Te oy-o sbatel osil li kʼanelal yuʼun Diose

1, 2. ¿Kʼu yelan chkaʼi jbatik kʼalal oy kʼusi tsots ta jnuptantike?

NOPO avaʼi kʼu yelan chyukʼilanat jkot varko ta skoj ti oy tsatsal ikʼaloʼe. Ta skoj ti xvaʼi xkoti noʼox li nabe, chjoche batel ta jujujot li varkoe. Sventa mu kʼusi xibal sba xkʼot ta pasele, skʼan jipel yalel li anklae.

² ¿Mi oy kʼusi tsots yakal chanuptan? Yikʼaluk van jaʼ jech chavaʼi aba kʼuchaʼal li jkot varkoe. Ti chavichʼ jochel ta jujujote o yukʼilanel ta skoj li avokoltake. Yuʼun bakʼintike, achʼunoj lek ti skʼanojot li Jeovae xchiʼuk ti tskoltaote, pe xuʼ van ta anil noʼox chlik anop ti mu kʼusi sventa-o li kʼusi chanuptane (Sal. 10:1; 13:1). Yikʼaluk van tspat avoʼonton junuk avamigo, vaʼun jun avoʼonton chakom kʼuuk sjalil (Prov. 17:17; 25:11). Pe ta tsʼakale, chlik anop xtok ti muʼyuk van skʼanojot li Jeovae xchiʼuk ti muʼyuk oyot ta yoʼontone. Mi xtal xbat noʼox li anopbene, ¿kʼuxi xuʼ skoltaot mi la ajip yalel li a-anklae, jaʼ xkaltik, ti jpʼeluk-o ta avoʼonton ti skʼanojot li Jeovae xchiʼuk ti tskoltaote?

3. 1) ¿Kʼusi skʼan xal li tukʼil kʼanelale? (Salmo 31:7; 136:1). 2) ¿Kʼu yuʼun chkaltik ti jaʼ jech tajek stalelal li Jeovae? (Kʼelo xtok li lokʼole).

³ Kʼalal oy kʼusi tsots ta jnuptantike, jaʼ me tskoltautik mi la jvules ta joltik li tukʼil kʼanelal yuʼun Jeovae. Taje jaʼ jtos ti kʼuxi ta jiptik yalel li j-anklatike (kʼelo Salmo 31:7; 136:1). Kʼalal «tukʼil kʼanelal» xie, jaʼ skʼoplal ti kʼu yelan muʼyuk spajeb chkʼanvan li jun krixchanoe xchiʼuk ti tukʼ-o chakʼ sbae. Taje jaʼ jech tajek stalelal li Jeovae. Li Vivliae chal ti toj ep «tukʼil kʼanelal yuʼun» li Jeovae xchiʼuk ti jaʼ jech chakʼbe ta ilel li yajtuneltake (Eks. 34:​6, 7; Sal. 86:5). Nopbo skʼoplal taje: ¡li Jeovae muʼyuk onoʼox chikta li yajtuneltak ti tukʼ yakʼoj sbaike! Mi te ta ajol taje, jaʼ me tskoltaot sventa junuk noʼox avoʼonton akʼo mi xkoʼolaj ta tsatsal ikʼaloʼ li avokoltake (Sal. 23:4).

LI KʼANELAL YUʼUN JEOVAE JAʼ JTOS CHANUBTASEL TI TSOTS SKʼOPLALE

4. ¿Kʼusitik junantik chanubtasel ta Vivlia ti tsots skʼoplale? ¿Kʼu yuʼun muʼyuk buchʼu xuʼ sjel jnopbentik?

⁴ ¿Kʼuxi yan xuʼ jiptik yalel li j-anklatik kʼalal oy jvokoltike? Jaʼ mi jech chkiltik kʼuchaʼal jun chanubtasel ta Vivlia li kʼanelal yuʼun Jeovae. ¿Kʼusitik li chanubtasel ti tsotsik skʼoplale? Jaʼ li kʼusitik baʼyel la jchantik ta Vivliae. Jech kʼuchaʼal liʼe, ti jaʼ Jeova sbi li Diose, ti jaʼ Xnichʼon Dios li Jesuse, ti mu xa kʼusi snaʼik li animaetike, ti tspas ta paraiso li balumile xchiʼuk ti te chkuxiik sbatel osil li krixchanoetike (Sal. 83:18; Ekl. 9:5; Juan 3:16; Apok. 21:​3, 4). Kʼalal jchʼunojtik xa lek ti melel li chanubtaseletik taje, ¿mi mu jechuk ti chʼabal xa buchʼu xuʼ sjelbutik li jnopbentike? Jaʼ noʼox jech ek, mi jaʼ jun chanubtasel ta Vivlia chkiltik li kʼanelal yuʼun Jeovae, jaʼ me tskoltautik sventa mu teuk xijnaʼet mi oyutik ta yoʼonton li Diose. Kalbetik to mas skʼoplal taje.

5. ¿Kʼuxi xuʼ jbul lokʼel ta koʼontontik li kʼusi jecheʼ jchʼunojtike?

⁵ Kʼalal lik achan li Vivliae, ¿kʼusi la skoltaot sventa xajel li kʼusi jecheʼ achʼunoje? Yikʼaluk van lik akoʼoltas li kʼusi achanoj ta arelijion xchiʼuk li kʼusi chal Vivliae. Xuʼ van achʼunoj toʼox ti jaʼ Dios li Jesuse. Pe kʼalal lik achan batel Vivliae, xi van la ajakʼbe abae: «¿Mi melel van taje?». Vaʼun, la akʼelbe lek skʼoplal ta Vivlia xchiʼuk laj avakʼ venta ti jecheʼ li kʼusi achʼunoj toʼoxe. Ta tsʼakale, la ajel anopben xchiʼuk la achʼun ti «jaʼ baʼyel laj yichʼ pasel ta skotol» kʼusitik li Jesuse xchiʼuk ti jaʼ «li jun noʼox Xnichʼon Diose» (Kol. 1:15; Juan 3:18). Li kʼusitik jecheʼ jchʼunojtike xuʼ van tsots yakʼoj yibel ta koʼontontik xchiʼuk vokol van chkaʼitik ta sbulel lokʼel (2 Kor. 10:4, 5). Pe kʼalal chkʼot lek ta koʼontontik li kʼusi melele, muʼyuk xa buchʼu xuʼ sjel li jnopbentike (Filip. 3:13).

6. ¿Kʼu yuʼun xuʼ jchʼuntik ti «te oy-o sbatel osil li tukʼil kʼanelal» yuʼun Jeovae?

⁶ Mi oy kʼusi tsots yakal chanuptan xchiʼuk mi chanop ti muʼyuk skʼanojot li Jeovae, xiuk xajakʼbe aba eke: «¿Mi melel van taje?». Li Vivliae chal ti oy tukʼil kʼanelal yuʼun li Jeovae. Jech oxal, mi oy kʼusi xachibet yuʼune, koʼoltaso xchiʼuk li kʼusi chal Salmo 136:1 ti jaʼ li teksto bu lokʼem li xchanobil liʼe. ¿Kʼu yuʼun chal Jeova ti tukʼ li kʼanelal yuʼune? Li ta salmo liʼe, ¿kʼu yuʼun 26 ta velta chal ti «te oy-o sbatel osil li tukʼil kʼanelal yuʼune»? Taje chakʼ kiltik ti chakʼbe ta ilel tukʼil kʼanelal steklumal li Jeovae. Taje jaʼ jtos chanubtasel ta Vivlia ti tsots skʼoplal jech kʼuchaʼal li yan chanubtaseletik ti kʼotem xa ta avoʼontone. Jaʼ yuʼun, mi chanop ti muʼyuk oyot ta yoʼonton li Jeovae, mu xatikʼ ta avoʼonton jech kʼuchaʼal muʼyuk xa chachʼun li jecheʼ chanubtaseletike.

7. Alo junchibuk teksto ti chakʼ ta ilel ti skʼanojutik li Jeovae.

⁷ Li ta Vivliae, ta jtatik yan tekstoetik ti chakʼ ta ilel ti skʼanojutik li Jeovae. Jkʼeltik chibuk skʼelobil. Li Jesuse xi laj yalbe li yajchankʼoptake: «Voʼoxuk mas tsots akʼoplalik kʼuchaʼal li epal saktarine» (Mat. 10:31). Muʼyuk bu xi laj yale: «Yikʼaluk van voʼoxuk mas tsots akʼoplalik kʼuchaʼal li epal saktarine». Li Jeova eke xi laj yalbe li steklumale: «Voʼon ta jtsatsubtasot, jech, voʼon ta jkoltaot, ta melel, ta xkikot lek ta jbatsʼikʼob ti tukʼ kʼusi tspase» (Is. 41:10). Muʼyuk bu xi laj yale: «Yikʼaluk van ta jkoltaot». Kʼuchaʼal chkiltike, li chib tekstoe muʼyuk ti xijnaʼet to yuʼune, yuʼun melel li kʼusi chale. Jaʼ yuʼun, mi oy kʼusi chanuptan xchiʼuk mi lik naʼetajan mi skʼanojot li Jeovae, xuʼ me skoltaot li tekstoetik kʼuchaʼal liʼe, yuʼun jaʼ chakʼ achʼun ti skʼanojot ta melel li Jeovae. Nopbo skʼoplal xchiʼuk albo Jeova li kʼusi xanaʼet-o yuʼune. Mi jech la apase, jaʼ jech chaval kʼuchaʼal li yajtsʼaklomtak Kristo ta baʼyel sigloe: «Laj xa kojtikintik xchiʼuk jchʼunojtik ti te oy ta jtojolaltik li kʼanelal yuʼun Diose» (1 Juan 4:16).a

8. ¿Kʼusi xuʼ jpastik mi te to xijnaʼet mi skʼanojutik li Jeovae?

⁸ ¿Kʼusi xuʼ xapas mi te to xanaʼet mi skʼanojot li Jeovae? Koʼoltaso ti kʼu yelan chavaʼi aba xchiʼuk li kʼusi anaʼojbe skʼoplale. Akʼo mi muʼyuk skʼanojot chavaʼi li Diose, anaʼoj ti mu meleluke, yuʼun li Vivliae chal ti skʼanojutike. Teuk ta ajol ti melel li kʼusi chal Vivliae, jaʼuk ti kʼu yelan chkaʼi jbatike xuʼ sloʼlautik. Mi ta jnoptik ti muʼyuk skʼanojutik li Diose, xkoʼolaj ti muʼyuk tsots skʼoplal chkiltik ti «jaʼ kʼanelal li Diose» (1 Juan 4:8).

JNOPBETIK SKʼOPLAL TI SKʼANOJUTIK LI TOTILE

9, 10. ¿Kʼusi la skʼan laj yal Jesus kʼalal xi laj yale: «Kʼux chaʼioxuk [o skʼanojoxuk] li Totile»? (Juan 16:​26, 27; kʼelo xtok li lokʼole).

⁹ Yan ti kʼusi tskoltautik sventa jchʼuntik ti skʼanojutik li Jeovae, jaʼ mi la jkʼeltik kʼusi laj yalbe yajchankʼoptak li Jesuse: «Kʼux chaʼioxuk [o skʼanojoxuk] li Totile» (kʼelo Juan 16:​26, 27). ¿Kʼu yuʼun ti jech laj yalanbee? ¿Mi jaʼ noʼox van sventa junuk yoʼonton xaʼi sbaik? Moʼoj, li stsʼak loʼile chakʼ ta ilel ti jaʼ yakal chalbe skʼoplal li orasione.

¹⁰ Li Jesuse laj yalbe yajchankʼoptak ti skʼan spasik orasion ta sbie, pe ti mu jaʼuk staik ta kʼoponele (Juan 16:​23, 24). Taje toj tsots skʼoplal ti xaʼibeik smelolale. ¿Kʼu yuʼun? Yuʼun kʼalal chaʼkuxiem xa oxe, xuʼ van ayan ta yoʼontonik ti staik ta kʼoponele. Ta skoj ti kʼanbilik tajek yuʼun li Jesuse xchiʼuk ti jaʼ yamigoike, yikʼaluk van la snop jchankʼopetik ti oy ta yoʼonton Jesus ti x-aʼibat li svokolike xchiʼuk ti te xa tsjelubtasbe li Stote. Pe li Jesuse laj yakʼ ta aʼiel ti mu lekuk ti jech tsnopike, xi laj yalanbee: «Kʼux chaʼioxuk li Totile». Taje chakʼ kiltik ti skʼanojutik tajek li Jeovae, yuʼun jaʼ chaʼi stuk li j-orasiontike, muʼyuk buchʼu yan svaʼanoj, taje jaʼ yan chanubtasel ti toj tsots skʼoplal ta sventa li orasione. Li voʼotik eke ta jchantik li Vivliae, jaʼ yuʼun xkojtikintik xa li Jesuse xchiʼuk jkʼanojtik xa (Juan 14:21). Pe jech kʼuchaʼal li yajchankʼoptak Jesus ta baʼyel sigloe, ta sjunul koʼontontik ta jkʼopontik li Diose, yuʼun jnaʼojtik ti chchikintabutike xchiʼuk ti skʼanojutike. Jujukoj kʼalal ta jkʼopontik li Jeovae, chkakʼtik ta ilel ti jchʼunojtik lek ti skʼanojutik li Totile (1 Juan 5:14).

JKʼELTIK KʼU YUʼUN TI XIJNAʼETE

11. ¿Kʼu yuʼun jaʼ xa xlaj-o Satanas ti xijnaʼet mi skʼanojutik li Jeovae?

¹¹ ¿Buchʼu chakʼ jnoptik ti muʼyuk xa skʼanojutik li Jeovae? Yikʼaluk van jaʼ chtal ta joltik li Satanase, taje jaʼ melel. Li Diabloe tskʼan tsbikʼutik xchiʼuk tskʼan ti akʼo jnoptik ti muʼyuk skʼanojutik li Jeovae (1 Ped. 5:8). Kʼalal la spojutik li Jeovae, jaʼ ta skoj ti skʼanojutike, pe li Satanase tskʼan ti jnoptik ti mu jtatik-o ti laj kichʼtik pojele (Ebr. 2:9). ¿Buchʼu ti xmuyubaj xa kʼalal xijnaʼet mi skʼanojutik li Jeovae? Jaʼ li Satanase. ¿Buchʼu ti jaʼ xa xlaj-o ti xijchibaj kʼalal chkil jvokoltike? Jaʼ li Satanase. Pe nopbo avaʼi skʼoplal liʼe: ¡jaʼ stuk ti muʼyuk xa kʼanbil yuʼun li Jeovae! ¡Jaʼ xa tskʼan ti akʼo jnoptik ti muʼyuk skʼanojutik li Jeovae xchiʼuk ti muʼyuk lek chilutike! Ta melel, toj manya ti kʼu yelan tsloʼlautike (Efes. 6:11). Ti laj xa jnaʼtik li kʼusi oy ta yoʼontone, jaʼ tskoltautik sventa jpʼeluk ta koʼontontik jpʼajtik li kʼusi tskʼan tstikʼ ta jnopbentike (Sant. 4:7).

12, 13. Ta skoj li mulil jkuchojtike, ¿kʼu yuʼun xijnaʼet yuʼun mi skʼanojutik li Jeovae?

¹² Pe maʼuk noʼox Satanas chakʼ jnoptik ti muʼyuk skʼanojutik li Jeovae. Li mulil jkuchojtike jech chakʼ jnoptik ek (Sal. 51:5; Rom. 5:12). Ta skoj ti jpasmulilutike, nom oyutik ta stojolal li Jpasvanej kuʼuntike. Maʼuk noʼox, yuʼun muʼyuk xa lek kʼusi chakʼ jnoptik, chopol chkaʼi jbatik xchiʼuk chij-ipajutik.

¹³ Li mulil jkuchojtike toj chopol kʼusi chakʼ jnoptik: oy jmul chkaʼi jbatik yuʼun, ta jvul koʼontontik, mu junuk koʼontontik xchiʼuk chijkʼexavutik. Taje jaʼ jech chkaʼi jbatik kʼalal ta jpas jmultike. Pe xuʼ jech chkaʼi jbatik xtok ta skoj ti te ta joltik ti jpasmulilutike, taje maʼuk jech la spasutik ta slikebal li Diose (Rom. 8:​20, 21). Ta skoj li mulil jkuchojtike, xijkoʼolaj ta jkot karro ti tʼomem jpʼej syantae, mu xa lekuk xanav jech kʼuchaʼal kʼalal laj yichʼ meltsanele. Li voʼotik eke oy xa kʼusitik mu spas kuʼuntik jech kʼuchaʼal la spasutik ta slikebal li Diose. Jaʼ yuʼun, stalel onoʼox ti xijnaʼet bakʼintik mi skʼanojutik li Jeovae. Kʼalal jech chkaʼi jbatike, lek me ti jvules ta joltik li kʼusi tspas ta jtojolaltik li Jeovae, xi chal li Vivliae: «Chavakʼ ta ilel tukʼil kʼanelal ta stojolal li buchʼutik skʼanojikote xchiʼuk ti chchʼunik amantale» (Neem. 1:5).

14. Kʼalal ta jnopbetik skʼoplal li pojelale, ¿kʼuxi tskoltautik sventa mu xijnaʼetaj mi skʼanojutik li Jeovae? (Romanos 5:8; kʼelo xtok li rekuadro «Li sjuʼel mulil ti chloʼlavane»).

¹⁴ Bateltike, mu jtatik-o chkaʼitik ti skʼanojutik li Jeovae. Ti melel xkaltike, mu onoʼox jtatik-o xchiʼuk mu kʼusi stakʼ jpastik sventa skʼanutike. Akʼo mi jech, stuk xa noʼox jech ti kʼu yelan skʼanojutik li Jeovae. Skʼanojutik tajek, yuʼun la spojutik sventa xchʼay li jmultike (1 Juan 4:10). Teuk ta joltik xtok ti maʼuk tal spoj tukʼil krixchanoetik li Jesuse, jaʼ tal spoj li jpasmuliletike (kʼelo Romanos 5:8). Li Jeovae muʼyuk onoʼox tskʼanbutik ti tukʼ xa skotol li kʼusi ta jpastike, yuʼun snaʼoj ti mu spas kuʼuntike. Kʼuchaʼal laj xa kiltike, li mulil jkuchojtike chijnaʼetaj yuʼun mi skʼanojutik li Diose. Mi te ta joltik taje, jaʼ tskoltautik sventa mu jnoptik ti muʼyuk skʼanojutik li Jeovae (Rom. 7:​24, 25).

TUKʼUK XKAKʼ JBATIK

15, 16. ¿Kʼusi tspas ta jtojolaltik Jeova mi tukʼ chkakʼ jbatike, xchiʼuk kʼu yuʼun ti jech tspase? (2 Samuel 22:26).

¹⁵ Akʼo mi xkoʼolaj ta tsatsal ikʼaloʼ li jvokoltike, li Jeovae tskʼan ti lekuk kʼusi xkʼot ta nopel kuʼuntike xchiʼuk ti jpat koʼontontik ta stojolale (Deut. 30:​19, 20). Mi tukʼ chkakʼ jbatik ta stojolale, xuʼ me jpʼel ta koʼontontik ti tukʼ chakʼ sba ta jtojolaltik eke xchiʼuk ti muʼyuk bu chiktautik kʼusuk noʼox ti jnuptantike (kʼelo 2 Samuel 22:26).

¹⁶ Jech kʼuchaʼal laj xa kiltike, kʼalal oy kʼusi tsots ta jnuptantike, jiptik yalel li j-anklatike, jaʼ xkaltik, jvules ta joltik ti skʼanojutik li Jeovae xchiʼuk ti ta onoʼox skoltautike. Mi xijnaʼet bakʼintik mi skʼanojutik li Jeovae, jvules ta joltik ti oy sjelbenal ti kʼu yelan chkaʼi jbatike xchiʼuk li kʼusi jnaʼojbetik skʼoplale. Jchʼuntik lek li jtos chanubtasel ta Vivlia liʼe: te oy-o sbatel osil li tukʼil kʼanelal yuʼun Jeovae.