¿Mi oy sbi li Diose?

Li kʼusi chal Vivliae

Li krixchanoetike oy sbiik, ¿mi mu van oyuk sbi li Dios eke? Tsots skʼoplal ti oyuk jbitik ta jujuntal sventa lekuk xkil jbatike. Jaʼ jech tsots skʼoplal ti jnabetikuk kʼusi sbi Dios sventa lekuk xkil jbatik xchiʼuke.

Li ta Vivliae xi chal li Diose: «Voʼon Jeovaun, taje jaʼ jbi» (Isaias 42:8). Ep ta tos kʼu yelan chichʼ albel li Diose, jech kʼuchaʼal liʼe: «Dios ti Buchʼu skotol xuʼ yuʼune», «Mukʼul Jpasmantal» xchiʼuk «Jpasvanej». Akʼo mi jech, chalbe yajtuneltak ti akʼo xkʼoponat ta sbie (Jenesis 17:1; Echos 4:24; 1 Pedro 4:19).

Ta epal Vivliaetike te xvinaj sbi Dios li ta Eksodo 6:3. Tee xi chal li Diose: «Laj kakʼilan jba ta ilel ta stojolal Abraan, Isaak xchiʼuk Jakob ti voʼon li Diosun ti Buchʼu skotol xuʼ yuʼune. Pe muʼyuk xkakʼ jba ta ojtikinel ti Jeova jbie».

Oy xa ta sjayibaluk jabile yichʼoj tunesel tal li biil Jeovae. Junantik pʼijil viniketike jaʼ lek chaʼiik ti Yavé xiike, pe jaʼ mas ojtikinbil li biil Jeovae. Li baʼyel livroetik ta Vivlia ti ojtikinbil k’ucha’al Pokoʼ Testamentoe laj yichʼ tsʼibael ta ebreo kʼop, ti ta batsʼi kʼob chlik stsʼibaike, xi chbat ta tsʼet kʼobe. Li sbi Dios ta ebreoe chanib letra yichʼoj ti jaʼ YHWH ti ojtikinbil kʼuchaʼal Tetragramaton.