¿Kʼusi xuʼ xapas yoʼ lekuk xavil aba xchiʼuk Jeova yan veltae?

JUJUN jabile, ep buchʼutik ch-ochik ta stestigo Jeova yan velta. Jnoptik noʼox kʼu to yelan «xkuxet yoʼontonik ta vinajel» kʼalal tsut talel ta mantal jkot yuni chij Jeovae (Luk. 15:7, 10). Mi la-och xa yan velta ta stestigo Jeovae, jpʼeluk ta avoʼonton ti xmuyubajik tajek li Jesus, li anjeletike xchiʼuk li Jeovae. Pe kʼalal jaʼo yakal chavakʼ tal persa sventa lekuk xavil aba xchiʼuk Jeova yan veltae, xuʼ van oy kʼusitik xanuptan. ¿Kʼusitik jaʼ taje xchiʼuk kʼusi xuʼ skoltaot?

KʼUSITIK XUʼ XANUPTAN

Epal ermanoetike chopol-o chaʼi sbaik akʼo mi sutemik xa ta mantal. Mi jaʼ jech chavaʼi aba eke, xuʼ van xavaʼibe smelolal ti kʼu yelan laj yaʼi sba li ajvalil Davide, yuʼun xi laj yal kʼalal yichʼoj xa ox akʼbel perton li smultake: «Toj echʼ xa noʼox ep li jpaltailtak ti chakʼ jvokole» (Sal. 40:12; 65:3). Kʼalal oy buchʼu tsut talel ta stojolal Jeovae, xuʼ van oy-o smul chaʼi sba o chkʼexav akʼo mi jelavem xa epal jabil. Jech kʼuchaʼal liʼe, xi chal Isabellea ti lokʼ ta tsobobbail mas ta 20 jabile: «Solel mu toʼox jchʼun ti chakʼun ta perton li Jeovae». Mi lachibaje, xuʼ van mu xa toj lekuk xavil aba yan velta xchiʼuk li Jeovae (Prov. 24:10). Mu xavakʼ jech xkʼot ta pasel.

Yantike tsvul-o yoʼontonik kʼalal tsnopbeik skʼoplal li kʼusitik skʼan spasik sventa lekuk xil sbaik xchiʼuk Jeova yan veltae. Xi laj yal Antoine kʼalal sutem xa ox ta mantale: «Chʼayem xa ox ta jol li kʼusitik toʼox ta jpas kʼalal stestigo Jeovaun toʼoxe». Ta skoj ti jaʼ jech chaʼi sbaike, junantike xuʼ van muʼyuk xa ep kʼusitik tspasik sventa mantal.

Kalbetik junuk skʼelobil. Kʼalal chlaj ta tsatsal ikʼaloʼ jpʼejuk nae, li yajval nae xuʼ van tsvul-o yoʼonton ti jal skʼan x-abtej xchiʼuk ti skʼan xakʼ persa sventa xchaʼmeltsan li snae. Jaʼ noʼox jech ek, mi muʼyuk xa lek xavil aba xchiʼuk Jeova ta skoj ti tsots la apas amule, xuʼ van ep kʼusitik skʼan xapas chavaʼi sventa xlekub ti kʼu yelan chavil aba xchiʼuke. Pe mu me atukuk oyot.

Xi chalbutik li Jeovae: «Laʼik, jchapantik li jkʼoptike» (Is. 1:18). Li Jeovae skʼanojot ta skoj ti avakʼoj persa sventa lekuk xavil aba yan velta xchiʼuke. Nopbo skʼoplal liʼe: li Jeovae xuʼ stunesot sventa xakʼ ta ilel ti jaʼ jun jutkʼop li Satanase (Prov. 27:11).

Kʼalal lasut talel ta stojolal Jeovae, lanopaj ta stojolal xchiʼuk yaloj ta jamal ti chnopaj ta atojolal eke (Sant. 4:8). Toj lek ti chilik yantik ti lasut xa talel ta mantale, pe oy to kʼusi skʼan xapas. Skʼan masuk to xakʼan li Jeova ti jaʼ Atot xchiʼuk Avamigoe. ¿Kʼuxi xuʼ spas avuʼun?

AKʼO TA AVOʼONTON LI KʼUSI XUʼ AVUʼUN SPASELE

Akʼo persa ti xavakʼ ta avoʼonton li kʼusi xuʼ avuʼun spasele. Xuʼ van te to oy li yoyaltak ana ta mantale, jaʼ xkaltik, ti te to ta ajol li kʼusi anaʼoj ta stojolal Jeovae xchiʼuk li kʼusitik tspas ta jelavele. Pe skʼan xachaʼmeltsan li spakʼbaltak anae, jaʼ xkaltik, ti skʼan oyuk kʼusitik xapas ta mantale, jech kʼuchaʼal ti xalokʼ ta cholmantale, ti xabat ta tsobajeletike xchiʼuk ti oyuk kʼusi xapas xchiʼuk li ermanoetike. Jkʼeltik kʼusitik xuʼ xavakʼ ta avoʼonton spasel.

Nopolik noʼox xakʼopon li Jeovae. Li Atot ta vinajele xaʼibe smelolal ti mu kʼunuk chavaʼi skʼoponel mi oy-o amul chavaʼi ta skoj li kʼusi la apase (Rom. 8:26). Akʼo mi jech, jechuk-o xakʼopon xchiʼuk albo ti oy tajek ta avoʼonton ti xakʼot ta yamigoe (Rom. 12:12). Xi chvul ta sjol li Andreje: «Oy toʼox tajek jmul chkaʼi jba xchiʼuk chikʼexav toʼox tajek. Pe kʼalal ta jkʼopon Jeova jujun veltae, mas xa jun koʼonton chikom». Mi mu xanaʼ kʼusi chaval ta a-orasione, nopbo skʼoplal li kʼusi laj yal ta s-orasion li ajvalil David kʼalal sutesoj xa ox yoʼontone, taje xuʼ te xata ta Salmos 51 xchiʼuk 65.

Nopolik noʼox xachan li Avivliae. Taje jaʼ tskoltaot sventa stsatsub li xchʼunel avoʼontone xchiʼuk ti masuk to xakʼan li Jeovae (Sal. 19:7-11). Xi laj yal li Felipee: «Li kʼusi likʼunib-o ta mantal xchiʼuk ti la jsaʼo jmul ta stojolal Jeovae jaʼ ta skoj ti muʼyuk toʼox nopem xkaʼi chichanunaje xchiʼuk ti jchan Jvivliae, pe mu jkʼan ti jyayijesbe yoʼonton Jeova yan veltae. Jaʼ yuʼun, la jchʼakbe lek yorail sventa xichanunaj». Taje xuʼ jech xapas ek. Mi mu xanaʼ kʼusi chachanbe skʼoplale, xuʼ xakʼanbe koltael junuk avamigo ti yij ta mantale.

Paso ta avamigo yan velta li ermanoetike. Junantik li buchʼutik tsutik tal ta mantale tsnopik ti chopol ch-ilatik yuʼun li yantike. Xi chal li Larissae: «Chikʼexav toʼox tajek. Xkoʼolaj ti la jvalopatin komel chkaʼi li ermanoetike. Ta epal jabil jaʼ jech laj kaʼi jba». Teuk ta ajol ti oy ta yoʼonton tskoltaoxuk li moletik xchiʼuk li yan ermanoetik ti yijik ta mantal sventa lekuk xavil aba xchiʼuk Jeova yan veltae (kʼelo li rekuadro «Li kʼusi xuʼ spasik li moletike»). Xmuyubajik tajek ti lasut tale xchiʼuk tskʼanik ti xamuyubaje (Prov. 17:17).

¿Kʼusi xuʼ xapas sventa masuk nopol xavaʼi aba ta stojolal li ermanoetike? Batan ta skotol tsobajeletik xchiʼuk nopolik noʼox xachol mantal xchiʼuk li ermanoetike. ¿Kʼuxi tskoltaot mi jech la apase? Xi chal li Felikse: «Li ermanoetike smalaojik xisut tal. Kʼanbil tajek laj kaʼi jba. La skoltaikun skotolik sventa junuk koʼonton xkaʼi jba li ta tsobobbaile, sventa jchʼun ti yakʼojun xa ta perton li Jeovae xchiʼuk ti xuʼ xkakʼbe-o batel yipale» (kʼelo li rekuadro «Li kʼusi xuʼ xapase»).

MU ME XACHIBAJ

Kʼalal jaʼo yakal chavakʼ persa sventa lekuk xavil aba xchiʼuk Jeova yan veltae, li Satanase oy kʼusitik tspas sventa slubtsanot (Luk. 4:13). Sventa lek chapalote, akʼo persa sventa lekuk xavaʼan li ana ta mantale, jaʼ xkaltik, ti masuk to xavamigoin li Jeovae.

Xi chalbe skʼoplal xchijtak li Jeovae: «Chbat jsaʼ tal li jchij ti chʼayeme, chbat kikʼ sutel tal li jchij ti kʼejpʼujem lokʼel ta bee, ta jpixbe syayijemal li jchij ti yayijeme xchiʼuk ta jtsatsubtas li jchij ti kʼunibeme» (Esek. 34:16). Li Jeovae skoltaoj ep yajtuneltak sventa lekuk xil sbaik xchiʼuk yan veltae. Jaʼ yuʼun, jpʼeluk me ta avoʼonton ti tskʼan tskoltaot ek sventa masuk to lek xavil aba xchiʼuke.

Li kʼusi xuʼ spasik li moletike

Li moletik ta tsobobbaile ep kʼusitik xuʼ spasik sventa skoltaik li jcholmantaletik ti sutemik xa ta mantal sventa lekuk xil sbaik xchiʼuk Jeova yan veltae. Jkʼeltik kʼusitik xuʼ spasik.

Ti spatbeik yoʼontonike. Li jtakbol Pabloe snaʼoj ti xuʼ xlubtsaj li buchʼu sutesoj yoʼonton ta skoj ti «chat tajek yoʼontone» (2 Kor. 2:7). Xuʼ van chkʼexav xchiʼuk chchibaj. Jaʼ yuʼun, li Pabloe xi laj yalbe li yermanotake: «Ta slekil avoʼontonik xavakʼik ta perton xchiʼuk patbeik yoʼonton». Li buchʼutik tsutik talel ta mantale skʼan xichʼik akʼbel ta ilel ti kʼanbilik tajek yuʼun Jeovae xchiʼuk ti kʼanbilik yuʼun li ermanoetike. Muʼyuk me chchibajik mi nopolik noʼox chichʼik kʼupil kʼoptaele xchiʼuk mi chichʼik koltaele.

Ti spasik orasion xchiʼukike. «Oy kʼusi lek tajek chkʼot ta pasel kʼalal xvokolet li tukʼil krixchanoe» (Sant. 5:16). Li Larissa ti laj xa kalbetik skʼoplale xi chale: «Laj kalbe moletik ti oy kʼusi xichibet-oe xchiʼuk ti oy kʼusitik chixiʼoe. La spasik orasion ta jtojolal. Jaʼ jech laj kakʼ venta ti muʼyuk ch-ilinik ta jtojolale. Tskʼan tskoltaikun sventa lekuk xkil jba yan velta xchiʼuk li Jeovae». Xi chal li ermano Theoe: «Kʼalal la spasik orasion li moletike, la skoltaun sventa jchʼun ta melel ti skʼanojun li Jeovae xchiʼuk ti jaʼ tskʼel li kʼusitik lekik ta jpase, maʼuk li jpaltaile».

Ti xamigoinike. Li buchʼutik tsutik tal ta mantale skʼan ti oyuk yamigoik li ta tsobobbaile. Xi chal jun mol ta tsobobbail ti Justin sbie: «Skʼan ti nopolikuk noʼox xkalbetik ti jmoj xijlokʼ ta cholmantale, pe li kʼusi mas tsots skʼoplale jaʼ ti xbat jvulaʼantike. Tsots tajek skʼoplal ti xkamigointike». Xi chal yan mol ta tsobobbail ti Henry sbie: «Mi chakʼik venta ermanoetik ti chamigoinik buchʼu sut talel ta mantal li moletike, jaʼ jech chlik spasik ek».

Ti skoltaik sventa xchanunaj stukike. Li jun ermano ti yij ta mantale xuʼ skolta li buchʼu tsut tal ta mantal sventa oyuk lek yorail yuʼun yoʼ xchanunaj stuke. Xi chal jun mol ta tsobobbail ti Darko sbie: «Ta jkʼupin tajek chkalbeik li kʼusitik kʼupil sba ta jta kʼalal ta jchan Jvivliae xchiʼuk ti xakʼik venta ti ta jkʼupin tajeke». Xi chal yan mol ta tsobobbail ti Clayton sbie: «Ta jtijbe yoʼontonik sventa skʼelik kʼusitik la spasik li buchʼutik chalbe skʼoplal ta Vivlia ti jaʼ jechtik la snuptan svokolik kʼuchaʼal stukike».

Ti xchabiike. Li buchʼutik tsut tal ta mantale yilojik kʼu yelan chchapanvanik li moletike, pe skʼan xilik xtok ti kʼu yelan chchabiik li chijetik ta tsobobbaile (Jer. 23:4). Moletik, chikintabeik li buchʼutik tsut tal ta mantale xchiʼuk kʼupil kʼoptaik. Nopolikuk noʼox xakʼoponik. Jun mol ta tsobobbail ti Marcus sbie chal kʼusi tspasik kʼalal chbat svulaʼanike: «Ta jkʼelkutik xchiʼuk chkalbekutik skʼoplal jun loʼil ta Vivlia. Ta jkʼupil kʼoptakutik, chkalbekutik ti ep tajek sbalil chkilkutik xchiʼuk ti ep sbalil chil Jeova ti laj yakʼik persa sventa sutik talel ta mantale. Vaʼun, chkalbekutik kʼusi ora chbat jvulaʼankutik yan velta».

a Li ta xchanobil liʼe, jelbil li biiletike.