4 | Saʼo tojobtaseletik ta Vivlia

¿Kʼusi skʼan xal?

Akʼo mi maʼuk jun livro sventa poxiletik li Vivliae, chakʼ lekil tojobtaseletik sventa junuk noʼox yoʼontonik li buchʼutik ip ta snopbenike. Kalbetik batel skʼoplal junantik skʼelobiltak.

¿Kʼuxi tskoltautik?

«Muʼyuk bu chtun yuʼunik doktor li buchʼutik muʼyuk ipike, jaʼ noʼox chtun yuʼunik li buchʼutik ipike» (MATEO 9:12).

Li Vivliae chalbutik ti skʼan onoʼox jsaʼtik koltael ta stojolal doktor bakʼintike. Ep krixchanoetik ti ip ta snopbenike lek yaʼioj sbaik ti la saʼik jun doktor ti xchanojbe skʼoplal li chamel ta jnopbentike. Yuʼun mas xa snaʼik kʼu yelan skʼan skʼel sbaik.

«Oy onoʼox sbalil kʼalal ta jpastik ejersisioe» (1 TIMOTEO 4:8).

Kʼalal ta jchʼak kʼakʼaltik sventa jnopes jbatik spasel li kʼusi lek chaʼi jbekʼtaltike, jaʼ tskoltautik sventa mu x-ipaj jnopbentik. Jech kʼuchaʼal ti nopajtikuk noʼox jpastik ejersisioe, ti jkʼeltik ti lekuk kʼusitik jlajestike xchiʼuk ti lekuk xijvaye.

«Li oʼontonal ti xmuyubaj noʼoxe jaʼ lekil poxil, pe mi kʼux li koʼontontike, tslajes kipaltik» (PROVERBIOS 17:22).

Mi ta jchantik li tekstoetik ta Vivlia ti tspat koʼontontike xchiʼuk mi oy kʼusitik chkakʼ ta koʼontontik staele, mas to jun koʼontontik. Mi lekik li kʼusitik ta jnoptike, jaʼ tskoltautik sventa junuk noʼox koʼontontik akʼo mi iputik ta jnopbentik.

«Li pʼijilale jaʼ te oy ta stojolal li buchʼutik bikʼit chakʼ sbaike» (PROVERBIOS 11:2).

Xuʼ van oy kʼusitik mu spas avuʼun ta atuk. Jaʼ yuʼun, chʼamo mi oy buchʼu tskʼan tskoltaote. Yikʼaluk van li avamigotak xchiʼuk li avutsʼ avalale oy ta yoʼonton tskoltaoxuk, jaʼ noʼoxe mu snaʼik kʼuxi. Jamal xaval ti kʼuxi chakʼan koltaele. Pe ta smeloluk noʼox. Jech xtok, mu xchʼay xavaʼi ti xatoj ta vokole.

¿Kʼu yelan koltabilik yuʼun Vivlia li buchʼutik ip ta snopbenike?

«Laj kakʼ venta ti muʼyuk lek chkaʼi jbae. Jaʼ yuʼun, libat ta doktor. Li doktorae la xchapbun smelolal ti kʼu yuʼun jech chkaʼi jbae. Jaʼ to te laj kakʼ venta ti ipune. Jech xtok, laj yalbun kʼusitik poxiletik xuʼ jlajes sventa li jchamele» (Nicolea ti ip ta trastorno bipolar).

«Tskoltaun tajek kʼalal ta jchankutik jujun kʼakʼal Vivlia xchiʼuk li kajnile. Ti jech ta jpase jaʼ tskoltaun sventa lekuk noʼox kʼusi jnop jujun kʼakʼal. Kakʼoj venta ti kʼalal chkat tajek koʼontone, jaʼo xa ta jta jun teksto ti tspat tajek koʼontone» (Peter ti ip ta depresión).

«Ta slikebale chikʼexav toʼox ta yalbel yantik ti kʼusi ipun-oe. Pe oy jun kamiga ti laj yaʼi kʼu yelan chkaʼi jbae xchiʼuk ta slekil yoʼonton la skoltaun. Taje jaʼ la skoltaun sventa masuk xa jun koʼonton xchiʼuk ti mu jtukuk xa xkaʼi jbae» (Ji-yoo ti ip ta trastorno alimentario).

«Koliyal li Vivliae, jchʼakojbe xa yorail sventa xi-abtej xchiʼuk ti jkuxe. Jech xtok, skoltaojun sventa mu masuk jvul koʼonton» (Timothy ti ip ta trastorno obsesivo compulsivo).