Chaʼvoʼ ermano lik tunikuk ta Jtsop Jbeiltasvanej

LI TA tsobajel jujun jabil ti jelav ta 5 yuʼun oktuvre ta 2024, laj yichʼ alel ti chlik tunikuk ta Jtsop Jbeiltasvanej yuʼun stestigotak Jeova li ermano Jody Jedele xchiʼuk Jacob Rumph. Xchaʼvoʼalik jal xa tukʼ tunemik talel ta stojolal Jeova.

Li ermano Jody Jedele vokʼ ta Misuri (Estados Unidos). Jaʼ chanubtasat ta mantal yuʼun li stot smeʼe. Ti bu nakalike jutuk noʼox stestigotak Jeova, jaʼ yuʼun laj yojtikin ermanoetik ti jeltos bu likemik tal kʼalal te chkʼotik ta cholmantale. Kʼalal laj yakʼ venta ti kʼu yelan skʼanoj sbaik xchiʼuk ti jmoj tsobolik li steklumal Jeovae, jaʼ tijbat-o yoʼonton sventa xtun ta stojolal Jeova. Laj yichʼ voʼ ta 15 yuʼun oktuvre ta 1983. Tskʼupin tajek li cholmantale, jaʼ yuʼun kʼalal tsuts xchanun ta sekundariae, lik tunuk ta prekursor regular ta septiembre ta 1989.

Kʼalal kʼoxik toʼox li Jody xchiʼuk yixlele, nopajtik noʼox ch-ikʼatik batel ta Betel yuʼun li stot smeʼike. Taje jaʼ tijbat-o yoʼontonik sventa te xtunik. Ta tsʼakale, te onoʼox lik tunikuk. Li ta septiembre ta 1990, li Jedele lik tunuk ta Betel ta Wallkill. Tun ta Departamento de Limpieza, laje ta Servicios Médicos.

Li vaʼ orae, oy te nopol tsobobbailetik ta español ti jaʼ to chchʼie xchiʼuk ti chtun tajek ermanoetike. Li ermano Jedele bat koltavanuk ta jun tsobobbail xchiʼuk lik xchan español. Mu ta sjaliluke, laj yojtikin jun ermana ti koʼol sirkuitoik ti Dámaris sbie. Ta tsʼakale, nupunik xchiʼuk jmoj lik tunikuk ta Betel.

Li ta 2005, lokʼik ta Betel sventa xchabi smeʼ li Jedele xchiʼuk ti xchabiik li stot smeʼ Damarise. Li vaʼ orae, tunik ta prekursor regular. Li Jedele ep ta velta chanubtasvan li ta Chanob vun sventa Prekursore. Jech xtok, tun ta Komite ti Tsbeiltasvan batel ta Ospitaletike xchiʼuk ta Komite sventa Svaʼanel Salonetik ti bu kʼalal smakoj ti bu nakalike.

Li ta 2013, laj yichʼik takel ta ikʼel yan velta li ta Betele, pe jaʼ xa sventa xkoltavanik ta xchapanel li abtelal ta Warwicke. Laje, te tunik ta Patterson xchiʼuk ta Wallkill. Li Jedele tunem talel ta Departamento sventa Svaʼanel salonetik xchiʼuk yan kʼusitik xchiʼuk ta Servicios de Información sobre Hospitales. Li ta marso ta 2023, laj yichʼ vaʼanel ta yajkoltaobba Komite sventa Cholmantal. Ta skoj ti ep xa kʼusitik sbainoj tale, xi chale: «Bateltike, xuʼ van chijxiʼ kʼalal oy kʼusi achʼ ta jbaintike. Pe skʼan jvules ta joltik ti tsots skʼoplal ti jpat koʼontontik ta stojolal Jeovae, yuʼun jaʼ chakʼ kʼotuk ta pasel li kʼusi tskʼane».

Li ermano Rumphe vokʼ ta California (Estados Unidos). Kʼalal kʼox toʼoxe, jaʼo lubtsajem ta mantal li smeʼe. Akʼo mi jech, laj onoʼox yakʼ yipal sventa xchanubtas li skereme. Jujun jabil chbat svulaʼan syaya li Rumphe, tukʼ yakʼoj sba ta stojolal Jeova xchiʼuk jaʼ koltaat sventa x-ayan ta yoʼonton li mantale. Jaʼ yuʼun, kʼalal 13 xa ox sjabilale, la skʼan chanubtasel ta Vivlia. Vaʼun, li ta 27 yuʼun septiembre ta 1992, laj yichʼ voʼ akʼo mi chex kerem toʼox. Jech xtok, li smeʼe lik yakʼbe yipal yan velta li mantale, chʼi ta mantal li yutsʼ yalale xchiʼuk laj yichʼik voʼ.

Kʼalal chex kerem toʼox li Rumphe, laj yakʼ venta ti xmuyubajik noʼox li prekursoretike. Jaʼ yuʼun, kʼalal tsuts xchanun ta sekundariae, lik tunuk ta prekursor ta septiembre ta 1995. Li ta 2000, bat tunuk ta Ecuador ti bu chtun mas jcholmantaletike. Te laj yojtikin jun prekursora ti likem ta Canadá ti Inga sbie, ta tsʼakale nupunik. Kʼalal jaʼtik toʼox snupunelike, lik tunikuk ta jun kʼox grupo ta jun jteklum ta Ecuador. Avie, jaʼ xa jun mukʼta tsobobbail.

Ta tsʼakale, laj yichʼik biiltasel ta prekursor espesial, laje ta jkʼelvanej ta sirkuito. Li ta 2011, laj yichʼik takel ta ikʼel li ta Chanob vun ta Galaad numero 132. Kʼalal tsuts li xchanunike, takatik batel ta jeltos lumetik xchiʼuk tunik kʼuchaʼal jbetelitaetik, ta misioneroal xchiʼuk ta jkʼelvanej ta sirkuito. Jech xtok, li Rumphe chanubtasvan li ta Chanob vun sventa j-al lekil aʼyejetik yuʼun Ajvalilal yuʼun Diose.

Ta skoj li COVID-19, sutik batel ta Estados Unidos. Te tunik ta Betel ta Wallkill xchiʼuk te laj yichʼ chanubtasel li ermano Rumph sventa x-abtej li ta Departamento sventa Cholmantale. Laje, laj yichʼik takel batel ta Betel ta Ecuador xchiʼuk tun ta Komite sventa Betel. Li ta 2023, laj yichʼik ikʼel batel ta Warwick. Li ta enero ta 2024, laj yichʼ biiltasel ta yajkoltaobba Komite sventa Cholmantal. Ta skoj ti ep xa butik tunem tale, xi chale: «Li kʼusi mas tsots skʼoplale, maʼuk ti bu chijtune, jaʼ ti jmoj chijtun ta stojolal Jeova xchiʼuk li kermanotaktike».

Ep tajek sbalil chkiltik yabtel li ermanoetik taje xchiʼuk jech-o ta jkʼuxubintik (Filip. 2:29).