Xuʼ xanop atuk ti kʼu yelan chakʼan chbat akuxlejale

Leʼ xa van ta 3,500 jabile, li Jeovae laj yalbe kʼusi xuʼ spasik sventa lekuk xbat xkuxlejalik li buchʼu ch˗ichʼat ta mukʼe: «Chkakʼ atʼuj li kuxlejal o lajelale; li bendision o li chopol kʼoptaele. Skʼan xatʼuj li kuxlejale sventa xakuxi xchiʼuk li anitilulale» (Deuteronomio 30:19).

Mi tskʼan lek chbat xkuxlejalik li krixchanoetik taje, skʼan stʼujik li kʼusi leke. Li voʼotik eke jech me skʼan jtʼujtik. Li Vivliae chal kʼusi xuʼ jpastik sventa lekuk xbat li jkuxlejaltike, xi chale: «Kʼano li Jeova Dios avuʼune, chikintabo li kʼusi chale» (Deuteronomio 30:20).

¿KʼUXI XUʼ XAKʼAN LI JEOVAE XCHIʼUK TI XACHIKINTA LI KʼUSI CHALE?

CHANO LI KʼUSI CHAL VIVLIAE. Li kʼusi baʼyel skʼan xapas sventa xakʼan li Jeovae, jaʼ ti xavojtikinbe li stalelaltake, mi la achan li Vivliae te chavakʼ venta ti chkʼanvane xchiʼuk ti tskʼan lek chbat akuxlejale. Jech xtok, tskʼan ti xakʼopone, yuʼun oyot ta yoʼonton (1 Pedro 5:7). Mi chavakʼ persa yojtikinele, li Vivliae chal ti chnopaj tal ta atojolale (Santiago 4:8).

AKʼO TA AKUXLEJAL LI KʼUSI CHACHANE. Sventa xachikinta li kʼusi chal Diose skʼan xasaʼ li pʼijil beiltaseletik yuʼun ti te ta jtatik ta Vivliae. Mi jech chapase, chavil chkʼot ta pasel ta akuxlejal li kʼusi chal Josue 1:8: «Yuʼun jech lek chbat li kʼusitik chapase xchiʼuk oy lek apʼijil ti kʼusiuk noʼox chapase».