LI KʼUSITIK TSJAKʼ KEREM TSEBETIKE

Ti jnovioin jbakutike | Xchaʼvokʼal: ¿Kʼusi xuʼ xkʼot ta pasel kʼalal jnovio jbakutike?

Oy buchʼu lavojtikin ti lek chavile, vaʼun kʼot ta nopel avuʼunik ti chanovioin abaik sventa xavojtikin abaik xchiʼuk ti xavakʼik venta mi xuʼ xanupunik ta mas jelavele. Jech oxal chaʼa, ¿kʼusi xuʼ xkʼot ta pasel kʼalal yakal chavojtikin abaike?

Li ta mantal liʼe ta jkʼelbetik echʼel skʼoplal liʼe:

Jamaluk xachiʼin abaik ta loʼil

Kʼalal ep kʼusitik jmoj chapasike, mas to chavojtikin abaik. Yuʼun kʼalal chkiltik kʼusitik tspas li jun krixchanoe, jaʼ to te chkojtikintik lek.

Akʼo mi jech, oy yan kʼusitik ti skʼan jamaluk xaloʼiltaike. Mi jech la apasike, skʼan ti mu jaʼuk noʼox xatsak ta venta ti kʼu yelan chavaʼi abae, akʼo me lek venta kʼu yelan stalelal ta melel.

Junantik li kʼusi skʼan xaloʼiltaike jaʼ liʼe:

Takʼin. ¿Mi oy avil? ¿Mi vokol chavaʼi stsʼinel atakʼin? Mi lanupunike, ¿kʼu yelan anopoj chatunes li atakʼinike?
Chameletik. ¿Mi muʼyuk ipot? ¿Mi muʼyuk tsots ipajemot junuk velta?
Li kʼusitik chakʼan chapas ta akuxlejale. ¿Kʼusitik oy ta avoʼonton chapas ta akuxlejal? ¿Mi koʼol xchiʼuk li kʼusi oy ta yoʼonton li anovio o anoviae? Mi oy kʼusitik jel ta akuxlejalik kʼalal nupunemoxuk xa oxe, vaʼun ti mu xa xuʼ xapas li kʼusi oy ta avoʼontone, ¿mi jech-o xamuyubaj?
Utsʼ alalil. ¿Mi oy kʼusi abainoj spasel li ta avutsʼ avalale? Mi muʼyuke, ¿mi oy van kʼusi xuʼ xlik abain li ta mas jelavele? ¿Mi chakʼan chavil avalab anichʼnab? Mi jeche, ¿jayvoʼ?

Jaʼik onoʼox li kerem tseb ta baʼyel lokʼole, tsloʼiltaik li kʼusi tskʼan tstaik ta jujuntale. Li ta lokʼoletik ti setajtike: 1. Li kereme chlokʼ yaʼi ta cholmantal xchiʼuk chbat yaʼi ta yan lum. 2. Li tsebe tskʼan sna, chaʼvoʼ yalab xchiʼuk jkot stsʼiʼ.

Kʼalal mi laj avalbeik skʼoplal taje, jamaluk xaval li kʼusi chanope, mu me xamuk li kʼusi chanope o ti xajel ta skoj noʼox ti chakʼan ti masuk to lek chayilote (Ebreos 13:18).

Nopo ta sventa liʼe: ¿Kʼusi skʼan xanaʼ ta stojolal li anovio o anoviae? ¿Kʼusi skʼan snaʼ ta atojolal ek? Mi jamal chavalik li kʼusi chanopike, ¿kʼuxi tskoltaoxuk sventa lekuk-o xachiʼin abaik ta loʼil mi lanupunike?

Beiltasel ta Vivlia: «Meleluk [... ] xakʼopon abaik ta jujuntal» (Efesios 4:25).

«Xuʼ van xi tsnop li tsebe: ‹Mi echʼ vakib ue, ta xalbun ti xinupunkutike›, pe li kereme xuʼ van tsnop ti leʼ to ta jun jabile. Mi jech kʼot ta pasele, xuʼ van xat yoʼonton li tsebe xchiʼuk xnaʼet xa chkom ta skoj ti snopoj chnupun noʼoxe. Jech oxal, tsots skʼoplal ti jamaluk xchiʼin sbaik ta loʼil xchiʼuk ti xchap skʼopike» (Ariana ti jun xa jabil nupuneme).

Jelajtik kʼusi chanopik

Mu onoʼox xijkoʼolaj xchiʼuk li yantike. Jech oxal, mu xanop ti koʼol kʼusi chanopik skotol velta xchiʼuk li anovio o anoviae, yuʼun xuʼ van jelel kʼusitik chanopik ta skoj ti jelel atsʼunbalik o ti kʼu yelan laj avichʼik tsʼitesele.

Jaʼik onoʼox li kerem tseb ta baʼyel lokʼole, jelajtik li kʼusi tskʼupinike. Lokʼoletik: 1. Li kereme yichʼoj spalomita xchiʼuk tskʼan chbat ta sine. 2. Li tsebe xkuchoj smochila, stsakoj snamteʼ xchiʼuk ta xani yaʼi li vitsetik xvinaj ta spate.

Nopo ta sventa liʼe: Mi muʼyuk mas tsots skʼoplal li kʼusi jelel chkʼot ta nopel avuʼunike xchiʼuk mi muʼyuk tskontrain li kʼusi chal Vivliae, ¿mi oy ta avoʼonton achaʼvoʼalik ti xajelik li kʼusi chanopik sventa junuk noʼox avoʼontonike?

Beiltasel ta Vivlia: «Akʼo vinajuk ta stojolal skotol krixchanoetik ti lek xatojobik snopele [o ti xanaʼ xarasonajike]» (Filipenses 4:5).

«Akʼo mi chanop ti lek xata˗o abaike, oy onoʼox kʼusitik ti mu koʼoluk chkʼot ta nopel avuʼunike. Tsots onoʼox skʼoplal ti koʼoluk li kʼusi chanopike, pe ti kʼu yelan chavakʼ ta ilel atalelalik kʼalal mu jmojuk kʼusi chkʼot ta nopel avuʼunike, jaʼ mas to tsots skʼoplal» (Matthew ti voʼob xa jabil nupuneme).

Muʼyuk xa jun avoʼonton chavaʼi abaik

Kʼalal oy anovio o anoviae, jal chachʼakbe yorail sventa xachiʼin, vaʼun xuʼ van lubem xa chavaʼi aba o mu xa junuk avoʼonton. ¿Kʼusi xuʼ xapas mi jech chavaʼi abae?

Oyuk noʼox spʼisol li kʼusi chapase. Mu jaʼuk xavakʼ tajek ta avoʼonton li anovio o anovia ti jaʼ muʼyuk xa chapas li kʼusitik abainoj spasele o ti xachiʼin li avamigotake. Xi chal Alana ti oy xa ta voʼob jabil snupunele: «Kʼalal mi lanupun xa oxe, jech˗o chakʼan ti jaʼuk˗o avamigotake, jech li stukik eke. Jaʼ yuʼun, mu xavikta skʼoponelik ta skoj noʼox ti oy xa anovio o anoviae».

Teuk ta ajol liʼe: Kʼalal mi lanupune, jech˗o skʼan ti ta spʼisoluk xapas skotole. Jaʼ yuʼun chaʼa, ¿kʼu yuʼun mu jechuk xa onoʼox xlik apas kʼalal anovio to abaike?

Jaʼik onoʼox li kerem tseb ta baʼyel lokʼole. Lubemik tajek ta skoj li kʼusitik la spasik voljee. Lokʼoletik. 1. Tstsʼotik visikleta. 2. Tslokʼes selfiik xchiʼuk yamigotakik. 3. Tskʼelik tele xchiʼuk yamigotakik ta akʼobaltik. 4. Tstakbe sbaik mensajeetik kʼalal nax xa ox akʼobale.

Nopo ta sventa liʼe: ¿Mi chakʼan ti jal xa tajek chchiʼinot li anovio o li anoviae o ti epuk kʼusi spas ta atojolale? ¿Mi jaʼ jech tskʼanbot chavaʼi ek? ¿Kʼuxi xuʼ ti ta spʼisoluk noʼox li kʼusi chapas achaʼvoʼalik sventa mu xalubik tajek o ti mu xa junuk avoʼonton chavaʼi abaike?

Beiltasel ta Vivlia: «Akʼbil yorail skotol, akʼbil yorail skotol li kʼusi chichʼ [pasele]» (Eklesiastes 3:1).

«Mi jaʼ noʼox chachʼay avoʼontonik kʼalal anovio abaik toe, chavil avokolik mi lanupunike. Kʼalal anovio abaike, tsots skʼoplal ti oyuk kʼusitik jmoj xapasik jech kʼuchaʼal ti xalokʼik ta manole, ti xapasik li kʼusitik skʼan pasel ta yut nae xchiʼuk ti jmojuk xavichʼik ta mukʼ li Diose. Taje tskoltaoxuk sventa lekuk xbat li anupunelike» (Daniel ti chib xa jabil nupuneme).

Teuk ta ajol liʼe: Ti kʼu sjalil chanovioin abaike, jaʼ tskoltaot sventa xkʼot ta nopel avuʼun mi chanupun o mi chatuchʼ ta be li akʼopike. Li yoxvokʼal li mantal liʼe chalbe skʼoplal junchibuk li kʼusitik skʼan xatsak ta venta kʼalal mu to xkʼot ta nopel avuʼun taje.