Masuk to xlekub li j-orasiontike

1, 2. 1) Kʼalal ta jpastik orasione, ¿kʼu yuʼun jaʼ xa noʼox ta jchaʼaltik bakʼintik li kʼusi nopem xkaʼitike? 2) ¿Kʼuxi jnaʼojtik ti chchikinta Jeova skotol li kʼusi chkalbetike?

¿KʼU YELAN nopem xavaʼi chapas li a-orasione? ¿Mi jaʼ xa noʼox chaval li kʼusi nopem xavaʼie o ti muʼyuk xa chlokʼ ta avoʼontone? Taje xuʼ jech xkʼot ta jtojolaltik jkotoltik. Ta skoj ti ep kʼusi ta jpastik jujun kʼakʼale, xuʼ van jlikel xa noʼox ta jpastik orasion. Jech xtok, xuʼ van ta jnoptik ti mu jtatik-o ti jkʼopontik li Jeovae o ti xkalbetik ti kʼu yelan chkaʼi jbatike.

² Li Vivliae chal ti jaʼ mas tsots skʼoplal chil Jeova ti xlokʼuk ta koʼontontik li kʼusi chkalbetike xchiʼuk ti bikʼituk xkakʼ jbatike. Jaʼ yuʼun, mu persauk ti yan xa sba kʼusi chkaltik li ta j-orasiontike o ti lek xa xcholet kʼusi chkaltike. Li Jeovae chchikintabe «kʼusi tskʼanik li manxoetike» (Sal. 10:17). Tstsʼet chikinta skotol li kʼusi chkalbetike, yuʼun oyutik tajek ta yoʼonton (Sal. 139:​1-3).

3. ¿Kʼusi ta jkʼelbetik skʼoplal li ta xchanobil liʼe?

³ Li ta xchanobil liʼe, ta jkʼelbetik batel skʼoplal li sjakʼobiltak liʼe: ¿kʼu yuʼun skʼan mu xijxiʼutik ta yalbel Jeova li kʼusi ta jnoptik xchiʼuk ti kʼu yelan chkaʼi jbatike?, ¿kʼu yelan skʼan jpastik orasion sventa masuk to xijnopaj ta stojolal Jeovae?, ¿kʼuxi tskoltautik li orasionetik ti te tsʼibabil ta Vivlia sventa masuk to xlekub ti kʼu yelan ta jpastik eke? xchiʼuk ¿kʼusi xuʼ jpastik mi mu xa xlokʼ ta alel kuʼuntik ti kʼu yelan chkaʼi jbatik ta skoj ti ta jvul tajek koʼontontike?

MU XAXIʼ TA SKʼOPONEL JEOVA

4. ¿Kʼusi tskoltautik sventa mu xijxiʼ ta skʼoponel li Jeovae? (Salmo 119:145).

⁴ Mi jaʼ kamigotik chkiltik li Jeovae, mas me kʼun chkaʼitik ta yalbel li kʼusi ta jnoptike xchiʼuk ti kʼu yelan chkaʼi jbatike, yuʼun jnaʼojtik ti oy ta yoʼonton tskoltautike. Kalbetik skʼoplal li jtsʼibajom ta Salmo 119 ti ep kʼusitik la snuptane. Yuʼun laj yichʼ jutbel smul xchiʼuk bakʼintike chopol laj yaʼi sba ta skoj ti oy kʼusi muʼyuk lek bat ta pasel yuʼune (Sal. 119:​5, 23, 69, 78). Pe laj yakʼ persa sventa xnopaj ta stojolal li Jeovae, jaʼ yuʼun muʼyuk xiʼ ta skʼoponel (kʼelo Salmo 119:145).

5. ¿Kʼu yuʼun skʼan jechuk-o jkʼopontik Jeova akʼo mi chopol chkaʼi jbatik? Albo junuk skʼelobil.

⁵ Li Jeovae tskʼan ti jechuk-o jkʼopontike akʼo mi tsots jsaʼoj jmultik (Is. 55:​6, 7). Jaʼ yuʼun, akʼo mi chopol chkaʼi jbatik, skʼan me mu jaʼuk smakutik sventa jkʼopontik. Sventa xkaʼibetik smelolale, kalbetik junuk skʼelobil. Jnoptik noʼox ti labat ta paxyal xchiʼuk ti lachʼay ta bee. Anaʼoj ti oy jnaklejetik te sventa xajakʼbe bu sbelel xkom ti bu chakʼan chabate. ¿Mi muʼyuk van chbat ajakʼ ta skoj noʼox ti chakʼexave? ¡Mase, chatsʼik li kʼexlale! Jaʼ noʼox jech ek, bateltike oy kʼusi chopol ta jpastik xchiʼuk chijchʼay ta be, vaʼun chijxiʼ o chijkʼexav xa ta skʼoponel li Jeovae, pe skʼan me mu jaʼuk smakutik (Sal. 119:​25, 176).

JAMBO AVOʼONTON LI JEOVAE

6, 7. ¿Kʼusi tskoltautik sventa jambe koʼontontik li Jeovae? Albo junuk skʼelobil (kʼelo xtok li tsʼib ta yok vune).

⁶ Mas to chijnopaj ta stojolal Jeova kʼalal ta sjunul koʼonton chkalbetik li kʼusi ta jnoptike xchiʼuk li kʼusi oy ta yutil to koʼontontike. Ta jkʼeltik batel kʼu yelan skʼan jpastik orasion sventa masuk to xijnopaj ta stojolal li Jeovae.

⁷ Jnopbetik skʼoplal li stalelaltak Jeovae.a Kʼalal mas ta jnopbetik skʼoplale, mas kʼun chkaʼitik sventa jambe koʼontontik li Jeovae (Sal. 145:​8, 9, 18). Jaʼ jech la spas jun ermana ti Kristine sbie, xi chale: «Ta skoj ti toj chopol stalelal li jtote, vokol chkaʼi ta xchʼunel ti lek yoʼonton li Jeovae xchiʼuk ti xuʼ jkʼopone. Kʼalal oy kʼusi chopol chbat ta pasel kuʼune, ta jnop ti mas to chnamaj batel ta jtojolale». ¿Kʼusi stalelal Jeova la snopbe skʼoplal? Xi chale: «Jaʼ la skoltaun tajek li tukʼil kʼanelal yuʼun Jeova sventa masuk to jun koʼonton xkaʼi jbae. Jnaʼoj ti te snitojbun-o jkʼob li Jeovae xchiʼuk ti ta slekil yoʼonton tstoyun likel mi liyal ta lume. Kʼalal ta jnopbe skʼoplal li kʼanelal yuʼune, jaʼ tskoltaun sventa xkalbe Jeova li kʼusi ximuyubaj-o yuʼune xchiʼuk li kʼusi ta jvul-o koʼontone».

8, 9. ¿Kʼuxi tskoltautik kʼalal baʼyel ta jnoptik li kʼusi chkalbetik Jeovae? Albo junuk skʼelobil.

⁸ Jnoptik baʼyel li kʼusi chkalbetik Jeovae. Kʼalal mu to ta jpastik orasione, jnopbetik skʼoplal li sjakʼobiltak liʼe: «¿Kʼusi yakal ta jnuptan li avie? ¿Mi oy buchʼu ti muʼyuk to kakʼoj ta pertone? ¿Mi oy kʼusi achʼ to la jnuptan ti ta jkʼan tskoltaun li Jeovae?» (2 Rey. 19:​15-19). Xuʼ me jchanbetik stalelal xtok li Jesuse, yuʼun li stuke oy kʼusitik la skʼan ta sventa li sbi Jeovae, li Ajvalilale xchiʼuk li kʼusi tskʼan yoʼonton Stote (Mat. 6:​9, 10).

⁹ Jun ermana ti Aliska sbie chal ti vokol tajek laj yaʼi spasel orasion kʼalal tabat kanser ta xchinab li smalale xchiʼuk ti chʼabal xa xpoxile. Xi chale: «La jvul tajek koʼonton, jaʼ yuʼun mu xa xnop lek kuʼun kʼusi chkal li ta j-orasione». ¿Kʼusi spasoj talel? Xi chale: «Kʼalal mu to ta jpas orasione, baʼyel ta jnop kʼusi chkalbe li Jeovae. Taje jaʼ skoltaojun talel sventa mu jaʼuk noʼox xkalbe li jvokoltake xchiʼuk li kʼusi yakal tsnuptan jmalale. Vaʼun, jun xa noʼox koʼonton chkaʼi jba kʼalal ta jkʼopon li Jeovae».

10. ¿Kʼu yuʼun skʼan jchʼakbetik lek yorail sventa jpastik orasione? (Kʼelo xtok li lokʼoletike).

¹⁰ Jchʼakbetik lek yorail spasel orasion. Kʼalal jlikel noʼox ta jpastik orasione, chijnopaj onoʼox ta stojolal li Jeovae. Pe mi mas jal ta jpastike, xuʼ me mas to lek xkalbetik Jeova ti kʼu yelan chkaʼi jbatike.b Li smalal Aliska ti Elijah sbie, xi chale: «Chkakʼ persa ti ep ta velta ta jpas orasion jujun kʼakʼale. Pe kʼalal jal ta jkʼopon li Jeovae, mas to nopol chkaʼi jba ta stojolal. Yuʼun li stuke muʼyuk ti jujulikel xa tskʼel yora kʼalal ta jkʼopone, jaʼ yuʼun xuʼ jal jchiʼin ta loʼil». Xuʼ jech xapas ek: chʼakbo lek yorail xchiʼuk saʼo ti bu stsʼijlan sventa jal xakʼopon li Jeovae xchiʼuk maʼuk noʼox ta avoʼonton xakʼopon. Akʼo persa ti jechuk-o xapase.

NOPBO SKʼOPLAL LI ORASIONETIK TI TE OY TA VIVLIAE

11. ¿Kʼuxi tskoltautik mi la jnopbetik skʼoplal li orasionetik ti te oy ta Vivliae? (Kʼelo xtok li rekuadro «¿Mi jaʼ jech chavaʼi aba ek?»).

¹¹ ¿Kʼusi yan xuʼ skoltaot? Jaʼ mi la anopbe skʼoplal li kʼusi laj yal ta s-orasion li yajtuneltak Dios ta voʼnee xchiʼuk ti kʼu yelan la skʼejintaik li Jeovae. Li ta Vivliae, xuʼ te xavakʼ venta kʼu yelan la spasik orasion ti xuʼ jech xapas eke. Jech xtok, te chavil kʼusi laj yal ta s-orasionik sventa xichʼik ta mukʼ li Jeovae, vaʼun xuʼ jech xaval ek. Maʼuk noʼox, yuʼun xuʼ te xatabe s-orasion yajtuneltak Dios ti jech tajek laj yaʼi sbaik kʼu chaʼal chavaʼi abae.

12. ¿Kʼusitik xuʼ jakʼbe jbatik kʼalal ta jkʼeltik ta Vivlia junuk orasione?

¹² Kʼalal chakʼel ta Vivlia junuk orasione, xiuk xajakʼbe abae: «¿Buchʼu s-orasion liʼe? ¿Kʼusi yakal tsnuptan? ¿Mi jaʼtik jech yakal ta jnuptan ek? ¿Kʼusi chakʼ jchan?». Yikʼaluk van skʼan xasabe mas skʼoplal sventa xatabe li stakʼobiltake, pe xlokʼ venta mi jech la apase. Jkʼeltik batel junchibuk skʼelobil.

13. ¿Kʼusi chakʼ jchantik li orasion la spas Anae? (1 Samuel 1:​10, 11; kʼelo xtok li lokʼol).

¹³ (Kʼelo 1 Samuel 1:​10, 11). Kʼalal la spas orasion li Anae, jaʼo tsots tajek chil svokol, yuʼun mu snaʼ x-alaj xchiʼuk ilbaj x-utat yuʼun li yan yajnil smalale (1 Sam. 1:​4-7). Mi oy kʼusi yakal chanuptan ti mu xchapaj ta anile, ¿kʼusi chakʼ achan li orasion la spas Anae? Li stuke la xchʼakbe lek yorail sventa xalbe Jeova skotol li kʼusi tsvul-o yoʼontone, vaʼun mas xa jun yoʼonton laj yaʼi sba (1 Sam. 1:​12, 18). Jechuk xapas ek, «akʼbo sbain Jeova li avikatse», jaʼ xkaltik, albo skotol li kʼusi chavul-o avoʼontone xchiʼuk ti kʼu yelan chavaʼi abae (Sal. 55:22).

14. 1) ¿Kʼusi yan chakʼ jchantik li kʼusi la spas Anae? 2) ¿Kʼuxi tskoltautik sventa xlekub j-orasiontik mi ta jnopbetik skʼoplal li kʼusi chal Vivliae? (Kʼelo li tsʼib ta yok vune).

¹⁴ Kʼalal mukʼmukʼ xa ox jutuk li Samuele, li Anae laj yikʼ batel ta stojolal li mero bankilal pale Elie (1 Sam. 1:​24-28). Vaʼun, lik spas orasion, ta sjunul yoʼonton la stojbe ta vokol Jeova, yuʼun laj yil kʼuxi chchabi xchiʼuk tskʼel li yajtuneltak ti tukʼ yakʼoj sbaike (1 Sam. 2:​1, 8, 9).c Yikʼaluk van muʼyuk xchʼay skotol li svokole, pe jaʼ laj yakʼ ta yoʼonton ti kʼu yelan akʼbat bendision yuʼun li Jeovae. ¿Kʼusi chakʼ jchantik? Mi jaʼ laj kakʼ ta koʼontontik ti kʼuxi skoltaojutik talel li Jeovae, mas me kʼun chkaʼitik sventa xkuch batel kuʼuntik li kʼusi yakal ta jnuptantike.

15. ¿Kʼusi chakʼ jchantik li s-orasion Jeremiase? (Jeremias 12:1).

¹⁵ (Kʼelo Jeremias 12:1). Kʼalal laj yil j-alkʼop Jeremias ti chlabanat yuʼun li j-israeletike xchiʼuk ti lek noʼox xkuxlejalik yilel li buchʼutik chopolike, chopol tajek laj yaʼi sba xchiʼuk chibaj-o (Jer. 20:​7, 8). Xuʼ van jech xkaʼi jbatik ek, yuʼun tslabanutik li krixchanoetike xchiʼuk lek noʼox xkuxlejalik yilel li buchʼutik chopol kʼusi tspasike. ¿Kʼusi la spas li Jeremiase? Jamal laj yalbe Jeova li kʼusi chopol chile, pe muʼyuk laj yakʼbe smulin li kʼusitik muʼyuk tukʼ chichʼ pasele. Kʼalal laj yil ti kʼu yelan la stukʼibtas steklumal ta skoj ti chopol kʼusi la spasike, mas to la xchʼun ti tukʼ kʼusi snaʼ spas li Jeovae (Jer. 32:19). Li voʼotik eke xuʼ jamal xkalbetik Jeova li kʼusi chopol chkiltike xchiʼuk jpʼeluk ta koʼontontik ti snaʼoj bakʼin tslajesbe skʼoplal li kʼusi muʼyuk tukʼ chichʼ pasele.

16. ¿Kʼusi chakʼ jchantik li s-orasion jlevi vinike? (Salmo 42:​1-4; kʼelo xtok li lokʼoletike).

¹⁶ (Kʼelo Salmo 42:​1-4). Li ta kʼejoj liʼe, te chal kʼu yelan laj yaʼi sba jun jlevi vinik ti mu stakʼ jmoj xichʼ ta mukʼ Jeova xchiʼuk li xchiʼiltake. Yikʼaluk van jaʼ jech chkaʼi jbatik ek, mu van stakʼ xijlokʼ ta jnatik ta skoj ti iputik o tikʼilutik ta chukel ta skoj li kʼusi jchʼunojtike. Kʼalal jech ta jnuptantike, xuʼ van xjelilaj ti kʼu yelan chkaʼi jbatike: lek jlikel, pe ta anil noʼox chlik kat koʼontontik. Li kʼusi xuʼ skoltautike jaʼ ti xkalbetik Jeova ti kʼu yelan chkaʼi jbatike. Kʼalal jech ta jpastike, jaʼ tskoltautik sventa jnaʼtik ti kʼu yuʼun jech chkaʼi jbatike xchiʼuk ti jaʼuk xkakʼ ta koʼontontik li kʼusi mas tsots skʼoplale. Li jlevi vinike laj yakʼ venta ti oy to kʼusitik xuʼ spas sventa xichʼ ta mukʼ li Jeovae (Sal. 42:5). La snopbe skʼoplal xtok ti kʼu yelan yakal chchabiat yuʼun li Jeovae (Sal. 42:8). Li voʼotik eke xuʼ jambe koʼontontik li Jeovae, vaʼun jaʼ tskoltautik sventa junuk noʼox koʼontontik, ti oyuk kipaltik sventa xkuch batel kuʼuntike xchiʼuk chkakʼtik venta kʼu yuʼun ti chkat koʼontontike.

17. 1) ¿Kʼusi chakʼ jchantik li s-orasion Jonase? (Jonas 2:​1, 2). 2) Kʼalal chkil jvokoltike, ¿kʼuxi tskoltautik mi la jvules ta joltik li kʼusi chal salmoetike? (Kʼelo li tsʼib ta yok vune).

¹⁷ (Kʼelo Jonas 2:​1, 2). Kʼalal la spas orasion li Jonase, jaʼo te tikʼil ta xchʼut choy. Akʼo mi muʼyuk la xchʼunbe smantal li Jeovae, snaʼoj lek ti ta onoʼox xchikintabat li s-orasione. Ep kʼusitik la sta ta alel ti te lokʼem talel li ta slivroal Salmose, taje chakʼ kiltik ti xojtikin leke.d Kʼalal la svules ta sjol xchiʼuk la snopbe skʼoplale, jaʼ koltaat-o sventa xchʼun lek ti ta onoʼox xkoltaat yuʼun li Jeovae. Li voʼotik eke kakʼtik persa jkomes ta joltik li tekstoetik ta Vivlia ti tskoltautik kʼalal chkil jvokoltike. Vaʼun, kʼalal ta jpastik orasione, yikʼaluk van xtal ta joltik tekstoetik ti tspat koʼontontike.

JECHUK-O XAKʼOPON JEOVA SVENTA XANOPAJ TA STOJOLAL

18, 19. ¿Kʼuxi tskoltautik Romanos 8:26 xchiʼuk 27 mi mu xa xlokʼ ta alel kuʼuntik ti kʼu yelan chkaʼi jbatike? Albo junuk skʼelobil.

¹⁸ (Kʼelo Romanos 8:​26, 27). Bateltik kʼalal ta jvul tajek koʼontontike, mu xa xlokʼ ta alel kuʼuntik ti kʼu yelan chkaʼi jbatike. Pe li chʼul espiritue jaʼ tsvaʼan sba o tskʼan vokol ta jtojolaltik. ¿Kʼusi skʼan xal taje? Li Jeovae la stunes xchʼul espiritu sventa tsʼibabiluk xkom ta Vivlia li s-orasion yajtuneltake. Jaʼ yuʼun, kʼalal mu xa xlokʼ ta alel kuʼuntik ti kʼu yelan chkaʼi jbatik o li kʼusi ta jkʼantike, li Jeovae xuʼ stsak ta venta junuk orasion ti la spas junuk yajtunel ta voʼnee, vaʼun jaʼ xa j-orasiontik chil xchiʼuk tstakʼbutik.

¹⁹ Jun ermana ta Rusia ti Elena sbie laj yichʼ chukel ta skoj ti tspas orasione xchiʼuk ti chchan Vivliae. Solel la svul tajek yoʼonton xchiʼuk vokol xa chaʼi spasel orasion. ¿Kʼusi koltaat-o? Xi chale: «Kʼalal oy kʼusi ta jnuptan ti mu xa stsal kuʼun chkaʼie xchiʼuk ti mu xa jnaʼ kʼusi ta jkʼanbe li Jeovae, chvul ta jol ti xuʼ stsak ta venta li kʼusi laj yal ta s-orasion junuk yajtunel ta voʼnee xchiʼuk xkoʼolaj ti jaʼ xa chlokʼ ta ke chile. Taje la spatbun tajek koʼonton kʼalal jaʼo tsots tajek kʼusi ta jnuptane».

20. ¿Kʼuxi xuʼ jchapan jnopbentik sventa jpastik orasion kʼalal tsots ta jvul koʼontontike?

²⁰ Kʼalal tsots tajek ta jvul koʼontontike, xuʼ van mu xa lekuk jpastik orasion ta skoj ti yan-o kʼusi ta jnoptike. Sventa jchapan li jnopbentike, xuʼ jchikintatik li audioetik ta Salmoe o jtsʼibatik ti kʼu yelan chkaʼi jbatik jech kʼuchaʼal la spas li ajvalil Davide (xuʼ xakʼel Salmo kapitulo 18, 34, 142 xchiʼuk sloʼilal). Ta skoj ti jelelutike, skʼan jkʼeltik ta jujuntal kʼusi xuʼ skoltautik sventa jchapan jbatik kʼalal skʼan to jpastik orasione (Sal. 141:2). Voʼote, ¿kʼusi tunem talel avuʼun?

21. ¿Kʼu yuʼun xuʼ jambe koʼontontik li Jeovae?

²¹ Tspat tajek koʼontontik ti xaʼibe smelolal Jeova ti kʼu yelan chkaʼi jbatike akʼo mi muʼyuk to lokʼem ta ketik li kʼusi chkalbetike (Sal. 139:4). Pe lek tajek chaʼi kʼalal ta jkʼopontike xchiʼuk xmuyubaj kʼalal chil ti jpatoj koʼontontik ta stojolale. Jaʼ yuʼun, jkʼopontik me li Jtotik ta vinajele. Jtunestik li kʼusitik laj yalik li yajtuneltak ta voʼne ti te tsʼibabil kom ta Vivliae. Jambe koʼontontik li Jeovae: kalbetik li kʼusi vokol chkaʼitike xchiʼuk li kʼusi xijmuyubaj-oe. Jaʼ kamigotik xchiʼuk muʼyuk onoʼox chiktautik.