XCHANOBIL 21
¿Kʼu yelan tstakʼ j˗orasiontik li Jeovae?
«Jnaʼojtik ti ta jtatik li kʼusitik la jkʼanbetik ta skoj ti jaʼ la jkʼanbetike» (1 JUAN 5:15).
KʼEJOJ 41 Avokoluk, Dios, chikintabun j˗orasion
LI KʼUSI TA JCHANTIKEa
1, 2. ¿Kʼusi ta jakʼbe jbatik bakʼintik?
¿MI OY ajakʼojbe aba mi ta onoʼox stakʼbot aorasion li Jeovae? Mi jeche, mu atukuk. Epal ermanoetik jaʼ jech sjakʼojbe sbaik, mas to kʼalal jaʼo chil svokolike. Xuʼ van vokol chkaʼitik yakʼel venta ek mi ta onoʼox stakʼbutik j˗orasiontik Jeova kʼalal jaʼo chkil jvokoltike.
2 Li ta xchanobil liʼe, ta jkʼeltik batel kʼu yuʼun xuʼ jchʼuntik ti ta onoʼox stakʼbe s˗orasion yajtuneltak li Jeovae (1 Juan 5:15). Jech xtok, ta jkʼeltik batel kʼu yuʼun muʼyuk tstakʼ yilel bakʼintik j˗orasiontik li Jeovae xchiʼuk kʼu yelan tstakʼ.
XUʼ VAN JELEL KʼUXI TSTAKʼBUTIK LI JEOVAE
3. ¿Kʼu yuʼun tskʼan Jeova ti jkʼopontike?
3 Li Vivliae chalbutik ti skʼanojutik tajek li Jeovae xchiʼuk ti ep jbalil chilutike (Ajeo 2:7; 1 Juan 4:10). Jaʼ yuʼun, chalbutik ti jkʼopontike xchiʼuk ti jkʼanbetik koltaele (1 Ped. 5:6, 7). Tskʼan tskoltautik sventa xijnopaj ta stojolal xchiʼuk tskoltautik sventa xkuch kuʼuntik li jvokoltike.
Li Jeovae la stakʼbe s˗orasion David kʼalal la spoj ta stojolal li yajkontratake. (Kʼelo parafo 4).
4. ¿Kʼuxi jnaʼojtik ti ta onoʼox stakʼbe s˗orasion yajtuneltak li Jeovae? (Kʼelo xtok li lokʼole).
4 Li ta Vivliae, te chkiltik kʼu yelan la stakʼbe s˗orasion yajtuneltak li Jeovae. Yikʼaluk van chtal ta joltik li ajvalil Davide, yuʼun tskʼan ox chmilat yuʼun yajkontratak. Pe nopolik no’ox tskʼopon Jeova sventa skʼanbe koltael. Jun veltae xi laj yalbee: «Kajval Jeova, chikintao li j˗orasione; chikintao ti xivokolet ta jkʼan akʼo xakoltaune. Takʼbun ta skoj ti tukʼ chavakʼ abae xchiʼuk ta skoj li atukʼilale» (Sal. 143:1). Li Jeovae la stakʼbe li s˗orasione xchiʼuk la spoj ta stojolal li yajkontratake (1 Sam. 19:10, 18˗20; 2 Sam. 5:17˗25). Jaʼ yuʼun, xi laj yal ta sjunul yoʼonton li Davide: «Li Jeovae nopol oy ta stojolal skotol li buchʼutik tskʼanbeik vokole». Jech oxal, xuʼ jchʼuntik ti tskoltautik li Jeova eke (Sal. 145:18).
Li Jeovae la skolta Pablo sventa xkuch yuʼun li svokole. (Kʼelo parafo 5).
5. ¿Mi laj onoʼox stakʼbe s˗orasion Jeova li yajtuneltake? Albo junuk skʼelobil. (Kʼelo xtok li lokʼole).
5 Yikʼaluk van li Jeovae mu jechuk tstakʼ j˗orasiontik kʼuchaʼal jmalaojtike. Taje jaʼ jech la snuptan li jtakbol Pabloe, yuʼun yakal chil svokol ti xkoʼolaj kʼuchaʼal pajal chʼix ta sbekʼtale. Jaʼ yuʼun, oxib to velta xvokolet la skʼanbe Jeova ti xlokʼesbate. ¿Mi takʼbat li s˗orasione? Takʼbat. Pe mu jechuk kʼuchaʼal smalaoje, yuʼun muʼyuk xlokʼesbat li chʼix ta sbekʼtale, jaʼ noʼox akʼbat yipal sventa jechuk˗o tukʼ xtun ta stojolal (2 Kor. 12:7˗10).
6. ¿Kʼu yuʼun muʼyuk tstakʼbutik j˗orasiontik yilel li Jeovae?
6 Yikʼaluk van muʼyuk tstakʼbutik j˗orasiontik Jeova jech kʼuchaʼal jmalaojtik oxe. Pe teuk ta joltik ti snaʼoj kʼu yelan xuʼ skoltautik li Jeovae, yuʼun li stuke «x˗echʼ to ta xakʼbutik li kʼusi ta jkʼantike o li kʼusi jnopojtike» (Efes. 3:20). Jaʼ yuʼun, li Jeovae xuʼ jelel ti kʼu yelan tstakʼbutik o jaʼo tstakʼbutik kʼalal muʼyuk jmalaojtike.
7. ¿Kʼu yuʼun skʼan jeltik li kʼusi ta jkʼan ta j˗orasiontik bakʼintike? Albo junuk skʼelobil.
7 Kʼalal mi laj kaʼibetik smelolal li kʼusi oy ta yoʼonton li Jeovae, yikʼaluk van skʼan jeltik li kʼusi la jkʼanbetike. Kalbetik skʼoplal li ermano Martin Poetzinger. Kʼalal jaʼtik toʼox snupunele, laj yichʼ takel batel ti bu tspasik tsatsal abtel li jnazietike. Ta slikebale, la skʼanbe Jeova ti akʼo xlokʼesat ta chukel sventa xbat xchiʼuk yajnil xchiʼuk xchol mantal yan veltae. Pe kʼalal echʼ xa ox chib xemanae muʼyuk chtakʼbat yilel li s˗orasione. Li ermano Poetzinger xi la skʼanbe li Jeovae: «Avokoluk, koltaun sventa jnaʼ li kʼusi chakʼan akʼo jpase». Vaʼun, lik snopbe skʼoplal li kʼusi yakal tsnuptan li yan ermanoetik ti te tikʼajtik ta chukel eke, yuʼun ep buchʼutik yakal chat yoʼontonik ta skoj yajnilik xchiʼuk xnichʼnabik. Li ermanoe xi laj yalbe li Jeovae: «Kolaval ti oy kʼusi yan laj avakʼ jbaine, koltaun yoʼ jtsatsubtas xchiʼuk jpatbe yoʼonton li kermanotake». Taje jaʼ li kʼusi la spas li baluneb jabil te chukule.
8. ¿Kʼusi skʼan teuk ta joltik kʼalal ta jpastik orasione?
8 Li Jeovae ta onoʼox xkʼot ta pasel li kʼusi oy ta yoʼontone, yuʼun chakʼbe slajeb li vokolil, chamel, lajelal, nikeletik, nojelal ta voʼ xchiʼuk yan kʼusitik. Sventa spas taje jaʼ tstunes li Ajvalilal svaʼanoje (Dan. 2:44; Apok. 21:3, 4). Pe li Jeovae yakʼojbe to sventain balumil li Satanase (Juan 12:31; Apok. 12:9).b Ti tauk slokʼesbe svokol krixchanoetik li Jeovae, xuʼ van lek yilel ti kʼu yelan ch˗ajvalilaj li Satanase. Akʼo mi skʼan jmalatik sventa xkʼot ta pasel li kʼusitik yaloj Jeovae, maʼuk skʼan xal ti muʼyuk tskoltautike. Jkʼeltik batel kʼusi yakal tspas ta jtojolaltik li Jeovae.
¿KʼUTIK YELAN TSTAKʼ J˗ORASIONTIK LI JEOVAE?
9. ¿Kʼuxi tskoltautik Jeova kʼalal oy kʼusi ta jnop ta jpastike? Albo junuk skʼelobil.
9 Chakʼ jpʼijiltik. Li Jeovae yalojbutik ti chakʼ jpʼijiltik sventa lekuk kʼusi xkʼot ta nopel kuʼuntike. Mas to kʼalal oy kʼusi tsots skʼoplal ta jnop ta jpas ta jkuxlejaltik jech kʼuchaʼal mi chijnupun o mi muʼyuk (Sant. 1:5). Jkʼelbetik sloʼil jun ermana ti Maria sbie.c Xmuyubaj noʼox chtun ta prekursora regular kʼalal jaʼo laj yojtikin jun ermanoe. Xi chalbutike: «Ta tsʼakale, laj kamigoin jbakutik. Vaʼun, lek laj kil jbakutik. Pe jnaʼoj ti oy kʼusi skʼan jpase. Jaʼ yuʼun, laj kalbe Jeova ti kʼu yelan chkaʼi jbae. Ta jkʼan ti sbeiltasune, pe jnaʼoj ti voʼon onoʼox ta jnop jtuk li kʼusi skʼan jpase». Li Mariae laj yakʼ venta ti takʼbat s˗orasion xchiʼuk akʼbat spʼijil yuʼun li Jeovae. ¿Kʼu yelan koltaat? La sabe skʼoplal li ta jvuntike, vaʼun la sta mantaletik ti jaʼ koltaat˗oe. Jech xtok, akʼbat lekil beiltaseletik yuʼun smeʼ ti jaʼ stestigo Jeova sventa xakʼ venta mi melel skʼanoj li ermanoe. Jaʼ yuʼun, lek kʼusi kʼot ta nopel yuʼun li Mariae.
¿Kʼuxi chakʼ kipaltik Jeova sventa xkuch kuʼuntik li kʼusi ta jnuptantike? (Kʼelo parafo 10).
10. Jech kʼuchaʼal chal Filipenses 4:13, ¿kʼuxi tskolta yajtuneltak li Jeovae? Albo junuk skʼelobil. (Kʼelo xtok li lokʼole).
10 Chakʼ kipaltik sventa xkuch kuʼuntik. Jech kʼuchaʼal la spas ta stojolal li jtakbol Pabloe, li Jeovae chakʼ kipaltik sventa xkuch kuʼuntik li jvokoltike (kʼelo Filipenses 4:13). Jkʼeltik avil kʼuxi la skolta jun ermano ti Benjamin sbie. Ta skeremal onoʼox epal jabil te oyik ta África xchiʼuk yutsʼ yalal ta skoj ti jatavemik lokʼel ta slumalike. Xi chale: «Nopolik noʼox ta jkʼopon Jeova xchiʼuk ta jkʼanbe ti xakʼbun kipal sventa jaʼuk jpas li kʼusi lek chile. La stakʼbun j˗orasion kʼalal laj yakʼbun jun oʼontonal, yipal koʼonton sventa jechuk˗o jcholmantal xchiʼuk laj yakʼbun vunetik sventa tsotsun ta mantal». Xi to chale: «Kʼalal la jkʼelbe sloʼil ermanoetik xchiʼuk ti kʼu yelan koltaatik yuʼun Jeova sventa xkuch yuʼun li svokolike, jaʼ la skoltaun sventa mu xilubtsaj xchiʼuk ti jechuk˗o tukʼ xkakʼ jba ta stojolal Jeovae».
¿Mi aviloj kʼu yelan tstunes ermanoetik li Jeova sventa tskoltaote? (Kʼelo parafo 11, 12)d.
11, 12. Li Jeovae, ¿kʼuxi tstunes kermanotaktik sventa tstakʼ j˗orasiontik? (Kʼelo xtok li lokʼole).
11 Tstunes li kermanotaktike. Kʼalal jutuk xa ox skʼan xcham li Jesuse, xvokolet la skʼanbe Stot sventa mu snop krixchanoetik ti yakal chchopol kʼopta li Diose. Vaʼun, li Jeovae la stak tal jun anjel sventa stsatsubtas (Luk. 22:42, 43). Li avi eke, li Jeovae xuʼ skoltautik kʼalal tskʼoponutik talel o chtal svulaʼanutik junuk ermanoe. Jkotoltik xuʼ oy kʼusi xkaltik sventa jpatbetik yoʼonton li kermanotaktike (Prov. 12:25).
12 Kalbetik skʼoplal li kʼusi kʼot ta stojolal jun ermana ti Míriam sbie. Kʼalal jun chib xemana xchamel li smalale, stuk te oy ta sna xchiʼuk chat tajek yoʼonton. X˗okʼolet xchiʼuk oy buchʼu tskʼan chchiʼin ta loʼil. Xi chale: «Muʼyuk xa kipal laj kaʼi sventa oyuk buchʼu jkʼopon batel, jaʼ yuʼun la jkʼopon li Jeovae. Kʼalal jaʼo xi˗okʼolet spasel orasione, jaʼo vul jyamada. La skʼoponun jun mol ta tsobobbail». Li mol ta tsobobbail xchiʼuk yajnile la spatbeik yoʼonton. Li Míriame snaʼoj lek ti jaʼ Jeova la stijbe yoʼonton li ermano sventa xkʼopoj batele.
¿Kʼu yelan tstunes Jeova yan krixchanoetik sventa tskoltaote? (Kʼelo parafo 13, 14).
13. Albo junuk skʼelobil ti kʼu yelan tstunes yan krixchanoetik Jeova sventa stakʼ li j˗orasiontike.
13 Xuʼ stunes krixchanoetik ti muʼyuk chtunik ta stojolale (Prov. 21:1). Bakʼintike, sventa stakʼbe s˗orasion yajtuneltak li Jeovae, tstunes krixchanoetik ti maʼuk yajtuneltake. Taje jaʼ li kʼusi kʼot ta stojolal li Neemiase. Li Jeovae la stunes ajvalil Artajerjes sventa xakʼbe permiso Neemias yoʼ sut ta Jerusalen xchiʼuk xchaʼvaʼan li jteklume (Neem. 2:3˗6). Avi eke, li Jeovae xuʼ stunes yan krixchanoetik sventa skoltautik.
14. ¿Kʼuxi tstsatsubtas avoʼonton li sloʼil Soo Hing? (Kʼelo xtok li lokʼole).
14 Jun ermana ti Soo Hing sbie laj yil kʼu yelan la stunes Jeova li doktor ti jaʼ onoʼox chkʼelatike. Li skeremike ta sbikʼtal onoʼox ip ta snopben, jech xtok ta skoj ti toyol bu pʼaj yalele, tsots yayij. Sventa skʼel li skeremike, laj yikta yabtelik. Ta skoj taje, chʼabal xa stakʼinik. Kʼalal mas to tsatsub li svokolike, mu xa snaʼ kʼusi tspasik. Muʼyuk xa yipal laj yaʼiik. Jaʼ yuʼun, li Soo Hing laj yalbe Jeova ti kʼu yelan chaʼi sbae xchiʼuk la skʼanbe koltael. Li doktore laj yil ti tsots yakal chil svokolike. Koliyal taje, koltaatik yuʼun li ajvalile xchiʼuk muʼyuk toyol stojol li na la xchʼamunike. Laje, xi laj yal li Soo Hing: «Laj kakʼkutik venta kʼu yelan la skoltaunkutik li Jeovae, ta melel chchikinta j˗orasiontik» (Sal. 65:2).
SKʼAN OYUK XCHʼUNEL KOʼONTONTIK
15. ¿Kʼusi koltaat˗o jun ermana sventa xakʼ venta ti yakal chtakʼbat li s˗orasione?
15 Li Jeovae muʼyuk ti labal xa sba kʼu yelan tstakʼ li j˗orasiontike, pe ti kʼu yelan tstakʼbutike jaʼ ti tskoltautik sventa tukʼ xkakʼ jbatike. Jaʼ yuʼun, skʼan jkʼeltik kʼu yelan tstakʼ j˗orasiontik li Jeovae. Jun ermana ti Yoko sbie mu xtakʼbat yileluk li s˗orasione. Pe lik stsʼiba ta jlik vun li kʼusi tskʼanbe li Jeovae. Kʼalal la xchaʼkʼel li kʼusi stsʼibaoje, laj yakʼ venta ti takʼbil xa jutuk mu skotoluk li s˗orasione. Junantike mu xa xvul ta sjol mi skʼanoj. Lek onoʼox ti jnopbetik skʼoplal bakʼintik ti kʼu yelan yakal tstakʼ j˗orasiontik li Jeovae (Sal. 66:19, 20).
16. ¿Kʼuxi tskoltautik xchʼunel koʼontontik kʼalal ta jpastik orasione? (Ebreos 11:6).
16 Maʼuk noʼox skʼan oyuk xchʼunel koʼontontik kʼalal ta jpastik orasione, yuʼun bakʼintike mu jechuk tstakʼbutik Jeova kʼuchaʼal ta jkʼantike. Pe mu chopoluk xkaʼitik (kʼelo Ebreos 11:6). Kalbetik skʼoplal li kʼusi kʼot ta stojolalik li Maik xchiʼuk Crisi, jun nupultsʼakal ti oy ox ta yoʼonton chbat tunikuk ta Betele. Xi chal li Maike: «Ep ta velta la jnojes jsolisitudkutik xchiʼuk laj kalbekutik Jeova ti ta jkʼan chibatkutike, pe muʼyuk laj kichʼkutik takel ta ikʼel». Li Maik xchiʼuk Crisie snaʼojik ti jaʼ te ch˗akʼatik yuʼun Jeova ti bu mas jtunel ch˗ilatike. Jech xtok, jech˗o tunik batel ta prekursor regular ti bu chtun mas jcholmantaletike xchiʼuk la skolta sbaik ta svaʼanel salonetik xchiʼuk yan kʼusitik. Avie, chtunik xa ta jkʼelvanej ta sirkuito. Xi chal li Maike: «Li Jeova mu skotoluk velta stakʼojbunkutik jech kʼuchaʼal ta jkʼankutike, pe laj onoʼox stakʼbunkutik xchiʼuk labal sba ti kʼu yelan stakʼojbunkutike».
17, 18. Jech kʼuchaʼal chal Salmo 86:6, 7, ¿kʼusi ti jpʼel ta koʼontontike?
17 (Kʼelo Salmo 86:6, 7). Li Davide jpʼel ta yoʼonton ti ch˗aʼibat xchiʼuk chtakʼbat s˗orasion yuʼun li Jeovae. Xuʼ jpʼel ta avoʼonton ek. Li ta chanobil liʼe, la jkʼeltik ti xuʼ xakʼbutik jpʼijiltik xchiʼuk kipaltik Jeova sventa xkuch kuʼuntik li jvokoltike. La jkʼeltik xtok ti xuʼ stunes kermanotaktik o yan krixchanoetik ti muʼyuk chtun ta stojolal sventa skoltautike.
18 Li Jeovae xuʼ van mu skotoluk velta tstakʼ j˗orasiontik jech kʼuchaʼal ta jkʼantike, akʼo mi jech ta onoʼox stakʼbutik. Chakʼbutik li kʼusi chtun kuʼuntik chile xchiʼuk li kʼusi ora sta˗o chile. Jaʼ yuʼun, jechuk˗o me jpastik orasion xchiʼuk jpʼeluk ta koʼontontik ti ta onoʼox xchabiutik Jeova avi xchiʼuk ti chakʼbutik li kʼusi tskʼan koʼontontike (Sal. 145:16).
KʼEJOJ 46 Kolaval, Jeova
a Li Jeovae ta onoʼox stakʼbutik j˗orasiontik mi ta jkʼanbetik jech kʼuchaʼal tskʼane. Kʼalal chkil tsots jvokoltike, jchʼunojtik lek ti ta onoʼox skoltautik Jeova sventa tukʼuk xkakʼ jbatike. Li ta xchanobil liʼe, ta jkʼeltik batel kʼu yelan tstakʼ j˗orasiontik li Jeovae.
b Li ta mantal «Mu me xchʼay ta koʼontontik ti toj tsots skʼoplal li mukʼul pasmantal yuʼun Jeovae», ti lokʼ li ta revista Li Jkʼel osil ta toyol ta junio ta 2017 te chalbe skʼoplal kʼu yuʼun yakʼoj to akʼo sventain balumil Satanas li Jeovae.
c Jelbil li jlom biiletike.
d LI KʼUSI XVINAJ TA LOKʼOLE: Jun meʼil xchiʼuk jun stseb kʼotik ta jun jteklum ta skoj ti jatav lokʼel ta slumalike. Li ermanoetike ta slekil yoʼonton chʼamvanik xchiʼuk koltavanik.