Toj lek kʼalal chijnopaj ta stojolal Diose

1, 2. 1) ¿Kʼusi skʼan jpastik sventa jta lek kamigotike? 2) ¿Kʼusi ta jkʼeltik batel li ta xchanobil liʼe?

NOPBO skʼoplal junuk avamigo, ¿mi xvul ta ajol kʼusi la apasik sventa lek tajek xavamigoin abaike? Xuʼ van jal tajek jmoj kʼusitik la apasik, la avil li kʼusitik nopem xaʼi spasele xchiʼuk la avakʼ venta li kʼusi tskʼupin xchiʼuk li kʼusi muʼyuk lek chile. Jech xtok, la avil ti toj kʼupilik sba stalelaltake, vaʼun chakʼan xa jech atalelal ek. Ta mas tsʼakal une, lek tajek la avamigoin abaik.

² Kʼuchaʼal chkiltike, sventa jta lek kamigotike skʼan xkakʼ kipaltik xchiʼuk jchʼak jkʼakʼaltik. Jaʼ jech skʼan jpastik ek sventa xkamigointik li Diose. Li ta xchanobil liʼe, ta jkʼeltik batel kʼuxi xuʼ masuk to xijnopaj ta stojolal Jeova ti jaʼ jlekil amigotike. Pe baʼyel kalbetik skʼoplal ti kʼu yuʼun toj lek ti jech jpastike.

3. ¿Kʼu yuʼun skʼan jnopbetik skʼoplal kʼusi sbalil ta jtabetik mi chijnopaj ta stojolal Jeovae? Albo junuk skʼelobil.

³ Toj tsots skʼoplal ti jnopbetik lek li srasonaltak ti kʼu yuʼun skʼan xijnopaj ta stojolal Jeovae (Sal. 63:​6-8). ¿Kʼu yuʼun? Kalbetik junuk skʼelobil. Li krixchanoetike snaʼojik ti ep sbalil kʼalal lek chijveʼe, ti chkuchʼtik ep voʼe, ti jpastik ejersisioe xchiʼuk ti xijvay leke. Akʼo mi jech, epal krixchanoetike mu sventaik xchiʼuk muʼyuk chchabi sbaik. ¿Kʼusi van chkoltaatik jechuk sventa xchabi sbaike? Jaʼ mi la snopbeik skʼoplal li sbaliltak tstabeike. Jaʼ jech ek kʼalal chijnopaj ta stojolal Jeovae, jnaʼojtik ti jaʼ li kʼusi mas toj leke. Pe mi la jnopbetik skʼoplal li sbaliltak ta jtabetike, tstij koʼontontik sventa masuk to xijnopaj ta stojolal (Sal. 119:​27-30).

4. ¿Kʼusi laj yal li jtsʼibajom ta Salmo 73:28?

⁴ (Kʼelo Salmo 73:28). Li buchʼu la stsʼiba li Salmo 73 te likem talel ta snitilulal Levi ti jaʼ jkʼejimol xchiʼuk jaʼ sbainoj stijel son ta templo. Xuʼ van ta epal jabil tukʼ tunem talel ta stojolal Jeova. Pe laj yakʼ venta ti toj tsots skʼoplal ti skʼan mas xnopaj ta stojolal Diose, yuʼun tstabe sbalil kʼalal jech tspase. Jech xtok, oy ta yoʼonton ti xakʼik venta yantik ti toj lek kʼalal chkamigointik li Jeovae. Jkʼeltik batel junantik sbaliltak.

XIJMUYUBAJ NOʼOX KʼALAL CHIJNOPAJ TA STOJOLAL DIOSE

5. 1) ¿Kʼu yuʼun xijmuyubaj kʼalal chijnopaj ta stojolal Jeovae? 2) ¿Kʼuxi xuʼ skoltaot xchiʼuk xchabiot li spʼijil Jeovae? (Proverbios 2:​6-16).

⁵ Kʼalal nopol lek oyutik ta stojolal Jeovae, mas to xijmuyubaj (Sal. 65:4). Oy ep srasonal kuʼuntik ti kʼu yuʼun jech chkaltike. Jech kʼuchaʼal liʼe, kʼalal ta jchʼuntik li beiltasel chakʼbutik ta Skʼope, lek chbat jkuxlejaltik. Li pʼijilal yuʼune chchabiutik ta sventa li kʼusitik xuʼ xkil-o jvokoltike xchiʼuk tskoltautik sventa mu jpastik tsatsal muliletik (kʼelo Proverbios 2:​6-16). Xi onoʼox chal li Vivliae: «Xmuyubaj noʼox li vinik ti tsta spʼijile xchiʼuk li vinik ti oy kʼusi lek snaʼe» (Prov. 3:13).

6. ¿Kʼu yuʼun muʼyuk xa xmuyubaj li jtsʼibajom yuʼun salmoe?

⁶ Pe maʼuk skʼan xal ti muʼyuk xa chat yoʼonton li yamigotak Jeovae. Jaʼ jech kʼot ta stojolal li jtsʼibajom yuʼun Salmo 73 kʼalal la snopbe skʼoplal li kʼusitik muʼyuk tukʼ chichʼ pasel yilele. La svul tajek yoʼonton, yuʼun la snopbe skʼoplal ti mas lek xkuxlejal li buchʼutik muʼyuk chichʼik ta mukʼ Dios xchiʼuk ti muʼyuk chchʼunbeik smantale, vaʼun lik itʼixajuk ta stojolalik. Yuʼun laj yakʼ venta ti mas jkʼulejik, ti muʼyuk noʼox ch-ipajik yilel xchiʼuk ti muʼyuk chil svokolik li chopol krixchanoetike, li jsaʼkʼopetike xchiʼuk li jtoybaetike, pe taje mu jechuk (Sal. 73:​3-7, 12). Ta skoj ti jech laj yil taje, lik snop mi oy to sbalil ti chtun ta stojolal Jeovae. Xi laj yal ta skoj ti tsvul yoʼontone: «Ta melel, jecheʼ noʼox ti muʼyuk xchopolil koʼonton kakʼoj jbae xchiʼuk ti jpokoj jkʼob sventa chkakʼ ta ilel ti muʼyuk jmule» (Sal. 73:13).

7. K’alal jaʼo ta jvul koʼontontike, ¿kuxi xuʼ xijmuyubaj yan velta? (Kʼelo xtok li lok’ol ta pajina 1).

⁷ Li jtsʼibajom yuʼun salmoe oy kʼusi la spas ta anil sventa mu xa svul yoʼontone, yuʼun «och batel ti bu chʼul tajek yuʼun Diose», vaʼun te jelbat snopben yuʼun li Jeovae (Sal. 73:​17-19). Ta skoj ti jaʼ jlekil amigotik li Jeovae, snaʼoj kʼalal ta jvul koʼontontike. Jkʼanbetik ti akʼo sbeiltasutike, vaʼun jchʼamtik li koltael chakʼbutik ta Skʼop xchiʼuk ta tsobobbaile. Kʼalal jech ta jpastike, tstsal kuʼuntik li vul oʼontone. Akʼo mi mu xa jnaʼtik kʼusi ta jpastik ta skoj li vul oʼontone, li Jeovae xuʼ spat koʼontontik (Sal. 94:19).a

TA JTA SPATOBIL KOʼONTONTIK KʼALAL CHIJNOPAJ TA STOJOLAL DIOSE

8. ¿Kʼuxi yan ta jtabetik sbalil kʼalal chijnopaj ta stojolal Diose?

⁸ Kʼalal chijnopaj ta stojolal Diose, oy to yan kʼuxi ta jtabetik sbalil. Kalbetik skʼoplal chaʼtosuk. Baʼyel, oy sbalil chkaʼi li jkuxlejaltike. Xchibal, ta jta spatobil koʼontontik ta sventa li kʼusi chtal ta jelavele (Jer. 29:11). Jkʼeltik batel ta jujutos li sbaliltak ta jtabetike.

9. ¿Kʼu yuʼun oy sbalil chkaʼi jkuxlejaltik kʼalal chijnopaj ta stojolal Jeovae?

⁹ Kʼalal chijnopaj ta stojolal Jeovae, oy sbalil chkaʼi li jkuxlejaltike. Epal krixchanoetik avie, chalik ti muʼyuk Diose, jaʼ yuʼun junantike muʼyuk sbalil chaʼi li xkuxlejalike xchiʼuk tsnopik ti chchʼay skʼoplal li krixchanoetik ta jelavele. Pe koliyal li kʼusi jchanojtik ta Skʼop Diose, jchʼunojtik lek ti oy li Diose xchiʼuk «ti ch-akʼbat smotonik li buchʼutik ta sjunul yoʼonton tsaʼike» (Ebr. 11:6). Li Jtotik ta vinajel ti jaʼ li Jeovae, la spasutik sventa xkichʼtik ta mukʼ. Jaʼ yuʼun, kʼalal chijtun ta stojolale, jun noʼox koʼontontik li avie (Deut. 10:​12, 13).

10. Jech kʼuchaʼal chal Salmo 37:​29, ¿kʼusi tstaik ta jelavel li buchʼutik spatoj yoʼontonik ta stojolal Jeovae?

¹⁰ Epal krixchanoetike muʼyuk spatobil yoʼontonik ta melel, yuʼun jaʼ noʼox ch-abtejik, chil yalab xnichʼnabik xchiʼuk tstsob stakʼinik sventa mu xil svokolik mi mol meʼelik xa oxe. Pe jaʼ chchʼay ta sjolik li Diose. Jaʼuk li yajtunelutik Jeovae jpatoj koʼontontik ta stojolal (Sal. 25:​3-5; 1 Tim. 6:17). Muʼyuk xijnaʼet ta stojolal li Jdiostik ti jaʼ kamigotike, yuʼun jnaʼojtik ti chkʼot ta pasel yuʼun li kʼusitik yaloje. Toj ep kʼusi ta jkʼupintik li ta jelavele, jtose jaʼ ti chkichʼtik-o ta mukʼ Jeova ta sbatel osil li ta Paraisoe (kʼelo Salmo 37:29).

11. ¿Kʼusi sbalil ta jtabetik kʼalal chijnopaj ta stojolal Diose, xchiʼuk kʼu yelan chaʼi sba kʼalal jech ta jpastike?

¹¹ Kʼalal chijnopaj ta stojolal Diose, toj ep ta jtabetik sbaliltak. Jtose jaʼ ti yaloj ta jamal ti chchʼay jmultik mi la jsutes koʼontontike (Is. 1:18). ¿Kʼusi skʼan xal taje? Jaʼ ti muʼyuk ta jvul tajek koʼontontik ta skoj li kʼusitik chopol la jpastik ta voʼnee (Sal. 32:​1-5). Jech xtok, chmuyubaj yoʼonton kuʼuntik Jeova kʼalal oy kʼusitik lek ta jpastike (Prov. 23:15). Ta melel, xuʼ van oy to kʼusitik yan jkʼupinojtik ta skoj ti jaʼ kamigotik li Jeovae. ¿Pe kʼusi xuʼ jpastik sventa jechuk-o xijnopaj ta stojolale?

¿KʼUSI SKʼAN JPASTIK SVENTA JECHUK-O XIJNOPAJ TA STOJOLAL DIOSE?

12. ¿Kʼusi skʼan xapas sventa masuk to xanopaj ta stojolal li Diose?

¹² Mi jaʼot stestigo Jeova ti avichʼoj xa voʼe, jaʼ skʼan xal ti ep xa kʼusi achanoj ta stojolal Jeova xchiʼuk ta stojolal Jesukristoe, ti asutesoj xa avoʼonton ta skoj li kʼusitik chopol apasoje, ti laj avakʼ xchʼunel avoʼonton ta stojolal Dios xchiʼuk ti laj avakʼ persa xchʼunbel li smantaltake. Xuʼ xkaltik ti mas xa nopol oyot ta stojolal Jeovae. Pe sventa jechuk-o xijnopaj ta stojolal Diose, skʼan jechuk-o jpastik skotol taje (Kol. 2:6).

13. ¿Kʼusi oxtos xuʼ skoltautik sventa jechuk-o xijnopaj ta stojolal li Jeovae?

¹³ ¿Kʼusi xuʼ jpastik sventa masuk to xijnopaj ta stojolal Jeovae? 1) Jechuk-o jchantik li Vivliae xchiʼuk jsabetik skʼoplal li kʼusi ta jchantike. Mu baluk noʼox xkaʼitik ti jchantik li kʼusitik kʼun ta aʼibel smelolal ta sventa Diose. Jech xtok, kakʼtik venta li kʼusi tsnop Diose, li kʼusi tskʼan akʼo jpastike xchiʼuk kakʼ ta jkuxlejaltik li beiltaseletik ta jtatik ta Skʼope (Efes. 5:​15-17). 2) Jtsatsubtas xchʼunel koʼontontik, ¿kʼuxi xuʼ jpastik? Jaʼ ti jnopbetik skʼoplal kʼuxi yakʼojbutik ta ilel Jeova ti skʼanojutike. 3) Skʼan jechuk-o jpʼajtik li kʼusitik chopol chil Jeovae xchiʼuk mu xkamigointik li buchʼutik chopol kʼusi tspasike (Sal. 1:1; 101:3).

14. ¿Kʼusi skʼan jpastik jujun kʼakʼal sventa jmuyubtabetik yoʼonton li Jeovae? (1 Korintios 10:31; kʼelo xtok li lokʼoletike).

¹⁴ (Kʼelo 1 Korintios 10:31). Toj tsots skʼoplal ti jaʼuk jpastik li kʼusitik jnaʼojtik ti chmuyubaj-o yoʼonton li Jeovae. Maʼuk noʼox ti chijbat ta cholmantal o ta tsobajeletike, yuʼun skotol li kʼusitik ta jpastik jujun kʼakʼale, jaʼuk sventa jmuyubtabetik yoʼonton li Jeovae. Jech kʼuchaʼal liʼe, oy ta yoʼonton ti meleluk xijkʼopoje xchiʼuk ti jnaʼuk xijtʼolpʼije (2 Kor. 8:21; 9:7). Jech xtok, oy ta yoʼonton ti epuk sbalil xkiltik li jkuxlejaltike, yuʼun jaʼ jun matanal yakʼojbutik. Jaʼ yuʼun, kʼalal oy noʼox spʼisol chijveʼ, chij-uchʼbolaj xchiʼuk mi chkakʼtik persa ta jchabi jbatik sventa mu xij-ipaje tskoltautik sventa xijnopaj mas ta stojolal. Akʼo mi muʼyuk mas tsots skʼoplal yilel li kʼusi ta jpastike, xuʼ jaʼ skoltautik sventa skʼanutik mas li Jeovae (Luk. 16:10).

15. ¿Kʼu yelan tskʼan Jeova ti xkiltik li yantike?

¹⁵ Li Jeovae chakʼ ta ilel slekil yoʼonton ta stojolal li buchʼutik tukʼike xchiʼuk li buchʼutik muʼyuk tukʼike (Mat. 5:45). Tskʼan ti jechuk jpastik ta stojolal yantik eke. Li Jeovae chalbe yajtuneltak ti «mu me chopoluk xkʼopojik ta stojolal yantik, mu me ta aniluk x-ilinik, [ . . . ] xchiʼuk akʼo me yakʼik ta ilel lek ti manxo chakʼ sbaik ta stojolal skotol li krixchanoetike» (Tito 3:2). Jaʼ yuʼun, muʼyuk ta jnoptik ti mas xa tsots jkʼoplal chkaʼi jbatik ta stojolal li buchʼutik jelel kʼusi xchʼunojike (2 Tim. 2:​23-25). Mi chkakʼtik persa ti oyuk slekil koʼontontik ta stojolal yantike, tskoltautik sventa masuk to xijnopaj ta stojolal Jeova.

XUʼ XIJNOPAJ TA STOJOLAL DIOS AKʼO MI KʼUN CHKAʼI JBATIK

16. ¿Kʼu yelan laj yaʼi sba jun velta li jtsʼibajom yuʼun Salmo 73?

¹⁶ Mi oy junuk velta la jnoptik ti muʼyuk xa nopol oy ta jtojolaltik li Jeovae, jnopbetik skʼoplal li kʼusi la snuptan li jtsʼibajom yuʼun Salmo 73. Kʼalal jaʼo tsvul yoʼontone, xi laj yale: «Li voʼone jutuk xa mu kʼejpʼuj ta be li kakane; jutuk xa mu jaxpʼuj li kakane» (Sal. 73:2). Jech xtok, xi jamal laj yalbe li Jeovae: «Laj yil tajek svokol li koʼontone [ . . . ]. Mu toʼox jnaʼ rason [ . . . ]; xikoʼolaj toʼox chavil kʼuchaʼal jkot chonbolom ti mu xaʼibe smelolale» (Sal. 73:​21, 22). ¿Mi laj van snop ti mu xa kʼusi stakʼ pasel ta stojolal xchiʼuk ti mu xa sta-o ti xkʼanat yuʼun Jeova ta skoj ti jaʼ jun jpas mulil krixchano xchiʼuk ti oy kʼusi chopol ayan ta yoʼontone?

17. 1) ¿Kʼusi van la spas li jtsʼibajom yuʼun salmo kʼalal lajem tajek chaʼi sbae? 2) ¿Kʼusi chakʼ jchantik li kʼusi la snuptane? (Kʼelo xtok li lokʼoletike).

¹⁷ Mi la snop jtsʼibajom yuʼun salmo ti tenbil xa yuʼun Jeovae, muʼyuk jal jech laj yaʼi sba. Kʼalal lajem tajek chaʼi sbae, yikʼaluk van laj yakʼ venta ti skʼan xnopaj ta stojolal Jeovae, yuʼun xi laj yale: «Pe li avi une, te xa napʼalun-o ta atojolal; atsakojbun lek li jbatsʼikʼobe. Voʼot chabeiltasun ta sventa li tojobtasel avuʼune, ta tsʼakal xtoke, chabeiltasun batel sventa jta jmukʼulal» (Sal. 73:​23, 24). Kʼalal jaʼo lajem tajek chkaʼi jbatik o chibajemutike, skʼan xijnopaj ta stojolal Jeova ek ti jaʼ Mukʼta ton kuʼuntike sventa xijtsatsub yan velta (Sal. 73:26; 94:18). Mi oy lijkʼejpʼuj junuk velta li ta lekil be jtamojtike, sutkutik ta stojolal Jeovae, yuʼun jnaʼojtik ti chapal sventa xchʼay jmultike (Sal. 86:5). Kʼalal jaʼo lajem tajek chkaʼi jbatike, jaʼo mas skʼan xijnopaj ta stojolal Dios (Sal. 103:​13, 14).

NOPAJKUTIK-O TA STOJOLAL DIOS TA SBATEL OSIL

18. ¿Kʼu yuʼun muʼyuk spajeb ti chijnopaj ta stojolal Jeovae?

¹⁸ Muʼyuk spajeb ti chijnopaj ta stojolal Jeovae xchiʼuk muʼyuk spajeb li kʼusi ta jchantik ta stojolale. Li Vivliae chal ti mu tabaj li spʼijil Diose, li yojtikinobil yuʼune xchiʼuk «mu xlaj ta aʼibel smelolal li sbee» (Rom. 11:33).

19. ¿Kʼusi jamal chalbutik li Salmoetik la jkʼeltik talele?

¹⁹ Xi chal Salmo 79:13: «Vaʼun, li voʼonkutik ti ateklumalunkutike xchiʼuk ti achijunkutik ta avosile chkalbotkutik kolaval ta sbatel osil; jech xtok, ta jkʼupil kʼoptaotkutik li ta jaykʼol kuxlejal chtale». Xuʼ jpʼel ta avoʼonton ti chata epal bendision ta sbatel osil mi jech-o chanopaj ta stojolal Jeovae. Vaʼun, xuʼ xi xaval eke: «Li Diose, jaʼ kʼotem ta mukʼta ton kuʼun xchiʼuk jaʼ jparte kʼotem ta sbatel osil» (Sal. 73:26).