Ta onoʼox xlaj skʼoplal li paskʼopetike

LI DIOSE TSLAJESBE SKʼOPLAL LI AJVALILETIKE

Li Diose tslajesbe skʼoplal ta jun paskʼop li ajvaliletike. Li Vivliae chal ti Armajedon sbi li paskʼop taje (Apokalipsis 16:16).a Li vaʼ orae, skotol li ajvaliletik ta spʼejel balumile chichʼik tsobel «li ta paskʼop ta smukʼta kʼakʼalil Dios ti jaʼ li Buchʼu skotol xuʼ yuʼune» (Apokalipsis 16:14). Mi echʼ xa ox li paskʼop ta Armajedone, chlaj-o skʼoplal ta j-echʼel li paskʼopetike.

Mi laj xa ox slajesbe skʼoplal ajvaliletik li Diose, jaʼ xa chlik sventain tal balumil li Ajvalilal svaʼanoj ti te oy ta vinajele xchiʼuk ti muʼyuk chlaj-o skʼoplale (Daniel 2:44). Li Diose stʼujoj xa li buchʼu ch-ajvalilaje, jaʼ li Xnichʼon ti Jesukristo sbie (Isaias 9:​6, 7; Mateo 28:18). Li Ajvalilalb taje jaʼ onoʼox laj yalbe skʼoplal Jesus li ta orasion ti laj yakʼbe xchan yajtsʼaklomtake (Mateo 6:​9, 10). Vaʼun, skotol li krixchanoetike tsobol xa oyik xchiʼuk chakʼ sbaik ta ventainel yuʼun li Jesuse.

Li Jesuse mu xkoʼolaj xchiʼuk li ajvaliletik ta balumile, yuʼun maʼuk tsaʼ li kʼusi tskʼan stuke. Jaʼ jun tukʼil Ajvalil xchiʼuk mu snaʼ xtʼujvan, jaʼ yuʼun tstsak ta venta skotol li krixchanoetike xchiʼuk muʼyuk xa buchʼu chil svokol ta skoj ti jelel slumal o skʼope (Isaias 11:​3, 4). Li Jesuse tskolta skotol li krixchanoetike, jaʼ yuʼun muʼyuk xa srasonal yuʼunik sventa saʼik kʼop. «Tspoj li povreetik ti x-avet tskʼanik koltaele, tspoj xtok li buchʼu bikʼit yakʼoj sbae xchiʼuk li buchʼu muʼyuk jkoltavanej yuʼune. […] Chpojatik kʼalal chichʼik ilbajinele xchiʼuk kʼalal tstsakatik ta kʼope» (Salmo 72:​12-14).

Li Ajvalilal yuʼun Diose tslajesbe skʼoplal skotol li kʼusitik tstunesik ta paskʼop ti smiloj epal krixchanoetike (Mikeas 4:3). Jech xtok, tslajesbe skʼoplal skotol li chopol krixchanoetik ti mu skʼan xiktaik paskʼop xchiʼuk ti chilbajinik li yantike (Salmo 37:​9, 10). Li vinik antsetik xchiʼuk li ololetike jun xa noʼox yoʼontonik buyuk noʼox ti xbatike (Esekiel 34:28).

Mi lik ventainvanuk talel li Ajvalilal yuʼun Diose, ta xlekub xkuxlejal li krixchanoetike. Yuʼun chchʼaybe skʼoplal li kʼusi chlik-o kʼop, jech kʼuchaʼal li povreale, li viʼnale xchiʼuk ti chʼabal lek snaik li krixchanoetike. Ta x-ayan epal lekil veʼliletik xchiʼuk oy xa lek snaik skotol li krixchanoetike (Salmo 72:16; Isaias 65:​21-23).

Li Ajvalilal yuʼun Diose chchʼaybe skʼoplal xtok li vokoliletik yakʼoj li paskʼope, yuʼun chlekub li buchʼutik yayijem komik ta skoj paskʼope xchiʼuk jun xa yoʼontonik li buchʼutik tsvul yoʼontonik o chiʼik ta skoj li kʼusi snuptanojik toʼox ta paskʼope. Jech xtok, li buchʼutik chamemike ta xchaʼkuxiik talel (Isaias 25:8; 26:19; 35:​5, 6). Jmoj xa oyik li jujun utsʼ alalile xchiʼuk muʼyuk xa chvul ta sjolik li vokolil la snuptanik ta skoj li paskʼope (Apokalipsis 21:4).

LI DIOSE TSLAJESBE SKʼOPLAL LI MULILE

Mi lik spas talel mantal li Ajvalilal yuʼun Diose, li krixchanoetike jmoj xa chichʼik ta mukʼ li melel Dios Jeovaec ti jaʼ «li Dios ti chkʼanvane xchiʼuk ti chakʼ jun oʼontonale» (2 Korintios 13:11). Li krixchanoetike muʼyuk xa ta yoʼontonik tsaʼik kʼop (Isaias 2:​3, 4; 11:9). Yuʼun li buchʼutik chakʼ ta xkuxlejalik li smantaltak Diose chkʼotik ta tukʼil krixchano (Romanos 8:​20, 21).

LI DIOSE TSLAJESBE SKʼOPLAL LI SATANAS XCHIʼUK SPUKUJTAKE

Li Ajvalilal yuʼun Diose tslajesbe skʼoplal li Satanas xchiʼuk spukujtake, vaʼun li krixchanoetike muʼyuk xa buchʼu xuʼ xtijbat yoʼontonik sventa saʼik kʼop (Apokalipsis 20:​1-3, 10). Mi laj yichʼik lajesel li Satanas xchiʼuk spukujtake, «ta x-epaj li jun oʼontonale» (Salmo 72:7).

Li Diose yaloj ti chchʼaybe skʼoplal li paskʼopetike. Xuʼ xapat avoʼonton ti chkʼot onoʼox ta pasele, yuʼun xuʼ yuʼun spasel xchiʼuk oy ta yoʼonton jech tspas.

• Li Diose oy sjuʼel sventa xchʼaybe skʼoplal li saʼkʼop xchiʼuk li paskʼopetike xchiʼuk snaʼoj lek kʼuxi tspas (Job 9:4). Li Diose spas yuʼun skotol (Job 42:2).

• Li Diose chopol tajek chil ti oy svokol li krixchanoetike (Isaias 63:9). Xchiʼuk «spʼajoj li buchʼutik skʼanojik saʼkʼope» (Salmo 11:5).

• Li Diose persa chkʼot ta pasel yuʼun li kʼusi chale, yuʼun mu snaʼ sjut kʼop (Isaias 55:​10, 11; Tito 1:2).