¿Kʼu yuʼun muʼyuk lajem-o skʼoplal li paskʼopetike?
Li Vivliae chalbe srasonaltak ti kʼu yuʼun chlik skʼop li krixchanoetike xchiʼuk ti oy noʼox paskʼopetike. Jech xtok, chalbe srasonal kʼu yuʼun muʼyuk lajem-o skʼoplal.
LI MULILE
Kʼalal la spas Adan xchiʼuk Eva li Diose, jech kʼuchaʼal slokʼol la spasanan, jaʼ xkaltik, ti xuʼ xchanbeik stalelale, jech kʼuchaʼal ti junuk noʼox yoʼontonike xchiʼuk ti xkʼanvanike (Jenesis 1:27; 1 Korintios 14:33; 1 Juan 4:8). Pe muʼyuk la xchʼunik mantal xchiʼuk la saʼ smulik ta stojolal li Diose. Jaʼ yuʼun, la jkuchintik li mulile xchiʼuk chijchamutik (Romanos 5:12). Ta skoj ti jpasmulilutike, oy kʼusitik chopol chtal ta jnopbentik, vaʼun xuʼ jaʼ stij koʼontontik sventa jpastik li kʼusi chopole (Jenesis 6:5; Markos 7:21, 22).
LI AJVALILETIKE
Ti kʼu yelan la spasutik li Diose maʼuk sventa jventain jba jtuktik. Xi chal li Vivliae: «Mi jaʼuk xuʼ yuʼun tsbeiltas sba batel stuk li jun krixchano ti yakal chanave» (Jeremias 10:23). Jaʼ yuʼun, li ajvaliletike mu xuʼ yuʼunik slajesbel skʼoplal ta j-echʼel li saʼkʼope xchiʼuk li paskʼopetike.
LI SATANAS XCHIʼUK SPUKUJTAKE
Li Vivliae chal ti «skotol li krixchanoetike oyik ta sjuʼel li Satanase» (1 Juan 5:19). Li Satanas ti Diablo sbi xtoke muʼyuk xkʼuxul yoʼonton, yuʼun lek chil ti xcham li krixchanoetike (Juan 8:44). Li Satanas xchiʼuk spukujtak ti toj chopolike jaʼ tstijbeik yoʼonton li krixchanoetik sventa saʼik kʼope (Apokalipsis 12:9, 12).
Li voʼotike mu xuʼ kuʼuntik slajesbel skʼoplal ta j-echʼel li saʼkʼop xchiʼuk li paskʼopetike, pe li Diose xuʼ yuʼun slajesbel skʼoplal.