Jpʼeluk ta avoʼonton ti xmuyubaj avuʼun li Jeovae

1. ¿Kʼusi van xuʼ snop junantik yajtuneltak Jeova?

¡TOJ kʼupil sba ti «lek chil steklumal li Jeovae»! (Sal. 149:4). Bateltike, oy junantik ti chibajem chaʼi sbaike xchiʼuk ti xi tsnopike: «Jnaʼoj lek ti Jeovae xmuyubaj ta stojolal li steklumale, pe ¿mi xmuyubaj van kuʼun li voʼone?». Epal yajtuneltak ta voʼnee, oy bateltik ti vokol laj yaʼiik xchʼunel mi xmuyubaj yuʼunik li Jeovae (1 Sam. 1:​6-10; Job 29:​2, 4; Sal. 51:11).

2. ¿Buchʼutik xmuyubaj yuʼunik li Jeovae?

² Li Vivliae jamal chal ti xuʼ xmuyubaj kuʼuntik Jeova manchuk mi jpas mulilutik. ¿Kʼusi skʼan jpastik? Jaʼ ti xkakʼ xchʼunel koʼontontik ta stojolal Jesukristo xchiʼuk ti xkichʼtik voʼe (Juan 3:16). Taje jaʼ jech chkakʼtik ta ilel ti jsutesoj xa koʼontontike xchiʼuk ti jamal kalojbetik Dios ti ta jkʼan ta jpastik li kʼusi oy ta yoʼontone (Ech. 2:38; 3:19). Kʼalal jech ta jpastike, xmuyubaj me kuʼuntik, yuʼun jaʼ jech chkakʼbetik yil ti ta jkʼan chijkʼot ta yamigoe. Mi chkakʼtik persa ta spasel li kʼusi laj kakʼ ketik kʼalal laj kakʼbe jkuxlejaltike, xmuyubaj me kuʼuntik xchiʼuk chijkʼot ta yamigo (Sal. 25:14).

3. ¿Kʼusitik sjakʼobil ta jkʼelbetik batel skʼoplal li ta xchanobil liʼe?

³ ¿Kʼu yuʼun oy bateltik ti oy junantik tsnopik ti muʼyuk xmuyubaj yuʼunik li Jeovae? ¿Kʼuxi chakʼ ta ilel Jeova ti xmuyubaj kuʼuntike? ¿Kʼusi tskoltautik sventa jpʼeluk ta koʼontontik ti lek chilutike?

JUNANTIKE TSNOPIK TI MUʼYUK XMUYUBAJ YUʼUNIK LI JEOVAE

4, 5. ¿Kʼusi skʼan jpʼeluk ta koʼontontik akʼo mi muʼyuk jbalil chkaʼi jbatik?

⁴ Eputik ti ta jbikʼtaltik onoʼox ti muʼyuk jbalil chkaʼi jbatike (Sal. 88:15). Jun ermano ti Adrian sbie xi chale: «Jech-o ta jnop ti muʼyuk jbalil chkaʼi jbae. Kʼalal bikʼitun toʼoxe ta jkʼanbe Jeova ti xuʼuk xkuxiik ta Paraiso li kutsʼ kalale, pe li voʼone mu jta-o chkaʼi ti te xinakie». Xi chal Tony ta sventa ti kʼu yelan tsʼitesat tal yuʼun stot smeʼ ti maʼuk stestigotak Jeovae: «Muʼyuk bu laj yalbeikun ti skʼanojikune o ti xmuyubajik ta jtojolale. Ta skoj taje, la jnop ti muʼyuk sbalil chilik li kʼusitik ta jpase».

⁵ Mi oy bateltik ti muʼyuk jbalil chkaʼi jbatike, teuk me ta joltik ti jaʼ laj yikʼutik tal Jeova li ta steklumale (Juan 6:44). Li stuke yiloj li jlekil talelaltike manchuk mi mu xkakʼtik venta xchiʼuk xojtikinutik kʼu kelantik ta melel (1 Sam. 16:7; 2 Kron. 6:30). Jaʼ yuʼun, xuʼ jchʼuntik kʼalal chalbutik ti oy jbaliltike (1 Juan 3:​19, 20).

6. ¿Kʼu yelan laj yaʼi sba Pablo kʼalal tsnopbe skʼoplal li kʼusitik chopol spasoje?

⁶ Oy van bateltik ti oy jmul chkaʼi jbatik ta skoj li kʼusitik chopol la jpastik kʼalal muʼyuk toʼox ochemutik ta mantale (1 Ped. 4:3). Yantik xtoke, xuʼ van jal xa chtunik ta stojolal Jeova, pe jech-o chakʼik persa stsalel li kʼusi chopol oy ta yoʼontonike. Li voʼote, ¿mi jaʼ jech oy amul chavaʼi bateltik? Mi jaʼ jeche, xuʼ van spat avoʼonton ti jaʼ jech laj yaʼi sba junantik yajtuneltak Jeova ta voʼne ti tukʼ laj yakʼ sbaike. Jech kʼuchaʼal li jtakbol Pabloe, abol sba laj yaʼi kʼalal chtal ta sjol li kʼusitik chopol spasoje (Rom. 7:24). Akʼo mi sutesoj xa ox yoʼonton xchiʼuk yichʼoj xa ox voʼ tey-o ta sjol ti jaʼ «mas bikʼit ta skotol li jtakboletike» xchiʼuk ti jaʼ mas oy smul laj yaʼi sbae (1 Kor. 15:9; 1 Tim. 1:15).

7. ¿Kʼusi skʼan teuk ta jnopbentik mi ta jsutes koʼontontike?

⁷ Li Jtotik ta vinajele jamal chalbutik ti chakʼutik ta perton mi la jsutes koʼontontike (Sal. 86:5). Jaʼ yuʼun, mi chopol tajek chkaʼi jbatik ta skoj li kʼusitik jpasojtike teuk me ta joltik ti ta onoʼox xakʼutik ta perton ta melel li Diose (Kol. 2:13).

8, 9. ¿Kʼusi xuʼ skoltautik sventa mu xa jnoptik ti muʼyuk sbalil li kʼusitik ta jpastik ta stojolal Jeovae?

⁸ Jkotoltik oy ta koʼontontik ti jpastik ti bu kʼalal xuʼ kuʼuntik sventa xijtun ta stojolal Jeovae. Pe oy junantik ti muʼyuk sbalil chilik li kʼusitik tspasik sventa xmuyubaj yuʼunik li Diose. Xi chal jun ermana ti Amanda sbie: «Jech-o ta jnop ti oy to kʼusi skʼan jpas sventa xitun ta stojolal Jeovae. Jaʼ yuʼun, maʼuk xa noʼox ta jpas ti bu kʼalal xuʼ kuʼune. Pe kʼalal chkil ti mu spas kuʼune, ta jnop ti muʼyuk xa lek chilun li Jeova eke».

⁹ ¿Kʼusi xuʼ skoltautik sventa mu xa jnoptik ti muʼyuk sbalil li kʼusitik ta jpastik ta stojolal Jeovae? Teuk ta joltik ti lek snaʼ xrasonaj li Jeovae xchiʼuk ti muʼyuk tsujutik ta spasel li kʼusi mu xa spas kuʼuntike. Mi jaʼ ta jpastik ti bu kʼalal xuʼ kuʼuntik manchuk mi ep o mi juteb, ep me sbalil ta xil. Teuk ta jnopbentik xtok li yajtuneltak Jeova ta voʼne ti ta sjunul yoʼonton tunik ta stojolale. Jech kʼuchaʼal li Pabloe, ta epal jabil ta smilal xa noʼox kilometro xanav ta spasbel yabtel Jeova xchiʼuk la svaʼan epal tsobobbailetik. Pe ta mas tsʼakale, jel li xkuxlejale xchiʼuk mu xa jechuk yepal ta xchol mantal kʼuchaʼal toʼoxe. ¿Mi muʼyuk xa van xmuyubaj yuʼun li Jeovae? Mu jechuk. Li Pabloe jech-o la xchol mantal ti bu kʼalal xuʼ yuʼune. Vaʼun, jech-o akʼbat bendision yuʼun li Jeovae (Ech. 28:​30, 31). Jaʼ jech li voʼotik eke, mu onoʼox skotoluk ora jech yepal spas kuʼuntik kʼuchaʼal ta jkʼantike, pe li kʼusi mas tsots skʼoplal chil Jeovae jaʼ ti ta sjunul koʼonton ta jpastike. Jkʼeltik batel kʼu yelan chakʼbutik ta ilel Jeova ti xmuyubaj kuʼuntike.

CHAKʼ TA ILEL JEOVA TI XMUYUBAJ KUʼUNTIKE

10. ¿Kʼu yelan chalbutik Jeova ti xmuyubaj kuʼuntike? (Juan 16:27).

¹⁰ Ta Vivlia. Li Jeovae nopem xaʼi chakʼbe yil yajtuneltak ti skʼanojane xchiʼuk ti xmuyubaj ta stojolalike. Li ta Vivliae, te chal ti chib to velta laj yalbe Jesus ti skʼanoje xchiʼuk ti xmuyubaj ta stojolale (Mat. 3:17; 17:5). ¿Mi oy ta avoʼonton ti xalbot Jeova ti xmuyubaj ta atojolal eke? Melel onoʼox ti muʼyuk tskʼoponutik tal ta vinajele, pe tstunes Vivlia sventa skʼoponutik. Kʼalal ta jkʼeltik ta Vivlia li kʼusi laj yalbe yajchankʼoptak li Jesuse, xkoʼolaj ti jaʼ jech chalbutik li Jeova eke (kʼelo Juan 16:27). Li Jesuse lek tajek la xchanbe stalelal li Stote. Jaʼ yuʼun, kʼalal chkiltik ti laj yalbe yajchankʼoptak Jesus ti skʼanojan akʼo mi jpas muliletike, xuʼ jnoptik ti jaʼ jech chalbutik li Jeova eke (Juan 15:​9, 15).

11. Kʼalal ta jnuptantik junuk prevae, ¿mi jaʼ skʼan xal ti muʼyuk xa xmuyubaj kuʼuntik li Diose? (Santiago 1:12).

¹¹ Kʼalal chakʼ li kʼusi chtun kuʼuntike. Li Jeovae oy ta yoʼonton chakʼbutik li kʼusitik chtun kuʼuntike, pe bateltike chakʼ permiso ti xkil jvokoltik jech kʼuchaʼal la snuptan li Jobe (Job 1:​8-11). Kʼalal ta jnuptantik jtosuk prevae, mu me jnoptik ti muʼyuk xa xmuyubaj kuʼuntik li Jeovae, yuʼun jaʼ xuʼ te xkakʼtik ta ilel ti jkʼanojtik tajeke xchiʼuk ti jpatoj koʼontontik ta stojolale (kʼelo Santiago 1:12). Kʼalal oy kʼusi tsots ta jnuptantike, te me chkiltik ti skʼanojutike xchiʼuk chkakʼtik venta ti kʼu yelan tskoltautik sventa xkuch kuʼuntik li jvokoltike.

12. ¿Kʼusi chakʼ jchantik li kʼusi kʼot ta stojolal Dimitrie?

¹² Jkʼeltik kʼusi kʼot ta stojolal li ermano Dimitri ti nakal ta Asiae. Chʼabal kom yabtel. Ta skoj ti muʼyuk la sta noʼox yabtele, kʼot ta nopel yuʼun ti mas chchol mantal sventa xakʼbe yil Jeova ti spatoj yoʼonton ta stojolale. Manchuk mi echʼ jayibuk uetik, muʼyuk la sta-o yabtel. Laje, tsots ipaj xchiʼuk te xa noʼox puchʼul ta stem ch-echʼ yuʼun kʼakʼal. Vaʼun, la snop ti jaʼ jun chopol totile, ti jaʼ jun chopol malalile xchiʼuk ti muʼyuk xa lek ch-ilat yuʼun Jeovae. Pe jun akʼobale, li yuni kʼox tsebe la stsʼiba ta vun li kʼusi chal Isaias 30:15 ti xi chale: «Jaʼ chkʼot ta avipalik mi tsʼijiloxuk noʼoxe xchiʼuk mi apatoj avoʼontonik ta jtojolale». Vaʼun, laj yakʼbe li stote xchiʼuk xi laj yalbee: «Papi, mi chavul avoʼontone, teuk me ta ajol li teksto liʼe». Li Dimitrie laj yakʼ venta ti jaʼ koliyal Jeova ti oy skʼuʼ spokʼik, ti oy sveʼelik xchiʼuk ti oy bu xuʼ xnakiike. Xi chale: «Jaʼ noʼox skʼan ti tsʼijilun noʼoxe xchiʼuk ti jechuk-o jpat koʼonton ta stojolal Diose». Mi jaʼ jech yakal chanuptan eke, xuʼ me jpʼel ta avoʼonton ti tsvul yoʼonton ta atojolal li Jeovae xchiʼuk ti chakʼ avipal sventa xkuch avuʼune.

13. ¿Kʼuxi yan chakʼbutik ta ilel Jeova ti xmuyubaj kuʼuntike?

¹³ Ta stojolal ermanoetik. Li Jeovae xuʼ stijbe yoʼonton yajtuneltak sventa spat koʼontontik kʼalal jaʼo chtun tajek kuʼuntike. Taje jaʼ jech kʼot ta stojolal jun ermana ta Asia ti chʼabal kom yabtele xchiʼuk ti tsots ipaje. Ta tsʼakal xtoke, li smalale la spas tsots smul, vaʼun maʼuk xa mol ta tsobobbail kom. Li ermanae tsots laj yaʼi li kʼusi la snuptane. Xi chale: «Mu jnaʼ kʼu yuʼun ti jech yakal ta jnuptane. La jnop mi oy van kʼusi chopol la jpas xchiʼuk ti muʼyuk xa xmuyubaj kuʼun li Jeovae». Laje, la skʼanbe sprevail ti x-akʼbat iluk ti kʼanbil-oe. ¿Kʼuxi takʼbat li s-orasione? Xi chale: «La xchiʼinikun ta loʼil li moletike xchiʼuk laj yakʼbeikun kil ti jech-o skʼanojun li Jeovae». Ta mas tsʼakal xtoke la xchaʼalbe Jeova ti xkoltaate. ¿Kʼusi kʼot ta pasel? Xi chale: «Li vaʼ kʼakʼale, laj yakʼbeikun karta jayvoʼuk ermanoetik ta tsobobbail. Kʼalal la jkʼele, te laj kakʼ venta ti la xchikintabun j-orasion li Jeovae». Kʼuchaʼal chkakʼtik ventae, kʼalal chakʼ ta ilel slekil yoʼonton li ermanoetike, jaʼ te chvinaj ti xmuyubaj kuʼuntik li Jeovae (Sal. 10:17).

14. Sventa xakʼ ta ilel ti xmuyubaj kuʼuntik li Jeovae, ¿kʼuxi to yan tstunes li kermanotaktike?

¹⁴ Yan ti kʼuxi chakʼ ta ilel ti xmuyubaj kuʼuntik li Jeovae, jaʼo kʼalal tstunes ermanoetik sventa stojobtasutike. Jech kʼuchaʼal li ta baʼyel sigloe la stunes jtakbol Pablo sventa stsʼiba 14 kartaetik ta sventa li yajtsʼaklomtak Kristoe. Li ta kartaetik taje, te yichʼoj tojobtaseletik ti ta xkʼuxul oʼontonal laj yichʼ tsʼibaele. Li Jeovae, ¿kʼu yuʼun ti jech laj yalbe Pablo ti akʼo xtojobtasvane? Yuʼun toj lek yoʼonton xchiʼuk skʼanojutik. Chalbutik mantal «jech kʼuchaʼal jun totil ti tstukʼibtas xnichʼon ti skʼanoje» (Prov. 3:​11, 12). Jaʼ yuʼun, kʼalal chalbutik junuk tojobtasel ta Vivlia li kermanotaktike, mu me jnoptik ti muʼyuk xa xmuyubaj kuʼuntik li Jeovae. Yuʼun jaʼ senyail ti jech-o skʼanojutike (Ebr. 12:6). ¿Kʼuxi to yan chakʼ ta ilel Jeova ti xmuyubaj kuʼuntike?

YAN SPREVAILTAK TI XMUYUBAJ KUʼUNTIK LI JEOVAE

15. ¿Buchʼutik chakʼbe xchʼul espiritu li Jeovae, xchiʼuk kʼusi xuʼ jpʼel ta koʼontontik chkʼot ta pasel mi chkakʼtik ta ilel li talelaletik chakʼ chʼul espiritue?

¹⁵ Li Jeovae jaʼ noʼox chakʼbe xchʼul espiritu li buchʼutik lek chile (Mat. 12:18). Xiuk jnopbetik skʼoplale: «¿Mi xvinaj ta jkuxlejal li talelaletik chakʼ chʼul espiritue?». Jech kʼuchaʼal liʼe, ¿mi mas xa oy smalael avuʼun avi ti xavojtikin xa Jeovae? Kʼalal chavakʼ venta ti xvinaj xa ta akuxlejal li talelaletik chakʼ chʼul espiritue, mas me jpʼel ta avoʼonton ti xmuyubaj avuʼun li Jeovae. (Kʼelo li rekuadro «Li talelaletik chakʼ chʼul espiritue»).

16. Jech kʼuchaʼal chal 1 Tesalonisenses 2:​4, ¿buchʼutik tstunes Jeova sventa xichʼ cholel li lekil aʼyejetike? ¿Kʼu yelan chavaʼi aba ta skoj taje?

¹⁶ Li Jeovae jaʼ chakʼbe sbain xcholel lekil aʼyejetik li buchʼutik lek chile (kʼelo 1 Tesalonisenses 2:4). Taje jaʼ jech laj yakʼ venta li ermana Yoseline. Jun kʼakʼale, kʼalal jaʼo julave, mu kʼusi skʼan spas laj yaʼi. Xi chale: «Muʼyuk kipal laj kaʼi xchiʼuk mu kʼusi jkʼan jpas. Pe prekursoraun xchiʼuk jaʼo skʼakʼalil chilokʼ ta cholmantal. Vaʼun, la jkʼopon Jeova xchiʼuk libat ta cholmantal». Li vaʼ sobe, li Yoseline la xcholbe mantal jun ants ti Mari sbie ti lek yoʼontone xchiʼuk ti la xchʼam chanubtasel ta Vivliae. Kʼalal echʼ jayibuk ue, li Marie laj yalbe Yoselin ti kʼalal kʼot vulaʼanatuke, laj xa onoʼox skʼanbe Dios ti xkoltaate. ¿Kʼusi la xchan Yoselin ti jech la snuptane? Xi chale: «Xkoʼolaj ti xi yakal chalbun li Jeovae: ‹Ximuyubaj avuʼun›». Melel onoʼox ti mu skotoluk krixchano lek chchikintaik li mantal chkalbetike, pe teuk me ta joltik ti xmuyubaj kuʼuntik Jeova kʼalal chil ti chkakʼtik persa ta xcholbel mantal li krixchanoetike.

17. ¿Kʼusi chakʼ achan Viki kʼalal la snopbe skʼoplal li pojelale? (Salmo 5:12).

¹⁷ Li pojelal laj yakʼ Jeovae jaʼ noʼox me tstabeik sbalil li buchʼutik lek xil sba xchiʼuke (1 Tim. 2:​5, 6). Akʼo mi avakʼoj xchʼunel avoʼonton ta sventa li pojelale xchiʼuk mi avichʼoj xa voʼ, ¿kʼusi xuʼ skoltaot mi vokol chavaʼi xchʼunel ti xmuyubaj avuʼun li Jeovae? Teuk ta joltik ti mu onoʼox skotoluk velta lek kʼusi chalbutik li koʼontontike, pe jaʼ xuʼ jpat koʼontontik ta stojolal Jeova. Yuʼun li stuke tukʼ chil xchiʼuk chakʼbe bendision li buchʼutik chakʼ xchʼunel yoʼontonik ta sventa li pojelale (kʼelo Salmo 5:12; Rom. 3:26). Jun ermana ti Viki sbie, jaʼ koltaat-o kʼalal la snopbe skʼoplal ta sventa li pojelale. Akʼo mi vokol chaʼi ta xchʼunel ti kʼanbil yuʼun Jeovae, xi kʼot ta nopel yuʼune: «Jal xa onoʼox yakʼoj ta ilel Jeova ti oy smalael yuʼun ta jtojolale [ . . . ]. Akʼo mi jech, xkoʼolaj ti xi toʼox chkalilanbee: ‹Mu baluk-o chkaʼi ti kʼu yelan akʼanojune. Li pojelal laj yakʼ anichʼone mu baluk-o sventa xchʼay li jmule›». Mi jech la jnopbetik skʼoplal pojelal jech kʼuchaʼal la spas li Vikie, chkakʼtik venta ti skʼanojutik li Jeovae xchiʼuk jpʼel ta koʼontontik ti xmuyubaj kuʼuntike.

18. ¿Kʼusi xuʼ jpʼel ta koʼontontik mi jech-o jkʼanojtik li Jtotik ta vinajele?

¹⁸ Akʼo mi xkakʼ ta jkuxlejaltik skotol li kʼusi la jchantik xa talele, oy van bateltik ti chijchibaje xchiʼuk ta van jnoptik mi lek chilutik li Jeovae. Mi jech chavaʼi abae, teuk me ta ajol ti xmuyubaj ta stojolal «li buchʼutik jech-o chkʼanate» (Sant. 1:12). Jaʼ yuʼun, jechuk-o me xanopaj ta stojolal Jeova xchiʼuk kʼelo kʼusitik spasoj ta atojolal ti chakʼ ta ilel ti xmuyubaj avuʼune. Jech xtok, mu me xchʼay xavaʼi ti muʼyuk onoʼox bu nom oy ta jtojolaltik ta jujuntal li Diose (Ech. 17:27).