¿Kʼu yuʼun muʼyuk jun oʼontonal? | ¿Kʼusi chal li Vivliae?

Skotol li ajvaliletik xchiʼuk li organisasionetik ta spʼejel balumile muʼyuk pasem yuʼunik ti oyuk jun oʼontonale. Ti kʼuxi jelav li Xchibal Mukʼta Paskʼop ta spʼejel Balumile, mas to epajem talel li paskʼopetike. Te van chaʼmil miyon krixchanoetik te nakalik ti bu yakal paskʼope.

¿Kʼu yuʼun mu x˗akʼ yuʼunik jun oʼontonal li krixchanoetike? ¿Kʼusi chal li Vivliae?

Jkʼeltik oxib srasonal ti kʼu yuʼun muʼyuk jun oʼontonale

1. 1. Li Vivliae chal kʼu yelan stalelal krixchanoetik li avi kʼakʼale, xi chale: «Tskʼan sba stuk li krixchanoetike, batem ta yoʼontonik takʼin, stuk noʼox lek chaʼi sbaik, jpʼel xalik, […] muʼyuk stukʼil yoʼontonik, […] mi jutebuk oy ta yoʼontonik tspas ta jmoj skʼopik, […] mu snaʼ spajes sbaik, simaronik, […] pimik ta mantal, xtoyet xa tajek chaʼi sbaik». Ta skoj ti jech stalelalike, muʼyuk ta yoʼontonik tsaʼik jun oʼontonal (2 Timoteo 3:2-4).

2. 2. Akʼo mi tstsob sbaik li krixchanoetik o chakʼik persa ta stukik sventa oyuk jun oʼontonale, mu spas yuʼunik. Persa skʼanik koltael yuʼun li Jpasvanej kuʼuntike, li Jeovae.a Xi chchanubtasvan li Vivliae: «Mi jaʼuk xuʼ yuʼun tsbeiltas sba batel stuk li jun krixchano ti yakal chanave» (Jeremias 10:23).

3. 3. Li buchʼu yakal tsventain balumil avie toj chopol xchiʼuk tsots sjuʼel, «yakal tsloʼla skotol li jnaklejetik ta spʼejel balumile». Taje jaʼ skʼoplal li Satanase. Jaʼ yuʼun, mi jech-o tsventain li balumile, oy-o vokolil xchiʼuk paskʼop (Apokalipsis 12:9; 1 Juan 5:19).

¿Buchʼu noʼox xuʼ xakʼ talel jun oʼontonal?

Li Vivliae jamal chal ti jaʼ noʼox Dios xuʼ xakʼ talel li jun oʼontonale, maʼuk li krixchanoetike.

•  «Xi chal li Jeovae: ‹Yuʼun jnaʼoj lek li kʼusi ta jpas ta atojolalike, chkakʼboxuk jun oʼontonal, maʼuk vokolil, sventa oyuk kʼusi lek xataik ta jelavel xchiʼuk sventa oyuk spatobil avoʼontonik›» (Jeremias 29:11).

¿Kʼuxi tspas Dios li kʼusi yaloje? Xi chal li Vivliae: «Li Dios ti chakʼ jun oʼontonale poʼot xa xakʼ ti akʼo xapechʼik ta tekʼel li Satanase» (Romanos 16:20). Sventa xakʼ talel jun oʼontonal ta balumil li Diose, tstunes jun ajvalilal ta vinajel. Xi tsbiiltas li Vivliae: «Ajvalilal yuʼun Dios», taje jaʼ ch˗ajvalilaj li Jesukristoe (Lukas 4:43). Mi lik sventain balumil li Jesuse, jaʼ to te chlik skʼupinik jun oʼontonal li krixchanoetike (Isaias 9:6, 7).

•  Mi chakʼan chanabe mas skʼoplale, kʼelo li mantal ti xi sbie: «¿Kʼusitik tspas li Ajvalilal yuʼun Diose?».