¿Buchʼu chatʼuj ta ajvalil avuʼun? | ¿Kʼusi chal li Vivliae?

Li krixchanoetike oy kʼusi tsots skʼoplal skʼan snopik: jaʼ ti buchʼu tskʼan tstikʼik ta ajvalile.

¿Kʼusi chal Vivlia ta sventa taje?

Oy noʼox spajeb kʼusi spas yuʼunik li ajvaliletike

Li Vivliae chal ti oy noʼox spajeb kʼusitik spas yuʼunik li ajvaliletik ta balumile.

• «Mu xapat avoʼontonik ta stojolal li bankilaletike mi jaʼuk ta stojolal li xnichʼon krixchano ti mu xuʼ yuʼun xkoltavane. Chlokʼ li xchʼulele, tsut ta pukuktik li stuke; li vaʼ kʼakʼale, chlaj skʼoplal li kʼusitik tsnope» (Salmo 146:3, 4, tsʼib ta yok vun).

Chchamik onoʼox skotol li ajvaliletike mu ventauk mi toj lek xtojob ta spasel li yabtelike. Akʼo mi ep kʼusitik lekik tspasik, mu kʼusi stakʼ spasik sventa jechuk˗o x˗abtejik batel ek li buchʼutik ch˗och ta xkʼexolike (Eklesiastes 2:18, 19).

Li Vivliae yaloj xa onoʼox ti mu stakʼ spas sba ta mantal stukik li krixchanoetike.

• «Mi jaʼuk xuʼ yuʼun tsbeiltas sba batel stuk li jun krixchano ti yakal chanave» (Jeremias 10:23).

¿Mi oy buchʼu ti lek tajek x˗ajvalilaj li avie?

Li ajvalil ti lek ch˗ilat yuʼun Diose

Li Vivliae chal ti Diose stʼujoj jun ajvalil ti lek chanem xchiʼuk ti xuʼ jpat koʼontontik ta stojolale, jaʼ li Jesukristoe (Salmo 2:6). Jaʼ li Ajvalil li ta Ajvalilal yuʼun Diose, jun ajvalilal ti ta vinajel oye xchiʼuk ti te to tspas talel mantale (Mateo 6:10).

¿Mi jaʼ van chatʼuj ta ajvalil avuʼun li Jesuse? Li Vivliae chal ti kʼu yuʼun tsots skʼoplal ti jech xapase:

• «Ichʼik ta mukʼ li nichʼonile [li Jesukristoe], mi moʼoje, ch˗ilin me li Diose xchiʼuk chalajik ta be, yuʼun anil tajek chlik li skʼakʼal yoʼontone. Xmuyubajik noʼox li buchʼu tsaʼ snakʼobbailik ta stojolale» (Salmo 2:12).

Jaʼ xa yorail sventa xanopbe skʼoplal taje. Jech kʼuchaʼal chal li albil kʼopetik ta Vivliae, li Jesuse lik ajvalilajuk ta 1914. Li albil kʼopetike chal ti Ajvalilal yuʼun Diose poʼot xa x˗och ta xkʼexol skotol li ajvaliletik ta balumile (Daniel 2:44).

Mi chakʼan chanaʼ kʼuxi xuʼ xavakʼ aba ta stojolal li Ajvalil Jesuse, kʼelo li mantal liʼe: «Skʼan xa noʼox jkoltatik li Ajvalilal yuʼun Diose».