Jpastik orasion ta stojolal yantik

1. ¿Kʼuxi jnaʼojtik ti tsots skʼoplal chil Jeova li j-orasiontike?

JAʼ JUN mukʼta matanal akʼbilutik li orasione. Jnopbetik skʼoplal liʼe: li Jeovae oy kʼusitik yakʼojbe sbain li anjeletike xchiʼuk tsots yabtel yakʼojbe li Jesuse (Sal. 91:11; Mat. 28:18). Pe ¿mi oy van buchʼu yakʼojbe sbain xchikintael li j-orasiontike? Muʼyuk. Jaʼ chchikinta stuk li Jeovae xchiʼuk lek tajek chaʼi ti jkʼopontike (Sal. 65:2).

2. ¿Kʼusi chakʼ jchantik li jtakbol Pabloe?

² Xuʼ xkalbetik Jeova skotol li kʼusi ta jvul-o koʼontontike, pe skʼan jpastik orasion ta stojolal li yantik eke. Taje jaʼ jech la spas li jtakbol Pabloe. Jun veltae, xi laj yalbe batel li tsobobbail ta Efesoe: «Ta jtaoxuk ta alel kʼalal ta jpas j-orasione» (Efes. 1:16). Pe bakʼintik xtoke, kʼalal tspas orasione, tstabe ta alel sbi ta jujuntal li ermanoetike. Xi laj yalbe li Timoteoe: «Ta jtojbe ta vokol Dios […] [xchiʼuk ta] jvulesot-o ta jol ta kʼakʼal akʼobal kʼalal ta jkʼan vokole» (2 Tim. 1:3). Li Pabloe ep tajek kʼusi tsvul-o yoʼonton xchiʼuk jech-o tspas orasion. Akʼo mi jech, la xchʼakbe yorail sventa spas orasion ta stojolal li yantike (2 Kor. 11:23; 12:​7, 8).

3. ¿Kʼu yuʼun oy xchʼay xkaʼitik ti jpastik orasion ta stojolal yantike?

³ Bakʼintike, xuʼ van xchʼay ta joltik spasel orasion ta stojolal li yantike. ¿Kʼu yuʼun? Xi chal jun ermana ti Sabrinaa sbie: «Ta skoj ti mu noʼox xkaʼitik x-echʼ kʼakʼale, xuʼ van jaʼ xa noʼox chbat ta koʼontontik li jvokoltike xchiʼuk muʼyuk xa ta jpastik orasion ta stojolal li yantike». ¿Mi jaʼ jech chkaʼi jbatik ek? Mi jaʼ jeche, xuʼ skoltautik li kʼusi ta jkʼeltik batel li ta xchanobil liʼe. Ta jkʼeltik batel kʼu yuʼun tsots skʼoplal ti jpastik orasion ta stojolal li yantike xchiʼuk ti kʼuxi xuʼ jpastike.

¿KʼU YUʼUN TSOTS SKʼOPLAL?

4, 5. ¿Kʼuxi tstabeik sbalil yantik kʼalal ta jpastik orasion ta stojolalike? (Santiago 5:16).

⁴ Kʼalal ta jpastik orasion ta stojolal yantike, «oy kʼusi lek tajek chkʼot ta pasel» (kʼelo Santiago 5:16). Pe ¿mi ta melel xuʼ xjel kʼusi tsnuptan ta xkuxlejal jun ermano kʼalal ta jpastik orasion ta stojolale? Xuʼ. Li Jesuse la spas orasion ta stojolal li jtakbol Pedroe, yuʼun snaʼoj xa onoʼox ti chal ti mu xojtikin li Jesuse, jaʼ yuʼun xi laj yalbee: «Jkʼanoj xa vokol ta atojolal sventa mu xchʼay li xchʼunel avoʼontone» (Luk. 22:32). Li Pablo eke snaʼoj ti oy sbalil kʼalal ta jpastik orasione. Jaʼ yuʼun, kʼalal laj yichʼ chukel ta jpʼej na ta Romae, xi la stsʼibabe batel li Filemone: «Jpatoj koʼonton ti xuʼ van xisut batel ti bu oyoxuk ta skoj ti chapasik orasion ta jtojolale» (Filem. 22). Jech onoʼox kʼot ta pasel, yuʼun mu ta sjaliluke, laj yichʼ lokʼesel ta chukel xchiʼuk lik xchol mantal yan velta.

⁵ Pe taje maʼuk skʼan xal ti stakʼ jsujtik Jeova sventa spas li kʼusi ta jkʼanbetike. Li stuke yiloj li kʼusi ta jvul-o koʼontontike xchiʼuk bakʼintike tspas li kʼusi ta jkʼanbetike. Kʼalal te ta joltik taje, jaʼ tstij koʼontontik sventa masuk to jkʼopontik Jeova kʼalal oy kʼusi ta jvul-o koʼontontike xchiʼuk ti xkiktabetik ta yok skʼobe, yuʼun jaʼ snaʼoj li kʼusi mas lek ta jtojolaltike (Sal. 37:5; kʼelo 2 Korintios 1:11 xchiʼuk li notas de estudio ta españole).

6. ¿Kʼuxi ta jtabetik sbalil kʼalal ta jpastik orasion ta stojolal yantike? (1 Pedro 3:8).

⁶ Kʼalal ta jpastik orasion ta stojolal yantike, mas to ch-ayan xkʼuxul koʼontontik (kʼelo 1 Pedro 3:8). Li buchʼu oy xkʼuxul yoʼontone chilbe svokol li yantike xchiʼuk jaʼ chtijbat yoʼonton sventa skolta (Mar. 1:​40, 41). Xi chal jun mol ta tsobobbail ti Michael sbie: «Kʼalal ta jpas orasion ta stojolal li yantike, mas to chkaʼibe smelolal li kʼusi tsnuptanike, vaʼun mas to ta jkʼanik-o. Akʼo mi mu xakʼik venta, mas xa nopol chkaʼi jba ta stojolalik». Pe oy to yan sbalil xtok. Xi chal li Richard ti jaʼ jun mol ta tsobobbail eke: «Kʼalal ta jpastik orasion ta stojolal junuk ermanoe, mas to ch-ayan ta koʼontontik skoltael. Maʼuk noʼox, yuʼun kʼalal chbat jkoltatike, xkoʼolaj ti yakal ta jkolta jbatik jutebuk ta stakʼel li j-orasiontike».

7. ¿Kʼuxi yan tskoltautik kʼalal ta jpastik orasion ta stojolal yantike? (Filipenses 2:​3, 4; kʼelo xtok li lokʼoletike).

⁷ Kʼalal ta jpastik orasion ta stojolal yantike, tskoltautik sventa mu jnoptik ti jtuktik noʼox chkil jvokoltike (kʼelo Filipenses 2:​3, 4). Ta skoj ti jaʼ sventainoj balumil li Satanase, jkotoltik chkil jvokoltik (1 Juan 5:19; Apok. 12:12). Mi nopem xkaʼi ta jpastik orasion ta stojolal yantike, jaʼ me tsvules ta joltik «ti jaʼ jech yakal chilik vokoliletik ek li [kermanotaktik] ta spʼejel balumile» (1 Ped. 5:9). Xi chal jun prekursora ti Katherine sbie: «Kʼalal ta jpas orasion ta stojolal yantike, jaʼ tsvules ta jol ti mu jtukuk noʼox chkil jvokole xchiʼuk tskoltaun sventa mu jaʼuk xbat ta koʼonton li jvokole».

JPASTIK ORASION TA STOJOLALIK

8. ¿Buchʼutik xuʼ jpastik orasion ta stojolalik?

⁸ ¿Buchʼutik xuʼ jpastik orasion ta stojolalik? Xuʼ jpastik orasion ta stojolal li buchʼutik ipik noʼoxe, li kerem tsebetik ti chichʼik labanele xchiʼuk ti chichʼik sujel ta eskuelae o li buchʼutik oy xa sjabilalike. Ep ermanoetike chichʼik kontrainel, bakʼintike ta stojolal noʼox yutsʼ yalalik o bakʼintike ta stojolal ajvaliletik (Mat. 10:​18, 36; Ech. 12:5). Junantik xtoke yiktaoj komel snaik ta skoj ti oy kʼop ta sventa politikae. Yantik xtoke chil svokolik ta nikel, nojelal ta voʼ o yan kʼusitik. Yikʼaluk van mu xkojtikintik li ermanoetik taje, pe mi ta jpastik orasion ta stojolalike, jaʼ jech ta jchʼuntik ti laj yal Jesus ti akʼo jkʼan jbatik ta jujuntale (Juan 13:34).

9. ¿Kʼu yuʼun skʼan jpastik orasion ta stojolal li ermanoetik ti oy kʼusi sbainojike xchiʼuk ta stojolal li yajnilike?

⁹ Xuʼ jpastik orasion xtok ta stojolal li buchʼutik oy kʼusi sbainojik ta s-organisasion Jeovae: li Jtsop Jbeiltasvanej xchiʼuk yajkoltaobbaike, li Komiteetik ta Betele, li buchʼutik oy kʼusi sbainojik ta Betele, li jkʼelvanejetik ta sirkuitoe, li moletik ta tsobobbaile xchiʼuk li siervo ministerialetike. Li ermanoetik taje tsots tajek ch-abtejik ta jtojolaltik, pe oy kʼusitik tsvul-o yoʼontonik ek (2 Kor. 12:15). Kalbetik skʼoplal Mark ti jaʼ jkʼelvanej ta sirkuitoe, xi chale: «Jtos li kʼusi toj vokol chkaʼie jaʼ ti nom oyun ta stojolal li jtot jmeʼe, yuʼun oy xa sjabilalik xchiʼuk ipik noʼox. Akʼo mi ta slekil yoʼonton tskʼelik li jvix xchiʼuk smalale, pe vokol chkaʼi ti mu stak’ xbat jchabiike». Akʼo mi mu jnaʼtik skotol li kʼusi tsvul-o yoʼonton li ermanoetik taje, lek onoʼox ti jpastik orasion ta stojolalike (1 Tes. 5:​12, 13). Xuʼ jpastik orasion ta stojolal li yajnilik eke, yuʼun ta sjunul yoʼonton tskolta smalalik sventa spas yuʼunik li kʼusi sbainojike.

10, 11. ¿Mi lek chil Jeova ti jpastik orasion ta stojolal skotol li ermanoetike?

¹⁰ Jech kʼuchaʼal laj xa kiltik tale, ep ta velta ta jpastik orasion ta stojolal li ermanoetike. Akʼo mi muʼyuk chkalbetik sbi junuk ermano, xuʼ van chkalbetik Jeova ti skolta li buchʼutik tikʼajtik ta chukele o ti spatbe yoʼonton li buchʼutik chamem yutsʼ yalalike. Xi chal jun mol ta tsobobbail ti Donald sbie: «Ta skoj ti ep ermanoetik yakal chil svokolike, bakʼintike xi chkal ta j-orasiontike: ‹Avokoluk, koltao li ermanoetik xchiʼuk ermanaetik ti yakal chil svokolike›».

¹¹ ¿Mi lek chil Jeova ti jech jpastik orasione? ¡Lek!, yuʼun mu onoʼox jnaʼtik skotol li kʼusitik tsnuptan li yajtuneltake. Jaʼ yuʼun, lek ti jkʼanbetik Jeova ti skolta skotol li ermanoetike (Juan 17:20; Efes. 6:18). Kʼalal jech ta jpastike, jaʼ jech chkakʼtik ta ilel ti jkʼanojtik skotol li kermanotaktik ta chʼunolajele (1 Ped. 2:17).

JPASTIK ORASION TA STOJOLAL JUNUK ERMANO

12. Mi te noʼox jsatike, ¿kʼuxi tskoltautik kʼalal ta jpastik orasione?

¹² Teuk noʼox jsatik. Maʼuk noʼox skʼan jpastik orasion ta stojolal skotol li ermanoetike, yuʼun lek xtok ti jpastik orasion ta stojolal junuk ermanoe. Jnopbetik skʼoplal liʼe: ¿mi oy buchʼu jal xa ip li ta jtsobobbailtike?, ¿mi oy junuk kerem o tseb ti yakal chichʼ sujel yuʼun li xchiʼiltak ta chanune? o ¿mi oy junuk totil o meʼil ti stuk yakal tstsʼites skerem o stseb sventa stukʼibtas xchiʼuk xalbe «mantal jech kʼuchaʼal tskʼan Jeovae»? (Efes. 6:4). Mi te noʼox jsatike, mas me chkaʼibetik smelolal ti kʼu yelan chaʼi sbaik li ermanoetike, vaʼun jaʼ tstij koʼontontik sventa jpastik orasion ta stojolalik (Rom. 12:15).b

13. ¿Mi xuʼ jpastik orasion ta stojolal li ermanoetik ti mu xkojtikintike?

¹³ Jtabetik ta alel sbiik kʼalal ta jpastik orasione. Taje xuʼ jech jpastik akʼo mi mu xkojtikintik li ermanoetike. Jnopbetik skʼoplal liʼe: li ermanoetik ti tikʼajtik ta chukel ta Crimea, Eritrea, Rusia xchiʼuk Singapure, xuʼ te jtabetik sbiik li ta jw.org.c Xi chal jun jkʼelvanej ta sirkuito ti Brian sbie: «Kʼalal ta jtsʼibabe sbi junuk ermano ti tikʼil ta chukele xchiʼuk ti chkalilan ep ta veltae, mas kʼun chkaʼi sventa xvul ta jol xchiʼuk ti jtabe ta alel sbi kʼalal ta jpas orasione».

14, 15. ¿Kʼusi tskoltautik sventa jamaluk ta aʼiel li kʼusi ta jkʼan ta j-orasiontike?

¹⁴ Jamaluk ta aʼiel li kʼusi ta jkʼantike. Li Michael ti laj kalbetik skʼoplal ta parafo 6 oy kʼusi yiloj ti jtunel tajeke, xi chale: «Kʼalal ta jkʼel ta jw.org li sloʼil ermanoetik ti tikʼajtik ta chukele, ta jnop kʼu van yelan chkaʼi jba ti vuʼkunuk te tikʼilune. Ta van jvul koʼonton ta stojolal kajnil xchiʼuk ta jkʼan van ta jnaʼ mi lek oy. Taje jtunel kiloj, yuʼun kʼalal ta pas orasione, mas xa jamal kʼusi ta jkʼan ta stojolal li ermanoetik ti tikʼajtik ta chukel ti oy snup xchiʼilike» (Ebr. 13:​3, tsʼib ta yok vun).

¹⁵ Kʼalal ta jnopbetik skʼoplal li kʼusitik tsnuptanik jujun kʼakʼal li ermanoetik ti tikʼajtik ta chukele, mas chtal ta joltik kʼusi chkaltik li ta j-orasiontike. Jech kʼuchaʼal liʼe, xuʼ jkʼanbetik Jeova ti lekuk yoʼontonik ta stojolal ermanoetik li jchabichukinabetike o ti xakʼik permiso li buchʼutik tsots yabtelik sventa xichʼik ta mukʼ Dios li ermanoetike (1 Tim. 2:​1, 2). Jech xtok, xuʼ jpastik orasion ta stojolal junuk tsobobbail ti nopol xil chukinab sventa xchanbeik stalelal li ermanoetik ti tikʼajtik ta chukele. Maʼuk noʼox, yuʼun xuʼ jpastik orasion ta stojolal li yan jchukeletik sventa xkʼot ta yoʼontonik mantal kʼalal chilik ti lek stalelal li ermanoetike (1 Ped. 2:12). Li kʼusitik laj xa kaltik talele xuʼ me jech jpastik ta stojolal buchʼuuk noʼox ermanoal. Jaʼ yuʼun chaʼa, mi te noʼox jsatik, mi ta jtabetik ta alel sbi ermanoetik kʼalal ta jpastik orasione xchiʼuk mi jamal ta aʼiel li kʼusi ta jkʼantike, jaʼ jech chkakʼtik ta ilel ti jkʼanoj jbatik tajeke (1 Tes. 3:12).

KICHʼ JPʼIJILTIK

16. ¿Kʼu yuʼun skʼan xkichʼ jpʼijiltik kʼalal ta jpastik orasione? (Mateo 6:8).

¹⁶ Jech kʼuchaʼal laj xa jchantik talele, ep tajek sbalil li orasion ta jpastike, yuʼun xuʼ xkoltaatik-o li yantike. Akʼo mi jech, skʼan xkichʼ jpʼijiltik. ¿Kʼu yuʼun? Yuʼun kʼalal oy kʼusi chkalbetik li Jeovae, snaʼoj xa onoʼox. Mu stakʼ xkalbetik xtok kʼu yelan skʼan xchapan jvokoltik o li svokol yantike. Li stuke snaʼoj xa onoʼox li kʼusi chtun kuʼuntike akʼo mi muʼyuk toʼox kakʼojtik venta li voʼotike (kʼelo Mateo 6:8). Vaʼun chaʼa, ¿kʼu yuʼun skʼan jpastik orasion ta stojolal li yantike? Li ta xchanobil liʼe, la jkʼeltik jayibuk srasonal. Pe oy to yan: jaʼ jech chkakʼtik ta ilel ti oy ta koʼonton jbatik ta jujuntale xchiʼuk ti jkʼanoj jbatike. Li Jeovae xmuyubaj kuʼuntik kʼalal chil ti ta jchanbetik ti kʼu yelan snaʼ xkʼanvane.

17, 18. Albo junuk skʼelobil kʼuxi jnaʼojtik ti tstsak ta venta j-orasiontik li Jeovae.

¹⁷ Xuʼ van muʼyuk sbalil yilel ti ta jpastik orasion ta stojolal li yantike, pe mu jechuk, yuʼun jaʼ jech chkakʼtik ta ilel ti jkʼanoj li kermanotaktike xchiʼuk tstsak ta venta li Jeova eke. Kalbetik junuk skʼelobil. Jnoptik ta stojolal jun totil ti oy jun xkʼox kerem xchiʼuk jun xkʼox tsebe. Pe ch-ipaj li xkʼox kereme, vaʼun xi chalilanbe stot li kʼox tsebe: «Avokoluk, koltao li kuni muke, yuʼun toj tsots ip». Li totile snaʼoj lek kʼusi xuʼ spas sventa xpoxta li skereme, skʼanoj tajek xchiʼuk yakal chchabi. Akʼo mi jech, kʼupil sba chil ti skʼanoj tajek yuni muk li stsebe xchiʼuk ti te xvulvun ta stojolal sventa skoltae.

¹⁸ Jaʼ noʼox jech ek, li Jeovae tskʼan ti oyuk ta koʼontontik li kermanotaktike xchiʼuk ti jpastik orasion ta stojolalike. Vaʼun, jaʼ jech chkakʼtik ta ilel ti maʼuk noʼox chbat ta koʼonton li jvokol jtuktike, taje tstsak ta venta li Jeovae (2 Tes. 1:3; Ebr. 6:10). Jech xtok, jech kʼuchaʼal laj xa jchantik talele, bakʼintike xuʼ xjel kʼusi tsnuptan ta xkuxlejal jun ermano kʼalal ta jpastik orasion ta stojolale. Jaʼ yuʼun, ¡mu me xchʼay xkaʼitik spasel orasion ta stojolal li yantike!