Kolta˗o yantik sventa mu atukuk xavaʼi aba | ¿Kʼusi chal li Vivliae?

Ta spʼejel balumile, oy ep krixchanoetik ti stuk chaʼi sbaike xchiʼuk chʼabal yamigotakik. Junantik doktoretike chalik ti jaʼ mas lek chkaʼi jbatik mi la jkoltatik li yantike.

•  «Kʼalal ta jkoltatik li yantike, oy jbalil chkaʼi jbatik, muʼyuk ta jchʼak jbatik ta stojolal yantik xchiʼuk mu xa jtukuk chkaʼi jbatik» (Institutos Nacionales de la Salud, ta Estados Unidos).

Li Vivliae chal kʼusi stakʼ jpastik sventa jkoltatik li yantike. Mi la jtsaktik ta ventae, jaʼ tskoltautik sventa mu jtukuk xkaʼi jbatik.

Li kʼusi xuʼ xapase

Oyuk slekil avoʼonton. Akʼbo yantik li kʼusi oy avuʼune, jech kʼuchaʼal li atiempoe. Sabo yorail sventa xachiʼin ta loʼil li yantike, mas to lek mi te avilojbe sate. Kʼalal oy slekil avoʼontone, ta me stojboxuk ta vokol, vaʼun jaʼ jech ch˗ayan avamigotak.

•  Li kʼusi chal Vivliae: «Oyuk me kʼusi xavakʼilanbeik li yantike, vaʼun cha˗akʼbatik ek» (Lukas 6:38).

Koltao li yantike. Kʼelo kʼuxi xuʼ xakolta li buchʼutik chil svokolike. Jech kʼuchaʼal liʼe, ta slekiluk avoʼonton xatsʼet chikintabe li kʼusi chale xchiʼuk aʼibo smelolal ti kʼu yelan chaʼi sbae. Jech xtok, albo ti chakʼan chakolta sventa masuk kʼun xaʼi li kʼusi tspase.

•  Li kʼusi chal Vivliae: «Mu snaʼ xlaj slequil yoʼnton ta stojol maʼ ti buchʼu lec xil sbaic xchiʼuque» (Proverbios 17:17, Xch’ul C’op ti Jtotic Diose, ta sk’op Chamula).

Mi chakʼan chanaʼ kʼuxi xuʼ xata lek avamigotake, chano li mantal «Ta kutsʼ kalaltik xchiʼuk kamigotik».