¿Bu xuʼ xata koltael sventa lekuk xbat li akuxlejale?

Jech kʼuchaʼal laj xa kiltik tale, sventa lekuk xbat xkuxlejalik li krixchanoetike spatoj yoʼontonik ta sventa li chanune, li takʼine, ti lekuk stalelalike o li kʼusi albil chkʼot ta xkuxlejalike. Taje muʼyuk chkoltavan, pe maʼuk skʼan xal ti muʼyuk xa bu xuʼ jtatik koltael sventa lekuk xbat li jkuxlejaltike.

JUN LEKIL JBEILTASVANEJ

Kʼalal oy kʼusi ta jnop ta jpastike, ta van jakʼbetik li buchʼu mas xa oy sjabilale. Jaʼ yuʼun, mi ta jkʼan lek chbat jkuxlejaltike ta jsaʼtik koltael ta stojolal li buchʼu mas xa xtojobe xchiʼuk li buchʼu mas pʼije. Li koltael taje te oy li ta Chʼul Tsʼibetik ti laj yichʼ tsʼibael leʼ xa van ta 3,500 jabile, taje jaʼ li Vivliae.

¿Kʼu yuʼun xuʼ jpat koʼontontik li ta Vivliae? Yuʼun li buchʼu laj yakʼ ta naʼele jaʼ li buchʼu mas pʼij ta sjunul vinajel balumile, jaʼ «li Buchʼu mu snaʼ xlaj yoraile». Xi chichʼ albel skʼoplale: «Muʼyuk alikeb xchiʼuk muʼyuk apajeb» (Daniel 7:9; Salmo 90:2). Li Isaias 45:18 chal: «Ti jaʼ Jpasvanej yuʼun vinajele, ti jaʼ melel Diose, ti jaʼ li buchʼu la spas li balumile». Chalbutik stuk ti jaʼ Jeova li sbie (Salmo 83:18).

Ta skoj ti likem tal ta stojolal Jpasvanej kuʼuntik li Vivliae, muʼyuk chchanubtasvan ti oy junuk tsʼunbalil ti mas tsots skʼoplale. Tunem tajek li tojobtaseletik yichʼoj tale xchiʼuk skoltaoj krixchanoetik ta buyuk noʼox lumal, jaʼ li livro ti mas jelubtasbil ta jeltos kʼopetike xchiʼuk ti mas pukbil ta spʼejel balumile.a Jaʼ yuʼun, buchʼuuk noʼox krixchanoal xuʼ xaʼibe smelolal xchiʼuk xbeiltasat, yuʼun li Vivliae xi chale:

«Mu snaʼ xtʼujvan li Diose, yuʼun buyuk noʼox slumal lek ilbil li buchʼu chiʼta xchiʼuk ti tspas kʼusi tukʼe» (ECHOS 10:34, 35).

Jech kʼuchaʼal jun lekil totil ti skʼanoj xchiʼuk ti tskolta li xnichʼnabe, li Jeovae jaʼ jun totil ti skʼanojutik xchiʼuk ti tskoltautik ta Skʼope, li Vivliae (2 Timoteo 3:16). Xuʼ me xapat avoʼonton li ta Skʼop Diose. Ta skoj ti jaʼ la spasutik li Diose, snaʼoj li kʼusi jaʼ sventa jlekilaltike.

JUN BEILTASEL TI XUʼ JPAT˗O KOʼONTONTIKE

Xuʼ jpat koʼontontik ti lek tsbeiltasutik li Vivliae, yuʼun leʼ xa ta chamil jabil laj yal kʼusitik chkʼot ta pasel li ta balumile xchiʼuk ti kʼu yelan stalelal li krixchanoetik ta jkʼakʼaliltike.

Li KʼUSITIK CHKʼOT TA PASELE

«Chlik skontrain sbaik jujun mukʼta jteklum, chlik skontrain sbaik ajvaliletik. Ta x˗echʼ tsatsal nikeletik, chlik viʼnal xchiʼuk tsatsal chamel ta buyuk noʼox» (LUKAS 21:10, 11).

LI KRIXCHANOETIKE

«Chtal tsots vokolil li ta slajebal xa kʼakʼale, toj echʼ noʼox xibal sba. Yuʼun tskʼan sba stuk li krixchanoetike, batem ta yoʼontonik takʼin, stuk noʼox lek chaʼi sbaik, jpʼel xalik, chchopol kʼoptavanik, mu xchʼunbe smantal stot smeʼik, mu kʼusi snaʼ stojik ta vokol, muʼyuk stukʼil yoʼontonik, muʼyuk xa kʼanbail kʼuchaʼal stalel onoʼox jeche, mi jutebuk oy ta yoʼontonik tspas ta jmoj skʼopik, chchopol loʼiltavanik, mu snaʼ spajes sbaik, simaronik, muʼyuk skʼanojik li kʼusi leke, j˗akʼvanejetik ta kʼabal, pimik ta mantal, xtoyet xa tajek chaʼi sbaik, jaʼ skʼanojik li kʼusi kʼupil sba chaʼi stukike, jaʼ muʼyuk skʼanojik li Diose» (2 TIMOTEO 3:1-4).

Kʼalal chavil ti jaʼ jech chkʼot ta pasel li albil kʼopetik ta Vivlia ti voʼne xa tajek laj yichʼ tsʼibaele, ¿kʼusi chkʼot ta nopel avuʼun? Yikʼaluk van jech chkʼot ta nopel avuʼun kʼuchaʼal li Leung ti likem ta Hong Kong ti xi laj yale: «Voʼne xa tajek yichʼoj tsʼibael li albil kʼopetik ta Vivliae, ti jaʼuk la stsʼiba jun krixchanoe muʼyuk jech lek tajek chkʼot ta pasel. Li Vivliae jamal xvinaj ti likem talel ta stojolal li buchʼu mas pʼij kʼuchaʼal voʼotike».

Ta sienal xa noʼox albil kʼopetik te ta jtatik ta Vivlia ti kʼotemik ta pasele.b Taje chakʼ ta ilel ti jaʼ Skʼop Dios li Vivliae, xi chal li Jeovae: «Voʼon Diosun, muʼyuk yan kʼuchaʼal li voʼone. Ta slikebal onoʼox chkal ti kʼu yelan chkʼot ta tsutsele» (Isaias 46: 9, 10). Jaʼ yuʼun, oy lek srasonal kuʼuntik yoʼ jchʼuntik li kʼusi chal Vivlia ta sventa li kʼusi jmalaojtik ta tsʼakale.

JUN BEILTASEL TI TSKOLTAOT AVI XCHIʼUK TA SBATEL OSILE

Mi chachʼun li beiltaseletik te ta Vivliae, lek me chbat li akuxlejale. Nopbo skʼoplal li skʼelobiltak liʼe:

TAKʼIN XCHIʼUK ABTELAL

«Mas lek mi ta jkuxtik jlikeluke, jaʼ altik mi ta jmil jbatik ta abtele, yuʼun xkoʼolaj kʼuchaʼal ta jnutstik ikʼ» (EKLESIASTES 4:6).

UTSʼ ALALIL

«Ta jujuntaloxuk skʼan me xakʼan avajnilik jech kʼuchaʼal akʼanoj aba atukike; jech xtok, akʼo me yichʼ lek ta mukʼ smalal li ajnilale» (EFESIOS 5:33).

TI KʼU YELAN XKIL JBATIK XCHIʼUK YANTIKE

«Iktao li skʼakʼal avoʼontone xchiʼuk komtsano li stiʼemal ajole; mu xa˗ilin xchiʼuk mu xapas li kʼusi toj chopole» (SALMO 37:8).

Mi chavakʼ ta akuxlejal li tojobtaseletik ta Vivliae, tskoltaot li avie xchiʼuk chamuyubaj li ta jelavele. Li Vivliae chal ti kʼu yelan li kuxlejal ta tsʼakal ti yaloj chakʼbutik li Diose.

LEKILAL XCHIʼUK JUN OʼONTONAL

«Tskʼupinik tajek li jun oʼontonal ti muʼyuk spajebe» (SALMO 37:11).

OY BU CHIJNAKI XCHIʼUK OY JVEʼELTIK

«Ta xlik svaʼan snaik sventa te chnakiik, ta stsʼun s˗uvaik sventa tslobeik sat» (ISAIAS 65:21).

MUʼYUK XA BUCHʼU CH-IPAJ XCHIʼUK CHCHAM

«Muʼyuk xa lajelal, muʼyuk xa at˗oʼonton, muʼyuk xa okʼel ta skoj vokolil xchiʼuk mi jaʼuk xa kʼusi kʼux chkaʼitik» (APOKALIPSIS 21:4).

¿Kʼusi skʼan xapas sventa xakʼupin taje? Taje te ta jtakʼtik li ta mantal chtale.

a Mi chakʼan chanabe mas yaʼyejal li Vivliae xchiʼuk ti kʼu yelan chichʼ pukele ochan ta www.jw.org, akʼbo klik ti bu chal CHANUBTASELETIK TA VIVLIA > LI SLOILAL VIVLIAE.

b Mi chakʼan chanabe to mas yaʼyejale, kʼelo li kapitulo 3 li ta livro «Kʼupino akuxlejal ta sbatel osil» ti pasbil yuʼun stestigotak Jeovae, xuʼ xayales ta www.jw.org/tzo ti bu chal VUNETIK XCHIʼUK YAN KʼUSITIK > LIVROETIK XCHIʼUK FOYETOETIK.