Spasel li kʼusi leke : Li Vivliae yichʼoj lekil beiltasel

Mi jaʼ noʼox ta jtsaktik ta venta li jol koʼontontik o li kʼusi tsnop yantik kʼalal oy kʼusi ta jpastike, mu me jnaʼtik mi lek kʼusi chkʼot ta pasel. Li Vivliae chal ti k’u yuʼun mu lekuk li kʼusi chkʼot ta nopel kuʼuntike xchiʼuk chal li kʼusi xuʼ jpastik sventa xijmuyubajuk noʼoxe. Jech xtok, yichʼoj lekil beiltaseletik ti xuʼ skoltautike.

SKʼAN SBEILTASUTIK LI DIOSE

Li ta Vivliae, chal ti mu stakʼ jbeiltas jba jtuktike, jaʼ yuʼun persa skʼan ti sbeiltasutik li Jeova Diosea (Jeremias 10:23). Jaʼ yuʼun, laj yakʼbutik li Vivlia sventa lekuk li kʼusitik chkʼot ta nopel kuʼuntik ti tsotsik skʼoplale. Li Jeovae skʼanojutik tajek xchiʼuk mu skʼan ti xkil jvokoltik ta skoj li kʼusitik chopol chkʼot ta nopel kuʼuntike (Deuteronomio 5:29; 1 Juan 4:8). Jech xtok, jaʼ li Jpasvanej kuʼuntik ti pʼij tajeke xchiʼuk ti xojtikinutik leke. Jaʼ yuʼun, xuʼ xakʼbutik lekil tojobtaseletik (Salmo 100:3; 104:24). Akʼo mi jech, li Diose muʼyuk buchʼu tsuj sventa xchʼunbat li smantaltake.

Li Jeovae laj yakʼbe skotol kʼusitik chtun yuʼun sventa xmuyubajik li Adan xchiʼuk Evae ti jaʼ li baʼyel vinik xchiʼuk li baʼyel antse (Jenesis 1:28, 29; 2:8, 15). Jech xtok, laj yakʼanbe mantaletik ti mu toj tsotsuk ta chʼunele, pe laj yakʼ ti akʼo snop stukik mi chchʼunik o mi muʼyuk (Jenesis 2:9, 16, 17). Li Adan xchiʼuk Evae jaʼ la spasik li kʼusi lek chaʼi stukike jaʼ muʼyuk la xchʼunbeik smantal li Jeovae (Jenesis 3:6). ¿Kʼu yelan jkuxlejaltik avi ta skoj ti jaʼ ta jpastik li kʼusi lek chkaʼi jtuktike? ¿Mi mas lek li jkuxlejaltike? Muʼyuk. Ti kʼu xa sjalil likem talel li kuxlejale, jamal xvinaj ti muʼyuk jun koʼontontik xchiʼuk muʼyuk xijmuyubaj ta skoj ti muʼyuk ta jchʼunbetik li smantaltak Diose (Eklesiastes 8:9).

Li Vivliae chakʼbutik lekil beiltasel sventa lekuk li kʼusitik xkʼot ta nopel kuʼuntike, mu ventauk ti bu likemutike (2 Timoteo 3:16, 17; kʼelo li rekuadro «Jlik livro sventa skotol krixchanoetik»). Jkʼeltik batel kʼuxi tsbeiltasutik Dios li ta Vivliae.

Kʼelo kʼu yuʼun chkaltik ti jaʼ Skʼop Dios li Vivliae (1 Tesalonisenses 2:13). Ochan ta jw.org xchiʼuk kʼelo li video ¿Buchʼu la spas li Vivliae?

KʼU YUʼUN OY JUNANTIK MU XCHʼUNIK LI KʼUSI CHAL VIVLIAE

Junantik krixchanoetike mu xchʼunik ti yichʼoj lekil beiltaseletik li Vivlia ti xuʼ skoltautike. Xuʼ van xi chal junantike:

Xi chalike: «Mu meleluk li kʼusi chal Vivliae».

Li kʼusi melele: Yileluke, xuʼ van skontrain sba junantik loʼiletik ta Vivlia, pe mi la jtsaktik ta venta li stsʼak loʼile, ti kʼusi ora kʼot ta pasele, li kʼusitik nopem xaʼiik spasel li vaʼ orae xchiʼuk ti kʼu yelan laj yil kʼot ta pasel li buchʼu la stsʼibae xchiʼuk yan kʼusitike, chkakʼtik venta ti koʼol li kʼusi chale.

Mi chakʼan chakʼel junantik skʼelobile, ochan ta jw.org xchiʼuk kʼelo li mantal «¿Se contradice la Biblia?».

Xi chalike: «Li krixchanoetik ti chchanik Vivliae chopol stalelalik ek. Jaʼ yuʼun, muʼyuk yichʼoj lekil beiltaseletik li Vivliae».

Li kʼusi melele: Maʼuk ta smul Vivlia ti chopol stalelal li krixchanoetik ta skoj ti muʼyuk chakʼ ta xkuxlejalik li lekil tojobtaseletike. Yuʼun li Vivliae yaloj xa onoʼox ti oy ep krixchanoetik ti muʼyuk tspasik li kʼusi chalike, ti te tsakal skʼoplal li jnitvanejetik ta relijion eke. Jech xtok, yaloj xa onoʼox ti jaʼ ta skojik ti «chopol xa chichʼ albel skʼoplal» li chanubtaseletik ta Vivliae (2 PEDRO 2:1, 2).

Mi chakʼan chakʼel junantik skʼelobil ti oy ep jnitvanejetik ta relijion ti mu xa jechuk chchanubtasvanik kʼuchaʼal chal li Vivliae, ochan ta jw.org xchiʼuk kʼelo li mantal «Li relijione, ¿mi jaʼ sventa xijpas ta jkʼulej?».

Xi chalike: «Li Vivliae tstij koʼontontik ti xijpʼajvane».

Li kʼusi melele: Li Vivliae tstij koʼontontik ti xkichʼtik ta mukʼ skotol li jchiʼiltaktike. Muʼyuk lek chil li junantik talelaletik liʼe:

Ti tsots jkʼoplal chkaʼi jbatike ti jaʼ mu sta li yantike (Filipenses 2:3).
Ti muʼyuk ta jtsaktik ta venta li buchʼutik jelel kʼusi xchʼunojik kʼuchaʼal voʼotike (1 Pedro 2:17).
Ti jsujtik yantik sventa koʼoluk li kʼusi jnoptike (Mateo 10:14).

Li Vivliae chal ti toj lek yoʼonton li Diose, ti tukʼ kʼusi tspasbe li krixchanoetike xchiʼuk tskʼan ti jechuk jpastik eke (Romanos 9:14).

Mi chakʼan to chanabe mas yaʼyejale, ochan ta jw.org xchiʼuk kʼelo li mantal «¿Kʼuxi tskoltautik Vivlia sventa oyuk stsʼikemal kuʼuntike?».

LI DIOSE TSBEILTASUTIK TA VIVLIA

Li ta Vivliae, te chalbe skʼoplal kʼu yelan yiloj sbaik tal xchiʼuk Dios li krixchanoetike. Kʼalal ta jkʼeltik li Vivliae, te chkakʼtik venta li kʼusi lek chil Diose xchiʼuk li kʼusi muʼyuke, jaʼ xkaltik, li kʼusi xuʼ jtabetik sbalile xchiʼuk li kʼusi xuʼ xkil-o jvokoltik yuʼune (Salmo 19:7, 11). Jech xtok, te ta jtatik beiltaseletik sventa talelaletik ti jtunel-o kuʼuntik jujun kʼakʼale.

Kalbetik skʼoplal li tojobtasel ta jtatik ta Proverbios 13:20: «Li buchʼu jaʼ chchiʼin li buchʼutik pʼijike chpʼijub ek, pe li buchʼu jaʼ chchiʼin li buchʼutik bolike muʼyuk kʼusi lek chkʼot ta stojolal». Li beiltasel liʼe jtunel-o kuʼuntik li avi eke xchiʼuk oy to yan lekil tojobtaseletik ti jaʼ noʼox te xuʼ jtatik li ta Vivliae (kʼelo li rekuadro «Li pʼijil tojobtaseletik ta Vivliae jtunel-o kuʼuntik»).

Xuʼ van xi chanopbe skʼoplale: «¿Kʼuxi xuʼ jnaʼ mi ta jtabe sbalil ta melel li beiltaseletik ta Vivliae?». Li ta yan mantal chtale, ta jkʼeltik kʼuxi staojbeik sbalil yantik li beiltaseletik ta Vivliae.

a Jaʼ Jeova sbi li Diose (Salmo 83:18).

LI PʼIJIL TOJOBTASELETIK TA VIVLIAE TA ONOʼOX SKOLTAUTIK

Jutuk xa mu chaʼmiluk jabil laj yichʼ tsʼibael li Vivliae, akʼo mi jech jtunel-o kuʼuntik li avie. Li krixchanoetike muʼyuk-o jelem li kʼusi chtun yuʼunike. Jkotoltik chkakʼtik persa ti xijmuyubajuk noʼoxe xchiʼuk ti junuk noʼox koʼontontike (Eklesiastes 1:9). Jaʼ yuʼun, li pʼijil tojobtaseletik ta Vivliae xuʼ skoltautik, yuʼun oy-o sbalil.

Sakuk jtalelaltik

«Oy ta koʼontonkutik ti sakuk jtalelalkutik ta skotole» (Ebreos 13:18).
«Mu xa me x-elkʼaj li buchʼu ch-elkʼaje; li kʼusi mas leke akʼo tsots abtejuk» (Efesios 4:28).

Lekuk xkil jbatik xchiʼuk li yantike

«Ta jujuntal akʼo saʼik li kʼusi lek chaʼi yan krixchanoe, maʼuk li kʼusi lek chaʼi stuke» (1 Korintios 10:24).
«Jechuk-o me tsʼikbo abaik ta jujuntal xchiʼuk mu me xajalanbe abaik ta jujuntal ti chapasbe abaik pertone» (Kolosenses 3:13).

Lekuk li kʼusi xkʼot ta nopel kuʼuntike

«Li buchʼu muʼyuk spʼijile chchʼun skotol li kʼusi ch-albate, yan li buchʼu pʼije tsnop lek li kʼusi tspase» (Proverbios 14:15).
«Li buchʼu pʼije tsta ta ilel li vokolile, vaʼun tsnakʼ sba, pe li buchʼutik chʼabal spʼijilike tukʼ chjelavik batel, vaʼun tsta-o svokolik» (Proverbios 22:3).