¿Kʼusi jaʼ li Ajvalilal yuʼun Diose?
Li kʼusi chal Vivliae
Li Jeova Diose slikesoj jun ventainel ti Ajvalilal yuʼun Dios sbie. Ta skoj ti te oy ta vinajele, xi ch-albat skʼoplal yuʼun li Vivlia xtoke: «Li Ajvalilal ta vinajele» (Mateo 4:17; Markos 1:14, 15). Akʼo mi oy kʼusitik xkoʼolaj-o xchiʼuk li ajvaliletik ta balumile, stuk noʼox toj lek li Ajvalilal yuʼun Diose.
Ajvaliletik. Li Diose svaʼanoj Jesukristo sventa jaʼuk spas mantal li ta Ajvalilal yuʼune. Toj tsots yabtel laj yakʼbe ti jaʼ mu sta jech mi junuk ajvalil krixchanoe (Mateo 28:18). Li Jesuse jaʼ noʼox tstunes sjuʼel sventa tspas li kʼusi leke. Yuʼun yakʼoj ta ilel ti oy xkʼuxul yoʼonton xchiʼuk ti xuʼ jpat koʼontontik ta stojolale (Mateo 4:23; Markos 1:40, 41; 6:31-34; Lukas 7:11-17). Li Diose sbeiltasoj Jesus sventa stʼuj jayvoʼuk krixchanoetik ti jeltos slumalik yoʼ xbatik ta vinajel xchiʼuk ti jmojuk «ch-ajvalilajik ta sba spʼejel balumil» (Apokalipsis 5:9, 10).
Kʼu sjalil chventainvan. Li ajvaliletik ta balumile chjelilaj batel, pe li Ajvalilal yuʼun Diose «muʼyuk bu chichʼ chʼaybel-o [skʼoplal]» (Daniel 2:44).
Buchʼutik tsventain. Li buchʼu tspasbe yabtel Diose xuʼ xventainat yuʼun li Ajvalilal yuʼune, mu ventauk bu likem talel (Echos 10:34, 35).
Mantaletik. Li mantaletik chakʼ li Ajvalilal yuʼun Diose maʼuk noʼox chal ti mu jpastik li kʼusi chopole, yuʼun chlekub-o jtalelaltik xtok. Jech kʼuchaʼal liʼe, xi chal li Vivliae: «‹Skʼan xakʼan ta sjunul avoʼonton li Jeova Dios avuʼune, ta sjunul akuxlejal xchiʼuk ta sjunul anopben›. Liʼe jaʼ li baʼyel mantale xchiʼuk ti mas tsots skʼoplale. Li xchibale xkoʼolajtik kʼuchaʼal li baʼyele, jaʼ liʼe: ‹Skʼan me xakʼan achiʼil jech kʼuchaʼal akʼanoj aba atuke›» (Mateo 22:37-39). Skʼanojik Dios xchiʼuk xchiʼiltakik li buchʼutik chakʼ sbaik ta ventainel yuʼun li Ajvalilal yuʼun Diose, jaʼ yuʼun chakʼ ta ilel slekil yoʼontonik ta stojolal li yantike.
Chanubtasel. Maʼuk noʼox chakʼ mantaletik sventa xlekub jtalelaltik li Ajvalilal yuʼun Diose, yuʼun chchanubtasutik xtok kʼuxi xuʼ jchʼuntik (Isaias 48:17, 18).
Li kʼusi tspasike. Li buchʼutik tspasik mantal li ta Ajvalilal yuʼun Diose muʼyuk bu tspasik-o ta jkʼulej ta skoj li kʼusitik chakʼbeik spas li buchʼutik tsventainike. Moʼoj, yuʼun jaʼ tspasik li kʼusi oy ta yoʼonton Diose. Jtose jaʼ ti tskolta sbaik yoʼ staik kuxlejal sbatel osil li buchʼutik skʼanojik Diose (Isaias 35:1, 5, 6; Mateo 6:10; Apokalipsis 21:1-4).