Albo avoʼonton ti yakʼojot xa ta perton li Jeovae

1, 2. ¿Kʼusi tspas Jeova kʼalal ta jsutes koʼontontike, xchiʼuk kʼu yelan chkaʼi jbatik ek? (Kʼelo xtok li lokʼol ta pajina 1).

LI AJVALIL Davide oy tajek smul laj yaʼi sba ta skoj li kʼusitik chopol la spase (Sal. 40:12; 51:3; sloʼilal). Akʼo mi jech, la sutes yoʼonton xchiʼuk akʼe ta perton yuʼun li Jeovae (2 Sam. 12:13). Li Davide xmuyubaj tajek xchiʼuk xkuxet to laj yaʼi kʼalal akʼe ta perton yuʼun li Jeovae (Sal. 32:1).

² Li voʼotik eke xuʼ me xijmuyubaj xchiʼuk jun koʼontontik kʼuchaʼal li Davide. Yuʼun li Jeovae chakʼutik ta perton akʼo mi toj tsots li jmultike, jaʼ noʼox venta mi la jsutes koʼontontike, mi laj kaltik ta jamale xchiʼuk mi chkakʼtik persa ti muʼyuk xa ta jchaʼpastike (Prov. 28:13; Ech. 26:20; 1 Juan 1:9). Jech xtok, tspat tajek koʼontontik kʼalal chchʼay jmultik li Jeovae, yuʼun tstupʼ ta j-echʼel ta snopben, xkoʼolaj ti muʼyuk bu jech jpasojtik-oe (Esek. 33:16).

3, 4. ¿Kʼu yelan laj yaʼi sba li Yenifere? ¿Kʼusi ta jchantik batel li ta xchanobil liʼe?

³ Akʼo mi jech, bateltike vokol tajek chkaʼitik xchʼunel ti yakʼojutik xa ta perton li Jeovae. Jaʼ jech kʼot ta stojolal li Yenifere. Li stuke ta mantal chʼi talel, pe kʼalal chex tseb toʼoxe, chopol kʼusitik lik spas ta mukul. Kʼalal echʼ jayibuk jabile, la sjel xkuxlejal xchiʼuk laj yichʼ voʼ. Xi chal kaʼitike: «Batem toʼox ta koʼonton saʼel takʼin xchiʼuk chimulivaj toʼox. Jech xtok, chiyakub toʼox xchiʼuk lek jnaʼ xi-ilin. Te ta jol ti k’alal la jsutes koʼontone, laj yakʼun ta perton li Jeovae, yuʼun cham ta jtojolal li Jesuse. Pe mi jaʼuk x-och ta koʼonton ti chʼaybil xa li jmule».

⁴ Ta skoj li kʼusi chopol la apase, ¿mi vokol chavaʼi bakʼintik ek ti xachʼun ti yakʼojot xa ta perton li Jeovae? Li Davide laj yakʼ venta stuk ti ch-akʼvan ta perton li Jeovae xchiʼuk ti oy xkʼuxul yoʼontone. Li Jeovae tskʼan ti jechuk jchʼuntik eke. Li ta xchanobil liʼe, ta jkʼeltik batel kʼu yuʼun tsots skʼoplal ti jchʼuntik lek ti yakʼojutik xa ta perton li Jeovae xchiʼuk ta jkʼeltik kʼusi tskoltautik sventa jchʼuntik taje.

TSOTS SKʼOPLAL TI JCHʼUNTIK LEK TI YAKʼOJUTIK XA TA PERTON LI JEOVAE

5. ¿Kʼusi tskʼan Satanas ti akʼo jchʼuntike? Albo junuk skʼelobil.

⁵ Mi jpʼel ta koʼontontik ti yakʼojutik xa ta perton li Jeovae, muʼyuk me chijlaj ta loʼlael yuʼun li Satanase. Teuk ta joltik ti jaʼ xa xlaj-o Satanas ti mu xa xijtun ta stojolal Jeovae. Jtos ti kʼusi tstunese, jaʼ ti tskʼan chakʼ jchʼuntik ti muʼyuk onoʼox chakʼutik ta perton Jeova ta skoj ti oy kʼusi toj chopol la jpastike. Kalbetik skʼoplal li vinik ta Korintoe, li stuke mulivaj xchiʼuk laj yichʼ lokʼesel ta tsobobbail (1 Kor. 5:​1, 5, 13). Laje, la sutes yoʼonton. Pe li Satanase tskʼan ox ti mu x-akʼe ta perton yuʼun li ermanoetike xchiʼuk ti mu xchʼamik yan velta li ta tsobobbaile. Ti jechuk la spasik li ermanoetike, li Satanase laj van yakʼbe snop ti muʼyuk onoʼox tsta perton li vinike. Vaʼun, xuʼ van xlubtsaj ta skoj ti chat tajek yoʼontone xchiʼuk ti muʼyuk xa chtun-o ta stojolal Jeovae. Li Satanase muʼyuk jelem-o li kʼusi oy ta yoʼontone xchiʼuk li kʼusi tstunese. Pe li kʼusi leke, jaʼ ti «xkojtikinbetik lek li smanyae» (2 Kor. 2:​5-11).

6. ¿Kʼusi skʼan jpastik sventa muʼyukuk xa jmul xkaʼi jbatike?

⁶ Mi jchʼunojtik lek ti yakʼojutik xa ta perton li Jeovae, muʼyuk xa me jmul chkaʼi jbatik. Stalel onoʼox ti chopol chkaʼi jbatik kʼalal ta jsaʼ jmultike (Sal. 51:17). Lek onoʼox ti jech chkaʼi jbatike, yuʼun jaʼ tskoltautik sventa jel jtalelaltik xchiʼuk ti jaʼuk jpastik li kʼusi leke (2 Kor. 7:​10, 11). Pe mi toj chopol-o chkaʼi jbatik akʼo mi jsutesoj xa ox koʼontontike, xuʼ me xijchibaj-o xchiʼuk ti mu xa jkʼan xijtun ta stojolal Jeovae. Yan mi la jchʼuntik ti yakʼojutik xa ta perton li Jeovae, muʼyuk xa jmul chkaʼi jbatik xchiʼuk ta jiptik komel ta patil li kʼusi la jpastike. Vaʼun, xuʼ me sak jol koʼontontik xijtun ta stojolal Jeova xchiʼuk xijmuyubaj noʼox. Taje jaʼ onoʼox li kʼusi oy ta yoʼonton Jeovae (Kol. 1:​10, 11; 2 Tim. 1:3). Jkʼeltik xa batel kʼusi tskoltautik ta jujuntal sventa jtikʼ ta koʼontontik ti yakʼojutik xa ta perton li Jeovae.

¿KʼUSI XUʼ SKOLTAOT SVENTA XACHʼUN TI YAKʼOJOT XA TA PERTON LI JEOVAE?

7, 8. ¿Kʼu yelan chalbe sba skʼoplal Jeova li ta Eksodo 34:6 xchiʼuk 7, xchiʼuk kʼuxi tspat koʼontontik taje?

⁷ Nopbo skʼoplal ti kʼu yelan chalbe sba skʼoplal stuk li Jeovae. Kʼelavil kʼusi laj yalbe Moises li ta vits Sinaie (kʼelo Eksodo 34:​6, 7).a Li Jeovae ep tajek stalelaltak ti kʼupilik sbae, pe jaʼ mas laj yalbe skʼoplal ti «jaʼ jun Dios ti oy xkʼuxul yoʼontone» xchiʼuk ti oy slekil yoʼontone. Vaʼun chaʼa, mi akʼanoj li Jeovae xchiʼuk mi asutesoj xa avoʼonton ta melele, ¿mi mu tauk van xakʼuxubaj ta yoʼonton xchiʼuk ti xakʼot ta pertone? Ti muʼyukuk jech tspase, chʼabal xkʼuxul yoʼonton ti jechuke. Pe mi jaʼuk onoʼox spas yuʼun jech li Jeovae.

⁸ Li Jeovae melel snaʼ xkʼopoj, jaʼ yuʼun kʼalal chal ti oy xkʼuxul yoʼontone, sta-o ti jchʼunbetike (Sal. 31:5). Pe mi vokol chavaʼi xchʼunel ti yakʼojot xa ta perton li Jeovae, nopbo skʼoplal liʼe: li Jeovae chakʼ ta perton skotol li buchʼutik tsutes yoʼontonike, yuʼun oy xkʼuxul yoʼonton xchiʼuk slekil yoʼonton. Mi achʼunoj lek taje, xuʼ me jpʼel ta avoʼonton ti chakʼot ta perton eke.

9. ¿Kʼusi smakoj kʼalal ch-akʼvan ta perton li Jeovae? (Salmo 32:5).

⁹ Nopbo skʼoplal kʼusi smakoj ti ch-akʼvan ta perton li Jeovae. Laj yakʼ ta tsʼibael ta Vivlia ti kʼu yelan ch-akʼvan ta pertone. Xi laj yalbe Jeova li Davide: «La apasbun perton li jmul ti toj echʼ xa noʼox chopole» (kʼelo Salmo 32:5). Kʼalal «apasbun perton» xie, li ta ebreoe jaʼ skʼan xal xtok «tslokʼes batel» o «chkuch batel». Jaʼ yuʼun, kʼalal laj yakʼ ta perton David li Jeovae, xkoʼolaj ti la slokʼesbe batel jun alal ikatsil xchiʼuk ti la xkuch batele. Vaʼun, xkuxet to laj yaʼi li Davide xchiʼuk jun xa yoʼonton yan velta (Sal. 32:​2-4). Mi ta jsutes koʼontontik ta melele, xuʼ me jech xkaʼi jbatik ek. Mu kʼusi ta jtatik mi te jkuchoj-o jmultik ti xkoʼolaj ta alal ikatsile, yuʼun slokʼesoj xa batel li Jeovae xchiʼuk nom xa bu yakʼoj batel.

10, 11. ¿Kʼusi skʼan xal ti chapal sventa chchʼay mulil li Jeovae? (Salmo 86:5).

¹⁰ (Kʼelo Salmo 86:5). Li Davide xi laj yalbe li Jeovae: «Chapalot sventa xachʼay mulil». Jlik livro ti chalbe skʼoplal Vivliae, xi chal ta sventa li versikulo liʼe: «Jaʼ onoʼox jech stalelal ti ch-akʼvan ta perton li Diose». ¿Kʼu yuʼun ti oy xkʼuxul yoʼonton ta stojolal li buchʼutik tsutes yoʼontonike? Xi to chal li tekstoe: «Toj ep tukʼil kʼanelal avuʼun ta stojolal li buchʼutik xvokoletik ta atojolale». Jech kʼuchaʼal la jchantik li echʼ xchanobile, li buchʼutik skʼanojik Jeovae ch-akʼbatik ta ilel tukʼil kʼanelal xchiʼuk muʼyuk ch-iktaatik-o. Taje jaʼ chtijbat-o yoʼonton Jeova sventa mu sjalanbe perton li buchʼutik tsutes yoʼontonike (Is. 55:7). Mi vokol chavaʼi xchʼunel ti yakʼojot xa ta perton li Jeovae, nopbo skʼoplal liʼe: «Jnaʼoj ti chapal lek Jeova sventa xakʼbe perton li buchʼutik tsutes yoʼontonike xchiʼuk ti xvokoletik ta skʼanel ti xkʼuxubinatike. ¿Mi mu skʼanuk van jtikʼ ta koʼonton ek ti yakʼojun xa ta pertone?».

¹¹ Li Vivliae chal xtok ti snaʼoj Jeova ti kʼu yelan pasbilutike xchiʼuk te ta sjol ti jpasmulilutike, taje tspat tajek koʼontontik (Sal. 139:​1, 2). Jkʼeltik batel yan salmo ti la stsʼiba David sventa xkiltik ti xojtikinutik lek li Jeovae. Taje jaʼ tskoltautik sventa jchʼuntik ti oy ta yoʼonton chakʼutik ta pertone.

TEUK TA AJOL LI KʼUSI TE TA SJOL JEOVAE

12, 13. Jech kʼuchaʼal chal Salmo 103:​14, ¿kʼusi te ta sjol li Jeovae xchiʼuk kʼusi tspas?

¹² (Kʼelo Salmo 103:14). Li Davide xi laj yalbe skʼoplal li Jeovae: «Te ta sjol ti lumutik noʼoxe». Taje oy kʼusi tsots skʼoplal chakʼ kiltik: oy ta yoʼonton chakʼutik ta perton Dios mi la jsutes koʼontontike, yuʼun muʼyuk chchʼay ta sjol ti jpasmulilutike. Jkʼelbetik to mas skʼoplal li versikuloe.

¹³ Li Davide laj yal ti «snaʼoj lek [Jeova] ti kʼu yelan pasbilutike». Kʼalal la spas li Adane, ta lum la spas. Jaʼ yuʼun, akʼo mi tukʼil krixchano toʼox, snaʼoj onoʼox Jeova ti oy kʼusitik mu spas yuʼune xchiʼuk ti oy kʼusitik chtun yuʼune, jech kʼuchaʼal ti xichʼ ikʼe, ti xveʼe xchiʼuk ti xvaye (Jen. 2:7). Li voʼotik eke ta lum pasbilutik, pe ta skoj ti la saʼ smulik li Adan xchiʼuk Evae, jpasmulil xa onoʼox chij-ayan xchiʼuk mas to skʼan xkakʼtik persa sventa mu jpastik li kʼusi chopole. Li Davide maʼuk noʼox laj yal ti snaʼoj lek Jeova ti jpasmulilutike, yuʼun laj yal ti te ta sjole. Kʼalal «te ta sjol» xi li ta Salmo 103:​14, li ta ebreo kʼope maʼuk noʼox chakʼ ta aʼiel ti te ta snopben li Jeovae, yuʼun oy kʼusi lek chtijbat yoʼonton spasel. Li versikulo liʼe chakʼ kiltik ti snaʼoj lek Jeova ti oy onoʼox bu chijchʼaye. Pe mi la jsutes koʼontontike, chakʼbutik ta ilel xkʼuxul yoʼonton xchiʼuk chakʼutik ta perton, yuʼun te ta sjol ti lum achʼelutik noʼoxe (Sal. 78:​38, 39).

14. 1) ¿Kʼusi chakʼ jchantik Salmo 103:12 ti kʼu yelan ch-akʼvan ta perton li Jeovae? 2) ¿Kʼusi chakʼ jchantik ti kʼu yelan akʼe ta perton yuʼun Jeova li Davide? (Kʼelo li rekuadro «Li Jeovae ch-akʼvan ta perton xchiʼuk chchʼay-o ta sjol li jmultike»).

¹⁴ ¿Kʼu yelan snaʼ x-akʼvan ta perton li Jeovae? (Kʼelo Salmo 103:12). Li Davide laj yal ti kʼalal ch-akʼvan ta perton li Jeovae, nom tajek tsjip batel li jmultike, «jech kʼuchaʼal toj nom xil sbaik li slokʼeb kʼakʼal xchiʼuk smaleb kʼakʼale». Yuʼun muʼyuk onoʼox bu tsta sba kʼalal chlokʼ talel kʼakʼal xchiʼuk kʼalal chmal bal kʼakʼale. ¿Kʼusi chakʼ jchantik taje? Jun vinik ti xchanojbe skʼoplal Vivliae xi chale: «Mi nom tajek chichʼ jipel batel li jmultike, xuʼ jpʼel ta koʼontontik ti muʼyuk kʼusi chkom jsetʼuke xchiʼuk chichʼ chʼayel-o ta jolal» (El tesoro de David, yuʼun Charles Spurgeon, volumen 2, jaʼ la sjelubtas Samuel Vila). Bateltike, kʼalal oy kʼusi chkaʼibetik jutebuk yikʼe, oy kʼusi chvul-o ta joltik. Pe kʼalal ch-akʼvan ta perton li Jeovae, mi jaʼuk kʼusi chkom jsetʼuk o jutebuk yikʼ ti jaʼ chvul-o ta sjol sventa stikʼ ta jsatike (Esek. 18:​21, 22; Ech. 3:19).

15. ¿Kʼusi xuʼ jpastik mi chopol-o chkaʼi jbatik ta skoj li kʼusi la jpastik ta voʼnee?

¹⁵ Mi chopol-o chavaʼi aba ta skoj li kʼusi la apas ta voʼnee, nopbo skʼoplal li Salmo 103 sventa xatikʼ ta avoʼonton ti yakʼojot xa ta perton li Diose. Xiuk xajakʼbe abae: «Mi te ta sjol Jeova ti jpasmulilune xchiʼuk ti oy ta yoʼonton chakʼun ta pertone, ¿mi mu skʼanuk van jtikʼ ta koʼonton taj eke? Jech xtok, mi xchʼayoj xa ta sjol li jmultak xchiʼuk ti muʼyuk tstikʼ ta jsate, ¿mi mu skʼanuk van jchʼay ta jol ek?». Li Jeovae muʼyuk bu tsvules ta sjol li kʼusi chopol la apase, ¿kʼu yuʼun ti te to xanopnun-o xchiʼuke? (Sal. 130:3). Mi la avalbe avoʼonton ti yakʼojot xa ta perton li Jeovae, chavakʼbe aba perton ek xchiʼuk chajip komel ta patil li kʼusi la apase.

16. ¿Kʼu yuʼun toj xibal sba mi te xijnopnun-o xchiʼuk li kʼusi chopol la jpastik ta voʼnee? (Kʼelo xtok li lokʼole).

¹⁶ Kʼalal te xanopnun-o xchiʼuk li kʼusitik chopol la apas ta voʼnee, xkoʼolaj ti chatsʼot akarro ti jujulikel chakʼelbe snenal sventa xavil li kʼusi chkom ta patile. Lek onoʼox ti jech xapas bakʼintik sventa xavil mi oy kʼusi xibal sba chtale xchiʼuk ti xajoy abee. Pe sventa mu kʼusi xanuptane, skʼan tukʼ akʼelojuk batel li abee. Jaʼ noʼox jech ek, lek onoʼox ti xavules ta ajol bakʼintik li kʼusi chopol la apas sventa oyuk kʼusi xakʼ achan xchiʼuk ti xavakʼ avipal ti mu jechuk xapas yan veltae. Pe mi solel te xanopnun-o xchiʼuke, oy-o amul chavaʼi aba xchiʼuk muʼyuk xa jun avoʼonton chatun ta stojolal Jeova. Jaʼ yuʼun, tukʼ xakʼel batel li sbelel achʼ balumile, ti bu «muʼyuk xa chichʼ tael ta naʼel» li kʼusitik chopole (Is. 65:17; Prov. 4:25).

JECHUK-O XAVAKʼBE XCHʼUN LI AVOʼONTONE

17. ¿Kʼu yuʼun skʼan xkakʼbe xchʼun koʼontontik ti skʼanojutik li Jeovae xchiʼuk ti chakʼutik ta pertone?

¹⁷ Jkotoltik skʼan jechuk-o xkakʼbe xchʼun koʼontontik ti skʼanojutik li Jeovae xchiʼuk ti ta sjunul yoʼonton chakʼutik ta pertone (1 Juan 3:​19, tsʼib ta yok vun). ¿Kʼu yuʼun? Yuʼun li Satanase jech-o chakʼ jchʼuntik ti muʼyuk skʼanojutik li Diose xchiʼuk ti muʼyuk onoʼox chakʼutik ta pertone. Li kʼusi oy ta yoʼontone jaʼ ti mu xa xijtun ta stojolal Jeovae. Jech xtok, ta skoj ti snaʼoj ti jutuk xa skʼan xichʼ lajesele, mas to yakʼojbe yipal sventa xchibajesutik (Apok. 12:12). ¡Mu me xkakʼtik ti jaʼuk spas kanal li Satanase!

18. ¿Kʼusi xuʼ xapas sventa xachʼun ti skʼanojot li Jeovae xchiʼuk ti yakʼojot xa ta pertone?

¹⁸ Li xchanobil echʼe la jchantik kʼusi xuʼ skoltaot sventa xachʼun ti skʼanojot li Jeovae. Li ta xchanobil liʼe, laj kiltik kʼusi xuʼ xapas sventa xachʼun ti yakʼojot xa ta perton li Jeovae. Nopbo skʼoplal ti kʼu yelan chalbe sba skʼoplal stuk li Jeovae xchiʼuk ti kʼusi smakoj ti ch-akʼvan ta pertone. Mu xchʼay xavaʼi ti te ta sjol Jeova ti maʼuk tukʼil krixchanoote xchiʼuk ti chakʼbot ta ilel xkʼuxul yoʼontone. Jech xtok, teuk ta ajol ti chchʼay ta j-echʼel amul li Jeovae. Vaʼun, xi jpʼel ta avoʼonton chaval kʼuchaʼal li Davide: «¡Kolaval, Jeova, ti ‹la apasbun perton li jmul ti toj echʼ xa noʼox chopole›!» (Sal. 32:5).