Lekil aʼyej ta Skʼop Dios: Xuʼ sta spatobil yoʼonton li buchʼu jatavemik lokʼel ta slumalike

Jujun jabil ta smiyonal xa noʼox krixchanoetik chjatav lokʼel li ta slumalike. ¿Mi oy jech anuptanoj ek? Mi jaʼ jeche, oy buchʼu xuʼ skoltaot, jaʼ li Diose. Li stuke chalbot ti xuʼ to xakʼupin li akuxlejale. Li ta Skʼope xuʼ te xata li spatobil oʼontonal chakʼe.

«Li buchʼutik jatavemik lokʼel xchiʼuk ti nutsbil lokʼel ta slumalikea maʼuk no’ox chtun yuʼunik ti xichʼik koltaele, yuʼun chtun yuʼunik xtok ti oyuk spatobil yoʼontonike». Taje jaʼ jech laj yal Christos Stylianides, ti jaʼ to’ox jun j˗abtel ta Unión Europea.b Kʼalal oy spatobil yoʼonton li krixchanoetike, xuʼ mas jun yoʼontonik. Pe maʼuk noʼox skʼan spatobil yoʼontonik, yuʼun skʼan xichʼik koltael sventa xkuch yuʼunik li kʼusi la snuptanike.

«Kʼalal lijatav lokʼel li ta jlumale xchiʼuk kʼalal persa laj kikta li kutsʼ kalale, muʼyuk xa noʼox kʼusi xkoʼolaj˗o laj kaʼi. Lixiʼ tajek xchiʼuk solel la jvul tajek koʼonton» (Emmanuel ta Haití).

¿Mi oy jech anuptanoj ek? Mi jeche, chtun avuʼun ti oyuk bu xuʼ xata jun oʼontonal xchiʼuk spatobil avoʼontone. ¿Kʼuxi xuʼ skoltaot li Skʼop Diose?

Tspat koʼontontik li Skʼop Diose

Xi chal li Vivliae: Li Jeovaec «skʼanoj li jyanlum ti te achiʼukik ta nakleje» (Deuteronomio 10:17, 18).

Xi chal li Vivliae: «Li Jeovae nopol oy ta stojolal skotol li buchʼutik tskʼanbeik vokole» (Salmo 145:18).

Xi chal li Vivliae: «Mi jaʼuk onoʼox bu tsnop tspas kʼusi chopol li melel Diose [...] muʼyuk tsokes tukʼilal li Buchʼu skotol xuʼ yuʼune» (Job 34:10, 12).

Li kʼusi chale chakʼ ta aʼiel ti maʼuk ta smul Dios li avokole. Li stuke maʼuk yakal chakʼ avokol sventa chakʼot ta preva.

Li kʼusi yaloj chkʼot ta pasel li Skʼop Diose

Li ta Vivliae, te chal li kʼusi tspas ta jtojolaltik ta jelavel li Diose. Kʼelo avil kʼuxi staoj spatobil yoʼontonik junantik krixchanoetik ti jatavem lokʼel ta slumalike.

Xi chal li Vivliae: «Tskusbat skotol yaʼlel satik yuʼun li Diose, muʼyuk xa lajelal, muʼyuk xa at˗oʼonton, muʼyuk xa okʼel ta skoj vokolil xchiʼuk mi jaʼuk xa kʼusi kʼux chkaʼitik» (Apokalipsis 21:4).

Li kʼusi chale chakʼ ta aʼiel ti chlaj skʼoplal li jvokoltike. Li Diose yaloj ta jamal ti tslajesbe skʼoplal skotol li jvokoltik ti chakʼbutik tajek vul oʼontone.

«Li Diose yaloj ta jamal ti poʼot xa xakʼbe slajeb li kʼusi muʼyuk tukʼ chkichʼtik pasbele xchiʼuk skotol li kʼusi chopol chkʼot ta pasel ta balumile. Taje jaʼ tskoltaun sventa jaʼuk jnopbe skʼoplal ti chlaj skotol li vokolil ta jelavele» (Karla ta El Salvador).

Xi chal li Vivliae: «Muʼyuk xa chichʼ tael ta naʼel li kʼusitik kʼotemik ta pasel ta voʼnee xchiʼuk muʼyuk te chkom-o ta oʼontonal» (Isaias 65:17).

Li kʼusi chale chakʼ ta aʼiel ti muʼyuk xa chkil jvokoltik yuʼun li kʼusitik jnuptanojtik ta voʼnee. Li Diose tskoltaot sventa mu xa xavil avokol yuʼun skotol li kʼusitik chopol kʼotem ta atojolale, yuʼun tstupʼ lokʼel ta anopben.

«Li Vivliae chal ta jamal ti muʼyuk xa chopol chkaʼi jbatik yuʼun ta skoj li kʼusitik chʼay kuʼuntike. Li spatobil oʼontonal taje jaʼ tskoltaun sventa stsʼik kuʼun li kʼusi toj vokol la jnuptane, yuʼun jnaʼoj ti poʼot xa xlaj skʼoplal skotole» (Natalia ta Ucrania).

Xi chal li Vivliae: «Li Dios te oy ta vinajele tsvaʼan jun ajvalilal ti [...] jaʼ bikʼitik tslilin xchiʼuk tslajesbe skʼoplal skotol li ajvalilaletik taje» (Daniel 2:44).

Li kʼusi chale chakʼ ta aʼiel ti jaʼ xa chlik sventain balumil jun tukʼil ajvalil te ta vinajel. Li Diose chakʼ ti jaʼuk sventain talel balumil li ajvalilal yuʼun te ta vinajele ti jaʼ chchʼaybe skʼoplal li ajvaliletik liʼ ta balumile. Li ajvalil taje chichʼ talel jun oʼontonal, tukʼilal xchiʼuk lekilal ta spʼejel balumil (Mikeas 4:3, 4).

«Tspatbun tajek koʼonton kʼalal laj kaʼi ti j˗echʼel be noʼox skotol li vokoliletike: ti chlaj skʼoplal ti chkichʼtik pʼajele, ti muʼyuk kʼusi lek chkichʼtik pasbele, ti mu spat yoʼontonik ta jtojolaltike xchiʼuk ti pʼajbilutik ta skoj jtsʼunobaltike. Jutuk xa tajek skʼan slajesbe skʼoplal skotol vokoliletik li Ajvalil svaʼanoj Jeovae» (Mustafá ta Asia).

Lekil mantaletik ta Skʼop Dios

Li Vivliae xuʼ skoltaot sventa xkuch avuʼun li kʼusi laj anuptane. Li lekil mantaletik te chale xuʼ skoltaot sventa xnop xavaʼi ti kʼu xa yelan kuxulote, yuʼun xuʼ van chʼay skotol li kʼusitik oy toʼox avuʼune. Kʼelo avil kʼuxi koltabilik junantik li buchʼutik jatavem lokʼel ta slumalike.

Xi chal li Vivliae: «Kʼalal ep kʼusitik oy yuʼun li jun krixchanoe, maʼuk tsta-o xkuxlejal li kʼusitik oy yuʼune» (Lukas 12:15).

¿Kʼuxi xuʼ skoltaot taje? Xuʼ van mu to chʼunbaj chavaʼi li kʼusi kʼot ta pasele xchiʼuk chavul tajek avoʼonton ta skoj li kʼusitik laj avikta komele. Melel onoʼox ti kʼux chavaʼi li kʼusitik yakal chanuptane, pe mi la nopbe lek skʼoplale, jaʼ mas tsots skʼoplal ti kuxulot toe. Taje xuʼ van jaʼ skoltaot sventa junuk noʼox avoʼonton.

«Li jkuxlejaltike mas tsots skʼoplal, jaʼ xkom to li kʼusitik x˗ayan kuʼuntike. Bateltike, manchuk mi oy kʼusitik lek x˗ayan avuʼun o oy noʼox atakʼin muʼyuk sbalil xchiʼuk muʼyuk tspojot» (Natalia ta Ucrania).

Xi chal li Vivliae: «Mu xiuk xavale: ‹¿Kʼu yuʼun mas toʼox lek li kʼakʼaletik ta voʼne ti jaʼ xa mu jechuk li avie?›» (Eklesiastes 7:10).

¿Kʼuxi xuʼ skoltaot taje? Akʼo mi mas toʼox lek li akuxlejale, mu xakoʼoltas xchiʼuk ti kʼu yelan kuxulot avie. Taje jaʼ tskoltaot sventa mu chopoluk˗o xavaʼi aba.

«Mi laj kalbe koʼonton ti mu xa kʼusi stakʼ jpase, jaʼ tskoltaun sventa lekuk kʼusi xlik jnop» (Eli ta Ruanda).

Xi chal li Vivliae: «Mi oy noʼox jveʼeltik xchiʼuk jkʼuʼ jpokʼtike, junuk noʼox koʼontontik yuʼun» (1 Timoteo 6:8).

¿Kʼuxi xuʼ skoltaot taje? Mi jun noʼox avoʼonton xchiʼuk li kʼusitik x˗ayan avuʼune, jaʼ tskoltaot sventa mu xavul tajek avoʼonton.

«Koliyal li Vivliae muʼyuk ta jvul tajek koʼontonkutik ta skoj li kʼusitik kom kuʼunkutike. Ximuyubaj noʼox xchiʼuk kajnil ta skoj ti kuxulunkutike» (Iván ta Ucrania).

Xi chal li Vivliae: «Skotol li kʼusitik chakʼan akʼo spasboxuk li krixchanoetike skʼan me jech xapasbeik ek» (Mateo 7:12).

¿Kʼuxi xuʼ skoltaot taje? Akʼo persa yakʼel ta ilel ti oy smalael avuʼun xchiʼuk slekil avoʼontone, taje xuʼ van jaʼ tskoltaot sventa lek xavil aba xchiʼuk li yantike xchiʼuk ti mu chopoluk xavichʼ ilele.

«Jutuk mu skotoluk li krixchanoetike lek chtakʼavik kʼalal chij˗ichʼvan ta mukʼ ta jkʼopojeltik xchiʼuk kʼalal oy slekil koʼontontike. Taje jaʼ chkoltavan sventa lekuk xavil aba xchiʼuk li alakʼnatake» (Ángelo ta Sri Lanka).

Xi chal li Vivliae: «Ta sjunul avoʼontonik xakʼanik vokol [...]; vaʼun li jun oʼontonal yuʼun [Diose] chchabi avoʼontonik xchiʼuk anopbenik» (Filipenses 4:6, 7).

¿Kʼuxi xuʼ skoltaot taje? Kʼopono li Diose, albo ti kʼu yelan chavaʼi abae, li kʼusi chtun avuʼune, li kʼusi chaxiʼo yuʼune xchiʼuk li kʼusi chavul˗o avoʼontone. Taje jaʼ tskoltaot sventa mu xavul tajek avoʼonton ta skoj li kʼusi yakal chanuptane.

«Kʼalal oy kʼusi ta jnuptane, ta jkʼopon li Diose xchiʼuk kakʼoj venta ti tstakʼbune. Li kʼusitik jchanoj ta Vivliae jaʼ skoltaojun sventa mu teuk xinopnun˗o yuʼun li kʼusi ta nuptane» (Yol ta Sudán del Sur).

«Li lekil tojobtasel ta Vivliae yakʼojbun jun oʼontonal sventa stsal kuʼun li kʼusi tsots yakal ta jnuptane» (Valentina, ta Ucrania).

«Tspatbun tajek koʼonton ti yaloj Jeova ti chlekub jkuxlejaltik ta jelavele» (Emmanuel, ta Haití)

¿Mi chakʼan chachanbe to mas skʼoplal ta sventa li spatobil oʼontonal chal Vivliae, xchiʼuk kʼuchaʼal xuʼ xapat avoʼonton ti chkʼot ta pasel li kʼusi chale? Albo ti akʼo svulaʼanot junuk stestigo Jeovae. Vaʼun, ta slekil yoʼonton tskoltaoxuk, muʼyuk tskʼan stojolik.