu yelan li jtsobajelkutike?

9, 10. Mi oy buchʼu laj kikʼtik batel ta tsobajele, ¿kʼusi xuʼ xkalbetik sventa mu xiʼe? (Kʼelo xtok li lokʼole).

⁹ Junantike mu skʼan xbatik ta tsobajel ta skoj ti chiʼik mi xichʼik sujel ti x-ochik ta stestigo Jeovae. Jaʼ yuʼun, kalbetik ti xuʼ jaʼ noʼox xbat yaʼiik li mantale, ti muʼyuk chichʼik sujel sventa xakʼ sloʼilike o ti sjel li srelijionike. Muʼyuk bu parte chichʼ akʼel li ololetike, xuʼ jmoj xchoti xchiʼuk stot smeʼik sventa xaʼiik li mantale. Vaʼun, li totil meʼile snaʼoj bu oy li yalab xnichʼnabike xchiʼuk ti kʼusi yakal chchanike (Deut. 31:12). Jech xtok, muʼyuk ch-echʼ stsobik takʼin mi jaʼuk chichʼ kʼanel takʼin, yuʼun jaʼ ta jchʼuntik li kʼusi laj yal Jesus liʼe: «Ta moton la-akʼbatik, jaʼ jech ta moton xavakʼik ek» (Mat. 10:8). Xuʼ xkalbetik ti mu persauk toyol stojol li skʼuʼ tslap batele. Yuʼun li Diose maʼuk tskʼel li jpat jxokontike, jaʼ tskʼel li koʼontontike (1 Sam. 16:7).

¹⁰ Mi bat ta tsobajel li buchʼu la jtaktik ta ikʼele, kakʼtik persa ti junuk yoʼonton xaʼi sbae. Xuʼ xkakʼbetik yojtikin li moletik ta tsobobbaile xchiʼuk li yan ermanoetike. Mi jun yoʼonton laj yaʼi sbae, yikʼaluk van xbat to yan velta. Mi chʼabal Svivlia kʼalal jaʼo xyaket li tsobajele, kakʼbetik yil li tekstoetik ta Jvivliatike xchiʼuk jkoltatik sventa xaʼibe smelolal li kʼusi yakal chichʼ chanele.

KʼALAL CHLIK XA KAKʼBETIK ESTUDIOE

11. ¿Kʼusi skʼan jtsaktik ta venta mi oy buchʼu lik kakʼbetik estudioe?

¹¹ ¿Kʼusi skʼan jtsaktik ta venta mi oy buchʼu lik kakʼbetik estudioe? Tsots skʼoplal ti jtsaktik ta venta kʼu sjalil xokol li jun krixchanoe. Jech xtok, mi laj kalbetik jayib ora chijkʼote, ta yorailuk me xijkʼot akʼo mi mu jechuk nopem xaʼiik li krixchanoetik ta junantik parajee. Lek me ti jlikeluk noʼox xkakʼbetik estudio li ta sba veltae. Yikʼaluk van jchapojtik xa ox xchiʼuk kʼu sjalil ta jchantik, pe junantik ermanoetik ti xtojobik leke yilojik ti jaʼ mas lek ti mu toj jaluk jchantike akʼo mi tskʼan to chchan li jun krixchanoe. Kakʼtik persa ti mu toj epuk xijkʼopoje, ti jaʼuk xkʼopoj mas li kaj-estudiotike (Prov. 10:19).

12. ¿Kʼusi oy ta koʼontontik kʼalal chlik kakʼtik junuk chanubtasele?

¹² Kʼalal chlik kakʼbetik chanubtasel ta Vivlia li jun krixchanoe, li kʼusi oy ta koʼontontike jaʼ ti xlik yojtikin Jeova xchiʼuk Jesus xchiʼuk ti xlik skʼane. Sventa spas kuʼuntik taje, skʼan ta Vivliauk jlokʼestik li kʼusi chkakʼtik ta chanele, maʼuk li kʼusi jchanoj jtuktike (Ech. 10:​25, 26). Jaʼ jech la spas li jtakbol Pabloe, yuʼun jaʼ mas laj yalbe skʼoplal Jesus ti laj yichʼ takel talel sventa xkojtikintik Jeova xchiʼuk ti jkʼantike (1 Kor. 2:​1, 2). Jech xtok, li Pabloe laj yal ti toj tsots skʼoplal ti jkoltatik li achʼ jchʼunolajeletik sventa x-ayan slekil talelalik ti toj ep sbalil kʼuchaʼal li oro, plata xchiʼuk li kʼupil sba tonetike (1 Kor. 3:​11-15). Junantik li talelal taje jaʼ li xchʼunel oʼontonale, li pʼijilale, li yaʼibel smelolale xchiʼuk li xiʼtael Jeovae (Sal. 19:​9, 10; Prov. 3:​13-15; 1 Ped. 1:7). Jchanbetik stalelal li Pabloe xchiʼuk jkoltatik li kaj-estudiotik sventa stsatsub xchʼunel yoʼonton xchiʼuk ti lekuk xil sba xchiʼuk li Jtotik ta vinajele (2 Kor. 1:24).

13. ¿Kʼuxi chvinaj ti oy smalael kuʼuntik xchiʼuk ti xkaʼibetik smelolal kʼu yelan chaʼi sba li kaj-estudiotike? (2 Korintios 10:​4, 5; kʼelo xtok li lokʼole).

¹³ Jchanbetik ti kʼu yelan chanubtasvan li Jesuse, yuʼun oy smalael yuʼun xchiʼuk laj yaʼibe smelolal kʼu yelan chaʼi sba li yantike. Mu kʼusi jakʼbetik kaj-estudiotik ti xuʼ chopol-o xaʼi sba kuʼuntike. Mi oy kʼusi vokol chaʼibe smelolal chkiltike, jelavkutik ta yan punto xchiʼuk jaʼ to jkʼeltik ta mas tsʼakal. Jech xtok, mi vokol chaʼi ta xchʼamel junuk chanubtasele, mu jsujtik, yuʼun te ta kʼun chaʼibe smelolal (Juan 16:12; Kol. 2:​6, 7). Li Vivliae chal ti xkoʼolaj ta jun muro li jecheʼ chanubtaseletik ti skʼan jinesele (kʼelo 2 Korintios 10:​4, 5; kʼelo li nota de estudio ta español «derrumbar cosas fuertemente atrincheradas»). Xuʼ van vokol chaʼi kaj-estudiotik sventa sbul lokʼel ta yoʼonton li kʼusi jecheʼ xchʼunoje, jaʼ yuʼun skʼan baʼyuk jkoltatik sventa xamigoin lek li Jeovae (Sal. 91:9).

KʼALAL CHBAT TA SBA VELTA TA TSOBAJELE

14. ¿Kʼu yelan skʼan xkiltik li buchʼutik chtalik ta tsobajele?

¹⁴ Li Jeovae tskʼan ti mu xijtʼujvane xchiʼuk ti jkʼantik skotol krixchanoetike. Jaʼ yuʼun, kʼalal chtalik ta tsobajele, lekuk jchʼamtik, mu ventauk bu likemik talel, mi jkʼulejik o mi povreik (Sant. 2:​1-4, 9). Jkʼeltik jtos chaʼtosuk kʼuxi xuʼ jpastik taje.

15, 16. ¿Kʼusitik xuʼ jpastik sventa junuk yoʼonton xaʼi sba li buchʼu jaʼ to chkʼot ta tsobajele?

¹⁵ Oy buchʼutik chtalik ta tsobajel ta skoj noʼox ti tskʼan tskʼelik kʼu yelan chjelave o ti oy buchʼu albatik ti xbatik ta tsobajele. Jaʼ yuʼun, kʼalal oy buchʼu chkʼot ta sba veltae, lekuk me jchʼamtik xchiʼuk nopajkutik ta stojolal, pe mu me kʼusi jpastik ti xuʼ chopol-o xaʼi sba kuʼuntike. Xuʼ xkalbetik ti xuʼ jmoj xijchoti xchiʼuke, kakʼbetik jlikuk Svivlia xchiʼuk li vunetik ti chichʼ chanel ta tsobajele o xuʼ jmoj jkʼeltik xchiʼuk. Toj tsots me skʼoplal ti jtsaktik ta venta ti kʼu yelan chaʼi sbaike. Kalbetik skʼoplal jun vinik ti ay ta tsobajele. Xvul ta sjol ti kʼexav tajek ta skoj ti la snop ti chʼabal lek li skʼuʼ slapoj batele. Pe li ermano ti chʼamvane laj yalbe ti mu kʼusi xal yoʼontone xchiʼuk ti muʼyuk buchʼu chlabanvane. Ta tsʼakale, laj yichʼ voʼ li vinik taje xchiʼuk muʼyuk chʼay-o ta sjol ti kʼu yelan chʼamee. Skʼan onoʼox jchʼamtik lek li buchʼutik jaʼ to chkʼotik ta tsobajele, pe skʼan me xkichʼ jpʼijiltik sventa mu kʼusi jakʼbetik ti xuʼ chopol-o xaʼi sba kuʼuntike o ti xkʼexav-oe (1 Ped. 4:15).

¹⁶ ¿Kʼusi to mas xuʼ jpastik sventa junuk yoʼonton xaʼi sba li buchʼu jaʼ to chkʼot ta tsobajele? Jaʼ ti skʼan mu chopoluk xkalbetik skʼoplal li buchʼutik maʼuk stestigotak Jeovae o li kʼusi xchʼunojike. Kʼalal chkakʼ jloʼiltik o ta jelubtas jpartetike, skʼan me xkichʼ jpʼijiltik xtok. Mu me kʼusi xkaltik ti xuʼ chopol-o xaʼi sba kuʼuntik li buchʼu chtal ta vulaʼale, vaʼun ti mu xa skʼan xtal ta yan veltae (Tito 2:8; 3:2). Jech xtok, mu me jlabantik ta skoj ti jelel li kʼusi xchʼunojike (2 Kor. 6:3). Li ermanoetik ti tsjelubtasik mantal eke skʼan me xichʼ spʼijilik ta sventa taje. Jech xtok, skʼan me sjambeik smelolal li kʼopetik o li kʼusitik jaʼ noʼox xkaʼibetik smelolal voʼotike, vaʼun jaʼ jech chakʼik ta ilel ti tstsakik ta venta li buchʼutik sba to velta chkʼotike.

17. ¿Kʼusi skʼan jpastik mi la jtatik li buchʼu oy ta yoʼonton mantale?

¹⁷ Li avie, skʼan xa mas xkakʼ ta koʼontontik li cholmantale. Maʼuk noʼox, yuʼun jech-o ta jtatik «li buchʼutik oy lek ta yoʼontonik stael li kuxlejal sbatel osile» (Ech. 13:48). Jaʼ yuʼun, mi la jchiʼintik ta loʼil li buchʼu oy ta yoʼonton mantale, kalbetik noʼox ti ta jkʼan chkakʼbetik estudioe xchiʼuk kikʼtik batel ta tsobajel. Vaʼun, jaʼ jech ta jkoltatik sventa stambe batel «li sbelel kuxlejale» (Mat. 7:14).