Chtunik˗o ta stojolal Jeova akʼo mi oy vokolil li ta Venezuelae

Oytik to van ta junchib jabil ti muʼyuk lek stakʼinik li ta Venezuelae xchiʼuk oy kʼusitik yan snuptanojik. Xi laj yal jun stestigo Jeova ti Edgar sbie: «Ta anil noʼox laj batel li kʼusi x-ayan kuʼunkutike. Xkoʼolaj ti libatkutik ta naklej ta yan lume».

¿Kʼusi la spas li Edgare? Xi chale: «Li kʼusi skoltaojunkutik xchiʼuk li kajnil Carmene jaʼ li sloʼil xkuxlejal misioneroetik ti batemik ta naklej li ta lumetik ti mas povreike xchiʼuk ti mu staik skotol li kʼusitik chtun yuʼunike. Taje jaʼ la skoltaunkutik sventa jel li jkuxlejalkutike xchiʼuk ti jpaskutik li kʼusi muʼyuk toʼox nopem xkaʼikutike, jech kʼuchaʼal stsʼunel li kʼusitik ta jlajeskutike».

Pe li Edgar xchiʼuk Carmene oy to kʼusi mas la spasik. Laj yakʼik persa spatbel yoʼontonik li ermanoetike xchiʼuk li buchʼutik ipik ta at˗oʼontone (1 Tesalonisenses 5:11). Xi to chal li Edgare: «Maʼuk noʼox ta jpatbekutik yoʼonton li ermanoetike, yuʼun ta jtijbekutik yoʼontonik sventa skoltaik li buchʼutik mas chtun yuʼunike, vaʼun xuʼ xmuyubajik noʼox kʼalal chkoltavanike» (Echos 20:35).

Lekik kʼusi chkʼot ta pasel ta cholmantal

Kʼalal lik li chamel COVID-19, li Argenise laj yakʼ ta yoʼonton ti chcholbe mantal li yutsʼ yalaltake, vaʼun oy junantik ti la xchʼamik chanubtasel ta Vivlia ta telefono.

Li yutsʼ yalal Argenise chʼabal s˗internetik, akʼo mi jech, li Argenise tskʼan ti akʼo skʼelik li asamblea rejional ta 2020. Jaʼ yuʼun, laj yalbe jun ermano ti te nopol nakal yoʼ bu oy li yutsʼ yalale sventa jaʼ xakʼbe li asamblea ti pasbil gravare. Li yutsʼ yalal Argenis une la xchʼamunik mukʼta television xchiʼuk vosina. Kʼalal skʼan toʼox xlik skʼelik li asambleae, li Argenise la skʼopon batel li yutsʼ yalale sventa jmoj spasik orasion. Ta skoj ti jech la spas li Argenise, chanvoʼ yutsʼ yalal xchiʼuk 15 ta voʼ yan krixchanoetik la skʼelik li asambleae.

Oy xchʼunel yoʼontonik xchiʼuk chkʼanvanik

Li Jairo xchiʼuk Johanae jaʼ noʼox stukik oy skarroik li ta tsobobbaile, pe lek tstunesik sventa skoltaik li yantike. Jaʼ noʼoxe toj vokol ta tael gasolina. Xi chal li Jairoe: «Jal tajek ta jmalakutik kʼalal chbat jmankutik gasolinae, bateltike spʼejel akʼobal te jmalaojkutik-o».

Li Jairoe snaʼoj ti xlokʼ venta ti spas ti bu kʼalal xuʼ yuʼun yoʼ skolta li yantike. Xi to chale: «Kʼalal chkakʼbekutik li kʼusi chtun yuʼun li kermanotakutike, ximuyubajkutik-o, yuʼun chkilkutik ti tstojbeik ta vokol li Jeova ti jaʼ chakʼbe steklumal li kʼusi chtun yuʼune» (2 Korintios 9:11, 14).

Jkotoltik xuʼ xijkoltavan

Li Noriannie 28 to sjabilal, pe muʼyuk toʼox tskolta li ermanoetike, yuʼun tsnop ti toj tseb to ch-ilate. Pe la xchan li kʼusi chal 1 Timoteo 4:12 ti xi chale: «Mu me buchʼu xavakʼ spʼaj jsetʼuk li akeremale. Moʼoj, lekuk ta chanel atalelal chilik li buchʼutik tukʼike».

Li versikulo taje tijbat yoʼonton Norianni yoʼ xchʼakbe mas yorail skoltael li ermanoetik ta stsobobbail ti oy xa sjabilalike. La skoltaan sventa xcholik mantal ta karta xchiʼuk laj yalanbe ti akʼo chiʼinatuk ta yakʼel estudioe. Jech xtok, tskʼoponan batel xchiʼuk tstakanbe batel mensaje sventa spatbe yoʼontonik. Xi chale: «Jaʼ la skoltaun Jeova yoʼ xkakʼ venta ti xuʼ xikoltavane».

Avie, li kermanotaktik ta Venezuelae ep kʼusitik tsnuptanik. Akʼo mi jech, xmuyubajik-o chcholik mantal xchiʼuk tspatbeik yoʼonton li yantike (Kolosenses 4:11; 2 Timoteo 4:2).