XCHANOBIL 7
KʼEJOJ 15 Kichʼtik ta mukʼ sba Xnichʼon Jeova
¿Kʼusi sbalil ta jtabetik ti chakʼutik ta perton li Jeovae?
«Chavakʼ perton ta melel» (SAL. 130:4).
LI K’USI CHALBE SKʼOPLALE
Li Vivliae chalbe skʼelobiltak sventa xkaʼibetik smelolal ti kʼu yelan stuk xa noʼox jech chakʼutik ta perton li Jeovae xchiʼuk ti epuk sbalil xkiltike.
1. Kʼalal oy buchʼu chalbutik ti chakʼutik ta pertone, ¿kʼusi skʼan xal ta melel?
«TA XKAKʼOT ta perton». Kʼalal jech chalbutik li buchʼu la jyayijesbetik yoʼontone, ¡xkuxlij to chkaʼitik! Pe ¿kʼusi van skʼan xal ta melel li buchʼu jech ta xale? Tsots ta aʼibel smelolal, yuʼun jelajtik ti kʼu yelan chkaʼibetik smelolal li yakʼel pertone. Junantik kʼalal ch-akʼvanik ta pertone, jech-o yamigo sbaik. Li junantike ch-akʼvanik la ta perton, jaʼ noʼoxe muʼyuk xa lek tskʼopon sbaik.
2. Jech kʼuchaʼal chal ta Vivliae, ¿kʼu yelan ch-akʼvan ta perton li Jeovae? (Kʼelo xtok li tsʼib ta yok vune).
2 ¡Jelel tajek ti kʼu yelan ch-akʼvan ta perton li Jeovae! Mu xkoʼolaj kʼuchaʼal li voʼotike. Xi laj yal jun jtsʼibajom ta salmoe: «Chavakʼ perton ta melel, taje jaʼ sventa labaluk sba xavichʼ ilel» (Sal. 130:4).a Stuk xa noʼox jech ti kʼu yelan ch-akʼvan ta «perton ta melel» li Jeovae. Mi ta jkʼan jech chij-akʼvan ta perton eke, skʼan jchanbetik li Jeovae. Li ta Tsʼibetik ta Ebreo Kʼope, oy bateltik tstunes jpʼel kʼop ti jaʼ noʼox chalbe skʼoplal ti kʼu yelan ch-akʼvan ta perton li Jeovae, maʼuk ti kʼu yelan ch-akʼvan ta perton li krixchanoetike.
3. ¿Kʼu yuʼun chkaltik ti jelel tajek kʼu yelan ch-akʼvan ta perton li Jeovae? (Isaias 55:6, 7).
3 Kʼalal oy buchʼu chakʼ ta perton li Jeovae, tstupʼbe ta j-echʼel li smule xchiʼuk chamigoin yan velta. Ta sjunul yoʼonton ch-akʼvan ta perton. Labal sba tajek, ¿jechuke? (Kʼelo Isaias 55:6, 7).
4. ¿Kʼu yelan tskoltautik Jeova sventa xkaʼibetik lek smelolal li yakʼel perton ta melele?
4 Ta skoj ti jelel tajek kʼu yelan ch-akʼvan ta perton li Jeovae, mu onoʼox xkaʼibetik smelolal ta jtuktik. Jaʼ yuʼun, li ta Vivliae tstunes skʼelobiltak sventa xkaʼibetik lek smelolal. Li ta xchanobil liʼe, ta jkʼelbetik batel skʼoplal junantik. Vaʼun, te chkakʼtik venta skotol li kʼusitik spasoj Jeova sventa xchʼay li jmultike xchiʼuk ti xkamigointik yan veltae. Kʼalal mas to chkaʼibetik smelolal li jeltos skʼelobiltake, mas to ta jkʼantik li Jeovae xchiʼuk mas to ta jtojbetik ta vokol.
LI JEOVAE CHKUCH BATEL LI JMULTIKE
5. ¿Kʼusi tspas Jeova kʼalal chakʼutik ta pertone?
5 Li ta Vivliae, ep ta velta tskoʼoltas kʼuchaʼal ta alal ikatsil li mulile. Taje jaʼ onoʼox jech laj yal li ajvalil Davide: «Kʼot xa kʼalal jol li jpaltailtake; xkoʼolaj kʼuchaʼal alal ikatsil ti mu xa xlik kuʼune» (Sal. 38:4). Akʼo mi jech, li ta Salmo 25:18 xchiʼuk 32:5 chal ti Jeovae chakʼ ta «perton» li buchʼu tsutes yoʼontone. Kʼalal chakʼ ta «perton» xi li ta versikuloetike, li ta ebreo kʼope jaʼ skʼan xal «chkuch batel» o «chchech batel», taje chakʼ jnoptik ti xkoʼolaj ta jun tsatsal vinik li Jeovae, ti tskajan batel ta snekeb li jmultike xchiʼuk ti chkuch batele.
Pasbun perton jmul o kucho batel (Sal. 32:5).
6. ¿Bu to chkuch batel jmultik li Jeovae?
6 Vaʼun chaʼa, ¿bu to kʼalal chkuch batel jmultik li Jeovae? Sventa xkaʼibetik smelolale, xi chal li ta Salmo 103:12: «Jech kʼuchaʼal toj nom xil sbaik li slokʼeb kʼakʼal xchiʼuk smaleb kʼakʼale, jaʼ jech nom tajek yakʼoj batel ta jtojolaltik li jmultike». Li slokʼeb kʼakʼal xchiʼuk li smaleb kʼakʼale nom tajek xil sbaik, mu stakʼ pʼisel kʼu snamal xil sbaik. Jaʼ yuʼun, li versikulo liʼe chakʼ kiltik ti nom tajek chkuch batel jmultik Jeova kʼalal chakʼutik ta pertone. ¡Taje tspat tajek koʼontontik!
«Toj nom xil sbaik li slokʼeb kʼakʼal xchiʼuk smaleb kʼakʼale» (Sal. 103:12).
7. ¿Bu to kʼalal tsjip batel jmultik li Jeovae? (Mikeas 7:18, 19).
7 Kʼalal chkuch batel jmultik li Jeovae, ¿mi te to van tskʼej komel? Moʼoj, yuʼun xi laj yal li ajvalil Esekiase: «Laj xa ajip batel ta apat skotol li jmultake» o jech kʼuchaʼal chal li tsʼib ta yok vune «la alokʼes batel ta yeloval asat skotol li jmultake» (Is. 38:9, 17; tsʼib ta yok vun). Jaʼ yuʼun, kʼalal ta jsutes koʼontontike, li Jeovae xkoʼolaj ti tstsak li jmultike xchiʼuk ti nom to tsjip batele. Xuʼ van xi chichʼ jelubtasel li versikulo xtoke: «Ti kʼu yelan la apasun ta pertone xkoʼolaj ti muʼyuk-o bu jpasoj li jmule». Jaʼ jechtik tskoʼoltas ek li ta Mikeas 7:18 xchiʼuk 19 (kʼelo). Te chal ti tsjip batel ta yutil to nab li jmultike. Li ta mas voʼnee, kʼalal oy kʼusi chichʼ jipel yalel ta yutil nabe, te xa chʼay-o batel.
«Laj xa ajip batel ta apat skotol li jmultake» (Is. 38:17).
«Ta yutil to nab chbat ajipbe skotol li smulike» (Mik. 7:19).
8. ¿Kʼusi xa la jchantik talel?
8 Laj xa jchantik talel ti kʼalal ch-akʼvan ta perton li Jeovae, jaʼ ti chkuch batel li jmultike, vaʼun muʼyuk xa kikatstik chijkom. Xi onoʼox jamal laj yal li Davide: «Xmuyubaj noʼox li buchʼutik akʼbil xa ta perton li kʼusitik chopol spasojike xchiʼuk li buchʼutik tupʼbil xa li smulike; xmuyubaj noʼox li buchʼu muʼyuk tstsakbat ta venta jutebuk smul yuʼun li Jeovae» (Rom. 4:6-8). ¡Taje jaʼ li yakʼel perton ta melele!
TSTUPʼ JMULTIK LI JEOVAE
9. ¿Kʼusi skʼelobil tstunes Jeova sventa xkaʼibetik smelolal ti kʼu yelan tstupʼ jmultike?
9 Koliyal li pojelal laj yakʼ Jesuse, xuʼ xkichʼtik tupʼbel li jmultik mi la jsutes koʼontontike. Jkʼeltik batel junantik skʼelobiltak chal ta Vivlia sventa xkaʼibetik smelolal taje, chal ti chchukʼ, tspok xchiʼuk tsakubtas jmultik li Jeovae, vaʼun muʼyuk xa yikʼobal chkom li jpasmulile (Sal. 51:7; Is. 4:4; Jer. 33:8). Xi chal stuk Jeova li kʼusi tspas kʼalal chchʼay jmultike: «Akʼo mi solel kuxul tsoj li amulike, sak ta xkom kʼuchaʼal li taive; akʼo mi tsoj tajek kʼuchaʼal li kuxul tsajal pokʼe, sak ta xkom jech kʼuchaʼal li sakil tsotse» (Is. 1:18). Kʼalal bonol ta kuxul tsoj li jlik pokʼe, vokol tajek ta chukʼel. Kʼalal jech laj yal li Jeovae, chakʼ ta aʼiel ti xuʼ yuʼun spokel lokʼel skotol li jmultike.
«Akʼo mi solel kuxul tsoj li amulike, sak ta xkom kʼuchaʼal li taive» (Is. 1:18).
10. ¿Kʼusi skoʼoltasobil tstunes Jeova sventa xkaʼibetik smelolal ti ta sjunul yoʼonton chakʼutik ta pertone?
10 Jech kʼuchaʼal la jchantik li ta yan xchanobile, li mulile xkoʼolaj ta ilil (Mat. 6:12; Luk. 11:4). Jaʼ yuʼun, kʼalal ta jpas jmultik jujukoje, xkoʼolaj ti chmuy kiltik ta stojolal Jeovae. Pe kʼalal chakʼutik ta pertone, xkoʼolaj ti chchʼay kiltik ti stsoboj xa sba tajeke, jaʼ xkaltik, ti mu xa persauk ta jtojtike. Taje jaʼ skʼan xal ti muʼyuk tsujutik Jeova sventa jtoj li jmultike, yuʼun yakʼojutik xa ta perton. ¡Tspat tajek koʼontontik ti jech chakʼutik ta perton li Jeovae!
«Pasbunkutik perton kilkutik» (Mat. 6:12).
11. ¿Kʼusi skʼan xal kʼalal chal ta Vivlia ti tstupʼ jmultik li Jeovae? (Echos 3:19).
11 Li Jeovae maʼuk noʼox chchʼay li kiltike, yuʼun tstupʼ ta j-echʼel (kʼelo Echos 3:19). Sventa xkaʼibetik smelolale, jnopbetik skʼoplal jun vinik ti chchʼay kiltike, ti chjuxilanbe li svunal ilile. Pe akʼo mi juxilanbil xa li svunale, xvinaj to ti kʼu yepal li ilile. Pe li Jeovae mu jechuk tspas, yuʼun tstupʼ ta j-echʼel. Sventa xkaʼibetik smelolale, jnopbetik skʼoplal ti kʼu toʼox yelan tstsʼibajik ta voʼnee, li kʼusi tstunesike anil ta tupʼel. Jaʼ yuʼun, kʼalal chichʼ tupʼel li ilile, chchʼay skʼoplal, muʼyuk xa kʼusi te tsʼibabil chkom mi jaʼuk xa buchʼu xuʼ xil kʼusi te tsʼibabil, xkoʼolaj ti chʼabal buchʼu saʼoj yile. ¡Lek tajek yoʼonton Jeova ti tstupʼ ta j-echʼel li jmultike! (Sal. 51:9).
«Sventa xichʼ tupʼel li amulike» (Ech. 3:19).
12. ¿Kʼusi chakʼ jchantik li skʼelobil ta sventa li pimil toke?
12 Li ta Isaias 44:22, li Jeovae te chal yan skoʼoltasobil ti kʼu yelan chchʼay li jmultike, xi chale: «Ta jtupʼ amultak, xkoʼolaj kʼuchaʼal ta jpix ta tok xchiʼuk ta jtupʼ apaltailtak, xkoʼolaj kʼuchaʼal ta jpix ta pimil tok». Jaʼ yuʼun, kʼalal chchʼay jmultik li Jeovae, xkoʼolaj kʼuchaʼal chpix ta pimil tok ti muʼyuk xa buchʼu xuʼ sta ta ilele.
«Ta jtupʼ amultak, xkoʼolaj kʼuchaʼal ta jpix ta tok» (Is. 44:22).
13. ¿Kʼu yelan chavaʼi aba ti chakʼot ta perton li Jeovae?
13 ¿Kʼusi sbalil ta jtabetik li kʼusi la jchantik xa talele? Kʼalal chakʼutik ta perton li Jeovae, mu me jnoptik ti te oy-o li jmultike, mu xa persauk jtojtik, yuʼun laj xa stoj ta xchʼichʼel li Jesukristoe. Tupʼbil xa ta j-echʼel, xkoʼolaj ti muʼyuk bu jpasojtik-oe. Taje jaʼ jech tspas Jeova kʼalal ta jsutes koʼontontike, ti chakʼutik ta perton ta melele.
CHAMIGOINUTIK YAN VELTA LI JEOVAE
Kʼalal chakʼutik ta perton li Jtotik ta vinajele, jaʼ tskoltautik sventa lekuk xkil jbatik xchiʼuk. (Kʼelo parafo 14).
14. ¿Kʼu yuʼun xuʼ jpat koʼontontik ta stojolal Jeova ti chchʼay ta j-echʼel li jmultike? (Kʼelo xtok li lokʼoletike).
14 Kʼalal chchʼay jmultik li Jeovae, xuʼ me jech-o xkamigointik. Taje jaʼ tskoltautik sventa muʼyukuk jmul xkaʼi jbatik xchiʼuk ti mu jnoptik ti te snakʼoj-o li jmultike o ti smalaoj chakʼbutik kastigoe, yuʼun mu onoʼox snaʼ jech spas. ¿Kʼu yuʼun ti jech chkaltike? Yuʼun xi laj yalbe li j-alkʼop Jeremiase: «Ta jchʼaybe li spaltailike xchiʼuk muʼyuk xa bu ta jvules ta jol li smulike» (Jer. 31:34). Li jtakbol Pablo eke la xchaʼal li kʼusi la stsʼiba Jeremiase, xi laj yale: «Muʼyuk xa bu ta jvules ta jol li smulike» (Ebr. 8:12). ¿Kʼusi skʼan xal taje?
«Muʼyuk xa bu ta jvules ta jol li smulike» (Jer. 31:34).
15. ¿Kʼusi skʼan xal ti muʼyuk tsvules ta sjol jmultik li Jeovae?
15 Li ta Vivliae, kʼalal chal jvules ta joltik xie, oy to kʼusi yan smakoj. Maʼuk noʼox ti ta jvules ta joltik li kʼusi kʼotem xa ta pasele. Bakʼintike, chakʼ ta aʼiel ti oy kʼusi skʼan xichʼ pasele. Sventa xkaʼibetik smelolale, kalbetik skʼoplal li kʼusi laj yal li jpaschoplejal vinik ti te jokʼol ta xokon Jesuse, ti xi laj yale: «Jesus, naʼun me kʼalal mi la-och li ta Ajvalilal avuʼune» (Luk. 23:42, 43). Kʼuchaʼal chkakʼtik ventae, oy kʼusi la skʼanbe Jesus ti akʼo spas ta stojolale. Vaʼun, li Jesuse laj yalbe ti chchaʼkuxese. Jaʼ yuʼun chaʼa, kʼalal chal Jeova ti chchʼay li jmultike, jaʼ skʼan xal ti muʼyuk xa kʼusi tspas jutebuk sventa svules ta sjol li jmultike xchiʼuk mi jaʼuk kʼusi tspas ta jelavel sventa xakʼ jtojtike, yuʼun xchʼayoj xa li jmultike.
16. Jech kʼuchaʼal chal li Vivliae, ¿kʼu yelan chkaʼi jbatik kʼalal chakʼutik ta perton li Jeovae?
16 Jkʼelbetik yan skʼelobil ti chalbe skʼoplal Vivlia sventa xkaʼibetik smelolal kʼu yelan chkaʼi jbatik kʼalal tspasutik ta perton li Jeovae. Ta skoj ti jpasmulilutik jkotoltike, jaʼ smosoutik xkaltik li mulile. Pe kʼalal chakʼutik ta perton li Jeovae, xkoʼolaj kʼuchaʼal tslilin lokʼel li jkadenailtike, vaʼun kolem chijkom ta stojolal li mulile (Rom. 6:17, 18; Apok. 1:5). Kʼalal chakʼutik ta perton li Jeovae, xijmuyubaj ta jyalel jech kʼuchaʼal li jun mosoil ti chkol lokʼele.
«Laj xa avichʼik koltael lokʼel ta stojolal li mulile» (Rom. 6:18).
17. ¿Kʼu yuʼun chkaltik ti xkoʼolaj kʼuchaʼal chijpoxtaj kʼalal chakʼutik ta perton li Jeovae? (Isaias 53:5).
17 (Kʼelo Isaias 53:5). Li ta slajeb skoʼoltasobil chkalbetik skʼoplale jaʼ ti xkoʼolaj kʼuchaʼal tsatsal chamel li mulile. Pe li Jeovae la xpoxtautik kʼalal cham ta jtojolaltik li Xnichʼone, ta skoj taje lek xa xkil jbatik xchiʼuk (1 Ped. 2:24). Kʼalal oy buchʼu chpoxtaj ti tsots tajek ipe, xmuyubaj tajek. Jaʼ jech chkaʼi jbatik ek kʼalal chakʼutik ta perton li Jeovae, yuʼun lek xa xkil jbatik xchiʼuk.
«Ta skoj li syayijemale, laj kichʼtik poxtael» (Is. 53:5).
¿KʼUXI TA JTABETIK SBALIL TI CHAKʼUTIK TA PERTON LI JEOVAE?
18. ¿Kʼusi laj yakʼ jchantik li skoʼoltasobiltak ta sventa li perton chakʼ Jeovae? (Kʼelo xtok li rekuadro «¿Kʼuxi chakʼutik ta perton li Jeovae?»).
18 ¿Kʼusi laj yakʼ jchantik li skoʼoltasobiltak ta Vivlia ta sventa li perton chakʼ Jeovae? Yuʼun kʼalal chakʼutik ta pertone, chchʼaybe ta j-echʼel skʼoplal li jmultike, vaʼun lek xa xkil jbatik xchiʼuk. Akʼo mi jech, skʼan me teuk ta joltik ti jaʼ jun matanal li pertone, yuʼun skʼanojutik xchiʼuk toj lek yoʼonton, maʼuk ti jtatik-oe (Rom. 3:24).
19. 1) ¿Kʼusi skʼan jpastik sventa xakʼutik ta perton li Jeovae? (Romanos 4:8). 2) ¿Kʼusi ta jkʼeltik li ta yan xchanobile?
19 (Kʼelo Romanos 4:8). ¡Ta jtojbetik ta vokol Jeova ti chakʼutik ta perton ta melel jech kʼuchaʼal chal ta Salmo 130:4! Pe mi ta jkʼan chakʼutik ta pertone, skʼan me jtsaktik ta venta li pʼijubtasel laj yal Jesus liʼe: «Mi muʼyuk chapasbeik perton smul li krixchanoetike, jaʼ jech muʼyuk tspasboxuk perton amulik ek li Atotik ta vinajele» (Mat. 6:14, 15). Jaʼ yuʼun chaʼa, toj tsots me skʼoplal ti jchanbetik stalelal li Jeovae. Li ta yan xchanobile, ta jkʼeltik kʼuxi xuʼ xij-akʼvan ta perton ek.
KʼEJOJ 46 Kolaval, Jeova
a Li ta ebreo kʼop ta orijinal kʼalal «perton» xie, jaʼ skʼan xal ti oy jaytos li pertone. Pe li ta Salmo 130:4 li ta Xchʼul Kʼop Dios sventa Achʼ Balumile jaʼ chalbe skʼoplal li perton ta melele. Pe epal Vivliaetike muʼyuk la stsakik ta venta kʼusi chal li Salmo 130:4.