¿Kʼu yuʼun vokol ta tael li jun oʼontonal ta spʼejel balumile?
Li kʼusi chal Vivliae
Ta yip stukik li krixchanoetike mu onoʼox x˗akʼ yuʼunik li jun oʼontonal ta spʼejel balumile. Jkʼeltik kʼu yuʼun:
«Mi jaʼuk xuʼ yuʼun tsbeiltas sba batel stuk li jun krixchano ti yakal chanave» (Jeremias 10:23). Li krixchanoetike muʼyuk laj yichʼik pasel sventa sventain sba stukik. Jaʼ yuʼun, mu x˗akʼ yuʼunik li jun oʼontonal ta spʼejel balumil ta sbatel osile.
«Mu xapat avoʼntonic ta stojol viniquetic ti cajal yabtel yichʼojique, viniquetic noʼox ti mu xuʼ yuʼun ta xpojvane, yuʼun cʼalal mi chamique, ta xjoybij ta lum achʼel. Ta scʼacʼalil taj une, tsʼij xi scʼoplal yuʼun ti cʼusi snopoj ta spase» (Salmo 146:3, 4, Xchʼul Cʼop ti Jtotic Diose, ta skʼop Chamula). Akʼo mi lek kʼusi oy ta yoʼontonik spasel li ajvaliletik ta balumile, mu xpaj yuʼunik li kʼusitik chlik˗o paskʼope.
«Li ta slajebal xa kʼakʼale, toj echʼ noʼox xibal sba. Yuʼun [...] li krixchanoetike [...] simaronik, muʼyuk skʼanojik li kʼusi leke, j˗akʼvanejetik ta kʼabal, pimik ta mantal, xtoyet xa tajek chaʼi sbaik» (2 Timoteo 3:1-4). Kuxulutik xa ta slajebal kʼakʼal liʼ ta chopol balumile, ti bu chʼabal jun oʼontonal ta skoj ti chopol tajek stalelal li krixchanoetike.
«¡Jaʼ toj abol sba li balumil xchiʼuk li nabe! Yuʼun te yalem talel Diablo ti bu oyoxuke, oy tajek skʼakʼal yoʼonton ta skoj ti snaʼoj ti toj komkom xa li yoraile» (Apokalipsis 12:12). Li bankilal yajkontra Diose jaʼ li Diabloe, yuʼun tstijbe yoʼonton krixchanoetik sventa chopoluk tajek stalelalik kʼuchaʼal stuke xchiʼuk ti chʼabaluk xkʼuxul yoʼontonik eke. Yoʼ to jaʼ «li ajvalil ta balumil liʼe» muʼyuk bu jun koʼontontik (Juan 12:31).
«[Li Ajvalilal yuʼun Diose] tslajesbe skʼoplal skotol li ajvalilaletik taje [ti tskontrainik li Diose], vaʼun stuk xa noʼox te chkom sbatel osil» (Daniel 2:44). Taje jaʼ tspas li Ajvalilal yuʼun Diose ti chakʼ talel li jun oʼontonal ta spʼejel balumil ta sbatel osile, maʼuk li ajvaliletik ta balumile (Salmo 145:16).