XCHANOBIL 49
¿Mi ta van stakʼbun j-orasion li Jeovae?
«Chatalik, chakʼanbeikun vokol xchiʼuk chataikun ta kʼoponel, vaʼun ta jchikintaboxuk» (JER. 29:12).
KʼEJOJ 41 Avokoluk, Dios, chikintabun j-orasion
LI KʼUSI TA JCHANTIKEa
1, 2. ¿Kʼu van yuʼun ta jnoptik ti muʼyuk tstakʼ j-orasiontik li Jeovae?
«KʼUPILUK tajek xavaʼi ti chatun ta stojolal Jeovae, vaʼun chakʼbot li kʼusi tskʼan avoʼontone» (Sal. 37:4). ¡Toj kʼupil sba li kʼusi chale! Pe ¿mi jaʼ van skʼan xal ti chakʼbutik ta anil skotol li kʼusi ta jkʼanbetik li Jeovae? Lek onoʼox ti jnopbetik skʼoplal taje. Kalbetik avaʼi skʼoplal junchibuk li kʼusi xuʼ xkʼot ta pasele. Jun ermana ti muʼyuk to nupuneme chalbe Jeova ti tskʼan chbat ta Chanob vun sventa j-al lekil aʼyejetik yuʼun Ajvalilal yuʼun Diose, pe manchuk mi echʼ xa ox jayibuk jabil, muʼyuk xtakat ta ikʼel. Jun kerem ti ip tajeke tskʼanbe Jeova ti xkole sventa masuk to x-abtej li ta tsobobbaile, pe muʼyuk bu xpoxtaj-o. Jun nupultsʼakal tskʼanbeik Jeova ti mu xikta mantal li skeremike, pe laj onoʼox yikta mantal.
2 Yikʼaluk van oy kʼusi akʼanojbe Jeova ti muʼyuk yakʼojbot-oe. Jaʼ yuʼun, xuʼ van xanop ti jaʼ noʼox tstakʼbe s-orasion li yantike o chanop ti oy van kʼusi muʼyuk lek la apase. Taje jaʼ jech laj yaʼi sba jun ermana ti Yanis sbie.b Li Yanis xchiʼuk smalale laj yalbeik Jeova ti tskʼan chtunik ta Betele. Xi chal li Yanise: «Jmalaoj mi chitakekutik noʼox ta ikʼele». Kʼalal echʼ jayib uetik xchiʼuk jabile, muʼyuk bu xtakatik-o ta ikʼel. Xi chal li Yanise: «La jvul tajek koʼonton. La jnop mi oy kʼusi chopol la jpas. Yuʼun jamal laj kalbe ta j-orasionkutik li kʼusi ta jkʼankutike, pe mu jnaʼ kʼu yuʼun ti muʼyuk la stakʼbunkutike».
3. ¿Kʼusi ta jkʼeltik batel li ta xchanobil liʼe?
3 Bakʼintike ta van xanop mi ta onoʼox xchikinta Jeova li aorasione. Taje jaʼ jech laj yaʼi sbaik junantik yajtuneltak Dios ta voʼne (Job 30:20; Sal. 22:2; Abak. 1:2). ¿Kʼusi xuʼ skoltaot sventa xanaʼ mi ta onoʼox stakʼ aorasion li Jeovae? (Sal. 65:2). Sventa xkaʼibetik smelolale, jkʼelbetik batel skʼoplal liʼe: 1) ¿kʼusi tspas Jeova kʼalal ta jkʼopontike? 2) ¿kʼusi oy ta yoʼonton Jeova ti akʼo jpastike? xchiʼuk 3) ¿kʼu yuʼun skʼan jeltik bateltik li kʼusi ta jkʼan ta j-orasiontike?
LI KʼUSI TSPAS JEOVAE
4. Jech kʼuchaʼal chal Jeremias 29:12, ¿kʼusi yaloj tspas li Jeovae?
4 Li Jeovae jamal chal ti ta onoʼox xchikinta li j-orasiontike (kʼelo Jeremias 29:12). Li Jeovae skʼanoj li yajtuneltake xchiʼuk persa onoʼox chchikintabe li s-orasionike (Sal. 10:17; 37:28). Pe taje maʼuk skʼan xal ti chakʼbutik skotol li kʼusi ta jkʼanbetike. Xuʼ van oy jlom li kʼusi ta jkʼanbetike jaʼ to chakʼbutik li ta Paraisoe.
5. ¿Kʼusi tstsak ta venta Jeova kʼalal chchikinta li j-orasiontike?
5 Kʼalal tstakʼ j-orasiontik li Jeovae, tstsak ta venta li kʼusi oy ta yoʼonton tspase (Is. 55:8, 9). Li kʼusi oy ta yoʼontone jaʼ ti xnoj ta krixchanoetik li balumile, ti xakʼ sbaik ta ventainele, ti xmuyubajikuk noʼox xtunik ta stojolale xchiʼuk ti jmojuk noʼox oyike. Pe li Satanase laj yal ti jaʼ to jun koʼontontik mi ta jventain jba jtuktike (Jen. 3:1-5). Sventa xakʼ ta ilel Jeova ti mu meleluk li kʼusi laj yal Diabloe, laj yakʼ permiso ti sventain sba stuk li krixchanoetike. Ta skoj taje, ep chkil jvokoltik li avie (Ekl. 8:9). Jnaʼojtik onoʼox ti muʼyuk bu chchapan skotol jvokoltik avi li Jeovae. Ti jechuk tspase, xuʼ van oy buchʼutik tsnop ti lek onoʼox ti sventain sba stuk li krixchanoetike xchiʼuk ti xchapaj yuʼunik li vokoliletike.
6. ¿Kʼu yuʼun skʼan jchʼuntik ti tukʼ kʼusi tspas Jeova xchiʼuk ti skʼanojutike?
6 Li Jeovae jelajtik kʼu yelan tstakʼbe s-orasion yajtuneltak manchuk mi koʼol li kʼusi tskʼanike. Kʼalal tsots ipaj li ajvalil Esekiase, la skʼanbe Jeova ti xpoxtaate, vaʼun poxtaat onoʼox (2 Rey. 20:1-6). Pe kʼalal xvokolet Pablo ti xlokʼesbat li chʼix ta sbekʼtale, ti tsakbil van ta jtosuk chamele, li Jeovae muʼyuk la xpoxta (2 Kor. 12:7-9). Kalbetik skʼoplal xtok kʼusi la snuptanik li jtakbol Santiago xchiʼuk Pedroe. Li ajvalil Erodese tskʼan ox tsmil yaʼi xchaʼvoʼal. Li ermanoetike la spasik orasion ta stojolal Pedro xchiʼuk laj van spasik ta stojolal li Santiago eke, akʼo mi jech, laj onoʼox yichʼ milel li Santiagoe. Jaʼuk li Pedroe kuxul kom ta skoj ti koltaat yuʼun Jeovae (Ech. 12:1-11). Xuʼ van ta jnoptik ti kʼu yuʼun jaʼ noʼox koltaat li Pedroe. Manchuk mi muʼyuk bu chal li Vivliae, xuʼ jpʼel ta koʼontontik ti muʼyuk onoʼox tspas kʼusi muʼyuk tukʼ li Jeovae xchiʼuk ti skʼanoj xchaʼvoʼale (Deut. 32:4; Apok. 21:14).c Bateltike, mu jechuk chkichʼtik takʼbel j-orasiontik kʼuchaʼal ta jkʼantike. Pe muʼyuk chopol chkaʼitik ti kʼu yelan tstakʼ j-orasiontik li Jeovae, yuʼun jchʼunojtik ta melel ti skʼanojutik xchiʼuk ti tukʼ kʼusi tspas ta jtojolaltike (Job 33:13).
7. ¿Kʼusi ti mu stakʼ jpastike, xchiʼuk kʼu yuʼun?
7 Chkakʼtik persa ti mu jkoʼoltastik li kʼusi ta jnuptantik xchiʼuk li yantike. Xuʼ van oy kʼusi ta jkʼanbetik Jeova, pe ti muʼyuk chakʼbutike. Pe ta mas tsʼakale, kʼot ta jchikintik ti oy buchʼu yan jech la skʼane xchiʼuk ti akʼbat onoʼoxe. Taje jaʼ jech la snuptan jun ermana ti Anna sbie. Li smalal ti Matiu sbie ip ta kanser, vaʼun li Annae la skʼanbe Jeova ti xpoxtabate. Li vaʼ kʼakʼale, jaʼo ipik ta kanser chaʼvoʼ ermanaetik ti yijik xae. Jaʼ yuʼun, li Annae la spas orasion ta stojolalik ek. Ta mas tsʼakale, poxtajik onoʼox li ermanaetike, pe li Matiue cham. Li Annae la snopbe skʼoplal ti kʼu yuʼun jaʼ la xpoxta Jeova li chaʼvoʼ ermanaetike. Ti mi jaʼ poxtavan li Jeovae, ¿kʼu yuʼun muʼyuk poxtabat li smalale? Manchuk mi mu jnaʼtik lek ti kʼu yuʼun jaʼ poxtaj li ermanaetike, pe li kʼusi jnaʼojtike jaʼ ti jutuk xa skʼan xakʼbe slajeb skotol jvokoltik li Jeovae xchiʼuk ti oy ta yoʼonton chchaʼkuxes li yajtuneltake (Job 14:15).
8. 1) Jech kʼuchaʼal chal Isaias 43:2, ¿kʼuxi tskoltautik li Jeovae? 2) ¿Kʼuxi tskoltautik li orasion kʼalal oy kʼusi ta jnuptantike? (Kʼelo li video Li orasione tskoltautik).
8 Li Jeovae ta onoʼox skoltautik. Li Jtotik Jeovae skʼanojutik xchiʼuk mu skʼan ti xkil jvokoltike (Is. 63:9). Pe muʼyuk onoʼox bu tslajesbe skʼoplal skotol li jvokoltik ti xkoʼolaj ta ukʼum xchiʼuk ta leb kʼokʼe (kʼelo Isaias 43:2). Pe li kʼusi jamal chale, jaʼ ti tskoltautik sventa xkuch kuʼuntik kʼusiuk noʼox vokolal xchiʼuk ti muʼyuk chkil-o jvokoltik ta sbatel osile. Jech xtok, li Jeovae chakʼbutik xchʼul espiritu sventa xkuch batel kuʼuntik (Luk. 11:13; Filip. 4:13). Jaʼ yuʼun, xuʼ jchʼuntik ti ta onoʼox xakʼbutik Jeova li kʼusitik chtun kuʼuntik sventa xkuch batel kuʼuntik xchiʼuk ti tukʼ-o xijtun ta stojolale.d
LI KʼUSI OY TA YOʼONTON JEOVA AKʼO JPASTIKE
9. ¿Kʼuxi chakʼ ta ilel Santiago 1:6, 7 ti ta onoʼox skoltautik li Jeovae?
9 Li Jeovae tskʼan ti jpat koʼontontik ta stojolale (Ebr. 11:6). Oy van bateltik ti tsots tajek chkil jvokoltik ti xuʼ van ta jnoptik mi ta onoʼox xkoltavan ta melel li Jeovae. Pe li Vivliae jamal chalbutik ti ta xakʼ kipaltik Dios sventa xuʼ xijmuy ta jun muro (Sal. 18:29). Jaʼ yuʼun, mu me teuk xijnaʼet ta sventa li kʼusi tspas ta jtojolaltike, jaʼ lek ta sjunul koʼontontik jpastik orasion xchiʼuk jpat koʼontontik ta stojolal Jeova ti ta onoʼox stakʼ li j-orasiontike (kʼelo Santiago 1:6, 7).
10. Albo junuk skʼelobil ti kʼusi skʼan jpastik mi oy xa ox kʼusi la jkʼantik ta j-orasiontike.
10 Li Jeovae tskʼan ti oyuk kʼusi jpastik kʼalal mi laj xa ox jpastik orasione. Kalbetik skʼoplal jun ermano ti tskʼan chbat ta asamblea rejional xchiʼuk ti tskʼanbe Jeova ti xkoltaat yoʼ x-akʼbat permiso li ta yabtele. ¿Kʼusi van tspas Jeova sventa stakʼbe li s-orasione? Xuʼ van x-akʼbat stsatsal yoʼonton sventa xbat xchiʼin ta loʼil li spatrone. Pe li ermanoe skʼan xbat xchiʼin ta loʼil xchiʼuk skʼan van jech spas jayibuk velta. Xuʼ van xalbe xtok ti xjelbat yorail yabtel xchiʼuk junuk xchiʼil ta abtele o ti mu xa xtojat ti kʼu sjalil chchʼay sbae.
11. ¿Kʼu yuʼun skʼan ep ta velta xkalbetik ta orasion Jeova li kʼusi ta jkʼantike?
11 Li Jeovae tskʼan ti jechuk-o xkalilanbetik ta j-orasiontik li kʼusi ta jvul-o koʼontontike (1 Tes. 5:17). Li Jesuse laj yakʼ ta aʼiel ti mu skotoluk velta chkichʼtik takʼbel ta anil li kʼusi ta jkʼan ta j-orasiontike (Luk. 11:9). Jaʼ yuʼun, ¡mu me xijlubtsaj! Jechuk-o me ta sjunul koʼonton jpastik orasion (Luk. 18:1-7). Kʼalal ep ta velta ta jpastik orasion ta sventa li kʼusi ta jvul-o koʼontontike, jaʼ jech chkakʼbetik yil Jeova ti toj tsots skʼoplal chkiltik li kʼusi ta jkʼanbetike xchiʼuk ti jchʼunojtik ti jaʼ xuʼ skoltautike.
BATELTIKE SKʼAN JELTIK LI KʼUSI TA JKʼAN TA J-ORASIONTIKE
12. 1) ¿Kʼusi van xuʼ jakʼbe jbatik, xchiʼuk kʼu yuʼun? 2) ¿Kʼu yuʼun skʼan xkakʼtik ta ilel ti chkichʼtik ta mukʼ Jeova kʼalal ta jpastik orasione? (Kʼelo li rekuadro «¿Mi chkakʼ ta ilel ti chkichʼ ta mukʼ Jeova kʼalal oy kʼusi ta jkʼanbee?»).
12 Mi muʼyuk laj yakʼbutik Jeova li kʼusi la jkʼanbetike, jnopbetik skʼoplal li oxib sjakʼobiltak liʼe. Li baʼyele: «¿Mi lek van ti jech la jkʼanbee?». Li kʼusi ta jkʼanbetike kalojtik mi jaʼ li kʼusi mas toj leke, pe xuʼ van ta mas tsʼakale chkakʼtik venta ti mu toj lekuk li kʼusi la jkʼanbetike. Oy van jkʼanojbetik Jeova ti xchapan jvokoltik jech kʼuchaʼal ta jkʼantike, pe xuʼ van oy yan xchapanobil ti mas to leke. Bateltik xtoke, oy van kʼusi ta jkʼantik ti mu jechuk oy ta yoʼonton Jeovae (1 Juan 5:14). Kalbetik skʼoplal yan velta li nupultsʼakal laj kaltik ta parafo 1. Li stukike la skʼanbeik Jeova ti akʼo mu xikta mantal li skeremike. Yileluke, lek li kʼusi la skʼanike. Pe ti melel xkaltike, li Jeovae muʼyuk buchʼu tsuj sventa xtun ta stojolal. Yuʼun li Jeovae tskʼan ti xlokʼ ta koʼonton jtuktik ti xkichʼtik ta mukʼe xchiʼuk ti xlokʼ ta yoʼonton stukik ek li alab nichʼnabiletike (Deut. 10:12, 13; 30:19, 20). Vaʼun chaʼa, ¿kʼusi ti mas lek xuʼ skʼanike? Jaʼ ti skʼanbeik Jeova yoʼ xkoltaatik ta xchanubtasel lek li skeremike, ti xlik skʼan li Jeovae xchiʼuk ti xkʼot ta yamigoe (Prov. 22:6; Efes. 6:4).
13. Jech kʼuchaʼal chal Ebreos 4:16, ¿kʼusi ora tskoltautik li Jeovae?
13 Li xchibal sjakʼobile: «¿Mi jaʼ xa van yorail chil Jeova ek ti xakʼbutik li kʼusi la jkʼanbetike?». Bateltike ta jnoptik ti tstakʼbutik noʼox Jeova li j-orasiontike. Pe li Jeovae snaʼoj lek ti kʼusi ora mas lek chakʼbutike (kʼelo Ebreos 4:16). Mi muʼyuk chakʼbutik Jeova li kʼusi la jkʼanbetike, xuʼ van xlik jnoptik ti muʼyuk tstakʼbutike. Pe jaʼ noʼox van chalbutik ti jmalatik toe. Kalbetik skʼoplal yan velta li kerem ti la skʼanbe Jeova ti akʼo xpoxtaate. A ti poxtaatuke, li Satanase xuʼ van la stikʼbe ta sat Jeova ti jaʼ noʼox chtun ta stojolal ta skoj ti la xpoxtae (Job 1:9-11; 2:4). Teuk ta joltik ti Jeovae yakʼojbe xa yorail ti tslajesbe skʼoplal li chameletike (Is. 33:24; Apok. 21:3, 4). Jaʼ yuʼun, li avie muʼyuk bu chpoxtautik Jeova ta skʼelobil juʼelal. Vaʼun chaʼa, ¿kʼusi van la skʼanbe Jeova jechuk li kereme? Jaʼ ti x-akʼbat yipale xchiʼuk ti junuk yoʼonton xkuch batel yuʼun li xchamele xchiʼuk ti jechuk-o tukʼ xtun ta stojolale (Sal. 29:11).
14. ¿Kʼusi chakʼ jchantik li Yanise?
14 Li ermana Yanis ti laj kalbetik skʼoplal ta parafo 2 laj yalbe Jeova ti tskʼan chtun ta Betele. Pe kʼalal echʼem xa ox voʼob jabile, jaʼ to laj yaʼibe smelolal ti kʼu yelan takʼbat s-orasion yuʼun li Jeovae. Xi chale: «Ti vaʼ sjalile, li Jeovae la xchapanun xchiʼuk la skoltaun sventa masuk to xlekub jtalelal. Laj kakʼ venta ti skʼan mas jpat koʼonton ta stojolal Jeovae, ti masuk to xichanunaje xchiʼuk ti ximuyubajuk noʼox mu ventauk bu chitune». Ta mas tsʼakale, li Yanis xchiʼuk smalale lik tunikuk ta jkʼelvanej ta sirkuito. Xi chal li ermanae: «Li Jeovae laj onoʼox stakʼbun j-orasion, pe mu jechuk ti kʼu yelan jmalaoje. Muʼyuk laj kakʼ venta ta anil ti toj echʼ xa noʼox lek ti kʼu yelan la stakʼbune. Ta jtojbe tajek ta vokol ti laj yakʼ ta ilel ti skʼanojune xchiʼuk ti laj yakʼ ta ilel slekil yoʼonton ta jtojolale».
Mi chavakʼ venta ti muʼyuk tstakʼ aorasion li Jeovae, ¿kʼu yuʼun mu yanuk xa kʼusi xakʼanbe? (Kʼelo parafo 15).f
15. ¿Kʼu yuʼun muʼyuk lek bakʼintik mi jtos noʼox li kʼusi ta jkʼan ta j-orasiontike? (Kʼelo xtok li lokʼoletike).
15 Li yoxibal sjakʼobile: «¿Mi jtos noʼox van kʼusi ta jkʼan li ta j-orasione?». Bateltike, mu lekuk mi jtos noʼox li kʼusi ta jkʼan ta j-orasiontike, yuʼun mi moʼoje, yikʼaluk mu xkakʼtik venta li kʼusi oy ta yoʼonton li Jeovae. Kalbetik skʼoplal li ermana ti tskʼan chbat ta Chanob vun sventa j-al lekil aʼyejetik yuʼun Ajvalilal yuʼun Diose. Ti tskʼan chbat li ta chanob vune jaʼ sventa masuk to xkoltavan li ta cholmantale. Akʼo mi jech tskʼanilan-o ta s-orasion, pe ¿kʼusi to van mas xuʼ skʼanbe li Jeovae? Jaʼ ti x-akʼbat yil bu to mas xuʼ xtun ta stojolale (Ech. 16:9, 10). Mi laj xa ox spas orasione, xuʼ sjakʼbe li jkʼelvanej ta sirkuito mi oy junuk tsobobbail ti chtun mas prekursoretik tee o xuʼ stsʼibaj batel ta Betel yoʼ sjakʼ batel bu mas chtun jcholmantaletik.e
16. ¿Kʼusi skʼan jpʼeluk ta koʼontontik?
16 Jech kʼuchaʼal la jchantik xa talele, xuʼ jpʼel ta koʼontontik ti ta onoʼox stakʼ j-orasiontik li Jeovae, yuʼun skʼanojutik xchiʼuk tukʼ kʼusitik tspas (Sal. 4:3; Is. 30:18). Bateltike mu van jechuk tstakʼ j-orasiontik kʼuchaʼal jmalaojtike, pe ta onoʼox xchikinta skotol velta. Skʼanojutik tajek xchiʼuk muʼyuk bu chiktautik (Sal. 9:10). Jaʼ yuʼun, skotoluk-o me ora jpat koʼontontik ta stojolal xchiʼuk jambe koʼontontik kʼalal ta jpastik orasione (Sal. 62:8).
KʼEJOJ 43 Kalbetik koliyal Dios ta orasion
a Li ta xchanobil liʼe, chalbe skʼoplal ti kʼu yuʼun xuʼ jpat koʼontontik ti ta onoʼox stakʼ j-orasiontik ta slekil yoʼonton li Jeovae xchiʼuk ti kʼu yelan sta-o chile.
b Jelbil li jlom biiletike.
c Kʼelo li mantal ti xi sbie: «¿Mi jpatoj koʼontontik ti lek kʼusi tspas li Jeovae?» ti lokʼ li ta revista Li Jkʼel-osil ta toyol ta fevrero ta 2022, parafo 3 kʼalal ta 6.
d Li ta video Li orasione tskoltautik ti te ta jtatik ta jw.org te chakʼ kiltik kʼu yelan tskoltautik Jeova sventa xkuch kuʼuntik li tsatsal prevaetike.
e Mi chakʼan chanaʼ kʼusi skʼan xapas sventa xbat tunan ta yan lum o ta yan estadoe, kʼelo li livro Lek chapalutik ta spasbel yabtel Jeova, ta kapitulo 10, parafo 6 kʼalal ta 9.
f LI KʼUSI XVINAJ TA LOKʼOLETIKE: Chaʼvoʼ ermanaetik tspasik orasion kʼalal skʼan toʼox snojesik li solisitud sventa Chanob vun sventa j-al lekil aʼyejetik yuʼun Ajvalilal yuʼun Diose. Li june take ta ikʼel, pe li june muʼyuk. Pe muʼyuk bu xchibaj-o, yuʼun la spas orasion yan velta sventa snaʼ kʼusi to yan xuʼ spas. Vaʼun, la stak batel jlik karta ta Betel sventa xal ti tskʼan chbat ti bu chtun mas jcholmantaletike.