Buyuk xa noʼox ti kʼixnaj tajek ta 2023 | ¿Kʼusi chal li Vivliae?

Avie chkʼixnaj tajek ti muʼyuk bu jech ilbil˗oe, ta skoj taje, oy kʼusitik yan chkʼot ta pasel yuʼun. Kakʼtik venta kʼusi chalik ta sventa taje.

•  «Oy xa ta 174 jabil ti chichʼ tsʼibael kʼu yelan sikil o xkʼixnal li balumile, pe muʼyuk toʼox jech ilbil˗o ti jech xkʼixnaj li ta junioe» (Oficina Nacional de Administración Oceánica y Atmosférica, Departamento de Comercio de Estados Unidos, 13 yuʼun julio ta 2023).

•  «Li ta Italia, España, Francia, Alemania xchiʼuk Poloniae chkʼixnaj tajek, jnopojkutike yikʼaluk xkʼot ta 48 ºC li ta isla Sicilia xchiʼuk Cerdeñae. Mi kʼot jeche, jaʼ spajeb jech kʼixin tajek ilbil li ta Europae» (Agencia Espacial Europea, 13 yuʼun julio ta 2023).

•  «Ta skoj ti chkʼixnaj tajeke, mas tsotsik tajek chakʼ voʼ xchiʼuk mas nopajtik, vaʼun ep butik chnojik ta voʼ» (Stefan Uhlenbrook, ti jaʼ direktor li ta Sección de Hidrología, Recursos Hídricos y Criosfera de la Organización Meteorológica Mundial, 17 yuʼun julio ta 2023).

¿Mi chavul˗o avoʼonton li kʼusi chalik ta sventa ti chkʼixnaj tajeke? Akʼo avil venta kʼusi chal Vivlia ta sventa taje.

¿Mi oy xa onoʼox yaloj Vivlia ti jech chkʼot ta pasele?

Yaloj xa onoʼox ta Vivlia ti jech chkʼot ta pasel li jkʼakʼaliltike. Yuʼun li Jesuse yaloj xa onoʼox ti «chichʼ ilel kʼusitik toj xibal sba» li ta jkʼakʼaliltike (Lukas 21:11). Ep buchʼutik chiʼik˗o ti yantik xkʼixnaj li balumile xchiʼuk chiʼik˗o ti voʼotik xa jlajestik li balumile.

¿Mi stakʼ to van naklebinel ta tsʼakal li balumile?

Stakʼ to. Yuʼun li Diose la smeltsan balumil sventa te xijnaki-o. Vaʼun, muʼyuk chakʼ ti slajes li krixchanoetike (Salmo 115:16; Eklesiastes 1:4). Jech xtok, yaloj ti tslajesbe skʼoplal li buchʼutik tsokesik li balumile (Apokalipsis 11:18).

Li Vivliae chal ti muʼyuk chakʼ ta lajesel Dios li balumile xchiʼuk chkʼot ta pasel li kʼusi yaloje.

•  «[Li Diose] tspajtsan li tsatsal ikʼe; chpaj li nab ti xvaʼi xkoti noʼoxe» (Salmo 107:29). Li Diose oy sjuʼel sventa tspas ta mantal li kʼusitik oy ta balumile. Xuʼ me smeltsan li kʼusitik chkʼixnaj tajek yuʼun li balumile xchiʼuk ti chakʼ jvokoltike.

•  «Oy ta avoʼonton li balumile, oy kʼusi lek xchʼi avuʼun te xchiʼuk ep kʼusitik x-ayan» (Salmo 65:9). Jaʼ me tspas Dios ti xjoybij ta jun paraiso li balumile.

Sventa xanabe mas skʼoplal ti kʼusi chal Vivlia ta sventa ti chlekub li balumile, kʼelo li mantal «¿Buchʼu noʼox xuʼ xlekub yuʼun li jbalumiltike?».