Jkoltatik li Jesukristo ti jaʼ tsbeiltasutike

1. ¿Kʼusi oy ta yoʼonton li Diose?

LI Diose oy ta yoʼonton ti xichʼ cholel ta spʼejel balumil li lekil aʼyejetik ta sventa li Ajvalilal yuʼune (Mar. 13:10; 1 Tim. 2:3, 4). Li abtelal taje jaʼ yuʼun li Jeovae xchiʼuk toj tsots skʼoplal chil, jaʼ yuʼun jaʼ la stʼuj li skʼanbil Nichʼon sventa jaʼuk sbeiltase. Ta skoj ti jaʼ tsbeiltas cholmantal li Jesus ti lek xtojobe, jpʼel ta koʼontontik ti lek chil Jeova ti kʼu yelan ta jcholtik mantale (Mat. 24:14).

2. ¿Kʼusi ta jkʼeltik li ta xchanobil liʼe?

² Li ta xchanobil liʼe, ta jkʼeltik ti yakal tstunes Jesus «li tukʼil xchiʼuk pʼijil mosoil» sventa xakʼ li jveʼeltik ta mantal xchiʼuk ti sbeiltasutik li ta cholmantal yakal ta jpastik ti stuk noʼox jeche (Mat. 24:45). Jech xtok, ta jkʼeltik kʼusi xuʼ jpastik sventa jkoltatik li Jesus xchiʼuk li tukʼil xchiʼuk pʼijil mosoile.

TSBEILTAS CHOLMANTAL LI JESUSE

3. ¿Kʼusi akʼbil sbain li Jesuse?

³ ¿Kʼuxi jnaʼojtik ti jaʼ yakal tsbeiltas cholmantal li Jesuse? Kʼalal jutuk xa ox skʼan xmuy batel ta vinajele, la stsob sba xchiʼuk junantik yajchankʼoptak ta jun vits ta Galilea xchiʼuk xi laj yalanbee: «Akʼbil jventain skotol li kʼusitik ta vinajel xchiʼuk ta sba balumile». Xi to laj yalanbee: «Jaʼ yuʼun, batanik, bat pasik ta jchankʼop li krixchanoetik ta skotol jteklumetike» (Mat. 28:18, 19). Li Jesuse jaʼ akʼbil sbain sbeiltasel li cholmantale xchiʼuk yan kʼusitik.

4. ¿Kʼuxi jnaʼojtik ti jaʼ yakal tsbeiltas-o cholmantal li Jesuse?

⁴ Li Jesuse laj yal ti chichʼ cholel mantal xchiʼuk chichʼ pasel ta yajchankʼoptak li krixchanoetik «ta skotol jteklumetike». Laj yal xtok ti te chchiʼinan li yajchankʼoptak «skotol kʼakʼal jaʼ to mi poʼot xa ox xlaj skotol li kʼusitik oy ta balumile» (Mat. 28:20). Li kʼusi laj yale jamal chakʼ ta aʼiel ti jaʼ tsbeiltas-o cholmantal li avi kʼakʼale.

5. ¿Kʼuxi xuʼ jkolta jbatik sventa xkʼot ta pasel li kʼusi chal ta Salmo 110:3?

⁵ Li Jesuse xchʼunoj lek ti ep buchʼutik chkoltavan ta cholmantal li ta slajebal kʼakʼale. Snaʼoj ti chkʼot ta pasel li albil kʼop liʼe: «Li ateklumale chlokʼ ta yoʼonton tskolta sbaik kʼalal tsta skʼakʼalil chavikʼ batel ta paskʼop li avajsoltarotake» (Sal. 110:3). Mi chachol mantale, yakal chakolta li Jesus xchiʼuk li tukʼil xchiʼuk pʼijil mosoile. Yakal chakoltavan xtok sventa xkʼot ta pasel li albil kʼop taje. Yakal xa chichʼ cholel li mantale, pe oy kʼusitik vokol chichʼ nuptanel.

6. ¿Kʼusi vokolil ta jnuptantik?

⁶ Jtos li kʼusi vokol ta jnuptantike jaʼ li kontrainele. Li jvalopatinej mantaletik, li jpolitikoetik xchiʼuk li jnitvanejetik ta relijione tspukik batel jutbil kʼopetik ta sventa li cholmantal ta jpastike. Mi lajik ta loʼlael li kutsʼ kalaltik, li buchʼutik xkojtikintik o li jchiʼiltaktik ta abtele, xuʼ van spajesutik ta cholmantal xchiʼuk mu van xakʼik ti xijtun ta stojolal Jeovae. Ta junantik lumetike, li buchʼutik tskontrainutike chalbutik ti oy kʼusi chopol tspasbutike, chakʼ jvokoltik xchiʼuk chtikʼvanik ta chukel. Taje mu labaluk sba chkaʼitik, yuʼun xi onoʼox yaloj li Jesuse: «Chavichʼik pʼajel [...] ta skoj jbi» (Mat. 24:9). Kʼalal chkichʼtik pʼajele, jaʼ svinajeb ti yakal ta jpastik li kʼusi la spas Jesuse xchiʼuk ti lek chilutik li Jeovae (Mat. 5:11, 12). Jaʼ onoʼox yabtel Diablo li kontrainel chkichʼtike, pe jaʼ mas tsots sjuʼel li Jesuse. Jaʼ yuʼun, yakal chpuk batel ta spʼejel balumil li lekil aʼyej ta sventa li Ajvalilal yuʼun Dios ta skoj ti tskoltautik li Kristoe.

7. ¿Kʼusitik chakʼ ta ilel ti yakal chkʼot ta pasel li kʼusi chal ta Apokalipsis 14:6 xchiʼuk 7?

⁷ Yan kʼusi vokol ta jnuptantike jaʼ ti mu junuk noʼox kʼop chijkʼopoje. Pe li Juane akʼbat yil yuʼun Jesus ti maʼuk jaʼ chmakvan-o sventa xichʼ cholel li lekil aʼyejetike (kʼelo Apokalipsis 14:6, 7). ¿Kʼuxi kutojtik? Li ta jpajinatik jw.org yichʼoj jelubtasel vunetik ti lokʼemik ta Vivlia ta mas ta jmil jeltos kʼopetike. Jech xtok, li Jtsop Jbeiltasvaneje laj yal ti xichʼ jelubtasel ta mas ta vukub sien jeltos kʼopetik li livro Kʼupino akuxlejal ti jaʼ chkakʼtik-o chanubtasel ta Vivliae. Pasbil videoetik xtok sventa li pakʼchikinetike xchiʼuk pasbil vunetik ta braile kʼop sventa li maʼsatetike. Ta skoj taje, ep buchʼutik xuʼ xchʼamik li mantale. Jkʼelojtik yakal chkʼot ta pasel li albil kʼopetik ta Vivliae: epal krixchanoetik «ta skotol jeltos kʼopetik ta mukʼtik lumetik» yakal chchanik li «lekil kʼope», jaʼ xkaltik, li kʼusi melel ta Vivliae (Sak. 8:23; Sof. 3:9). Jech yakal chkʼot ta pasel ta skoj ti toj lek kʼu yelan chbeiltasvan li Jesukristoe.

8. ¿Kʼusitik lek kʼotem ta pasel yuʼun li cholmantale?

⁸ Li steklumal Jeova avie oy mas ta vaxakib miyon krixchanoetik ta 240 mukʼtik lumetik xchiʼuk ta bikʼtal lumetik. Jech xtok, ¡ta smilal xa noʼox krixchanoetik chichʼik voʼ jujun jabil! Pe mu jaʼuk mas tsots skʼoplal ti kʼu yepal ochemik ta mantale, yuʼun jaʼ mas tsots skʼoplal ti jaʼ xa jech stalelalik kʼuchaʼal «li achʼ talelale» (Kol. 3:8-10). Ep buchʼutik yiktaojik li mulivajele, li paskʼope, ti chopol kʼusi tsnopik ta stojolal yantike xchiʼuk ti skʼanoj slumalike. Yakal chkʼot ta pasel li albil kʼop ta Isaias 2:4 ti xi chale: «Mi jaʼuk xa chchanik paskʼop». Ta skoj ti chkakʼtik persa ti lekuk jtalelaltike, chnopajik talel ta s-organisasion Dios li krixchanoetike xchiʼuk chkakʼtik ta ilel ti ta jchʼuntik li kʼusi chal Jesukristo ti jaʼ li buchʼu tsbeiltasutike (Juan 13:35; 1 Ped. 2:12). Jech yakal chkʼot ta pasel ta skoj ti tskoltautik li Jesuse.

SVAʼANOJ JUN MOSOIL LI JESUSE

9. Jech kʼuchaʼal chal Mateo 24:45 kʼalal ta 47, ¿kʼusi laj yal Jesus ti chkʼot ta pasel li ta slajebal kʼakʼale?

⁹ (Kʼelo Mateo 24:45-47). Li Jesuse laj yal ti tsvaʼan «li tukʼil xchiʼuk pʼijil mosoil» sventa xakʼ jveʼeltik ta mantal li ta slajebal kʼakʼale. Jaʼ yuʼun, xuʼ jchʼuntik ti tsots yakal ch-abtej li tukʼil xchiʼuk pʼijil mosoil li ta jkʼakʼaliltike. Li Jesuse tstunes jtsop ermanoetik ti tʼujbil chbatik ta vinajel sventa xakʼbeik sveʼel ta mantal ta yorail noʼox li yajtuneltak Dios xchiʼuk li buchʼutik oy ta yoʼontonik mantale. Pe li ermanoetik liʼe maʼuk sventainojbeik li xchʼunel yoʼonton yantike (2 Kor. 1:24). Snaʼojik ti jaʼ jnitvanej xchiʼuk komandante yuʼun steklumal Dios li Jesukristoe (Is. 55:4).

10. Li livroetik xvinaj ta lokʼole, ¿bu jlikukal la skoltaot sventa xlik tunan ta stojolal Jeova?

¹⁰ Leʼ xa ta 1919, li tukʼil xchiʼuk pʼijil mosoile xchapanoj jeltos vunetik sventa xojtikinik mantal li krixchanoetike. Li ta 1921, laj yichʼ pukel ta inglés li livro El Arpa de Dios sventa xichʼ akʼel ta chanel li kʼusitik melel chal ta Vivliae. Ta mas tsʼakale, laj yichʼ pukel talel yan livroetik. ¿Kʼusi livroal la skoltaot sventa xavojtikin xchiʼuk xakʼan li Jeovae? Xuʼ van jaʼ liʼe: “Sea Dios veraz”, La verdad que lleva a vida eterna, Usted puede vivir para siempre en el paraíso en la Tierra, El conocimiento que lleva a vida eterna, ¿Kʼusi chchanubtasvan ta melel li Vivliae? o ¿Kʼusi chchanubtasvan li Vivliae? O xuʼ van jaʼ yakal chachan li livro Kʼupino akuxlejale. Li livroetik liʼe laj yichʼ pasel sventa jpastik ta yajchankʼop Kristo li krixchanoetike xchiʼuk ta yorail noʼox lokʼ.

11. ¿Kʼu yuʼun toj tsots skʼoplal ti jkotoltik xkichʼtik akʼbel li jveʼeltik ta mantale?

¹¹ Jkotoltik skʼan xkojtikintik lek li Jeovae xchiʼuk li kʼusi chal Vivliae, maʼuk noʼox skʼan jech spasik li buchʼutik jaʼ to chchanik Vivliae. Xi la stsʼiba li jtakbol Pabloe: «Jaʼ sventa yijil krixchanoetik li tsatsal veʼlile». Laj yal xtok ti kʼalal chkakʼ ta jkuxlejaltik li kʼusi ta jchantike, tskoltautik sventa xkʼel kuʼuntik «li kʼusi tukʼe xchiʼuk li kʼusi muʼyuk tukʼe» (Ebr. 5:14). Pe ta skoj ti muʼyuk xa chopol chilik mulivajel li krixchanoetike, xuʼ van mas vokol chkaʼitik xchʼunbel smantal li Jeovae. Jaʼ yuʼun, li Jesuse chakʼbutik talel muil veʼliletik ta mantal ti lokʼemik ta Vivlia sventa tsotsuk-o li xchʼunel koʼontontike. Li Jesuse jaʼ tsbeiltas li tukʼil xchiʼuk pʼijil mosoil sventa xchapan xchiʼuk spuk li veʼlil ta mantale.

12. ¿Kʼuxi kakʼojtik ta ilel ti kichʼojbetik ta mukʼ sbi Dios jech kʼuchaʼal la spas li Jesuse?

¹² Jech kʼuchaʼal la spas Jesuse, li voʼotik eke kichʼojbetik ta mukʼ li sbi Dios jech kʼuchaʼal sta-oe (Juan 17:6, 26). Jech kʼuchaʼal liʼe, li ta 1931, la jbiintik stestigotak Jeova jech kʼuchaʼal chal ta Vivliae. Jaʼ jech chkakʼtik ta ilel ti ta jkʼan chkichʼbetik li sbi Jtotik ta vinajele, yuʼun toj tsots skʼoplal chkiltik (Is. 43:10-12). Jech xtok, li ta oktuvre ta 1931, te lik vinajuk li sbi Dios ta yeloval li revista Li Jkʼel-osil ta toyol ta inglése. Maʼuk noʼox, yuʼun li ta Skʼop Dios sventa Achʼ Balumile te xa laj yichʼ akʼel li sbi Dios ti bu onoʼox tsʼibabil ta voʼnee. Taje mu jechuk tspasik li yan relijionetike, yuʼun jutuk mu skotoluk li Vivlia tstunesike stupʼojbeik li sbi Diose.

LI JESUSE LEK CHAPAL YUʼUN LI YAJTUNELTAKE

13. ¿Kʼu chaʼal achʼunoj lek ti jaʼ yakal tstunes Jesus li tukʼil xchiʼuk pʼijil mosoile? (Juan 6:68).

¹³ Li Jesuse jaʼ la stunes «li tukʼil xchiʼuk pʼijil mosoil» sventa xchapan jun organisasion yoʼ xichʼik ta mukʼ li melel Diose. ¿Kʼusi chanop ta sventa taje? Xuʼ van jech chavaʼi aba kʼuchaʼal Pedro ti xi laj yalbe li Jesuse: «¿Buchʼu xa noʼox chbat jchiʼinkutik? Yuʼun voʼot chavalbe skʼoplal li kuxlejal sbatel osile» (Juan 6:68). ¿Kʼusi van kʼot ta jtojolaltik ti muʼyukuk laj kojtikintik li s-organisasion Jeovae? Li Kristoe tstunes li organisasion taje sventa oyuk lek jveʼeltik ta mantal xchiʼuk chchapanutik sventa xijtojobuk lek ta chanubtasvanej. Jech xtok, tskoltautik sventa jlaptik «li achʼ talelal» yoʼ xmuyubajuk kuʼuntik li Jeovae (Efes. 4:24).

14. Kʼalal jaʼo yakal li chamel COVID-19, ¿kʼuxi la atabe sbalil ti liʼ oyot ta s-organisasion Jeovae?

¹⁴ Kʼalal oy kʼusi tsots ta jnuptantike, oy kʼusi tspas li Jesus sventa sbeiltasutik ta anile. Jaʼ jech jamal vinaj kʼalal tal li tsatsal chamel COVID-19. Epal krixchanoetike mu xa snaʼ kʼusi tspasik, pe li Jesuse oy kʼusi la spas sventa jnaʼtik kʼuxi xuʼ jchabi jbatik. Laj kichʼtik albel ti jtunes jkuvrevokatik kʼalal chijbat ti bu oy ep krixchanoetike xchiʼuk ti mu xijnopaj ta stojolal li yantike. Li moletik ta tsobobbaile laj yichʼik albel ti akʼo skʼoponik batel li jcholmantaletike, ti skʼelik ti oyuk li kʼusi chtun yuʼunike xchiʼuk ti lekuk oyik ta mantale (Is. 32:1, 2). Jech xtok, li ta aʼyejetik yuʼun Jtsop Jbeiltasvaneje te chkichʼtik albel kʼusi to yan skʼan jpastik xchiʼuk tspat koʼontontik.

15. ¿Kʼusitik yan kichʼojtik albel kʼalal lik li chamele, xchiʼuk kʼusitik lek kʼotem ta pasel yuʼun?

¹⁵ Kʼalal jaʼo lik li chamele, laj kichʼtik albel kʼu yelan ta jelubtastik li jtsobajeltike xchiʼuk kʼuxi ta jcholtik mantal. Ta ora noʼox oy kʼusi laj yichʼ pasel sventa ta videoconferenciauk xjelav li jtsobajeltik xchiʼuk li asambleae xchiʼuk ti xichʼ cholel mantal ta karta xchiʼuk ta telefonoe. Li Jeovae yakʼojbe bendision li kʼusitik ta jpastike. Epal Beteletike yalojik ti epajem li jcholmantaletike. Maʼuk noʼox, yuʼun ep ermanoetike lek kʼusi kʼotem ta pasel yuʼunik li ta cholmantale (kʼelo li rekuadro «Chakʼbe bendision Jeova li cholmantale»).

16. ¿Kʼusi skʼan jpʼeluk ta koʼontontik?

¹⁶ Xuʼ van oy ermanoetik tsnopik ti ch-echʼ xa ta mas ti kʼu yelan chal j-organisasiontik ti skʼan jchabi jbatik ta skoj li chamele. Pe kakʼojtik venta ti toj lek li beiltasel kichʼojtik albele (Mat. 11:19). Mi la jnopbetik skʼoplal ti kʼu yelan tsbeiltasutik li Jesuse, xuʼ me jpʼel ta koʼontontik ti chchabiutik li Jeova xchiʼuk li Xnichʼon mu ventauk li kʼusi chtal ta jelavele (kʼelo Ebreos 13:5, 6).

17. ¿Kʼu yelan chavaʼi aba ti jaʼ tsbeiltasot li Jesuse?

¹⁷ ¡Xijmuyubaj tajek ti jaʼ tsbeiltasutik li Jesuse! Te kapal jkʼoplaltik ta jun organisasion ti jmoj tsobolutik akʼo mi jelel jlumaltik, jtsʼunbaltik o jeltos jkʼoptik. Lek makʼlinbilutik ta mantal xchiʼuk lek kichʼojtik chanubtasel sventa jcholtik mantal. Jech xtok, ta jujuntal chkakʼtik persa sventa masuk to xlekub li jtalelaltike xchiʼuk ti jkʼantik li yantike. ¡Xijmuyubaj tajek ta stojolal li Jesukristoe!