XCHANOBIL 6
KʼEJOJ 18 Ta jtojkutik ta vokol li pojelale
Ta jtojbetik tajek ta vokol Jeova ti chakʼutik ta pertone
«Skʼanoj tajek krixchanoetik li Diose, jaʼ yuʼun laj yakʼ li jun noʼox [Xnichʼone]» (JUAN 3:16).
LI K’USI CHALBE SKʼOPLALE
Mi laj kaʼibetik smelolal kʼusitik la spas Jeova sventa xakʼutik ta pertone, mas to ep sbalil chkiltik.
1, 2. ¿Kʼu yuʼun xijkoʼolaj xchiʼuk li kerem chal ta parafo 1?
JNOPBETIK skʼoplal jun kerem ti jkʼulej tajek li stot smeʼe, pe jun kʼakʼale oy kʼusi chopol albat. Li stot smeʼe oy kʼusi tsots la snuptanik, vaʼun chamik. Pe maʼuk noʼox taje, yuʼun albat xtok ti laj yixtolan li stakʼinike xchiʼuk ti ep kom yilike. Jaʼ yuʼun, li xrexto iktabat komel xkaltik li kereme, jaʼ ti tikʼat komel ta ilile. Li yajval ilile tskʼan xa noʼox ti sutesbat li stakʼine. Pe toj echʼ xa noʼox ep li ilile, mu xa noʼox xtoj yuʼun.
2 Jaʼtik jech ta jnuptantik li avi eke. Li baʼyel jtot jmeʼtik Adan xchiʼuk Evae, tukʼik toʼox xchiʼuk te toʼox nakalik ta jun kʼupil sba paraiso (Jen. 1:27; 2:7-9). Xuʼ ox xkuxiik ta sbatel osil ti xmuyubajik noʼox xchiʼuk ti jun noʼox yoʼontonike, pe chʼay yuʼunik skotol. Mu xa stakʼ ti te xnakiik li ta kʼupil sba paraisoe xchiʼuk mu xa xuʼ xkuxiik sbatel osil. ¿Kʼusi li xrexto laj yiktabe komel li yalab xnichʼnabtake? Xi chal li Vivliae: «Ta jun noʼox vinik [Adan] och talel li mulil ta balumile, jech ta skoj mulil och talel ek li lajelale, jaʼ yuʼun chcham skotol krixchanoetik ta skoj ti jpasmulil kʼot skotolike» (Rom. 5:12). Li jrextotik laj yiktabutik li Adane jaʼ li mulil ti chijcham-o yuʼune. Li mulil la jkuchintike xkoʼolaj ta epal ilil ti muʼyuk buchʼu xtoj yuʼune (Sal. 49:8).
3. ¿Kʼu yuʼun chichʼ alel ti xkoʼolaj ta ilil li mulile?
3 Li Jesuse la skoʼoltas ta ilil li mulile (Mat. 6:12; Luk. 11:4). Kʼalal ta jpas jmultike, xkoʼolaj ti ta jsaʼ kiltik ta stojolal Jeova ti persa skʼan jtojtike. Ti chʼabaluk kʼusi spasoj sventa xchʼay li kiltike, jaʼ noʼox xuʼ xtoj kuʼuntik mi lijchamutike (Rom. 6:7, 23).
4. 1) ¿Kʼusi chkʼot ta jtojolaltik ti muʼyukuk buchʼu tskoltautike? (Salmo 49:7-9). 2) ¿Kʼusi skʼan xal li jpʼel kʼop mulil xi li ta Vivliae? (Kʼelo li rekuadro «Mulil»).
4 Ti chʼabaluk buchʼu tskoltautike, mu jtatik li kʼusi la xchʼay Adan xchiʼuk Evae (kʼelo Salmo 49:7-9). Jech xtok, mu xuʼ xijkuxi sbatel osil mi jaʼuk ti xijchaʼkuxie. Vaʼun, te noʼox chlaj jkʼoplaltik kʼuchaʼal li chonbolometike (Ekl. 3:19; 2 Ped. 2:12).
5. ¿Kʼusi spasoj Jeova sventa stoj li kiltik ta skoj li mulile? (Kʼelo li lokʼol ta pajina 1).
5 Jnopbetik skʼoplal yan velta li kerem laj kalbetik skʼoplal ta parafo 1. ¿Kʼu van yelan chaʼi sba ti jech x-albat yuʼun jun jkʼulej vinik ti chtojbat skotol li yile? Ta van stoj ta vokol xchiʼuk ta van xchʼam ta anil. Jaʼ jech li Jeova eke ti jaʼ Jtotik ti skʼanojutik tajeke. Laj yakʼbutik jun matanal sventa xtoj li mulil laj yiktabutik Adane. Li Jesuse xi la xchapbe skʼoplal taje: «Skʼanoj tajek krixchanoetik li Diose, jaʼ yuʼun laj yakʼ li jun noʼox Xnichʼon sventa mu xichʼ lajesel li buchʼu chakʼ xchʼunel yoʼonton ta stojolale, moʼoj, yuʼun jaʼ sventa tsta-o xkuxlejal sbatel osil» (Juan 3:16). Li matanal xtoke xuʼ skoltautik sventa lekuk xkil jbatik xchiʼuk li Jeovae.
Li Jesuse la xcholbe skʼoplal lekil aʼyej ta sventa li perton chakʼ Jeovae, taje xuʼ xkʼot ta pasel ta skoj li pojelale (Juan 3:16). Ta tsʼakale, ta sjunul yoʼonton laj yakʼ xkuxlejal sventa spojutik. (Kʼelo parafo 5).
6. ¿Kʼusitik jpʼelantik kʼop ta Vivlia ta jkʼelbetik batel skʼoplal li ta xchanobil liʼe, xchiʼuk kʼu yuʼun?
6 ¿Kʼuxi xuʼ jtabetik sbalil li matanal lij-akʼbate xchiʼuk ti ta jtatik pertone? Sventa xkaʼibetik smelolale, li ta xchanobil liʼe, ta jkʼelbetik batel skʼoplal jpʼelantik kʼop ta Vivlia jech kʼuchaʼal ti lekuk xkil jbatik xchiʼuk li Jeovae, matanal sventa skʼanel perton, pojelal, ti laj kichʼtik pojel ta mulil, ta lajelal xchiʼuk ti tukʼ xa chkichʼ albel jkʼoplaltike. Yuʼun mi la jchantik taje, mas to me ch-ayan ta koʼontontik stojbel ta vokol Jeova skotol li kʼusitik spasoj ta jtojolaltik yoʼ xakʼutik ta pertone.
LI JEOVAE OY TA YOʼONTON TI LEKUK XKIL JBATIK XCHIʼUKE
7. 1) ¿Kʼusi to mas chʼay yuʼunik li Adan xchiʼuk li Evae? 2) ¿Kʼusi ti chtun tajek yuʼunik li snitilulal Adan xchiʼuk Evae? (Romanos 5:10, 11).
7 Li Adan xchiʼuk Evae maʼuk noʼox chʼay yuʼunik li kuxlejal sbatel osile, yuʼun muʼyuk xa lek laj yil sbaik xtok xchiʼuk li Jeova ti jaʼ Stotike. Kʼalal muʼyuk toʼox spasoj smulike, jaʼ toʼox yutsʼ yalal sbaik xchiʼuk li Jeovae (Luk. 3:38). Pe kʼalal la stoy sbaik ta stojolal Jeovae, maʼuk xa yutsʼ yalal sbaik komik. Taje jaʼo kʼot ta pasel kʼalal muʼyuk toʼox yiloj yalab xnichʼnabike (Jen. 3:23, 24; 4:1). Jaʼ yuʼun, li snitilulaltak Adane skʼan lekuk xil sbaik xchiʼuk li Jeovae (kʼelo Romanos 5:10, 11). Taje jaʼ skʼan xal ti skʼan lekuk xkil jbatik xchiʼuk li Jeova eke. Jlik livro chalbe skʼoplal kʼusi skʼan xal ti lekuk xkil jbatik xchiʼuk li Jeovae, yuʼun li ta griego kʼope xuʼ van jaʼ skʼan xal ti «xkʼot ta yamigo li yajkontrae». Li kʼusi toj labal sbae jaʼ ti lokʼ ta yoʼonton stuk Jeova sventa lekuk xkil jbatik xchiʼuke. ¿Kʼuxi la spas taje?
LI JEOVAE LAJ YAKʼ LI MATANAL SVENTA SKʼANEL PERTONE
8. ¿Kʼusi jaʼ li matanal sventa skʼanel pertone?
8 Li matanal sventa skʼanel pertone jaʼ li kʼusi la spas Jeova sventa lekuk xil sbaik xchiʼuk li jpasmulil krixchanoetike. Taje jaʼ skʼan xal ti oyuk kʼusi xichʼ jelel ti koʼoluk sbalile. Kʼalal jech chichʼ pasele, xuʼ xichʼ tael yan velta li kʼusi chʼayem xa oxe. Li ta Tsʼibetik ta Griego Kʼop eke jaʼ chalbe skʼoplal li kʼusi la spas Jeova sventa xkʼot ta yamigo li jun krixchanoe (Rom. 3:25).
9. ¿Kʼusi toʼox xchapanoj Jeova sventa staik perton li j-israeletike?
9 Li ta skʼakʼalil j-israeletike, li Jeovae oy toʼox kʼusi xchapanoj sventa staik perton xchiʼuk ti lekuk x-ilatike. Li ta Skʼakʼalil Stael Perton ti jun noʼox velta ta jabil chichʼ pasele, li mero bankilal palee chakʼ ta milbil matanal chonbolometik ta sventa li jteklume. Melel onoʼox ti muʼyuk chchʼaybe-o ta j-echʼel smul li j-israeletike, yuʼun li chonbolometike mas pekʼel skʼoplalik. Pe li Jeovae oy ta yoʼonton chakʼ ta perton li jteklume, jaʼ noʼox venta mi tsutes yoʼontonik xchiʼuk mi chakʼik li matanal jech kʼuchaʼal tskʼane (Ebr. 10:1-4). Jech xtok, li matanaletik chakʼik li ta Skʼakʼalil Stael Perton xchiʼuk li ta yantik velta chakʼike, jaʼ noʼox chvulesbat ta sjolik ti jaʼik jsaʼmuliletike xchiʼuk ti oy kʼusi skʼan pasel sventa xtupʼbat-o ta j-echʼel li smulike.
10. ¿Kʼusi la xchapan Jeova sventa xchʼay ta j-echʼel li jmultike?
10 Li Jeovae oy kʼusi la spas sventa xchʼaybe-o ta j-echʼel smul li krixchanoetike. Sventa xkʼot ta pasel yuʼun taje, laj yakʼ skʼanbil Nichʼon «sventa xkuchbe batel smul li epal [krixchanoetik]» ta jun noʼox velta ta j-echʼele (Ebr. 9:28). Li Jesuse «tal yakʼ xkuxlejal kʼuchaʼal pojelal sventa tspoj epal krixchanoetik» (Mat. 20:28). ¿Kʼusi jaʼ li pojelale?
LI POJELALE
11. 1) ¿Kʼusi skʼan xal li pojelal chal ta Vivliae? 2) ¿Buchʼu noʼox xuʼ spojutik?
11 Kʼalal chalbe skʼoplal pojelal li Vivliae, jaʼ skʼan xal ti chkichʼtik tojel sventa xkichʼtik pojel o koltael lokʼel li ta mulile xchiʼuk ti lekuk xkil jbatik xchiʼuk li Diose.a Taje jaʼ li kʼusi la stunes Jeova sventa xichʼ tael yan velta li kʼusi chʼayem xa oxe. Kʼuchaʼal jnaʼojtike, li Adan xchiʼuk Evae chʼay yuʼunik li tukʼil kuxlejale xchiʼuk ti xuʼ ox xkuxiik ta sbatel osile. Jaʼ yuʼun, li pojelale skʼan koʼoluk sbalil xchiʼuk li kʼusi chʼaye (1 Tim. 2:6). Taje jaʼ noʼox me spas yuʼun jun vinik mi pas yuʼun li oxtos liʼe: ti tukʼil vinikuke, ti xuʼuk xkuxi ta sbatel osil liʼ ta balumile xchiʼuk ti xlokʼuk ta yoʼonton xakʼ xkuxlejal ta jtojolaltike. Taje jaʼ noʼox me jech xuʼ jtatik yan velta li kuxlejal la xchʼayik Adan xchiʼuk Evae xchiʼuk ti jtatik pertone.
12. ¿Kʼu yuʼun ti jaʼ noʼox Jesus xuʼ la spojutike?
12 Jkʼelbetik batel oxibuk srasonal ti kʼu yuʼun xuʼ yuʼun la spojutik li Jesuse: 1) jaʼ jun tukʼil vinik, muʼyuk bu la saʼ smul, 2) ta skoj taje, xuʼ ox xkuxi ta sbatel osil liʼ ta balumile xchiʼuk 3) ayan ta yoʼonton la sten xkuxlejal xchiʼuk ti xcham ta jtojolaltike (1 Ped. 2:22; Ebr. 10:9, 10). Li Jesuse jaʼ jun tukʼil vinik jech kʼuchaʼal li Adan kʼalal muʼyuk toʼox spasoj smule (1 Kor. 15:45). Jaʼ yuʼun, kʼalal cham li Jesuse, laj yichʼ tael yan velta li kʼusi chʼay yuʼun li Adane (Rom. 5:19). Vaʼun, jaʼ jech kʼot ta slajeb Adan li Jesuse. Mu xa persauk xtal yan tukʼil krixchano sventa stoj li kʼusi chʼay yuʼun li Adane, yuʼun li Jesuse laj yakʼ xkuxlejal ta «jun noʼox velta ta j-echʼel» (Ebr. 7:27; 10:12).
13. ¿Kʼusi sjelbenal li matanal sventa skʼanel perton xchiʼuk li pojelale?
13 Vaʼun chaʼa, ¿kʼusi sjelbenal li matanal sventa skʼanel perton xchiʼuk li pojelale? Li matanal sventa skʼanel pertone jaʼ li kʼusi la spas Dios sventa lekuk xil sbaik xchiʼuk li krixchanoetike. Yan li pojelale jaʼ li stojol sventa xichʼ tupʼbel smul li krixchanoetike. Li stojol taje jaʼ skʼoplal li xchʼichʼel Jesus ti laj yichʼ malel ta jtojolaltike (Efes. 1:7; Ebr. 9:14).
LA SPOJUTIK TA LAJELAL XCHIʼUK TA MULIL, VAʼUN TUKʼ XA CHILUTIK
14. ¿Kʼusi xa ta jkʼelbetik batel skʼoplal, xchiʼuk kʼu yuʼun?
14 ¿Kʼusi sbalil ta jtabetik li kʼusi la spas Jeova ta jtojolaltike? Sventa xkaʼibetik smelolale, ta jkʼeltik batel chaʼtos kʼusi chal ta Vivlia. Mi jech la jpastike, jaʼ tskoltautik sventa xkaʼibetik smelolal kʼusi sbalil ta jtabetik ti chakʼutik ta perton li Jeovae.
15, 16. 1) ¿Kʼusi skʼan xal kʼalal chal Vivlia ti chkichʼtik pojel lokʼel li ta mulil xchiʼuk ta lajelale? 2) ¿Kʼu yelan chkaʼi jbatik ta skoj taje?
15 Li Vivliae chal ti ta skoj ti tojbil xa li jmultike, avie pojbilutik xa ta lajelal xchiʼuk ta mulil. Xi laj yal li jtakbol Pedro ta sventa taje: «Anaʼojik ti kʼalal laj avichʼik koltael lokʼel [literal, «laj avichʼik pojel», «laj avichʼik manel»] ta stojolal li kʼusi muʼyuk sbalil ta akuxlejalik ti laj yiktaboxuk komel li amoltotakike, maʼuk la skoltaoxuk lokʼel li kʼusitik snaʼ xkʼaʼe, li platae o li oroe. Moʼoj, jaʼ la skoltaoxuk lokʼel li chʼichʼ ti toj ep sbalile, jech kʼuchaʼal xchʼichʼel chʼiom chij ti chʼabal spaltail xchiʼuk ti chʼabal xchopolale ti jaʼ xchʼichʼel li Kristoe» (1 Ped. 1:18, 19; tsʼib ta yok vun).
16 Koliyal li pojelale, xuʼ kolem xijkom li ta mulil xchiʼuk ta lajelal ti toj ep chakʼ jvokoltike (Rom. 5:21). Ta melel, ta jtojbetik tajek ta vokol Jeova ti la spojutike xchiʼuk ti la spojutik ta xchʼichʼel li Jesuse (1 Kor. 15:22).
17, 18. 1) ¿Kʼusi skʼan xal ti tukʼ chkichʼtik albel jkʼoplaltike? 2) ¿Kʼusi sbalil ta jtabetik taje?
17 Ti tukʼ chkichʼtik albel jkʼoplaltike jaʼ skʼan xal ti chichʼ tupʼel li jmultike, ti xkoʼolaj kʼuchaʼal muʼyuk bu jech jpasojtik-oe. ¿Mi jaʼ skʼan xal ti muʼyuk xa tstsak ta venta smantaltak li Jeovae? Moʼoj, li stuke tukʼ chal jkʼoplaltik ta skoj li kʼusitik la spase, maʼuk ta skoj kipal jtuktik o ti lek xa chil li mulile. Pe li Jeovae oy ta yoʼonton chakʼutik ta perton ta skoj ti chkakʼ xchʼunel koʼontontik ta stojolale xchiʼuk ta stojolal Xnichʼon ta skoj li pojelal laj yakʼe (Rom. 3:24; Gal. 2:16).
18 ¿Kʼusi sbalil ta jtabetik ti tukʼ jkʼoplal chilutik li Jeovae? Junantik yajtsʼaklomtak Kristoe laj yichʼik tʼujel sventa jmojuk x-ajvalilajik xchiʼuk Jesus ta vinajel xchiʼuk kʼotemik xa ta xnichʼnabtak Dios (Tito 3:7; 1 Juan 3:1). Pasbil xa ta perton li smulike, xkoʼolaj ti muʼyuk bu jech spasojik-oe. Jaʼ yuʼun, xuʼ te skʼoplalik li ta Ajvalilal yuʼun Diose (Rom. 8:1, 2, 30). Li yan yajtsʼaklomtak Kristoe xuʼ xkuxiik ta sbatel osil liʼ ta balumile, yuʼun kʼotik xa ta yamigo Dios xchiʼuk tupʼbat xa li smulike (Sant. 2:21-23). Li epal krixchanoetik ti kuxul chkomik ta Armajedone, xuʼ xkuxiik ta sbatel osil (Juan 11:26). «Li buchʼutik tukʼike» xchiʼuk «li buchʼutik muʼyuk tukʼike» xuʼ xchaʼkuxiik (Ech. 24:15; Juan 5:28, 29). Ta mas tsʼakale, li tukʼil yajtuneltak Jeova ti chkuxiik ta balumile, xuʼ «staik li jun yutsil kolebal jech kʼuchaʼal tstaik li xnichʼnab Diose» (Rom. 8:21). Jech kʼuchaʼal la jchantik xa talele, li kʼusitik yichʼoj pasel sventa lekuk xkil jbatik xchiʼuk Jeova ti jaʼ Jtotike, jaʼ jun mukʼta bendision.
19. ¿Kʼusi sbalil ta jtabetik ta skoj li kʼusi la spas ta jtojolaltik li Jeova xchiʼuk Jesuse? (Kʼelo xtok li rekuadro «Chakʼutik ta perton li Jeovae»).
19 Xuʼ van jaʼ jech chkaʼi jbatik kʼuchaʼal li kerem ti chʼabal kʼusi x-ayan kom yuʼune xchiʼuk ti jaʼ noʼox pechʼel kom ta ilil ti mu xtoj yuʼune. Ta skoj li kʼusi la spas Jeova sventa xkichʼtik pasbel perton li jmultike xchiʼuk li kʼusi la spas Jesus sventa spojutike, xuʼ jun koʼontontik. Li xchʼunel koʼontontik ta stojolal Jesuse jaʼ tskoltautik sventa xkichʼtik chʼaybel jmultik o ti kolem xijkom li ta mulil xchiʼuk ta lajele. Jech xtok, xuʼ xichʼ tupʼel li jmultike, xkoʼolaj ti chʼabal-o la jpas jmultike. Pe li kʼusi mas tsots skʼoplale jaʼ ti xuʼ lek xkil jbatik xchiʼuk li Jtotik ta vinajele, li Jeovae.
20. ¿Kʼusi ta jkʼelbetik skʼoplal li ta yan xchanobile?
20 Kʼalal ta jnopbetik skʼoplal li kʼusitik spasojik ta jtojolaltik li Jeova xchiʼuk Jesuse, ep tajek sbalil chkiltik (2 Kor. 5:15). Ti muʼyukuk la skoltautike, muʼyuk spatobil koʼontontik ti jechuke. Li ta yan xchanobile, ta jkʼelbetik batel skʼoplal junantik skʼelobil ta Vivlia ti kʼusi smakoj ti chakʼutik ta perton ta jujuntal li Jeovae.
KʼEJOJ 10 ¡Kichʼbetik ta mukʼ sbi Jeova!
a Ta junantik kʼope, li jpʼel kʼop pojelal xie, xuʼ xichʼ jelubtasel kʼuchaʼal «li stojol jun kuxlejale» o «li stojol kʼusi chichʼ manele».