3 | Kʼelo li loʼiletik ta Vivliae

LI TA VIVLIAE TE TA JTATIK: Sloʼil xkuxlejal krixchanoetik ti jaʼ jech laj yaʼi sbaik kʼuchaʼal li voʼotike (SANTIAGO 5:17).

¿Kʼusi skʼan xal?

Li ta Vivliae ta jtatik sloʼil xkuxlejal viniketik xchiʼuk antsetik ti jelajtik kʼu yelan laj yaʼi sbaike. Mi la jchanbetik li sloʼilike, te chkakʼtik venta ti xuʼ van jech laj yaʼi sbaik kʼuchaʼal li voʼotike.

¿Kʼuxi tskoltautik?

Jkotoltik chtun kuʼuntik ti oyuk buchʼu xaʼibe smelolal ti kʼu yelan chkaʼi jbatike, mas to ti kʼalal iputik ta jnopbentike. Xuʼ van jech laj yaʼi sbaik ek li buchʼutik te chalbe sloʼil xkuxlejalik ta Vivliae. Mi la jchantike, tskoltautik sventa xkakʼtik venta ti mu jtuktikuk ti jech chkaʼi jbatik ta skoj li ansiedad xchiʼuk li vul-oʼontone.

Li Vivliae chalbutik li kʼusi laj yalik junantik viniketik kʼalal tavan xa xaʼiik xkuxlejalik xchiʼuk ti muʼyuk xa yipal laj yaʼi sbaike. ¿Mi oy jech anopoj junuk velta kʼuchaʼal liʼe: «Liʼ noʼox kʼalale, mu xa stsʼik kuʼun»? Taje jaʼ jech laj yaʼi sbaik li Moises, Elias xchiʼuk Davide (Numeros 11:14; 1 Reyes 19:4; Salmo 55:4).
Li Vivliae chalbe skʼoplal Ana ti mu xa noʼox x-echʼ svokol laj yaʼi ta skoj ti mu xil yalabe xchiʼuk ti labanat yuʼun li yan yajnil smalale (1 Samuel 1:6, 10).
Xuʼ van jech chavaʼi aba kʼuchaʼal li Job chal ta Vivliae. Manchuk mi lek tsots xchʼunel yoʼonton, pe laj yat tajek yoʼonton, xi laj yale: «Ta jpʼaj li jkuxlejale, mu xa jkʼan xikuxi» (Job 7:16).

Li krixchanoetik taje tsal yuʼunik li kʼusitik toʼox chopol tsnopike. Li voʼotik eke xuʼ kuʼuntik sjelel li jnopbentik mi ta jkʼeltik ti kʼu yelan la spasike.

Chkoltaat yuʼun Vivlia Li Kevine

Ti kʼu yelan chakʼ jvokol ti anil noʼox chjel jtalelale

«Kʼalal jutuk xa ox mu 50 jabilale, laj yalbeikun ti ipun ta jun chamel ti ta anil noʼox chjel yuʼun jtalelale (trastorno bipolar). Bakʼintike xuʼ tajek kuʼun chkaʼi, pe bakʼintike mi jsetʼuk sbalil chkaʼi li jkuxlejale».

Ti kʼuxi tskoltaun li Vivliae

«Xikoʼolaj tajek chkaʼi kʼuchaʼal li jtakbol Pedroe. Yuʼun bakʼintike muʼyuk sbalil laj yaʼi sba ta skoj ti oy kʼusitik muʼyuk lek bat ta pasel yuʼune. Pe maʼuk noʼox te xnopnun-o ta skoj li kʼusi la spase, yuʼun la saʼ koltael ta stojolal yamigotak ti lek yoʼontonike. Oy junantik kʼakʼal ti chopol tajek chkaʼi jba ta skoj ti anil chjel jtalelale. Kʼalal jaʼo jech taje jaʼ noʼox chkakʼ ta koʼonton li kʼusi muʼyuk lek ta jpase xchiʼuk muʼyuk jbalil chkaʼi jba. Pe jech kʼuchaʼal li jtakbol Pedroe, la jchan ti skʼan jsaʼ koltael ta stojolal li kamigotake. Jaʼ tskoltaikun sventa xkuch batel kuʼun xchiʼuk ti mu xichibaje.

»Jech xtok, ta jnopbe skʼoplal ti kʼu yelan laj yaʼi sba li ajvalil Davide. Ep ta velta jech chat yoʼonton xchiʼuk oy noʼox smul chaʼi sba ta skoj li kʼusitik la spase. Bakʼintike jech chkaʼi jba ek: oy jmul chkaʼi jba ta skoj noʼox li kʼusi la jpas o laj kale. Jaʼ yuʼun, tspat tajek koʼonton li kʼusi laj yal David ta Salmo 51. Li ta versikulo 3, xi laj yale: ‹Jnaʼoj lek ti oy jpaltailtake xchiʼuk skotol ora te oy ta jnopben li jmule›. Jaʼ jech tajek chkaʼi jba kʼalal chkat koʼontone. Muʼyuk xa lek kʼusitik ta jnop ta jtojolal jtuk. Pe bakʼintike ta jnop li kʼusi laj yal David li ta versikulo 10: ‹Dios kuʼun, sakubtasbun koʼonton xchiʼuk achʼubuk li kʼusi oy ta koʼonton sventa skoltaun yoʼ tukʼuk xkakʼ jbae›. Jaʼtik jech ta jkʼanbe li Dios eke: ti akʼo skoltaun ti ximuyubajuk noʼoxe. Ta slajeb une, li ta versikulo 17 tskoltaun tajek, yuʼun xi chale: ‹Dios kuʼun, muʼyuk chapʼaj li buchʼu lilijem tajek chaʼi li yoʼonton xchiʼuk ti vochʼem tajek chaʼie›. Jujun velta kʼalal ta jchane chvul ta jol ti skʼanojun tajek li Jeovae.

»Kʼalal ta jnopbe skʼoplal li skʼelobiltak ta Vivliae xchiʼuk skotol li kʼusi spasoj Dios ta jtojolale, mas to ta jchʼun li kʼusi yaloj tspas ta jelavele. Taje jaʼ tskoltaun sventa xkuch batel kuʼun li jvokole xchiʼuk ti mu xichibaje».