1 | Paso orasion Akʼbo sbain skotol li kʼusi chavul-o avoʼontone

LI KʼUSI CHAL VIVLIAE: «Akʼbeik me sbain skotol li kʼusi chavul-o avoʼontonike, yuʼun oyoxuk ta yoʼonton» (1 PEDRO 5:7).

¿Kʼusi skʼan xal?

Li Jeovae chalbutik ti akʼo jchapbetik li jvokoltike o li kʼusi ta jvul-o koʼontontike (Salmo 55:22). Skʼan jchapbetik Dios li kʼusi ta jvul-o koʼontontike, mu ventauk mi tsots o mi mu masuk. Mi oy kʼusi ta jvul-o koʼontontike, jaʼ jech tsvul yoʼonton li Jeova eke. Li kʼusi baʼyel tskoltautik sventa junuk noʼox koʼontontike jaʼ li orasione (Filipenses 4:6, 7).

¿Kʼuxi tskoltautik?

Kʼalal ip noʼox chkaʼi ta jnopbentike, yikʼal van jtuk tajek chkaʼi jbatik. Yuʼun li yantike mu onoʼox skotoluk velta xaʼibutik ti kʼu yelan chkaʼi jbatike (Proverbios 14:10). Pe li Diose xaʼibutik lek xchiʼuk ta slekil yoʼonton chchikintabutik, jaʼ yuʼun xuʼ jchapbetik skotol ti kʼu yelan chkaʼi jbatike. Li Jeovae te oy sat ta jtojolaltik, snaʼ mi oy kʼusi kʼux chkaʼitik xchiʼuk xojtikin mi oy kʼusi vokol chkaʼitike, jaʼ yuʼun tskʼan ti akʼo jchapbetik ta orasion kʼusiuk noʼox ti ta jvul-o koʼontontike (2 Kronikas 6:29, 30).

Kʼalal ta jkʼopontik Jeovae, mas ta jchʼuntik ti tskʼan chchabiutike. Jaʼ jech chkaʼi jbatik jech kʼuchaʼal li jtsʼibajom ta Vivlia ti xi laj yalbe li Diose: «Aviloj xa li jvokole; avakʼoj xa venta li kʼusitik kʼux tajek chkaʼie» (Salmo 31:7). Kʼalal jnaʼojtik ti xaʼibe lek smelolal Jeova li kʼusi yakal ta jnuptantike, jaʼ chakʼ kipaltik sventa xkuch batel kuʼuntik. Mu teuk noʼox skʼeloj kʼalal chkil jvokoltike, yuʼun tskoltautik sventa jta spatobil koʼontontik ta Vivlia xchiʼuk jaʼ noʼox stuk xaʼibe smelolal ti kʼu yelan chkaʼi jbatike.

Chkoltaat yuʼun Vivlia li Juliane

Ti kʼu yelan chakʼ jvokol li ansiedade

«Chakʼbun tajek jvokol li ansiedade xchiʼuk li kʼusitik chopol chtal ta jnopbene (trastorno obsesivo compulsivo). Akʼo mi lek toʼox oyun, ta anil noʼox mu xa jnaʼ kʼusi ta jpas. Kʼalal jaʼo jun koʼonton chkaʼi jbae, jaʼ to chkaʼie ta jlikel noʼox ti chixiʼ xa tajeke, mas to jech tspasbun kʼalal oy buchʼutik te jchiʼuke, yuʼun ta jvul-o koʼonton li kʼusi tsnopik ta jtojolale.

»Li buchʼutik snaʼojik jvokole chakʼik persa tskoltaikun. Bakʼintike, mu skotoluk lek chkaʼi li kʼusi chalbeikune. Pe ta jtoj ta vokol, yuʼun chakʼik persa tskoltaikun sventa junuk noʼox koʼontone.

»Ta skoj li ansiedad xchiʼuk li kʼusitik toj chopol chtal ta jnopbene, toj vokol xa chkaʼi ta jpas li orasione. Chkakʼ tajek kipal sventa mu xchʼaybun jnopben kʼalal ta jkʼopon Jeovae, yuʼun kiloj ti toj anil chjel li kʼusitik ta jnope. Vaʼun, jecheʼ xa noʼox xichʼayet chikom. Kʼalal jech chkʼot ta pasele, mu xa jnaʼ kʼuxi chkalbe Jeova li kʼusi ta jnope xchiʼuk ti kʼu yelan chkaʼi jbae».

Ti kʼuxi tskoltaun li Vivliae

«Li ta Vivliae la jchan ti mu toj persauk ti jal jpas orasione o ti ep xa kʼusi xkalbe li Diose. Bakʼintike, kʼalal mu x-albej kuʼun chkaʼi ti kʼu yelan chkaʼi jbae, xi noʼox chkalbee: ‹Jeova, koltaun avokoluk›. Manchuk mi jaʼ noʼox jech chkal, jnaʼoj ti xaʼibun smelolal li Jeovae xchiʼuk chakʼbun li kʼusi chtun kuʼune. Maʼuk noʼox ta jpas orasion, jsaʼoj koltael ta doktoretik xtok ti lek xtojobike. Avie ximuyubaj tajek, yuʼun chkaʼi ti tskoltaun li jpoxile xchiʼuk ti ta jpas orasione. Kakʼoj tajek persa ta jpas orasion sventa xinopaj ta stojolal li Jtot ta vinajele, yuʼun jnaʼoj ti skʼanojune xchiʼuk ti tskʼan tskoltaune».