2 | «Tspat koʼontontik li Tsʼibetike»

LI KʼUSI CHAL VIVLIAE: «Skotol li kʼusitik laj yichʼ tsʼibael ta voʼnee laj yichʼ tsʼibael sventa jchanubtaseltik, sventa oyuk spatobil koʼontontik ta skoj ti chkuch kuʼuntik xchiʼuk ti tspat koʼontontik li Tsʼibetike» (ROMANOS 15:4).

¿Kʼusi skʼan xal?

Li Vivliae tspat koʼontontik, tskoltautik sventa xkuch kuʼun li jvokoltike xchiʼuk chakʼ kipaltik sventa stsal kuʼuntik li kʼusitik chopol chtal ta jnopbentike. Jech xtok, li Vivliae chal ti poʼot xa xlaj skʼoplal skotol li kʼusi kʼux chkaʼi ta koʼontontike.

¿Kʼuxi tskoltautik?

Stalel onoʼox ti bakʼintike chkat koʼontontik o ta jvul koʼontontik, pe li buchʼutik ipik ta depresión o ta ansiedade skotol kʼakʼal jaʼ jech chil svokolik. ¿Kʼuxi chkoltaatik yuʼun li Vivliae?

Li Vivliae kʼupilik sba kʼusi yichʼoj ti xuʼ jnopbetik skʼoplal sventa mu jaʼuk jnoptik li kʼusitik chopole (Filipenses 4:8). Jaʼ yuʼun, xuʼ jaʼ jnopilanbetik skʼoplal sventa junuk koʼontontik, yuʼun jaʼ tskoltautik sventa mu toj masuk xkat koʼontontik xchiʼuk sventa stsal kuʼuntik li kʼusitik chopol chtal ta jnopbentike (Salmo 94:18, 19).
Li Vivliae tskoltautik sventa mu jnoptik ti mu kʼusi xijtun-oe o ti chʼabal jbaliltike (Lukas 12:6, 7).
Li ta Vivliae ta jtatik jayibuk loʼiletik ti chakʼ kiltik ti mu jtuktik oyutike xchiʼuk chakʼ kiltik ti Diose xaʼibe lek smelolal ti kʼu yelan chkaʼi jbatike, yuʼun jaʼ Jpasvanej kuʼuntik (Salmo 34:18; 1 Juan 3:19, 20).
Li Diose jamal yaloj ta Vivlia ti jun kʼakʼale chlaj skʼoplal skotol li kʼusitik chvul ta joltik ti chakʼ jvokoltike (Isaias 65:17; Apokalipsis 21:4). Li kʼusi yaloj Dios taje xuʼ me skoltautik sventa stsal kuʼuntik li kʼusitik chopol chtal ta joltike.

Chkoltaat yuʼun Vivlia li Jessicae

Ti kʼu yelan chakʼ jvokol li depresione

«Kʼalal kichʼoj 25 jabilale, oy kʼusi tsots la jnuptan (crisis nerviosa), vaʼun laj yalbeikun ti tsots ipun ta depresione. Tsots tajek chakʼbun jvokol li kʼusitik chtal ta jole o te xa jkʼeloj yaʼel li kʼusitik jnuptanoj ta jkuxlejale. Li doktoretike laj yalbeikun ta skoj la li kʼusitik jnuptanoj ta jkuxlejale, nopolik xa kʼusitik chtal ta jol, jaʼ yuʼun ti ipun la ta depresione. Persa la jsaʼ jpoxil xchiʼuk la jsaʼ jun doktor ti xtojob lek sventa skoltaun ta snaʼel ti kʼu yuʼun jaʼ jech chkil jvokole xchiʼuk ti xtukʼib li kʼusitik chopol chtal ta jnopbene».

Ti kʼuxi tskoltaun li Vivliae

«Kʼalal jaʼo likem tajek jdepresione, solel chixiʼ tajek, mu xa jna’ kʼusi ta jpas xchiʼuk mi jaʼuk x-och jvayel. Oy jayibuk akʼobal ta skoj ti xvalkʼuj sutbij li kʼusitik chopol chtal ta jnopbene, solel chilub-o yuʼun. Pe jech kʼuchaʼal Salmo 94:19, li Diose tspatbun koʼonton xchiʼuk tspasbun ta jun koʼonton kʼalal mu xa jnaʼ kʼusi ta jpas yuʼun li jvokole. Jaʼ yuʼun, li ta jteme te kajal jun Jvivlia xchiʼuk jun jlivreta ti te tsakajtik tekstoetik ta Vivlia ti tspatbun koʼontone. Jaʼ yuʼun, kʼalal mu x-och jvayel chkaʼie, jaʼ tspatbun koʼonton li Skʼop Diose.

»Li Vivliae chchanubtasutik ti jpʼajtik li kʼusi chopol chtal ta joltike, yuʼun chopol chil li Diose. Jech kʼuchaʼal liʼe, voʼone ta toʼox jnop ti mu kʼusi xitun-oe xchiʼuk ti mu jta-o ti skʼanikun li yantike, pe laj ne laj kakʼ venta ti mu jechuk chal li Vivliae. Yuʼun li Vivliae chal ti Diose jaʼ jun jkʼanvanej Totil, kʼuxutik ta yoʼonton xchiʼuk tsvul yoʼonton ta jujuntalutik. Laj ne voʼon xa lik jpas ta manta li jnopbene xchiʼuk oy xa jbalil chkaʼi jba jech kʼuchaʼal oy jbalil chilun li Diose. Ti vaʼ yelan kakʼoj persa spasele jaʼ tskoltaun sventa mu kʼusi chopol jnop ta jtojolal.

»Ta jkʼan xa tajek ti xkʼot yorail ti muʼyuk xa kʼusi chopol chtal ta jol xchiʼuk ti chakʼbun jvokole. Jnaʼoj ti ta jelavele chlaj skʼoplal ti iputik ta jnopbentike. Taje jaʼ chakʼbun kipal sventa xkuch batel kuʼun li jvokole yoʼ to chkʼot yorail ti muʼyuk xa chi-ipaj ta depresione».