Ta tsʼetkʼob: Yasser Qudaih/Anadolu via Getty Images; ta batsʼikʼob: RONALDO SCHEMIDT/AFP via Getty Images
¡CHAPALUKUTIK-O!
¿Bak’in chlaj li paskʼope? | ¿Kʼusi chal li Vivliae?
«Jaʼ xa me yorail ti xichʼ pajtsanel li paskʼop sventa mu xa xil svokol li yantike. Ta melel, jaʼ xa me yorail ti xyochbeike» (Jaʼ jech laj yal António Guterres ti jaʼ secretario general ta Naciones Unidas kʼalal tsakat ta kʼop yuʼun Irán li Israel li ta savado 13 yu’un avril ta 2024).
Li paskʼop ta s-oesteal Asiae jaʼ no’ox jun skʼelobil li kʼusi yakal chkʼot ta pasel ta spʼejel balumile.
«Ti kʼuxi echʼ li Xchibal Muk’ta Paskʼop ta spʼejel Balumile, mas to epajem li paskʼop avie. Yuʼun jutuk mu skotoluk li jnaklejetik ta spʼejel balumile yiloj tal svokolik ta paskʼop, jaʼ xkaltik ti te van 2 mil miyon krixchanoetike» (Consejo de Seguridad ta ONU, 26 yuʼun enero ta 2023).
Li lumetik ti chil svokolik ta paskʼope jaʼ Israel, Gaza, Siria, Azerbaiyán, Ucrania, Sudán, Etiopía, Níger, Myanmar xchi’uk Haití.a
¿Bak’in chlaj li paskʼope? ¿Mi xlaj yuʼunik paskʼop li buchʼutik tsots yabtelik ta spʼejel balumile? ¿Kʼusi chal li Vivliae?
Buyuk no’ox oy paskʼop
Li paskʼopetik oy ta spʼejel balumile jaʼ svinajeb ti jutuk xa skʼan xlaj li paskʼope. Yuʼun jech kʼuchaʼal chal jun albil kʼop ta Vivliae, li paskʼopetik oy avie chak’ ta ilel ti «poʼot xa xlaj skotol li kʼusitik oy ta balumile» (Mateo 24:3).
«Chavaʼiik ti oy paskʼop liʼe xchiʼuk ti oy paskʼop ta nome [...]. Yuʼun chlik skontrain sbaik jujun mukʼta jteklum, chlik skontrain sbaik ajvaliletik» (Mateo 24:6, 7).
Li paskʼopetik avie chakʼ kʼotuk ta pasel li albil kʼopetik ta Vivliae. Kʼelo li mantal «¿Kʼuxi jnaʼojtik ti ta slajebal xa kʼakʼal kuxulutike?».
Jun paskʼop ti tslajesbe skʼoplal skotol li paskʼope
Li Vivliae chal ti chlaj skʼoplal li paskʼopetike. Pe maʼuk tslajesbeik skʼoplal paskʼop li krixchanoetike, jaʼ li Armajedone, jaʼ xkaltik, li «paskʼop ta smukʼta kʼakʼalil Dios ti jaʼ li Buchʼu skotol xuʼ yuʼune» (Apokalipsis 16:14, 16). Mi jelav xa ox li paskʼop taje, li Diose chakʼ ti akʼo skʼupinik jun oʼontonal ta sbatel osil li krixchanoetike (Salmo 37:10, 11, 29).
Sventa xanabe mas skʼoplal li paskʼop ti jaʼ tslajesbe skʼoplal skotol li paskʼope, kʼelo li mantal «¿Kʼusi jaʼ li Armajedone?».
a ACLED Conflict Index: “Ranking violent conflict levels across the world” (Ti kʼu yelan cholbil talel li lumetik ti bu oy mas paskʼop ta spʼejel balumile), enero ta 2024.