Ep ta jtabetik sbalil kʼalal chkamigointik li kermanotaktike

1, 2. ¿Kʼusi ti toj tsots skʼoplal chil li Jeovae, xchiʼuk kʼusi tskʼan ti akʼo jpastike?

LI Jeovae toj tsots skʼoplal chil ti kʼu yelan ta jtsaktik ta venta li yantike. Li Jesuse la xchanubtasutik ti jaʼuk jech jkʼantik jchiʼiltaktik jech kʼuchaʼal jkʼanoj jba jtuktike (Mat. 22:​37-39). Taje te skʼoplal ti xkakʼtik ta ilel slekil koʼontontik ta stojolal li buchʼutik muʼyuk chichʼik ta mukʼ li Jeovae. Kʼalal jech ta jpastike, jaʼ ta jchanbetik stalelal li Jtotik ta vinajele, «yuʼun li stuke chakʼ lokʼuk kʼakʼal ta stojolal li buchʼutik chopolike xchiʼuk li buchʼutik lekike xchiʼuk chakʼ taluk voʼ ta stojolal li buchʼutik tukʼike xchiʼuk li buchʼutik muʼyuk tukʼike» (Mat. 5:45).

² Akʼo mi skʼanoj skotol krixchanoetik li Jeovae, pe jaʼ mas kʼux ta yoʼonton li buchʼutik tukʼ chtunik ta stojolale (Juan 14:21). Li stuke tskʼan ti akʼo jchanbetik li stalelale, jaʼ yuʼun tstij koʼontontik ti akʼo jkʼantik tajek li kermanotaktike xchiʼuk ti kʼuxuk ta koʼontontike (1 Ped. 4:8; Rom. 12:10). Li kʼanelal taje xchiʼuk ti kʼu yelan chkakʼtik ta ilel xkʼuxul koʼontontike, jaʼ jech xkoʼolaj ti kʼu yelan chkaʼitik ta stojolal li kutsʼ kalaltik o ta stojolal junuk kamigotik ti lek tajek xkil jbatik xchiʼuke.

3. ¿Kʼusi skʼan teuk ta joltik ta sventa li kʼanelale?

³ Li kʼanelale xkoʼolaj ta jpets nichim ti skʼan maltael xchiʼuk kʼelel sventa xchʼie. Li jtakbol Pabloe xi laj yalbe li yajtsʼaklomtak Kristoe: «Jechuk-o xakʼan achiʼilik ta chʼunolajel jech kʼuchaʼal skʼanoj sbaik ta jujuntal li buchʼutik xchiʼil sbaik ta vokʼele» (Ebr. 13:1). Li Jeovae tskʼan ti jechuk-o jkʼantik li yantike. Li ta xchanobil liʼe, ta jkʼeltik batel kʼu yuʼun skʼan xkamigointik lek li kermanotaktike xchiʼuk ti kʼuxi xuʼ jechuk-o jpastik batele.

¿KʼU YUʼUN SKʼAN XKAMIGOINTIK LI KERMANOTAKTIKE?

4. ¿Kʼusi tskoltautik sventa jechuk-o ep sbalil xkiltik ti jmoj oyutik jech kʼuchaʼal chal ta Salmo 133:1? (Kʼelo xtok li lokʼoletike).

⁴ (Kʼelo Salmo 133:1). Jech kʼuchaʼal laj yal li jtsʼibajom yuʼun salmoe «toj lek xchiʼuk toj kʼupil sba» ti jaʼ kamigotik li buchʼutik skʼanojik Jeovae. Pe xuʼ me oy kʼusi xibal sba xkʼot ta pasel, jaʼ ti xuʼ van muʼyuk xa ep sbalil chkiltik ti kʼu yelan jmoj tsobol li steklumal Jeovae. Xuʼ van jaʼ jech chkʼot ta jtojolaltik kʼuchaʼal jun krixchano ti toj labal sba chil ta sba velta li jpets mukʼta teʼe, pe kʼalal ch-echʼ batel li kʼakʼaletike muʼyuk xa mas toj labal sba chil. Ta skoj ti nopajtik noʼox chkiltik li kermanotaktike, ¿kʼusi xuʼ skoltautik sventa epuk-o sbalil xkiltike? Jaʼ ti teuk ta joltik ti toj tsots skʼoplalik ta jujuntale xchiʼuk ti toj ep sbalil li kʼusi tspasik ta tsobobbaile.

5. ¿Kʼu yelan chaʼi sba yantik kʼalal chilik ti skʼanoj sbaik li stestigotak Jeovae?

⁵ Kʼalal oy buchʼutik jaʼ to chkʼotik ta sba velta ta jtsobajeltike, labal to sba chilik ti kʼu yelan jkʼanoj jbatike, vaʼun chchʼunik ti jaʼ li melel relijione. Xi onoʼox laj yal li Jesuse: «Mi chakʼan abaik ta jujuntale, jaʼ jech tsnaʼ skotolik ti voʼoxuk kajchankʼopoxuke» (Juan 13:35). Jkʼeltik kʼusi la snuptan li Chaithrae, ti chanunaj ta universidade xchiʼuk ti lik xchan li Vivliae. Li stuke bat li ta asamblea rejionale, kʼalal laj li asamblea ta viernese, xi laj yalbe li ermana ti jaʼ ch-akʼbat chanubtasele: «Li jtot jmeʼe muʼyuk bu smeyojikun-o. ¡Pe avi ti liʼun ta asambleae, laj kichʼ meyel 52 ta velta! Laj kaʼi ti jaʼ yakal tstunes steklumal Jeova sventa xakʼbun ta ilel ti skʼanojune. Ta jkʼan ti teuk jkʼoplal eke». Li Chaithrae jech-o la xchan li Vivliae xchiʼuk laj yichʼ voʼ ta 2024. Kʼalal chilik li kʼusitik ta jpastik xchiʼuk ti kʼu yelan chkakʼbe jbatik ta ilel kʼanelal li buchʼutik jaʼ to chkʼotike, jutukuk mu skotoluk veltae jaʼ chtijbat yoʼontonik sventa xtunik ta stojolal Jeova (Mat. 5:16).

6. ¿Kʼuxi chchabiutik mi nopol oyutik ta stojolal li ermanoetike?

⁶ Kʼalal mas to chijnopaj ta stojolal li ermanoetike, chchabiutik. Xi laj yalbe yajtsʼaklomtak Kristo li Pabloe: «Jujun kʼakʼal jech-o me xapatbe aba avoʼontonik ta jujuntal [ . . . ] sventa mu stsatsub avoʼontonik yuʼun li sjuʼel mulil ti chloʼlavane» (Ebr. 3:13). Mi oy lijkʼunib ta mantal xchiʼuk mi lik kʼejpʼujkutik li ta lekil be jtamojtike, li Jeovae xuʼ stunes junuk ermano sventa skoltautik (Sal. 73:​2, 17, 23). ¡Toj kʼupil sba ti oy buchʼu xuʼ skoltautike!

7. ¿Kʼuxi snitojbe sba skʼoplal li kʼanelal xchiʼuk ti jmoj tsobol oyutike? (Kolosenses 3:​13, 14).

⁷ Li ta steklumal Jeovae jkotoltik chkakʼtik persa sventa xkakʼbe jbatik ta ilel kʼanelal. Ta skoj ti jech ta jpastike ta jkʼupintik epal bendision (1 Juan 4:11). Yuʼun li kʼanelale jaʼ tstij koʼontontik sventa jechuk-o jtsʼikbe jbatik ta jujuntal, taje jaʼ tskoltautik sventa jmojuk tsobolutik (Efes. 4:​2-6; kʼelo Kolosenses 3:​13, 14). Jaʼ yuʼun, stuk xa noʼox jech li jtsobajeltike, muʼyuk bu jech jtatik yan.

KICHʼ JBATIK TA MUKʼ TA JUJUNTAL

8. ¿Kʼuxi tskoltautik Jeova sventa jmojuk tsobolutike?

⁸ Akʼo mi jpasmulilutik, koliyal li Jeovae xuʼ jmoj tsobol oy li steklumal ta spʼejel balumile (1 Kor. 12:25). Li Vivliae xi chale: «Yuʼun xchanubtasojoxuk Dios ti akʼo xakʼan abaik ta jujuntale» (1 Tes. 4:9). ¿Kʼuxi tskoltautik li Jeovae? Tstunes Skʼop sventa xalbutik kʼusi skʼan jpastik sventa masuk to lek xkil jbatik xchiʼuk li yantike. Pe ¿kʼuxi chkakʼtik ti akʼo xchanubtasutik li Jeovae? Jaʼ mi la jchanbetik lek li Skʼope xchiʼuk mi laj kakʼ ta jkuxlejaltike (Ebr. 4:12; Sant. 1:25). Taje jaʼ li kʼusi kakʼoj ta koʼontontik spasel li stestigoutik Jeovae.

9. ¿Kʼuxi tskoltautik Romanos 12:9 kʼalal ta 13 sventa xkichʼ jbatik ta mukʼ ta jujuntale?

⁹ ¿Kʼuxi xuʼ skoltautik li Skʼop Dios sventa xkamigointik lek li kermanotaktike? Jkʼeltik li kʼusi laj yal Pablo ta Romanos 12:9 kʼalal ta 13 (kʼelo). ¿Kʼusi skʼan xal ti voʼotik baʼyel skʼan xkakʼtik ta ilel ti chij-ichʼvan ta mukʼe? Jaʼ ti jkʼeltik kʼuxi xuʼ xkakʼtik ta ilel xkʼuxul koʼontontik ta skotol orae. Taje te me smakojbe skʼoplal ti xij-akʼvan ta pertone, ti lekuk xijchʼamvane xchiʼuk ti jnaʼuk xijtʼolpʼije (Efes. 4:32). Jech oxal, mu me jaʼuk to jmalatik ti oy kʼusi spasik ta jtojolaltik li yantike. Jaʼ mas lek ti voʼotikuk baʼyel oy kʼusi jpastike, vaʼun xuʼ me jech xkaʼi jbatik jech kʼuchaʼal laj yal Jesus liʼe: «Jaʼ mas xmuyubaj li buchʼu chakʼe, jaʼ mu sta li buchʼu chichʼe» (Ech. 20:35).

10. ¿Kʼu yuʼun skʼan baxbolutik ta abtel sventa xkichʼ jbatik ta mukʼ ta jujuntale? (Kʼelo xtok li lokʼole).

¹⁰ Kʼalal laj xa ox yal jtakbol Pablo ti voʼotik baʼyel skʼan xkakʼtik ta ilel ti xij-ichʼvan ta mukʼe, oy to kʼusi yan laj yal ti toj tsots skʼoplale, xi laj yale: «Baxbolukoxuk me, mu me chʼajukoxuk». Li buchʼu baxbol ta abtele xmuyubaj noʼox tspas li yabtele xchiʼuk kʼalal oy kʼusi ch-akʼbat sbaine tstukʼulan lek xchiʼuk ta yorail noʼox tspas. Xi chtojobtasvan li Proverbios 3:​27, 28: «Mu me xajalan aba ta spasel kʼusi lek ta stojolal li buchʼutik skʼan xakoltae, paso me kʼalal xuʼ avuʼune». Jaʼ yuʼun, mi chkiltik ti oy buchʼu chtun yuʼun koltaele, jkoltatik ti bu kʼalal xuʼ kuʼuntike. Mu jnoptik ti oy buchʼu yan tspase o ti jpastik ta tsʼakale (1 Juan 3:​17, 18).

11. ¿Kʼusi xuʼ skoltautik sventa xkamigointik lek li ermanoetike?

¹¹ Kʼalal chij-akʼvan noʼox ta pertone, jaʼ jech chkakʼtik ta ilel xtok ti chkichʼtik ta mukʼ li yantike. Xi chal Efesios 4:26: «Mu me jechuk ilinemoxuk-o kʼalal chchʼay xa ox batel kʼakʼale». ¿Kʼu yuʼun ti mu stakʼ jech jpastike? Jech kʼuchaʼal chal li ta versikulo 27 jaʼ sventa mu jambetik jsetʼuk sbe li Diabloe. Li Jeovae ep ta velta chalbutik ta Skʼop ti akʼo xkakʼ jbatik ta perton ta jujuntale. Xi tstojobtasutik Kolosenses 3:13: «Mu me xajalanbe abaik ta jujuntal ti chapasbe abaik pertone». Kʼalal muʼyuk ta jtikʼ ta koʼontontik li kʼusi chopol tspasbutik li kermanotaktike, jaʼ tskoltautik sventa lek xkamigoin jbatik. Mi jaʼ jech la jpastike, jun noʼox koʼontontik ta jujuntal xchiʼuk jmoj oyutik «ta skoj li chʼul espiritue» (Efes. 4:3). Jech kʼuchaʼal chkakʼtik ventae, mi mu xij-akʼvan ta pertone muʼyuk me jmoj tsobolutik xchiʼuk muʼyuk me jun koʼontontik.

12. ¿Kʼuxi tskoltautik Jeova sventa xkakʼtik ta perton li yantike?

¹² Bakʼintike, vokol chkaʼitik yakʼel ta perton li buchʼu chopol kʼusi tspasbutike. Pe xuʼ me spas kuʼuntik ta skoj ti tskoltautik li xchʼul espiritu Diose. Li Vivliae maʼuk noʼox chalbutik ti xkakʼtik ta ilel xkʼuxul koʼontontik xchiʼuk ti baxbolukutik ta abtele, yuʼun xi to chalbutike: «Akʼo yakʼ atsatsalik li chʼul espiritue». Taje jaʼ skʼan xal ti xchʼul espiritu Diose tskoltautik sventa baxbolutik ta abtel xchiʼuk ti xijmuyubajuk noʼox ta spasele, ti te skʼoplal ti oyuk xkʼuxul koʼontontike xchiʼuk ti ta slekiluk koʼontontik xkakʼtik pertone (Rom. 12:11). Jaʼ yuʼun, jkʼanbetik vokol Jeova ti akʼo skoltautik ta spasele (Luk. 11:13).

«MU XACHʼAK ABAIK»

13. ¿Kʼusitik van xuʼ xchʼakutik?

¹³ Skotol li buchʼutik chkʼotik ta tsobobbaile jeltos li slumalike (1 Tim. 2:​3, 4). Ta skoj ti jelelutik ta jujuntale jelajtik kʼusi chkʼot ta nopel kuʼuntik, jech kʼuchaʼal ti kʼu yelan ta jmeltsan jbatike, ti kʼu yelan ta jpoxta jbatike xchiʼuk ti kʼu yelan ta jchʼay koʼontontike. Mi muʼyuk la jkʼel jbatike, xuʼ me xchʼakutik (Rom. 14:4; 1 Kor. 1:10). Pe li Jeovae xchanubtasojutik sventa jkʼan jbatik ta jujuntal, jaʼ yuʼun mu sta-o ti xkaltik ti voʼotik mas lek kʼusi chkʼot ta nopel kuʼuntike ti jaʼ mu sta li yantike (Filip. 2:3).

14. ¿Kʼusi skʼan xkakʼ-o ta koʼontontik spasel, xchiʼuk kʼu yuʼun?

¹⁴ Yan ti kʼusi xuʼ jpastik sventa muʼyukuk chʼakbail li ta tsobobbaile, jaʼ ti xkakʼ kipaltik sventa jpatbetik yoʼonton li yantike (1 Tes. 5:11). Achʼtik toe, ep buchʼutik sutik talel ta stojolal Jeova ti lubtsajemik toʼox ta mantale o ti lokʼemik ta tsobobbaile. Li voʼotik eke ta sjunul koʼontontik la jchʼamtik (2 Kor. 2:8). Jun ermana ti oy xa ta lajuneb jabil sikubem ta mantale xi chal kaʼitik kʼalal chaʼsut ta tsobajeletike: «Kʼalal lichaʼsute, skotolik xmuyubajik noʼox la xchʼamikun xchiʼuk stseʼetik noʼox» (Ech. 3:19). ¿Kʼusi sbalil la stabe ti jech la spas li ermanoetike? Xi chal kaʼitike: «Xkoʼolaj laj kaʼi ti la stsakbun jkʼob Jeova sventa sbeiltasun sutel ti bu xuʼ ximuyubaje». Kʼalal chkakʼtik persa spatbel yoʼonton li yantike, li Jesuse xuʼ stunesutik sventa jkoltatik li buchʼutik ol yikats chaʼiike (Mat. 11:​28, 29).

15. ¿Kʼusi to yan xuʼ jpastik sventa jmojuk tsobolutike? (Kʼelo xtok li lokʼole).

¹⁵ Kʼalal ta jnoptik lek li kʼusi chkaltike, xuʼ xijkoltavan sventa jmojuk tsobolutik. Xi chal Job 12:11: «¿Mi muʼyuk van chaʼi mi melel kʼusi chichʼ alel li jchikintik jech kʼuchaʼal tspas preva veʼlil li kokʼtike?». Li buchʼu xtojob lek ta smeltsanel veʼlile baʼyel tspas preva mi lek mu kʼalal mu to tsjelubtas batele. Jaʼ jech ek, kʼalal mu to chijkʼopoje, jnoptik lek li kʼusi chkaltike, ti oyuk lek smuile, jaʼ xkaltik, ti spatuk oʼontonale, ti stsatsubtasvane xchiʼuk ti stabeuk sbalil li buchʼutik chchikintaike (Sal. 141:3; Efes. 4:29).

16. ¿Buchʼutik ti skʼan xakʼik persa sventa spatuk oʼontonal li kʼusi chalike?

¹⁶ Li buchʼutik skʼan xakʼik persa sventa spatuk oʼontonal li kʼusi chalike, jaʼ li viniketik ti oy snup xchiʼilike xchiʼuk li totil meʼiletike (Kol. 3:​19, 21; Tito 2:4). Li moletik eke skʼan spatbeik yoʼonton xchiʼuk stsatsubtasik li xchijtak Jeovae (Is. 32:​1, 2; Gal. 6:1). Xi tsvules ta joltik li Vivliae: «¡Toj lek kʼalal oy kʼusi chichʼ alel ti ta yorail noʼoxe!» (Prov. 15:23).

KAKʼTIK TA ILEL TA MELEL TI JNAʼ XIJKʼANVANE

17. ¿Kʼusi xuʼ jpastik sventa jkʼantik ta melel li ermanoetike?

¹⁷ Xi laj yal li jtakbol Juane: «Skʼan xijkʼanvan, yuʼun maʼuk noʼox ti chkaltike o ti ta ketik noʼox chlokʼe, moʼoj, yuʼun skʼan xkakʼtik ta ilel ta melel ta skoj li kʼusitik ta jpastike» (1 Juan 3:18). ¿Kʼusi xuʼ jpastik sventa xijkʼanvan ta melele? Jaʼ ti masuk to jchiʼintik li kermanotaktike, vaʼun mas to chkamigointik xchiʼuk mas to ta jkʼantik. Jchʼakbetik yorail sventa jchiʼintik ta loʼil ta tsobajel xchiʼuk ta cholmantal. Jech xtok, jchʼakbetik yorail sventa xbat jvulaʼantik. Mi jaʼ jech la jpastike, xi chalik ta jtojolaltike: «Xchanubtasojoxuk Dios ti akʼo xakʼan abaik ta jujuntale» (1 Tes. 4:9). Vaʼun, chkil ta jsat jtuktik ti «toj lek xchiʼuk toj kʼupil sba ti jmoj oyik li steklumal Diose» (Sal. 133:1).