Masuk to xlekub li j˗orasiontike

1. ¿Kʼusi chalbutik Jeova ti akʼo jpastike? (Kʼelo xtok li lokʼoletike).

¿BUCHʼU xuʼ jkʼanbetik koltael kʼalal chtun kuʼuntik beiltasel xchiʼuk patbel koʼontontike? Jnaʼojtik ti jaʼ noʼox li Jeovae, yuʼun chalbutik ti jechuk jpastike, xi chalbutik li ta Skʼope: «Skotoluk me ora xapasik orasion» (1 Tes. 5:17). Xuʼ xkalbetik ti akʼo sbeiltasutik li ta jkuxlejaltike (Prov. 3:5, 6). Ta skoj ti toj lek yoʼonton li Jeovae, mu ventauk jaykoj jkʼopontik.

2. ¿Kʼusi chkalbetik batel skʼoplal li ta xchanobil liʼe?

² Li orasione jaʼ jun matanal yakʼojbutik li Jeovae. Ta skoj ti mu masuk xijxokobe, bakʼintike vokol van chkaʼitik xchʼakbel yorail sventa jchiʼintik ta loʼil li Jeovae. Yikʼaluk van ta jnoptik ti skʼan to mas xlekub ti kʼu yelan ta jpastik orasione. Pe li Vivliae tskoltautik sventa spas kuʼuntik. Li ta xchanobil liʼe, ta jkʼeltik kʼusi xuʼ jchanbetik Jesus ti la xchʼakbe lek yorail spasel orasione. Ta jkʼeltik batel xtok voʼtos li kʼusi tskoltautik sventa masuk to xlekub li j˗orasiontike.

LI JESUSE LA XCHʼAKBE LEK YORAIL SPASEL ORASION

3. ¿Kʼusi snaʼoj onoʼox li Jesuse?

³ Li Jesuse snaʼoj ti tsots skʼoplal chil orasion li Jeovae. Kʼalal skʼan toʼox xtal ta balumile, laj yil kʼu yelan tstakʼbe s˗orasion yajtuneltak li Stote. Kʼalal te toʼox ta vinajel xchiʼuk li Stote, laj yil ti la stakʼbe s˗orasion Ana, David, Elias xchiʼuk li yantike (1 Sam. 1:10, 11, 20; 1 Rey. 19:4˗6; Sal. 32:5). Jaʼ yuʼun, li Jesuse laj yalbe yajchankʼoptak ti nopolikuk noʼox spasik orasione xchiʼuk ti ta onoʼox xtakʼbatik yuʼun li Jeovae (Mat. 7:7˗11).

4. ¿Kʼusi laj yakʼ jchantik li Jesuse?

⁴ Li Jesuse la xchanubtas yajchankʼoptak ti kʼu yelan skʼan spasik orasione. Ti kʼu sjalil la spasbe yabtel Jeova li’ ta balumile nopolik noʼox la spas orasion. La xchʼakbe lek yorail spasel orasion, yuʼun mu noʼox xokob ta skoj ti chtal saʼatuk yuʼun li krixchanoetike (Mar. 6:31, 45, 46). Sob chlik sventa xchiʼin ta loʼil li Stote (Mar. 1:35). Jun veltae la spas orasion sjunul akʼobal ta skoj ti oy kʼusi tsots skʼoplal skʼan xkʼot ta nopel yuʼune (Luk. 6:12, 13). Kʼalal poʼot xa ox xchame, li Jesuse ep ta velta la skʼopon li Jeovae, yuʼun snaʼoj ti poʼot xa ox kʼusi tsots tsnuptane (Mat. 26:39, 42, 44).

5. ¿Kʼuxi xuʼ jchanbetik li Jesuse?

⁵ Li Jesuse laj yakʼbutik ta ilel ti akʼo mi ep kʼusitik ta jpastik skʼan jchʼakbetik yorail skʼoponel li Jeovae. Jech kʼuchaʼal la spas li Jesuse yikʼaluk van skʼan jsabetik yorail sventa jpastik orasion: xuʼ van skʼan mas sob xijlik o mas akʼobal xijvay. Mi jech ta jpastike, chkakʼbetik ta ilel Jeova ti tsots skʼoplal chkiltik li orasione. Jun ermana ti Lin sbie tstoj tajek ta vokol ti laj yaʼi ti xuʼ xchiʼin ta loʼil Jeova ta orasione. Xi chale: «Kʼalal laj kaʼi ti ta skotol ora chchikinta j˗orasion li Jeovae, jaʼ xa kamigo laj kaʼi xchiʼuk laj kakʼ persa ti masuk to xlekub li j˗orasione». Jech van chkaʼi jbatik jech kʼuchaʼal li ermanae. Jkʼelbetik batel skʼoplal voʼtos ti kʼusi xuʼ xkaltik ta j˗orasiontike.

VOʼTOS TI KʼUSI XUʼ XKAL TA J˗ORASIONTIKE

6. Jech kʼuchaʼal chal Apokalipsis 4:10, 11, ¿kʼusi sta˗o li Jeovae?

⁶ Jkʼupil kʼoptatik li Jeovae. Li jtakbol Juane akʼbat yil 24 ta voʼ moletik ti yakal chichʼik ta mukʼ Jeova te ta vinajele, yakal tskʼupil kʼoptaik xchiʼuk xi chalike: «Xata˗o albel amukʼulal, ichʼel ta mukʼ xchiʼuk oy ajuʼel» (kʼelo Apokalipsis 4:10, 11). Li anjeletik eke ep srasonal yuʼunik ti skʼupil kʼoptaik xchiʼuk ti xichʼik ta mukʼ li Jeovae, yuʼun te xchiʼukik ta vinajel xchiʼuk xojtikinik lek. Te chilbeik stalelaltak li ta kʼusitik spasojane, jaʼ yuʼun chlokʼ ta yoʼontonik skʼupil kʼoptael (Job 38:4˗7).

7. ¿Kʼutik yelan xuʼ jkʼupil kʼoptatik Jeova li ta j˗orasiontike?

⁷ Li voʼotik eke skʼan jkʼupil kʼoptatik Jeova kʼalal ta jchiʼintik ta loʼile. Taje jaʼo kʼalal chkalbetik li kʼusitik kʼupil sba chkiltik ta stojolale. Kʼalal ta jchantik li Vivliae, kakʼtik persa sabel stalelaltak ti mas kʼupilik sbae (Job 37:23; Rom. 11:33). Mi laje, kalbetik Jeova ti kʼu yelan chkaʼi jbatik ta sventa li stalelaltake. Xuʼ jkʼupil kʼoptatik Jeova xtok kʼalal tskoltautike o kʼalal tskolta li kermanotaktike. Ta onoʼox xchabiutik xchiʼuk muʼyuk chiktautik li Jeovae (1 Sam. 1:27; 2:1, 2).

8. ¿Kʼusitik xuʼ jtojbetik ta vokol li Jeovae? (1 Tesalonisenses 5:18).

⁸ Jtojbetik ta vokol Jeova. Ep kʼusitik xuʼ jtojtik ta vokol li ta j˗orasiontike (kʼelo 1 Tesalonisenses 5:18). Jtojbetik ta vokol Jeova skotol li kʼusitik lekik yakʼojbutike, yuʼun jaʼ te chlik tal ta stojolal (Sant. 1:17). Xuʼ jtojbetik ta vokol li kʼupil sba balumil yakʼojbutike, li labal sba spasbentake, li jkuxlejaltike, li kutsʼ kalaltike, li kamigotaktike xchiʼuk li spatobil koʼontontike. Xuʼ jtojbetik ta vokol xtok ti xuʼ xkamigointike.

9. ¿Kʼu yuʼun vokol chkaʼitik ti jtojtik ta vokole?

⁹ ¿Kʼusitik srasonal oy kuʼuntik sventa jtojbetik ta vokol li Jeovae? Taje mu kʼunuk ta pasel, yuʼun li krixchanoetik avie mu snaʼ stojik ta vokol. Yuʼun jaʼ noʼox tsaʼik li kʼusi tskʼanike. Mi jech ta jpastike, jaʼ xa noʼox me ta jkʼanilan ta j˗orasiontik li kʼusi tskʼan koʼontontike. Sventa mu jechuk xkʼot ta pasele, jnopes jbatik ta stojbel ta vokol Jeova skotol li kʼusitik yakʼojbutike (Luk. 6:45).

10. ¿Kʼusi koltaat˗o jun ermana ta skoj ti snaʼ stoj ta vokole? (Kʼelo xtok li lokʼole).

¹⁰ Kʼalal jnaʼtik stojel ta vokole, tskoltautik sventa xkuch kuʼuntik li jvokoltike. Kalbetik skʼoplal li ermana Kyung˗sook ti te chalbe sloʼil xkuxlejal li ta revista Li Jkʼel osil ta toyol ta 15 yuʼun enero ta 2015. Li ermanae tsots ip ta kanser ta spulmon. Xi chale: «Toj kʼux laj kaʼi xchiʼuk la jnop ti te xa noʼox kʼalale, lixiʼ tajek». ¿Kʼusi koltaat sventa xkuch batel yuʼune? Kʼalal skʼan toʼox xvaye, jujun akʼobal chmuy ta sjol sna sventa spas orasion. Vaʼun, tstojbe ta vokol Jeova voʼtos li kʼusitik lek kʼot ta stojolal li vaʼ kʼakʼale. Taje jaʼ ch˗akʼbat˗o jun oʼontonal xchiʼuk chtijbat˗o yoʼonton sventa xalbe Jeova ti skʼanoj tajeke. Li ermanae laj yil stuk ti ta onoʼox skolta yajtuneltak Jeova kʼalal jaʼo chil tsots svokolike xchiʼuk laj yakʼ venta ti ta xakʼbe bendision yajtuneltak akʼo mi chil svokolik. Jech kʼuchaʼal li Kyung˗sook ep srasonal kuʼuntik ek sventa jtojbetik ta vokol li Jeovae akʼo mi chkiltik jtosuk preva. Kʼalal ta jtojbetik ta vokol li Jeovae, tskoltautik sventa xkuch kuʼuntik xchiʼuk junuk noʼox koʼontontik.

11. ¿Kʼu yuʼun skʼan oyuk yipal yoʼontonik li yajchankʼoptak Jesuse?

¹¹ Jkʼanbetik yipal koʼontontik Jeova sventa jcholtik mantal. Kʼalal jutuk xa ox skʼan sut muyel ta vinajel li Jesuse, la svulesbe ta sjol yajchankʼoptak ti skʼan xcholik mantal «ta Jerusalen, ta sjunul Judea, ta Samaria xchiʼuk kʼalal to ta namal balumil» (Ech. 1:8; Luk. 24:46˗48). Ta tsʼakal jutuke, li jnitvanejetik ta relijion yuʼun judaetike la xchukik batel Pedro xchiʼuk Juan, vaʼun laj yikʼik batel ta stojolal li Sanedrine. Albatik ti akʼo xiktaik li cholmantale xchiʼuk sibtasatik (Ech. 4:18, 21). ¿Kʼusi la spasik li chaʼvoʼ jtakboletike?

12. Jech kʼuchaʼal chal Echos 4:29, 31, ¿kʼusi la spas li jchankʼopetike?

¹² Xi la stakʼik li Pedro xchiʼuk Juane: «Mi tukʼ chil Dios ti jaʼ ta jchikintakutik li kʼusi chavalike ti jaʼ muʼyuk ta jchikintabekutik li Diose, voʼot xanaʼ atukik. Pe li voʼonkutike mu xuʼ xkikta jbakutik ta yalel li kʼusi kilojkutik xchiʼuk li kʼusi kaʼiojkutike» (Ech. 4:19, 20). Kʼalal lokʼik ta chukel li chaʼvoʼ jtakboletike, la stsob sbaik xchiʼuk li yan jchankʼopetike. Jmoj la skʼoponik Jeova sventa xkoltaatik yoʼ jechuk˗o spasbeik li kʼusi tskʼan yoʼontone. Xi laj yalike: «Koltao sventa oyuk stsatsal yoʼontonik xalik batel akʼop li amosotake». Li Jeovae la stakʼbe li s˗orasionike (kʼelo Echos 4:29, 31).

13. ¿Kʼusi chakʼ jchantik li kʼusi la spas li Jin˗hyuk?

¹³ Xuʼ me jchanbetik stalelal jchankʼopetik mi laj kichʼtik albel yuʼun j˗abteletik ti mu xa jcholtik mantale. Taje jaʼ li kʼusi la spas Jin˗hyuk jun ermano ti laj yichʼ tikʼel ta chukel ta skoj ti tukʼ yakʼoj sba ta stojolal Jeovae. Li ta chukinabe jaʼ chichʼbe batel li kʼusitik chtun yuʼun li yan jchukeletike. Pe jaʼ noʼox naka bat yakʼanbe ta anil, mu xuʼ xcholbe mantal, jaʼ yuʼun la skʼanbe Jeova ti akʼo x˗akʼbat yipal yoʼonton sventa snaʼuk kʼuxi xuʼ xcholanbe mantale (Ech. 5:29). Xi chale: «Li Jeovae la stakʼbun li j˗orasione, laj yakʼbun yipal koʼonton xchiʼuk jpʼijil. Koliyal taje, la jlikes epal estudioetik akʼo mi uni 5 minuto noʼox ta jchiʼinan ta loʼil ta stiʼ xchukinabik. Li ta akʼobaltike ta jtsʼiba kartaetik sventa xkakʼbe ta yokʼomal li jchukeletike». Jech kʼuchaʼal la spas li Jin˗hyuk jkʼanbetik Jeova yipal koʼontontik xchiʼuk jpʼijiltik sventa skoltautik ta spasel li kabteltike.

14. ¿Kʼusi tskoltaot sventa stsal avuʼun li vokoliletike? (Salmo 37:3, 5).

¹⁴ Kalbetik Jeova ti skoltautik sventa jtsal li jvokoltike. Ep buchʼutik chil svokolik ta skoj ti chamem yutsʼ yalalike, chichʼik kontrainel, ipik noʼox xchiʼuk oy svokol ta yutsʼ yalalik. Li tsatsal chamel xchiʼuk li paskʼope mas to tsatsajem˗o yuʼun li vokoliletike. Jaʼ yuʼun, albo Jeova li kʼusi oy ta avoʼonton jech kʼuchaʼal kʼalal chavalbe junuk avamigoe. Teuk me ajol ti ta onoʼox skoltaot li Jeovae (kʼelo Salmo 37:3, 5).

15. ¿Kʼuxi tskoltautik orasion sventa xkuch kuʼuntik kʼalal oy kʼusi tsots ta jnuptantike? Albo junuk skʼelobil.

¹⁵ Kʼalal xijvokolet ta jpastik orasione, tskoltautik sventa xkuch kuʼuntik kʼalal ta xkil jvokoltike (Rom. 12:12). Li Jeovae snaʼoj li kʼusi tsnuptan li yajtuneltake xchiʼuk «chchikintabe kʼalal xvokolet tskʼanik koltaele» (Sal. 145:18, 19). Taje jech la snuptan jun prekursora ti 29 sjabilal ti Kriste sbie, yuʼun ta anil noʼox tsots ipaj. Ta skoj taje ipaj ta depresión. Ta tsʼakale, laj yaʼi ti muʼyuk xa xpoxil xchamel li smeʼe. Xi chale: «Jujun kʼakʼal xivokolet ta jkʼanbe kipal li Jeovae. Oy kʼusitik la jpas sventa lekuk oyun ta mantal: chibat ta skotol tsobajeletik xchiʼuk ta jchan Jvivlia xchiʼuk vunetik». Xi to chale: «Li orasione la skoltaun kʼalal jaʼo chkil tsots jvokole. La spatbun koʼonton ti jnaʼoj ti muʼyuk onoʼox chiktaun jtuk li Jeovae. Akʼo mi muʼyuk lipoxtaj ta anil, laj onoʼox stakʼbun j˗orasion li Jeovae, yuʼun laj yakʼbun jun oʼontonal». Teuk me ta joltik ti «snaʼoj Jeova kʼu yelan tskolta lokʼel ta preva li buchʼutik lek ch˗ichʼat ta mukʼ ta sjunul yoʼontonike» (2 Ped. 2:9).

16. ¿Kʼu yuʼun chtun kuʼuntik ti skoltautik Jeova sventa stsal kuʼuntik li prevaetike?

¹⁶ Jkʼanbetik Jeova ti skoltautik ta stsalel li prevaetike. Ta skoj ti jmulavilutike, vokol chkaʼitik ta stsalel li kʼusitik chopole. Li Satanase chakʼ tajek persa sventa mu kʼunuk xkaʼitik stsalel li prevaetike, yuʼun tskʼan tsokes jnopbentik ta chopol chʼayob oʼontonaletik. Ta skoj taje, chakʼ ti jaʼuk xlik jnoptik li kʼusitik ibalik sbae xchiʼuk ti muʼyuk xa lek xilutik li Jeovae, vaʼun xuʼ xlik jpastik˗o tsatsal muliletik (Mar. 7:21˗23; Sant. 1:14, 15).

17. ¿Kʼusi to yan skʼan jpastik sventa stsal kuʼuntik li prevaetike? (Kʼelo xtok li lokʼoletike).

¹⁷ Mu onoʼox stsal kuʼuntik ta jtuktik li prevaetike. Jaʼ yuʼun, ta jkʼantik tskoltautik li Jeovae. Li Jesuse xi laj yal li ta s˗orasione: «Mu me xavakʼ xiyalkutik ta mulil, jaʼ lek koltaunkutik sventa mu xi˗ochkutik ta skʼob li Satanase» (Mat. 6:13). Li Jeovae tskʼan tskoltautik, pe skʼan jkʼanbetik. Mu baluk noʼox ti jpastik orasione, yuʼun skʼan xkakʼ kipaltik sventa mu yolbajuk jpastik li kʼusi xuʼ xakʼutik ta prevae, yuʼun li sbalumil Satanase noj ta kʼusitik chopol (Sal. 97:10). Sventa jchabi xchiʼuk jnojes jnopbetik ta kʼusitik leke, skʼan jchantik li Vivliae, xijbat ta tsobajeletik xchiʼuk jcholtik mantal. Vaʼun, li Jeovae muʼyuk chakʼ ti xkichʼtik akʼel ta preva ti mu xa stsʼik kuʼuntike (1 Kor. 10:12, 13).

18. ¿Kʼusi skʼan jpastik?

¹⁸ Sventa tukʼuk xkakʼ jbatik ta stojolal Jeova li ta slajebal kʼakʼale, skʼan masuk to jpastik orasion. Tskʼan ti xkalbetik skotol li kʼusi oy ta koʼontontike (Sal. 62:8). Jaʼ yuʼun, chʼakbo yorail jujun kʼakʼal sventa ta sjunul avoʼonton xakʼopon. Kʼupil kʼoptao xchiʼuk tojbo ta vokol li kʼusitik tspas ta atojolale. Kʼanbo yipal avoʼonton sventa xachol mantal, albo ti akʼo skoltaot sventa xkuch avuʼun li avokoltake xchiʼuk li prevaetike. Mu xavakʼ ti oyuk kʼusi smakot sventa mu xa xakʼopon li Jeovae. Pe ¿kʼuxi tstakʼ j˗orasiontik li Jeovae? Taje jaʼ ta jkʼelbetik skʼoplal li ta yan xchanobile.