¿Kʼu yuʼun chʼabal xa ichʼbail ta mukʼ? | ¿Kʼusi chal li Vivliae?

Yantik xa sok stalelal li krixchanoetike: li doktoretike chichʼik utel yuʼun li buchʼutik tskʼelike, li buchʼutik chkʼotik ta veʼel ta restaurantee muʼyuk chichʼik ta mukʼ li j˗abteletike, li buchʼutik chbatik ta avion xtoke jtoybaetik xchiʼuk chutik o tsmajik li j˗abteletike, li jtoyba ololetike tslabanik li smaestrotakike, chalbeik ti oy kʼusi chopol tspasbeike o ta smajik. Jech xtok, junantik jpolitikoetike chopol tajek kʼusi tspasik, pe jaʼuk li yantike chalbe sba skʼoplal stukik ti toj lek la yoʼontonike.

Li Vivliae chal kʼu yelan skʼan lek xkakʼ ta ilel jtalelaltik. Jech xtok, chal kʼu yuʼun chʼabal xa ichʼbail ta mukʼ li avie.

¿Kʼu yuʼun chʼabal xa ichʼbail ta mukʼ?

Ta spʼejel balumile yantik xa sok stalelal li krixchanoetike. Muʼyuk xa tspasik li kʼusi leke, muʼyuk xa lek stalelik xchiʼuk muʼyuk xa tspasik li kʼusitik lek chanubtasbilik˗o talele.

• Achʼtik toe li empresa Gallup ta Estados Unidose oy kʼusi la sjakʼbe li jnaklejetik tee. Vaʼun, laj yalik ti muʼyuk xa lek stalelal li krixchanoetike, ti jaʼ mu sta li 22 jabil echʼem tale.

• Kʼalal laj yichʼ jakʼbel sloʼil mas ta 32 mil krixchanoetik ta 28 mukʼtik lumetike, mas ta oʼlol laj yalik ti muʼyuk xa mas ichʼbail ta mukʼ li avie.

Li Vivliae yaloj xa onoʼox ti tsok stalelal li krixchanoetik avie.

• «Cʼalal slajebtic xa batel ti cʼacʼale, yuʼun xiʼbal sba, ta xlic ep vocol. Yuʼun ti cristianoetique stuc noʼox ta scʼan ta xcʼuxubin sbaic. Yuʼun jaʼ noʼox cʼupijem yoʼntonic yuʼun ti taqʼuine. Ta stoy sbaic. Stuc xa noʼox lec ta xaʼi sbaic. […] Mu xchʼunbeic smantal ti stot smeʼique. Mu snaʼ xalic colaval. […] Muʼyuc slequilal yoʼntonic. Muʼyuc scʼuxul yoʼntonic. […] Contra ta xil scotol ti cʼusi leque» (2 Timoteo 3:1-3, Ti Achʼ Rextomento yuʼun ti Jesucristoe, ta skʼop Chamula).

Mi chakʼan chanabe mas skʼoplal kʼuxi yakal chkʼot ta pasel li albil kʼop liʼe, kʼelo li mantal «¿Mi yaloj xa onoʼox Vivlia kʼu yelan stalelal krixchanoetik li avie?».

Li Vivliae xuʼ me skoltautik sventa lekuk jtalelaltik

Akʼo mi yantik xa sok batel stalelal li krixchanoetik ta spʼejel balumile, pe oy xa ta smiyonal krixchanoetik lekubem stalelalik ta skoj ti la xchanik li kʼusi chal Vivliae. Yuʼun li kʼusi te chale «xuʼ jpat-o koʼontontik avie xchiʼuk ta sbatel osil» (Salmo 111:8). Jkʼeltik jayibuk:

• Li kʼusi chal Vivliae: «Skotol li kʼusitik chakʼan akʼo spasboxuk li krixchanoetike skʼan me jech xapasbeik ek» (Mateo 7:12).

  Kʼusi skʼan xal: Li voʼotike ta jkʼantik ti ta slekiluk yoʼonton skʼoponutik li yantike xchiʼuk ti xichʼutik ta mukʼe, taje skʼan me jech jpasbetik ek.

• Li kʼusi chal Vivliae: «Jaʼ yuʼun, meleluk xa xakʼopon abaik ta jujuntal xchiʼuk li achiʼilik ta skoj ti laj xa ajipik komel li loʼlavaneje» (Efesios 4:25).

  Kʼusi skʼan xal: Jaʼ ti meleluk xijkʼopoje xchiʼuk ti mu xijloʼlavan kʼalal oy kʼusi ta jpastike.

Xuʼ to xa tabe mas yaʼyejal liʼe:

• Li Jkʼel-osil ta toyol ti xi sbie: «¿Kʼusi xuʼ skoltautik ta spasel li kʼusi leke?».

• Li mantal «¿Kʼuxi tskoltautik Vivlia sventa oyuk stsʼikemal kuʼuntike?».