¿Kʼuxi tskoltautik Vivlia sventa oyuk stsʼikemal kuʼuntike?
«Kʼalal oy stsʼikemal kuʼuntike jaʼ chkoltavan sventa oyuk jun oʼontonal» (Declaración de Principios sobre la Tolerancia de la UNESCO, 1995).
Kʼalal muʼyuk stsʼikemal kuʼuntike, muʼyuk chijtsakvan ta venta xchiʼuk ta jpʼajtik li yantike. Kʼalal jech chkaʼi jbatike, oy me kʼusitik xuʼ xlik kaltik ti chopol˗o xaʼi sba kuʼuntik li yantike xchiʼuk ti xuʼ oy kʼusitik jpastik ta skoj ti chijpʼajvane.
Li krixchanoetike jelel kʼusi tsnopik ta sventa ti oyuk stsʼikemal kuʼuntik ta stojolal yantike. Junantike chalik ti skʼan lek noʼox xkiltik li kʼusitik tspas li yan krixchanoetike. Yantik xtoke, tstunesik Vivlia sventa tspak skʼoplalik, vaʼun chalik ti buchʼu oy stsʼikemal yuʼune skʼan la stsak ta venta kʼusi tsnop tspas li yantike xchiʼuk li kʼusi xchʼunojik akʼo mi muʼyuk lek chkiltik xchiʼuk lek nabil ti muʼyuk lek li kʼusi tspasike.
Li Vivliae ¿mi xuʼ xkoltavan sventa oyuk stsʼikemal yuʼun li krixchanoetik avi kʼakʼale?
Li kʼusi chal Vivlia ta sventa ti oyuk stsʼikemal kuʼuntike
Li Vivliae xi chal ta sventa li stsʼikemal kuʼuntike: «Akʼo vinajuk ta stojolal skotol krixchanoetik ti lek xatojobik snopele» (Filipenses 4:5). Ta jujuntal ta jnop jtuktik li kʼusitik ta jpastike, jaʼ yuʼun, li Vivliae tstij koʼontontik ti akʼo jtsaktik ta venta li kʼusi tsnop tspas li jujun krixchanoe, pe maʼuk me skʼan xal ti lek xa chkiltik skotol li kʼusi tspasike.
Li ta Vivliae te chal Dios kʼu yelan skʼan spas stalelal li krixchanoetike, xi chal li ta Mikeas 6:8: «Krixchano, yalojbot Dios li kʼusi lek ta pasele». Taje jaʼ tskoltautik sventa lekuk xbat li jkuxlejaltike (Isaias 48:17, 18).
Li Diose maʼuk yakʼoj ta jbatik ti jchapantik li yantike. Li Vivliae chal ti «jun noʼox li J˗akʼmantal xchiʼuk Jchapanvaneje, ¿buchʼuot avaloj sventa xachapan li achiʼile?» (Santiago 4:12). Yuʼun yakʼoj jnoptik ta jujuntal li kʼusi ta jnop ta jpastike xchiʼuk ta jbaintik li kʼusitik ta jpastike (Deuteronomio 30:19).
Li kʼusi chal Vivlia ta sventa ti skʼan xkichʼ jbatik ta mukʼe
Li Vivliae chal ti skʼan ‹xkichʼtik ta mukʼ buchʼuuk noʼox krixchanoal› (1 Pedro 2:17). Jaʼ yuʼun, li buchʼutik jech xkuxlejalik jech kʼuchaʼal chal li Vivliae chakʼik persa sventa xichʼik ta mukʼ skotol li krixchanoetike, mu ventauk li kʼusi xchʼunojik o li kʼusi tsnop tspas ta xkuxlejalike (Lukas 6:31). Pe taje maʼuk me skʼan xal ti lek xa chkiltik skotol li kʼusitik xchʼunojike, li kʼusitik chalike o li kʼusi tsnopike. Jech xtok, ta me xkichʼtik ta mukʼ kʼalal ta jchiʼintik ta loʼile. Chkakʼtik persa xchanbel stalelal li Jesuse, yuʼun li stuke laj yichʼ ta mukʼ li yantike.
Jun veltae, li Jesuse laj yojtikin jun ants ti yan˗o srelijione, ti mu koʼoluk li kʼusi xchʼunojike. Jech xtok, li ants taje te nakal xchiʼuk jun vinik ti maʼuk smalale. Li Jesuse muʼyuk lek chil li buchʼutik jaʼ jech tspasike, akʼo mi jech, vinaj ti la stsak ta mukʼ kʼalal la xchiʼin ta loʼile (Juan 4:9, 17˗24).
Li yajtsʼaklomtak Kristo avie chkakʼtik persa xchanbel stalelal Jesus sventa xij˗ichʼvan ta mukʼ kʼalal chkalbetik smelolal li kʼusi jchʼunojtike (1 Pedro 3:15). Li Vivliae chal ti mu xijsujvan sventa jechuk snopik yantik jech kʼuchaʼal ta jnoptike, yuʼun xi chale: ‹Mu persauk skʼan xalikes kʼop, skʼan lek noʼox avoʼonton ta stojolal skotol krixchanoetik› akʼo mi jelel li kʼusi xchʼunojike (2 Timoteo 2:24).
Li kʼusi chal Vivlia ta sventa li pʼajbaile
Li Vivliae chal ti ‹jpastik batel li kʼusi chakʼ jun˗o oʼontonale› (Ebreos 12:14). Kʼalal jech chkakʼtik persae, muʼyuk chijpʼajvan xchiʼuk chkakʼtik persa sventa junuk noʼox koʼontontik xchiʼuk li yantike, pe jech xtok un, muʼyuk chkakʼtik ta vokol li kʼusi jchʼunojtike (Mateo 5:9). Jech xtok, li Vivliae chalbe yajtsʼaklomtak Kristo ti akʼo skʼan li yajkontraike (Mateo 5:44).
Ta melel li Vivliae chal ti «ch˗ib yoʼonton» o «chopol» chil Dios li kʼusi chopol tspasik o ti chakʼbe˗o svokol li yantike (Proverbios 6:16˗19). Kʼalal chal ta Vivlia «jpʼajoj» xie, jaʼ chakʼ ta ilel ti toj echʼ noʼox chopol chichʼ ilel li kʼusi chopol chichʼ pasele. Li Diose chakʼ ta perton xchiʼuk oy ta yoʼonton tskʼan tskolta li buchʼu tskʼan tsjel li xkuxlejale xchiʼuk ti jech tskʼan chkuxi kʼu chaʼal chal li stukʼil mantaltake (Isaias 55:7).
Tekstoetik ta Vivlia ti chalbe skʼoplal ti oyuk stsʼikemal kuʼuntike xchiʼuk ti xij˗ichʼvan ta mukʼe
Tito 3:2: «Xtojobikuk lek snopel xchiʼuk akʼo me yakʼik ta ilel lek ti manxo chakʼ sbaik ta stojolal skotol li krixchanoetike».
Li jun krixchano ti xtojob lek snopele, muʼyuk chopol chil li yantike, akʼo mi jelel li kʼusi xchʼunojike.
Mateo 7:12: «Jech oxal, skotol li kʼusitik chakʼan akʼo spasboxuk li krixchanoetike skʼan me jech xapasbeik ek».
Jkotoltik ta jkʼantik ti xij˗ichʼat ta mukʼe, ti stsakik ta venta li kʼusi ta jnoptik xchiʼuk ti kʼu yelan chkaʼi jbatike. Sventa jnaʼtik kʼuxi xuʼ xkakʼ ta jkuxlejaltik li kʼusi laj yakʼ ta chanel li Jesuse, kʼelo li mantal «¿Kʼusi jaʼ li Mukʼul Lekil Mantale?».
Josue 24:15: «Tʼujik buchʼu chakʼan chatunik ta stojolal».
Sventa oyuk jun oʼontonale skʼan jtsaktik ta venta li kʼusi tsnop yantike.
Echos 10:34: «Mu snaʼ xtʼujvan li Diose».
Li Diose muʼyuk chopol chil li buchʼu jelel stalel xkuxlejal, slumal, mi vinik o mi ants, mi sak, mi ikʼ skoloral o ti kʼu toʼox yelan li xkuxlejale. Li buchʼutik tskʼan chchanbeik li stalelal Diose chakʼik persa ti xichʼik ta mukʼ skotol li krixchanoetike.
Abakuk 1:12, 13: ‹Mu stsʼik yuʼun [Dios] li kʼusi chopole›.
Li stsʼikemal yuʼun Diose oy noʼox spajeb, jaʼ yuʼun chkʼot yorail ti chakʼbe slajeb li buchʼutik chopol kʼusi tspasike. Mi chakʼan to chanabe mas skʼoplale, kʼelo li video ¿Kʼu yuʼun yakʼoj to oyuk vokolil li Diose?
Romanos 12:19: «Mu me xapak akʼoplalik, jaʼ akʼo yakʼ skʼakʼal yoʼonton Dios ta stojolal li kʼusi chopole, yuʼun xi tsʼibabile: ‹«Voʼon oy ta jba ta jpak; voʼon chkakʼbe stojol», xi li Jeovae›».a
Li Diose muʼyuk lek chil ti jpaktik sutele, yuʼun li stuke saʼojbe lek yorail bakʼin chchapanvan. Mi chakʼan to chanabe mas skʼoplale, kʼelo li mantal «¿Mi chkʼot van skʼakʼalil ti tukʼ xa kʼusitik chichʼ pasele?».
a Jaʼ Jeova sbi li Diose (Salmo 83:18). Kʼelo li mantal «¿Buchʼu jaʼ li Jeovae?».