Li Jeovae tskoltaot kʼalal oy kʼusi chanuptane

1. ¿Kʼusi ti jnaʼojtik leke?

JNAʼOJTIK ti skʼanojutik li Jeovae xchiʼuk tskʼan ti xijmuyubaje (Rom. 8:35-39). Jnaʼojtik xtok ti jaʼ sventa jlekilaltik kʼalal ta jchʼuntik li beiltaseletik ta Vivliae (Is. 48:17, 18). Pe ¿kʼusi xuʼ jpastik kʼalal oy kʼusi ta jnuptantike?

2. ¿Kʼusi van xuʼ jnuptantik, xchiʼuk kʼusi van xuʼ xlik jnoptik?

² Jkotoltik oy onoʼox kʼusi ta jnuptantik. Xuʼ van oy kʼusi tspasbutik o xalbutik junuk kutsʼ kalaltik ti chopol chkaʼitike o xuʼ van muʼyuk xa lek chijtun ta stojolal Jeova ta skoj ti iputike. Xuʼ van xkil jvokoltik ta nikel, nojelal ta voʼ o yan kʼusitik o chkichʼtik kontrainel. Kʼalal jech ta jnuptantike, xuʼ van xi xlik jnoptike: «¿Kʼu yuʼun jech yakal ta jnuptan? ¿Mi yuʼun oy kʼusi chopol jpasoj? ¿Mi yuʼun muʼyuk xa van lek chilun li Jeovae?». Mu me xachibaj mi oy jech chanope, yuʼun ep yajtuneltak Jeova jech snuptanojik (Sal. 22:1, 2; Abak. 1:2, 3).

3. ¿Kʼusi chakʼ jchantik li Salmo 34:19?

³ (Kʼelo Salmo 34:19). Li teksto liʼe oy kʼusi chaʼtos chakʼ jchantik 1) ti chil onoʼox svokol li buchʼu tukʼ chakʼ sbae xchiʼuk 2) ti ta onoʼox xkoltavan li Jeovae. ¿Kʼuxi tskoltautik? Jtose jaʼ ti yalojbutik ti ta onoʼox xkil jvokoltike. Melel onoʼox ti yalojbutik Jeova ti chijmuyubaj mi lijtun ta stojolale, pe taje maʼuk skʼan xal ti muʼyuk xa chkil jvokoltike (Is. 66:14). Li Diose tskʼan ti jaʼuk jnopbetik skʼoplal li kuxlejal chakʼbutik ta tsʼakale (2 Kor. 4:16-18). Yoʼ to mu xkʼot ta pasele, tskoltautik sventa xkuch batel kuʼuntik li jvokoltike (Lam. 3:22-24).

4. ¿Kʼusi ta jchantik li ta xchanobil liʼe?

⁴ Li ta xchanobil liʼe, chkalbetik batel skʼoplal yajtuneltak Jeova ta voʼne xchiʼuk li avie. Jech kʼuchaʼal ta jchantik batele, xuʼ van oy kʼusi ta jnuptantik ta anil. Pe tskoltautik Jeova mi jpatoj koʼontontik ta stojolale (Sal. 55:22). Kʼalal ta jkʼelbetik batel skʼoplale, xiuk xanope: «¿Kʼusi van la jpas ti voʼonuk la jnuptane? ¿Kʼuxi tskoltaun sventa masuk to jpat koʼonton ta stojolal Jeova? ¿Kʼusi chakʼ jchan?».

LI YAJTUNELTAK JEOVA TA VOʼNEE

5. ¿Kʼusi pasbat yuʼun Laban li Jakobe? (Kʼelo li lokʼol ta pajina 1).

⁵ Oy yajtuneltak Jeova ta voʼne ti laj yil svokolike. Kalbetik skʼoplal li Jakobe. Li stote laj yal ti xnupun xchiʼuk li stseb Labane ti jaʼ yutsʼ yalalik ti chichʼik ta mukʼ Jeovae. Albat xtok ti ch-akʼbat bendision yuʼun li Jeovae (Jen. 28:1-4). Li Jakobe jaʼ jech la spas. Bat ta Kanaan ti jaʼ te nakal ti Labane. Oy chaʼvoʼ stsebetak, Lea xchiʼuk Rakel. Li Jakobe lek laj yil li Rakele. Pe sventa x-akʼbat yikʼe, skʼan x-abtej vukub jabil ta stojolal li Labane (Jen. 29:18). Pe muʼyuk akʼbat yikʼ, yuʼun loʼlavan li Labane xchiʼuk jaʼ laj yakʼbe yikʼ li xvixil tseb ti jaʼ li Leae. Kʼalal echʼ jun xemanae, laj yal ti chakʼbe yikʼ Rakel mi ch-abtej to vukub jabil mase (Jen. 29:25-27). Chopol tajek kʼusi pasbat yuʼun li Labane, yuʼun 20 jabil ilbajinat ta abtel (Jen. 31:41, 42).

6. ¿Kʼusi to yan la snuptan li Jakobe?

⁶ Li Jakobe oy to yan kʼusitik la snuptan. Ta skoj ti ep li yutsʼ yalale, muʼyuk lek laj yil sbaik li xnichʼnabtake. Yuʼun la xchonik batel ta mosoil li Josee. Li chaʼvoʼ skeremtak xtok ti jaʼik li Simeon xchiʼuk Levie laj yakʼik ta kʼexlal yutsʼ yalalik xchiʼuk li sbi Jeovae. Jech xtok, kʼalal laj yil li xchaʼvoʼal skerem Rakele, jaʼo cham. Ta tsʼakale, tal viʼnal li ta slumale. Ta skoj taje, li Jakobe bat ta naklej ta Ejipto kʼalal oy xa ox sjabilale (Jen. 34:30; 35:16-19; 37:28; 45:9-11, 28).

7. ¿Kʼu yelan akʼbat ta ilel Jakob ti kʼanbil yuʼun Jeovae?

⁷ Akʼo mi ep kʼusitik la snuptan li Jakobe, jech-o tsots xchʼunel yoʼonton ta stojolal Jeova xchiʼuk xchʼunoj lek ti chkʼot ta pasel li kʼusi albile. Akʼbat ta ilel yuʼun Jeova ti kʼanbile. Akʼo mi ep ta velta loʼlaat yuʼun li Labane, li Jakobe oy noʼox kʼusitik x-ayan yuʼun ta skoj ti akʼbat bendision yuʼun li Jeovae. Jech xtok, laj van stojbe ta vokol Jeova ti laj yilbe sat yan velta li Jose ti voʼne xchamel yaloje. Ta skoj ti lek tajek xil sba xchiʼuk Jeova li Jakobe, kuch yuʼun skotol li kʼusitik la snuptane (Jen. 30:43; 32:9, 10; 46:28-30). Mi lek xkil jbatik xchiʼuk li Jeovae, xuʼ me xkuch kuʼuntik li kʼusitik ta jnuptantike.

8. ¿Kʼusi oy ox ta yoʼonton tspas li ajvalil Davide?

⁸ Li ajvalil Davide muʼyuk la spas li kʼusi oy ox ta yoʼontone. Yuʼun tskʼan ox tsvaʼanbe stemplo li Jeovae. Xi albat yuʼun li j-alkʼop Natan kʼalal laj yalbee: «Paso li kʼusi oy ta avoʼontone, yuʼun liʼ xchiʼukot li melel Diose» (1 Kron. 17:1, 2). ¡Kʼu to van yelan xmuyubaj li David kʼalal laj yaʼi taje! Xuʼ van anil xa lik xchapan li kʼusitik chtune.

9. ¿Kʼusi la spas David kʼalal muʼyuk kʼot ta pasel li kʼusi tskʼan ox tspase?

⁹ Li ta yakʼobalil noʼox taje, li Natane tal skʼel yan velta li Davide, yuʼun albat yuʼun Jeova ti maʼuk la tsvaʼan David li temploe ti jaʼ tsvaʼan li jun xnichʼone (1 Kron. 17:3, 4, 11, 12). ¿Kʼusi la spas li Davide? La sjel li kʼusi snopoj ox tspase. La stsob epal takʼin xchiʼuk laj yakʼbe Salomon li kʼusitik chtun yuʼun sventa li abtelale (1 Kron. 29:1-5).

10. Li Jeovae, ¿kʼuxi laj yakʼbe bendision li Davide?

¹⁰ Kʼalal jaʼtik toʼox albat David ti maʼuk tsmeltsan li temploe, li Jeovae la spas jun trato xchiʼuk. Albat ti ch-ajvalilaj-o sbatel osil li snitilulale (2 Sam. 7:16). Li ta achʼ balumile, kʼalal jaʼo chventainvan tal li Ajvalilal yuʼun Dios ta Mil Jabile, labal to van chaʼi David kʼalal mi laj yaʼi ti jaʼ yakal ch-ajvalilaj li jun snitilulale. Li loʼil liʼe chakʼ kiltik ti ta onoʼox xakʼbutik bendision Jeova akʼo mi mu spas kuʼuntik skotol li kʼusi ta jkʼan ta jpastik ta stojolale.

11. ¿Kʼusi bendisionetik la staik li yajtsʼaklomtak Kristo ta baʼyel sigloe? (Echos 6:7).

¹¹ Li yajtsʼaklomtak Kristo ta baʼyel sigloe oy kʼusi la snuptanik. Oy ox ta yoʼontonik ti xlik xa ventainvanuk tal li Ajvalilal yuʼun Diose, pe mu snaʼik bakʼin chkʼot ta pasel (Ech. 1:6, 7). ¿Kʼusi la spasik? Laj yakʼ ta yoʼontonik xcholel li mantale. Kʼalal laj yilik ti yantik xpuk batel ta yantik lumetik li lekil aʼyeje, laj yakʼik venta ti jaʼ yakal ch-akʼbatik bendision yuʼun li Jeovae (kʼelo Echos 6:7).

12. Li yajtsʼaklomtak Kristo ta baʼyel sigloe, ¿kʼusi la spasik kʼalal laj yilik viʼnale?

¹² Li ta baʼyel sigloe, laj yilik viʼnal li jnaklejetik «ta spʼejel balumile» (Ech. 11:28). Laj yil svokolik ek li yajtsʼaklomtak Kristoe. Li totil meʼiletike laj van svul tajek yoʼontonik ta sventa kʼuxi xuʼ tsmakʼlin li yutsʼ yalalike. Li kerem tsebetik ti chlik xa ox snopik chtunik mas ta stojolal Jeovae, yikʼaluk van la snopik mi ta onoʼox spasik o mi muʼyuk to. Mu ventauk li kʼusi la snuptanike, li yajtsʼaklomtak Kristoe jech-o laj yakʼ ta yoʼontonik xcholel mantal xchiʼuk lokʼ ta yoʼontonik yakʼbel yermanotakik ta Judea li kʼusitik oy yuʼunike (Ech. 11:29, 30).

13. ¿Kʼusitik bendisionetik la staik li yajtsʼaklomtak Kristo kʼalal laj yilik viʼnale?

¹³ Kʼalal tsots laj yil svokolik li yajtsʼaklomtak Kristoe, ¿kʼusi bendision la staik? Li buchʼutik akʼbatik li kʼusi chtun yuʼunike laj yil stukik ti chabiatik yuʼun li Jeovae (Mat. 6:31-33). Mas to van nopol laj yaʼi sbaik ta stojolal ermanoetik kʼalal koltaatike. Jech xtok, muyubajik tajek li buchʼutik jeltos kʼu yelan koltavanike (Ech. 20:35). Li Jeovae laj yakʼbe bendision ta skoj ti jech-o chtunik ta stojolal Jeova akʼo mi oy kʼusitik jel ta xkuxlejalik.

14. ¿Kʼusi la snuptanik Bernabe xchiʼuk Pablo, xchiʼuk kʼusi lek kʼot ta pasel yuʼunik? (Echos 14:21, 22).

¹⁴ Li yajtsʼaklomtak Kristo ta baʼyel sigloe ep ta velta laj yichʼik kontrainel, bakʼintike jaʼo kʼalal jun yoʼontonike. Jkʼeltik kʼusi kʼot ta stojolalik li Bernabe xchiʼuk li jtakbol Pablo kʼalal la xcholik mantal ta Listrae. Ta slikebale, lek chʼamatik yuʼun li krixchanoetike xchiʼuk chikintabatik li kʼusi laj yalike. Pe ta tsʼakale, li yajkontraike lik sloʼlabeik sjol li epal krixchanoetik sventa skontrainik li Pablo xchiʼuk Bernabe, laj yakʼbeik ton li Pabloe xchiʼuk la snopik ti chamem xae (Ech. 14:19). Pe li Bernabe xchiʼuk Pabloe batik ta yan lum sventa xcholik mantal. ¿Kʼusi lek kʼot ta pasel yuʼunik? La spasik «ta jchʼunolajel epal krixchanoetik» xchiʼuk la stsatsubtasbe xchʼunel yoʼonton ermanoetik ta skoj li kʼusitik la spasike (kʼelo Echos 14:21, 22). Muʼyuk lubtsaj xchaʼvoʼalik akʼo mi laj yichʼik kontrainel, taje la stabe sbalil li epal krixchanoetike. Li voʼotik eke ta jtatik epal bendisionetik mi muʼyuk chijlubtsaj xchiʼuk mi jech-o ta jcholtik mantale.

LI YAJTUNELTAL JEOVA AVIE

15. ¿Kʼusi chakʼ achan li kʼusi la spas Alexander Macmillan?

¹⁵ Kʼalal skʼan toʼox li 1914, li yajtuneltak Jeovae oy kʼusitik smalaojik chkʼot ta pasel. June jaʼ li ermano Alexander Macmillan ti snopoj xa ox ti chmuy ta vinajel li vaʼ jabile, jech la snopik li yantik eke. Li ta jun mantal la sjelubtas ta septiembre ta 1914, xi laj yale: «Yikʼaluk van jaʼ xa slajeb jdiskurso liʼe». Pe mu jechuk kʼot ta pasel. Ta mas tsakale, xi la stsʼibae: «Oy buchʼutik la jnoptik ti chijbat noʼox ta vinajele». Xi to laj yale: «Li kʼusi skʼan xkakʼ ta koʼontontik spasele jaʼ ti xijtun ta stojolal Kajvaltike». Taje jaʼ li kʼusi la spase. Laj yakʼ ta yoʼonton xcholel mantal, la spatbe yoʼonton li ermanoetik ti tikʼajtik ta chukele xchiʼuk muʼyuk laj yikta tsobajeletik akʼo mi oy xa ox sjabilal. Ti kʼu to sjalil liʼ kuxul ta balumile tun bu kʼalal xuʼ yuʼun ta stojolal Jeova. Jaʼ yuʼun, xi la stsʼiba kʼalal poʼot xa ox xcham li ta sjabilal 1966: «Avie jech-o tsots xchʼunel koʼonton». Li buchʼutik oy xa kʼuk sjalil kuchem tal yuʼune, ep me kʼusi xuʼ xchanbeik li ermanoe (Ebr. 13:7).

16. ¿Kʼusitik la snuptanik ta anil li ermano Jennings xchiʼuk yajnile? (Santiago 4:14).

¹⁶ Epal ermanoetik yakal chil svokolik ta chamel. Jech kʼuchaʼal li ermano Herbert Jennings laj yal ti xmuyubajik kʼalal tunik ta misioneroal ta Ghana xchiʼuk li yajnile.b Pe ta tsʼakale, albat ti tsakbil la ta jtots chamel ta sjole. Li ermano Jennings xi laj yalbe skʼoplal li kʼusi tsnuptane: «Muʼyuk jmalaojkutik li kʼusi la jnuptankutike». Li ermanoe jaʼ laj yalbe skʼoplal li kʼusi chal Santiago 4:14 (kʼelo). Xi la stsʼibae: «Laj kiktakutik komel Ghana xchiʼuk laj kalbekutik kamigotakutik ti chisut ta jlumalkutike, vaʼun lisutkutik batel ta Canadá sventa xkichʼ poxtael». Li Jeovae la skolta li ermano Jennings xchiʼuk yajnil sventa jechuk-o tukʼ xtunik ta stojolal akʼo mi tsots kʼusi yakal tsnuptanik.

17. ¿Kʼuxi staojbe sbalil yantik ermanoetik?

¹⁷ Li kʼusi laj yal li ermano Jennings li ta sloʼile la stabe sbalil li yantike. Xi chal jun ermanae: «Stuk noʼox jech ti kʼu yelan la spatbun koʼontone. Kʼalal laj kakʼ venta ti kʼu yelan laj yikta li kʼusi toʼox sbainoj ta s-organisasion Jeova li ermano Jennings ta skoj ti ipe la stijbun koʼonton sventa mu jaʼuk mas jnopbe skʼoplal li kʼusi yakal ta jnuptane». Xi laj yal yan ermanoe: «Lajuneb toʼox jabil chitun ta mol ta tsobobbail, pe kʼalal li-ipaj ta jole laj kikta. Muʼyuk xa jbalil laj kaʼi jba, jaʼ yuʼun mu xa jkʼan jchan li sloʼil ermanoetike. Pe kʼalal laj kil ti kʼu yelan kuch yuʼun li ermanoe la stsatsubtasbun koʼonton». Taje chakʼ ta ilel ti xuʼ jpatbetik yoʼonton yantik kʼalal chkuch kuʼuntik li kʼusitik ta jnuptantik ti muʼyuk bu jech jmalaojtike. Pe mi kuch kuʼuntike, xuʼ me stsatsubtasbe xchʼunel yoʼonton yantik xchiʼuk xuʼ xkuch yuʼunik ek li kʼusi tsnuptanike (1 Ped. 5:9).

18. ¿Kʼusi chakʼ jchantik li kʼusi la spas li ermana ta Nigeriae? (Kʼelo li lokʼoletik ti skʼelobil noʼoxe).

¹⁸ Li vokoliletik laj yakʼ li tsatsal chamel COVID-19 laj yil-o svokol li ermanoetike. Jun ermana ta Nigeria ti chamem smalale, jutuk xa tajek sveʼelik xchiʼuk stakʼinik. Jun veltae, kʼalal juteb xa ox s-arosike jakʼbat yuʼun stseb kʼusi tslajesik mi laje. Li ermanae laj yalbe stseb ti muʼyuk xa sveʼelik xchiʼuk stakʼinike ti jaʼ xa noʼox skʼan xchanbeik stalelal li meʼon ants ta Sareptae. Jaʼ xa noʼox tslajesik li uni juteb arose, mi laje jaʼ xa noʼox tspat yoʼontonik ta stojolal Jeova (1 Rey. 17:8-16). Kʼalal muʼyuk toʼox snopojbeik skʼoplal kʼusi tslajesik li vaʼ kʼakʼale kʼot akʼbatikuk sveʼelik yuʼun li ermanoetike. ¡Li veʼlil akʼbatike x-echʼ-o yuʼunik mas ta chib xemana! Li ermanae laj yakʼ venta ti laj yaʼi Jeova li kʼusi laj yalbe yuni tsebe. Jamal xvinaj mi laj pat koʼontontik ta stojolal Jeovae mas tsnopajesutik ta stojolal mi oy kʼusi la jnuptantike (1 Ped. 5:6, 7).

19. ¿Kʼusi la snuptan li Alexéi Yershov?

¹⁹ Leʼ xa kʼu sjalil tale, epal ermanoetik muʼyuk snopojik mi chichʼik kontrainel. Kalbetik skʼoplal jun ermano ta Rusia ti Alexéi Yershov sbie. Kʼalal jaʼo laj yichʼ voʼ li ta 1994, xuʼ toʼox spasbeik yabtel Jeova li ta slumale. Pe ta tsʼakale, oy kʼusi jel li ta Rusiae. Li ta sjabilal 2020, junantik polisiaetike ochik ta sna li ermano Yershov, chajbat ta kʼelel li snae xchiʼuk ichʼbat batel li kʼusitik oy yuʼune. Kʼalal echʼ xa ox jayibuk ue, li j-abteletike laj yalik ti oy la smul li ermanoe, yuʼun jech la chakʼ ta ilel ta jun video. Li kʼusi mas toj chopole jaʼ ti jaʼ spasoj gravar jun krixchano ti mas ta jun jabil laj yichʼ estudio xchiʼuk ti oy ta yoʼonton mantal yileluke. ¡Chopol tajek li kʼusi pasbate!

20. ¿Kʼusi la spas li ermano Yershov sventa masuk to lek xil sba xchiʼuk li Jeovae?

²⁰ ¿Mi la stabe sbalil li ermano Yershov li kʼusi la snuptane? Laj, yuʼun mas xa lek xil sba xchiʼuk li Jeovae. Xi chale: «Nopolik noʼox jmoj ta jpaskutik orasion xchiʼuk li kajnile. Jnaʼoj ti manchuk tskoltaunkutik li Jeovae mu xkuch kuʼunkutik jechuke». Xi to chale: «Li xchanel Vivliae la skoltaun sventa mu xichibaj. Ta jnopbe skʼoplal li kʼusitik la snuptan li yajtuneltak Jeova ta voʼnee. Ep loʼiletik ta Vivlia chakʼ ta ilel ti tsots skʼoplal ti junuk noʼox koʼontontike xchiʼuk ti jpat koʼontontik ta stojolal Jeovae».

21. ¿Kʼusi la jkʼeltik li ta xchanobil liʼe?

²¹ ¿Kʼusi la jkʼelbetik skʼoplal li ta xchanobil liʼe? Jaʼ mi la jpat koʼontontik ta stojolal Jeovae, jech-o tskoltautik mu ventauk li kʼusitik ta jnuptantike. Yuʼun xi chalbutik li teksto ti bu lokʼem li mantal liʼe: «Toj ep svokol li buchʼu tukʼ yakʼoj sbae, pe chkoltaat yuʼun Jeova ta skotol li svokole» (Sal. 34:19). Jaʼ yuʼun, mu me jaʼuk xkakʼ ta koʼontontik li kʼusitik ta jnuptantike, mas lek ti jaʼuk xkakʼ ta koʼontontik ti xuʼ skoltautik li Jeovae. Mi jech ta jpastike, xuʼ me xi chkaltik kʼuchaʼal li jtakbol Pabloe: «Oy jtsatsal sventa jpas skotol ta skoj li buchʼu chakʼbun juʼele» (Filip. 4:13).